Maumbangi kulikida asi Jesus kwa tamekere kukara Mupristeli goMunene konyima zapa ga gwene ekuho momvhura 29. Ngapi omu twa yi diva? Apa Jesus ga gwene ekuho, age kwa likidire asi age kwa tokomenene kugava eparu lyendi ngonzambo posizambero, esi sa fanekesa mpango zaKarunga. (Gar. 1:4; Heb. 10:5-10) Mokumona asi sizambero kuna kara sininke somulyo montembeli, eyi kulikida asi apa Jesus ga gwene ekuho, ntembeli zopampepo nazo kwa tamekere kukara po. Ntembeli zaJehova zopampepo kwa fanekesa nayinye eyi ayi tu vatere tu karere Jehova monkedi zouhunga, kupitira monzambo ezi ga geve Jesus.—Mat. 3:16, 17; Heb. 5:4-6.

Ntembeli ozo zopampepo za hepere mupristeli gomunene. Yipo nye, Jehova kwa gwavekere Jesus ‘nompepo zokupongoka’ yipo a kare Mupristeli goMunene. (Yirug. 10:37, 38; Mar. 1:9-11) Nye ngapi omu twa yi diva asi Jesus kwa mu gwavekere a kare mupristeli gomunene komeho a fe? Sihonena saArona ntani novapristeli wovanene ava va kweme ko, kutuvatera tu gwane elimbururo kepuro olyo.

Kuliza noVeta zaMosesa, mupristeli gomunene yige gelike va pulisilire kuhwilira monzugo zokupongokerera ezi za kere monkongoronzugo ntani nezi za ya kere montembeli konyima. Pokatji konzugo zokupongokerera ntani nonzugo zokupongoka, kwa tetere po ekehe. Mupristeli gomunene nga hwilire tupu monzugo zokupongokerera mezuva lyEfironkenda. (Heb. 9:1-3, 6, 7) Arona ntani novapristeli wovanene ava va mu kweme, navenye kwa va gwavekere ngovapristeli wovanene komeho va hwilire monzugo zokupongokerera. Eyi kulikida asi Jesus nage kwa mu gwavekere ngomupristeli gomunene komeho a fe nokuhwilira “monkondwa, kuninka asi rutu rwamwene” a ze meguru. (Heb. 10:20) Eyi yiyo ya ninkisire Paurusa a uyunge asi Jesus kwa “wizire ngomupristeli gomunene” ntani age “kwa hwililire motenta zonene zokusikilira mo ezi ga dira kurugana mawoko gomuntu,” ezi za kara “meguru mwene.”—Heb. 9:11, 24, NW.

Pwa kara elisigo pokatji kezuva eli Jehova ga tambwire egwanekero lyepe ntani napa lya zire pasirugana ndi? Kapi pwa kara elisigo. Morwasinke tuna kuuyungira ngoso? Apa Jesus ga rondere meguru, age kwa geve eparu lyendi lyokusikilira mo mwarwetu. Age kwa rugene yininke yimwe komeho Jehova a tambure egwanekero olyo. Yininke oyo kwa ninkisire egwanekero olyo li ze pasirugana. Yininke musinke oyo?

Sokuhova, Jesus kwa zire komeho zaJehova. Sauvali, Jesus kwa geve nzambo zendi kwaJehova ntani sautatu, Jehova kwa tambwire mulyo gohonde zaJesus ezi ga geve ngonzambo. Egwanekero lyepe kwa tamekere tupu kurugana konyima zapa ya pwire yininke oyo yitatu.

Bibeli kapi azi tu tantere siruwo apa Jehova ga tambwire mulyo gonzambo zaJesus. Yipo nye, kapi tatu vhuru kutanta ezuva apa egwanekero lyepe lya zire pasirugana. Nye ose twa yi diva asi Jesus kwa rondere meguru mazuva murongo komeho li sike ezuva lyoPentekoste. (Yirug. 1:3) Yipo nye, posiruwo oso age kwa geve nzambo zendi kwaJehova, ntani age kwa tambwire nzambo zaJesus. (Heb. 9:12) Eyi ya horokere poPentekoste kwa geve umbangi. (Yirug. 2:1-4, 32, 33) Yipo nye, egwanekero lyepe kwa zire pasirugana posiruwo oso ntani alyo kwa tamekere kurugana.

Pausupi, Jehova kwa tambwire egwanekero lyepe konyima zapa ga tambwire nzambo ezi ga geve Jesus. Kutunda opo, egwanekero olyo kwa zire pasirugana ntani Jesus ngoMupristeli goMunene kwa kere mugwanekedesi gegwanekero olyo.—Heb. 7:25; 8:1-3, 6; 9:13-15.