C.E. 29 hkʼawꞈ Baˆtiˆsaˬ haꞈ yuˬ htaˇ hpehꞈ la ve yoˬ. Ngaˬ hui hkʼaˬ hkʼe te shiˍ gʼa ve le? Yeˍsuˆ Baˆtiˆsaˬ haꞈ yuˬ htaˇ, yawˇ ve a shaꞈ ha lehˬ ve hkʼaw tawˇ pa haˉ tuˉ tanˇ kuiˬ hkʼoˆ lo tuˉ tanˇ piˇ ve tcuhˉ kuiˬ lehˬ “Gʼuiˬ sha ve a loˍ” htaꞈ gʼaꞈ te ve tehꞈ hpeuꞈ maw piˇ ve htaꞈ kʼoˆ gaˇ ve yoˬ. (Gaˍlaˍtiˆ 1:4; Heˍbrehˇ 10:5-10) Bon yehˬ lonˉ hkʼaw tuˉ tanˇ kuiˬ a yeˇ uiˍ jaˇ ve pa taw, co ha hpawˇ ve bon yehˬ lehˬ Yeˍsuˆ Baˆtiˆsaˬ haꞈ yuˬ htaˇ tanˬ cawˬ la ve yoˬ. Co ha hpawˇ ve bon yehˬ lonˉ tcuhˉ kuiˬ lehˬ Yeˍsuˆ htaiˍ hkʼawꞈ laˇ ve htaꞈ cuˇ leh ngaˬ hui cawˇ ve hkʼaw Yaˬhoˉvaˬ htaꞈ oˉ kʼoˍ pui tuˬ Yaˬhoˉvaˬ gu teh taˍ ve tehꞈ kʼoˆ gaˇ ve yoˬ.—Maꞈhtehˍ 3:16, 17; Heˍbrehˇ 5:4-6.

Co ha hpawˇ ve bon yehˬ lonˉ paw hkuˇ cawˬ tuˬ loˍ ve yoˬ. Chi htaꞈ pa taw, Yaˬhoˉvaˬ lehˬ Yeˍsuˆ htaꞈ paw hkuˇ lonˉ te tcuh tuˬ, “daꞈ ve kehˬ ve Awˬ ha hpu maˇ kʼoˆ, kanˇ paˆ maˇ kʼoˆ, yawˇ htaꞈ ngeuˍ pfuhˍ piˇ” ve yoˬ. (Tcuh yaˇ 10:37, 38; Maˍkuˆ 1:9-11) Yeˍsuˆ maˇ suh sheˍ htaˇ leh maˇ teꞈ tu la sheˍ htaˇ kaꞈ paw hkuˇ lonˉ te tuˬ leuˆ teh taˍ ve tehꞈ ngaˬ hui hkʼaˬ hkʼe te shiˍ gʼa ve le? Aˍronˍ leh Aˍronˍ hkʼawꞈ nawˉ ve paw hkuˇ lonˉ teˇ hpaˍ ve awˬ lawn ngaˬ hui na gʼa tuˬ ga laˇ ve yoˬ.

Yaˬhoˉvaˬ Moˉseˍ htaꞈ piˇ taˍ ve awˬ liˇ tawˇ hkawˇ hkʼaw kʼoˆ ve, paw hkuˇ lonˉ ceh tiˉ aˉ po kʼo bon yehˬ hkʼaw leh bon yehˬ lonˉ hkʼaw daꞈ kehˬ jaˇ ve chehˇ kuiˬ hkʼaw loꞈ˗e gʼa ve yoˬ. Daꞈ kehˬ jaˇ ve chehˇ kuiˬ leh daꞈ kehˬ ve chehˇ kuiˬ awˬ kaˍ lo hpaˬ kaˍ kaˍ taˍ ve yoˬ. Venˇ baˆ hpehˇ ve awˬ nyi ceh tiˉ paw hkuˇ lonˉ hpaˬ kaˍ oˇ ve awˬ hkʼaw hpawˇ lo loꞈ˗e hpehꞈ ve yoˬ. (Heˍbrehˇ 9:1-3, 6, 7) Aˍronˍ leh Aˍronˍ hkʼawꞈ nawˉ ve paw hkuˇ lonˉ teˇ hpaˍ daꞈ kehˬ jaˇ ve chehˇ kuiˬ leh daꞈ kehˬ ve chehˇ kuiˬ hkʼaw maˇ gʼa loꞈ˗e sheˍ htaˇ, yawˇ hui htaꞈ paw hkuˇ lonˉ te tuˬ gʼa leuˆ yuˬ sheˍ ve yoˬ. Chi ve hkʼa shuˍ shuˍ Yeˍsuˆ maˇ suh sheˍ htaˇ leh “hpaˬ kaˍ htaꞈ yehˬ baˬ taˍ leh” mvuhˇ naw ma hkʼoˆ lo maˇ taˆ˗e sheˍ htaˇ paw hkuˇ lonˉ te tuˬ awˉ lawˉ leuˆ yuˬ sheˍ ve yoˬ. “Hpaˬ kaˍ oˇ ve lehˬ, Yeˍsuˆ ve awˬ to htaꞈ kʼoˆ ve yoˬ.” (Heˍbrehˇ 10:20) Chi htaꞈ pa taw, tcuh yaˇ Pawˇluꞈ, Yeˍsuˆ “paw hkuˇ lonˉ te” leh laˬ htaˇ, ‘uiˍ jaˇ biˇ jaˇ ve laꞈ sheh te taˍ ve maˇ heˆ ve aˉ po kʼo bon yehˬ teˇ yehˬ awˬ hkʼaw lo yawˇ hpanˍ kʼai’ leh “mvuhˇ naw ma hkʼoˆ lo” kʼai ve yoˬ.—Heˍbrehˇ 9:11, 24.

Ka tiꞈ shaˉ caˆ awˬ suhˉ te ve leh ka tiꞈ shaˉ caˆ awˬ suhˉ tanˬ yehˇ ve awˬ yanˇ maˇ peun daꞈ. Aˬ htoꞈ ma pa taw le? Yeˍsuˆ mvuhˇ naw ma hkʼoˆ taˆ˗e leh yawˇ ve a shaꞈ biˇ jaˇ ve ngaˬ hui awˬ pon tanˇ laˇ htaˇ, ka tiꞈ shaˉ caˆ awˬ suhˉ cawˬ la tuˬ Yeˍsuˆ a yeˇ uiˍ ve 3 hkʼaˇ hkʼaw ve awˉ lawˉ teˇ hkʼaˇ te ve yoˬ. Awˬ hkʼaˇ chi ve teˇ hpaˍ ka tiꞈ shaˉ caˆ awˬ suhˉ tanˬ yehˇ tuˬ kaꞈ te piˇ ve yoˬ. Awˬ hkʼaˇ chi ve teˇ hpaˍ aˬ htoꞈ ma le?

Awˉ lawˉ teˇ hkʼaˇ lehˬ Yeˍsuˆ Yaˬhoˉvaˬ ve mehˆ gʼuˇ suhˍ lo laˬ ve yoˬ. Nyiˇ hkʼaˇ lehˬ Yeˍsuˆ htaiˍ hkʼawꞈ ve awˬ hpfuhˇ Yaˬhoˉvaˬ htaꞈ shaiˍ piˇ ve yoˬ. Shehˆ hkʼaˇ lehˬ Yeˍsuˆ ve awˬ suhˍ tuˉ tanˇ piˇ ve htaꞈ Yaˬhoˉvaˬ haꞈ yuˬ ve yoˬ. Chi aꞈ kehˉ a yeˇ uiˍ ve lehˬ ka tiꞈ shaˉ caˆ awˬ suhˉ cawˬ la tuˬ te laˇ ve yoˬ.

Yeˍsuˆ htaiˍ hkʼawꞈ ve awˬ hpfuhˇ htaꞈ Yaˬhoˉvaˬ haꞈ yuˬ ve awˬ yanˇ hkʼa tawˍ lehˆ maˇ gʼa kʼoˆ laˇ taˍ. Chi htaꞈ pa taw, ka tiꞈ shaˉ caˆ awˬ suhˉ cawˬ la leh tanˬ yehˇ ve awˬ yanˇ ngaˬ hui hkʼa dehꞈ kʼoˆ piˇ maˇ gʼa. Yaꞈ hkʼaˇ, Peˍteˍkoˆteˍ awˬ nyi maˇ gaˬ sheˍ ve 10 nyi htaˇ, Yeˍsuˆ mvuhˇ naw ma hkʼoˆ taˆ˗e ve tehꞈ ngaˬ hui shiˍ ve yoˬ. (Tcuh yaˇ 1:3) Awˬ yanˇ chi ve awˬ hkʼaw lo Yeˍsuˆ htaiˍ hkʼawꞈ ve awˬ hpfuhˇ Yaˬhoˉvaˬ htaꞈ shaiˍ piˇ leh yawˇ haꞈ yuˬ ve yoˬ. (Heˍbrehˇ 9:12) Ka tiꞈ shaˉ caˆ awˬ suhˉ tanˬ yehˇ˗oˬ ve tehꞈ Peˍteˍkoˆteˍ awˬ nyi htaˇ shaˉ hkiˆ hkʼa tawˍ lehˆ gʼa mawˬ ve yoˬ. (Tcuh yaˇ 2:1-4, 32, 33) Oˇ ve teˇ yanˇ ka tiꞈ shaˉ caˆ awˬ suhˉ cawˬ˗oˬ ve yoˬ.

Kʼawꞈ kʼoˆ maˍ ve lehˬ, Yaˬhoˉvaˬ Yeˍsuˆ htaiˍ hkʼawꞈ ve awˬ hpfuhˇ htaꞈ haꞈ yuˬ leh leuˆ yuˬ taˍ ve chaw kaꞈ ka tiꞈ shaˉ caˆ awˬ suhˉ chi ve hkʼaw chehˇ la tcuh peuˬ hkʼawꞈ nawˉ, ka tiꞈ shaˉ caˆ awˬ suhˉ cawˬ la leh tanˬ yehˇ ve yoˬ. Paw hkuˇ lonˉ Yeˍsuˆ lehˬ ka tiꞈ shaˉ caˆ oˇ ve awˬ kaˍ te shehˍ hpaˇ hpehꞈ ve yoˬ.—Heˍbrehˇ 7:25; 8:1-3, 6; 9:13-15.