Vyoireya vinooni-a ira Yesu akanle mulimbo velela kuto angabadiziwile, yawa ya 29 C.E. N’nga ninoidhiwa a-vi vyevyo? Vanduli vobadiziwa, Yesu atooni-a ira liye ndi kuto wavaiguwani ya “ifunelo” ya Nlungu. Vyevi vinofuna vithapulele ira angabadiziwile, Yesu atooni-a ira ali okozeya irana ifunelo ya Babee, novelela ingumi yee ninga yoombolana. (Agal. 1:4; Aeb. 10: 5-10) Yei chiizindielo yaoneile va ubadizo wa Yesu. Ndulimu, iguwa yali ikundu yofuneeleya vinjinji vakachisini. Ngumwasiwa, ninooda onga ira ali kachisi nlukulu waunemba thitho watooneela vanduli va ubadizo wa Yesu vasogolo viwa. Kachisula pivyothene vyevile Yohova vyakwakwaneli-edhe liye dhela mwa kuto wa Yesu ira atu tamlambelanga liye mochena.​—Mat. 3:16, 17; Aeb. 5:4-6.

Ee-no ninga ndulimu, kachisi wafuneeleya mulimbo velela kuto, kachisi nlukulu waunemba thitho oofuneeleya mutu mmbo-i. Ira akwakwaneli-dhe vyevi, Yesu o-osakuliwa na Yohova “na nemba ochena nanguru.” (Mayir. 10:37, 38; Marku 1:9-11) N’nga ninakaena iroromelo iivi yoi Yesu o-osakuliwa ninga mulimbo velela kuto angabadiziwile, a-anakwe thitho a-anavenyathi-iwe? Ifwanafwani-o ya Aroni thitho naalimbo velela kuto adhidhe ndulimwee inooda nikami-a wakula yofuka yei.

Lamulo lava-iwile Mose laonga ira mulimbo velela kuto unooda volowa valimburo lochena lavaiguwani vanduli viwa, limburo lochena la kachisi. Limburo lochena lali logaweya motithediwa na nguwo yochena. Mulimbo velela kuto avira vanguo yochenio vadambo locheni-iwa. (Aeb. 9:1-3, 6, 7) Aroni naalombwana enango oromeleya tasakuliwile ninga alimbo velela kuto tanovira “vanguo yochena” thitho tanovolowa valimburo lochena. Mofwanafwana na Yesu a-anakwe, oofwanela sakuliwa ninga mulimbo velela kuto ira avire “vanguo yochena yenio inothapulela manungwee, “ thitho liye dhowa dhulu. Manungo Yesu aututu tali ninga yotitedha venango nguwile. Ira awachele ingumi dhulu, Yesu afwanela ira arome kala mulimbo velela kuto. (Aeb. 10:20) Vamwasa wen’na, rumiwi Paulo aongile ee-ni vyoonga Yesu “ninga mulimbo velela kuto, liye atokala sasani nlukulu thitho angali ochena a-kala namwasa waatu odawa,” venango “dhulu wene.”​—Aeb. 9:11, 24.

Kavali i-yana uliwethene ivwelano ipya vyaromile aliwa laba thitho vyairomi-idhe atu. Mwasiwa ngwan’ni? Yesu angadhowile dhulu atovelela wa Nlungu pereso yaigumiyee yaumutu yochena thitho yoninganyali-a, liye atovelela ndhila yoroma mwandhila taaru dhogomedha venango varomile ivwelano ipya. Ndhila taaru dhedhi paromile aliwa ivwelano ipya Venango ‘tatoiromi-a mwanguru.’ N’nga ndhila dhedhi tivi?

Ndhila yoroma, Yesu atoneela vamethoni va Yohova. Yanambili, Yesu atovelela pereso ya kutwee wa Yohova. Yaneraru, Yohova atorumela pereso ya sangiri yochuchi-iwa na Yesu. Ndhila taaru dhedhi dha-anarome veleliwa, ivyelano ipya ya-anarome laba.

Bibilya kalinoonga movweya pama mwemo Yohova mwarumenle liye pereso ya kuto wa Yesu. Moi ee-no kaninaonge movweya pama malambo aivwelano ipya varomile aliwa kalavo movolowa mwanguru. Mbwenye imbarimbari iidhi i-yo choi Yesu atowelela dhulu, va malambo kumi petekoste wa-anafiye. (Mayir. 1:3) Hora dhinango, va hora yoyevila Yesu atooni-a pereso yodhivelela wee, thitho Yohova atoirumela. (Aeb. 9:12) Ninooda roromela va vyongo vyo-ooneya ninga vyevi vyaireile va yawa ya petekoste. (Mayir. 2:1-4, 32, 33) Mo-okaikela, ivwelano ipya yatovolowa mwanguru.

Mongwandela, ivwelano ipya yatokalavo thitho yatoroma i-ndi-edhiwa basa, vanduli vee Yohova varumenle liye pereso ya sangiri yochuchi-iwa na Yesu. Ivwelano ipya yatoroma mwanguru ee-no mulimbo velela kuto Yesu ninga namakala vari.​—Aeb. 7:25; 8:1-3, 6; 9:13-15.