Bukamoni bulombola’mba, Yesu wāikele Kitobo Mukatampe kitatyi kyaābatyijibwe mu 29 Yesu Ke Mwiye. Le i bukamoni’ka? Yesu pa kubatyijibwa wēlambwile bu kitapwa pa kisōkelo kyelekeja “kiswa-mutyima” kya Leza. (Ngt. 1:4; Bah. 10:5-10) Kino kisōkelo kya kyelekejo byokyāikele’ko tamba kubatyijibwa kwa Yesu ne kwenda kumeso, nanshi tempelo mikatampe ya ku mushipiditu, mine yelekeja mpangiko ya mutōtelo utōka wa Yehova idi’ko pa mwanda wa kinkūlwa, nayo yāikele’ko enka mu kino kitatyi. Kisōkelo i kintu kya kamweno mu ino tempelo ya ku mushipiditu.​—Mat. 3:16, 17; Bah. 5:4-6.

Byāikele’ko tempelo mikatampe ya ku mushipiditu, kwadi kusakilwa kitobo mukatampe wa kwingila’mo. Pa kusaka ekale’ko, Yesu wāshingilwe māni “na mushipiditu ujila ne bukomo.” (Bil. 10:37, 38; Mako 1:9-11) Ino i muswelo’ka otubwanya kukulupila’mba Yesu wātongelwe bu Kitobo Mukatampe kumeso kwa kufwa ne kusangulwa? Tutana bubinga bwendele’mo potubandaula kimfwa kya Alone ne bampingakani bandi bāingile bu babitobo bakatampe mu Bijila bya Mosesa.

Monka mwādi munenena Bijila, enka kitobo mukatampe kete ye wādi ubwanya kutwela mu Kijila Nakampata kya kipema, kupwa ke mu Kijila Nakampata kya tempelo. Mpashila yo yādi ikalañanya Kijila Nakampata na Kijila. Kitobo mukatampe wādi upita pa ino mpashila enka mu Difuku dya Kupūta Bubi. (Bah. 9:1-3, 6, 7) Pamo bwa Alone ne bampingakani bandi bāshingilwe māni bu babitobo bakatampe kumeso kwa kutwelela “ponka pa mpashila” ya kipema, Yesu nandi wāshingilwe māni bu Kitobo Mukatampe wa tempelo mikatampe ya ku mushipiditu ya Yehova kumeso kwa kufwa, kupwa wāpityila “ponka pa mpashila, ke ngitu yandi kadi” wāenda mūlu. (Bah. 10:20) Pa kino, mutumibwa Polo wānenene amba Yesu ukāya “bu kitobo mukatampe” ne kutwela “mu pema mukatampe kadi mubwaninine mpata wampikwa kulongwa ku makasa,” ne kutwela “mūlu mwine.”​—Bah. 9:11, 24.

Kekudipo kwishila pa bukata bwa kitatyi kyāsambilwe kipwano kipya ne kitatyi kyokyāshilwile kwingila. Mwanda waka? Kitatyi kyākandile Yesu mūlu ne kulambula būmi bwandi bubwaninine pa mwanda wetu, wālongele bintu pa kusamba kipwano kipya. Enka bino bintu byo byālengeje kipwano kishilule kwingila. Le i bintu’ka byādi bifwaninwe kulongwa?

Kibajinji, Yesu wāmwekele kumeso a Yehova; kupwa wālambula mvubu ya kitapwa kyandi kudi Yehova; ebiya ku mfulo Yehova nandi wāitabija mvubu ya mashi āmwangile Yesu. Shi bino bintu kebyālongelwepo longa kipwano kipya kekyāingilepo.

Bible ketulombwelepo kitatyi kine kyāitabije Yehova mvubu ya kitapwa kya Yesu. Netu ketuyukilepo kitatyi kinekine kyāsambilwe kipwano kipya ne kyokyāshilwile kwingila. Inoko, kyotuyukile i kino amba, Yesu wākandile mūlu mafuku dikumi kumeso kwa Pentekosa. (Bil. 1:3) Kyaba kimo enka mu kino kitatyi kityetye, wālambwile mvubu ya kitapwa kyandi kudi Yehova, nandi wēkitabija. (Bah. 9:12) Bukamoni bulombola’mba kipwano kipya kibashilula kwingila bwāmwekele patōkelela pa Pentekosa. (Bil. 2:1-4, 32, 33) Kipwano kipya kyāikala’ko ne kushilula kwingila.

Mu kīpi, kipwano kipya kyāsambilwe ne kushilula kwingila pāpwile Yehova kwitabija mvubu ya mashi āmwangile Yesu ne kutweja bashingwe māni mu kino kipwano. Penepa kipwano kyāshilula kwingila na Kitobo Mukatampe, Yesu, wingila bu Nsenga wakyo.​—Bah. 7:25; 8:1-3, 6; 9:13-15.