Unjiho wasolola nge Yesu vamulingishile kupwa Kapilishitu Wakulitulaho omu vamumbapachishile mu 29 C.E. Twatachikiza ngachilihi? Omu Yesu vamumbapachishile, alihanyine ivene kupwa wana halijiko lyakulumbila lyachifwanyisa lize lyemanyinyineko “mwaya muchima” waKalunga. (Ngale. 1:4; Hepe. 10:5-10) Hakuwana nge lijiko kaneli lyachifwanyisa linapungako kufuma vene halwola vambapachishile Yesu, ngocho natembele yayinene yakushipilitu yaputukile halwola lwolumwe. Tembele kana yemanyinako vyuma alongesa Yehova kutalisa kukulemesa chamuchano vize vyazama handando yakusokola. Eli lijiko lyakulumbila lyapwa lyalilemu chikuma mutembele yakushipilitu.—Mateu 3:16, 17; Hepe. 5:4-6.

Kwapwile nakusakiwa kapilishitu wakulitulaho wakuzachila mutembele yayinene yakushipilitu. Ngocho Yehova awavishile Yesu “nashipilitu yajila nangolo” mangana apwenga kapilishitu wakulitulaho. (Vili. 10:37, 38; Mako 1:9-11) Uno twatachikiza ngachilihi ngwetu Yesu vamutongwele kupwa Kapilishitu Wakulitulaho shimbu kanda afwenga nakusanguka? Chakutalilaho chaAlone navapilishitu vakulitulaho vaze vamuswanyine chikiko nachitukafwa kukumbulula chihula kana.

Jishimbi jize Yehova ahanyine Mose jambile ngwajo kapilishitu wakulitulaho kaha ikiye vetavishile kwingila Muze Mwajila Chikuma mutavanaku, kaha nawa mukuhita chamyaka, ikiye kaha vetavishile kwingila Muze Mwajila Chikuma mutembele. Kwapwilenga lihina lyakuvatasana lize lyahandunwine Muze Mwajila naMuze Mwajila Chikuma. HaLikumbi lyaKulinga chaKufwika haShili hakiko kaha kapilishitu wakulitulaho engililenga Muze Mwajila chikuma. (Hepe. 9:1-3, 6, 7) Alone navaze vamuswanyine vavawavishilenga kupwa vapilishitu vakulitulaho shimbu kanda vengile nakuhita “mulihina [livene] lyakuvatasana” lyamutavanaku. Ngocho naYesu vamuwavishile kupwa Kapilishitu Wakulitulaho wakuzachila mutembele yaYehova yayinene yakushipilitu shimbu kanda afwenga, kaha “[ahichile] mulihina lyakuvatasana, likiko mujimba wenyi” nakuya mwilu. (Hepe. 10:20) Shikaho, kaposetolo Paulu ambile ngwenyi Yesu vamulingishile “kupwa kapilishitu wakulitulaho,” kaha apulasanyine “mumbalaka yayilemu yakukupuka chikuma yize kavatunga namavokoko,” nakwingila “mwilu muvene.”—Hepe. 9:11, 24.

Kahatwama chihandwa halwola luze Kalunga etavilile lushiko lwaluhya nalwola lwaputukile kuzata lushiko kanako. Mwomwo ika? Omu Yesu ayile mwilu nakukahana kuyoya chenyi chakukupuka kupwa wana hali etu, alingishile Yehova etavile lushiko lwaluhya. Kaha chuma kana chalingishile nawa lushiko kana luputuke kuzata. Jino vyuma muka vyaliwezelemo?

Chatete, Yesu ayile nakusoloka kumeso aYehova mwilu. Chamuchivali, ahanyine wana wakuyoya chenyi chakukupuka kuli Yehova. Kaha chamakumishilo, Yehova etavilile wana kana. Omu vyalingiwile vyuma kanevi vitatu hakiko lushiko lwaluhya lwaputukile kuzata.

Mbimbiliya kayatulweza lwola Yehova etavilile wana waYesuko. Chochimwe nawa, katwatachikiza lwola luze Yehova etavilile lushiko lwaluhya nalwola luze lwaputukile kuzatako. Chipwe ngocho, twatachikiza ngwetu Yesu ayile mwilu omu kwasalile makumbi 10 shimbu kanda Pendekoseta. (Vili. 1:3) Kafwe hatando kana hakiko ahanyine wana wakuyoya chenyi kuli Yehova, kaha Yehova etavilile wana kana. (Hepe. 9:12) Unjiho wakusolola nge Yehova etavilile wana kana wasolokele hatoma haPendekoseta. (Vili. 2:1-4, 32, 33) Shikaho, Kalunga etavilile lushiko lwaluhya, kaha lwaputukile kuzata.

Shikaho natukukulula ngwetu, omu Yehova etavilile wana wakuyoya chaYesu, hakiko etavilile lushiko lwaluhya, kaha nawa hakiko lwaputukile kuzata lushiko kana. Elu lushiko lwaputukile kuzata omu Yesu uze apwa Kapilishitu Wakulitulaho aputukile kuzata mwaMuka-kuwanyisa lushiko kana.—Hepe. 7:25; 8:1-3, 6; 9:13-15.