C.E. 29-a baptisma a chan khân, Isua chu Puithiam Lalber a ni tih finfiahnain a târ lang a ni. Eng finfiahna nge awm? Baptisma a chan khân, Isua chu Pathian “duh zâwng” maichâm chungah inthawina atân a inhlân a. (Gal. 1:4; Heb. 10:5-10) Chu entîr nei maichâm chu Isua baptisma chan aṭanga a awm ṭan tawh avângin, thlarau lam biak in ropui—tlanna zâra Jehova biakna thianghlim atâna ruahmanna—pawh chumi hun aṭang chuan a awm ngei tûr a ni. Maichâm chu thlarau lam biak in pêng pawimawh tak pakhat a ni.—Mt. 3:16, 17; Heb. 5:4-6.

Thlarau lam biak in ropui tak din a nih tawh chuan, chuta hna thawktu tûr puithiam lalber pawh a awm a ngai a. Chutiang ni tûrin, Isua chu “thlarau thianghlim leh thiltihtheihnaa” hriak thih a ni. (Tirh. 10:37, 38; Mk. 1:9-11) A nih leh, Isua chu a thih a, a thawhleh hmain Puithiam Lalber atâna ruat a ni tih engtin nge kan chian theih? Mosia Dân hnuaia puithiam lalber nia rawngbâwltu Arona leh a aiawhtute entîrna kan ngaihtuah hian a chhan ṭha tak kan hmu a ni.

Dânin a phût angin, puithiam lalber chauh chu biak bûka Hmun Thinghlim Ber, a hnua biak in Hmun Thinghlim Berah chuan a lût thei a. Chu Hmun Thinghlim Ber chu puanzâr hmanga daidan a ni a. Puithiam lalber chuan Inremna Nîah chauh chu puanzâr chu a kal tlang a. (Heb. 9:1-3, 6, 7) Arona leh a aiawhtute chu biak bûk ‘puanzâr [tak tak] an kal tlang’ hmaa puithiam lalte nia ruat an ni ang bawkin, Isua chu a thih hmain Jehova thlarau lam biak ina Puithiam Lalber nia ruat a ni ngei tûr a ni a, a hnuah vân nunna chang tûrin ‘puanzâr chu (chu chu a taksa tihna a ni) a kal tlang’ a ni. (Heb. 10:19, 20) Chumi avâng chuan, tirhkoh Paula’n Isua chu “Puithiam Lalbera” lo kalin, “biak bûk, kuta sak loh, ropui leh famkim zâwk” kal tlangin, “vânah ngei” a lût tih a sawi a ni.—Heb. 9:11, 24.

Eng hunah nge thuthlung thar chu tihngheh a nih? Isua vâna a lâwn chhoh va, kan tâna a hring nun ṭha famkim hlutna a han hlân khân, thuthlung thar chu dân anga tingheh a nih theih nân hma a la ṭan a ni. Chu a hma lâknaah chuan engte nge tel?

A hmasa berin, Isua chu Jehova hmaah a inlan a; chumi hnuah, a inthawina hlutna chu Jehova hnênah a hlân a; a tâwpah, Jehova chuan Isua thisen chhuak hlutna chu a lo pawm a ni. Chûngte tih a nih hma chuan thuthlung thar chu a la nung lo.

Bible chuan Jehova’n Isua inthawina hlutna a pawm hun chiah chu min hrilh lo va. Chuvângin, thuthlung thar tihngheh a nih hun leh hman ṭan a nih hun chiah chu sawi fak theih a ni lo. Mahse, Isua chu Pentikost nî thlen hma ni sâwmah vânah a lâwn tih erawh kan hria a. (Tirh. 1:⁠3) Chu hun rei lo te chhûnga hun engemawah, ani chuan a inthawina hlutna chu a pawmtu Jehova hnênah a hlân a ni. (Heb. 9:​12) Pentikost nî khân, thuthlung thar chu tihnun a ni tih hmuh theihin a lang a. (Tirh. 2:​1-4, 32, 33) Chumi hun aṭang chuan thuthlung thar chu a nihna ang taka hman ṭan a ni tih a chiang a ni.

Khaikhâwm nân, thuthlung thar chu Jehova’n Isua thisen chhuak hlutna a pawm hnuah leh chu thuthlunga hriak thihte a hruai luh hnuah tihngheh a ni a. Chumi hun aṭang chuan thuthlung thar chu a nung ṭan a, Puithiam Lalber Isua chuan thuthlung Palai niin rawng a bâwl ṭan a ni.—⁠Heb. 7:​25; 8:​1-3, 6; 9:​13-​15.