Bukaleho bumwesa ngwabwo Yesu wapwile Kapilistu Wakama mu mwaka wa 29 C.E. mubamumbwitikile. Bika twendekela ngoco? Yesu mubamumbwitikile, wamwesele ngwendi washakele kulyana kupwa ñombelo ha mutula wa cifwisa uje wimanena “cizango” ca Njambi. (Ngala 1:4; Heve 10:5-10) Mutula wapwa mutamba wa seho wa tembele. Ngeci, casholoka ngwe tembele ya ku sipilitu yashangumukile kukalako ha simbu ibambwitikile Yesu. Tembele ya ku sipilitu yakama ya Yehova imanena byuma byoshe bije bitulingisa twase kulemesa Njambi mu ngila inapande kwitila mu ñombelo ya Yesu.—Mateo 3:16, 17; Heve 5:4-6.

Omwo kwakele tembele yakama ya ku sipilitu, kwatondekele kapilistu wakama. Ngeci, Yehova wabwabesele Yesu na ‘sipilitu ya kujela na nzili.’ (Vili 10:37, 38; Mako 1:9-11) Tuzibuka bati ngwetu Njambi wangwile Yesu kupwa Kapilistu Wakama simbu kanda atse na kusanguka? Byuma byalingiwile kuli Alone na tupilistu bakwabo bakama baje bamwingile, bitukwasa tuwane cikumbululo.

Lishiko lyamwesele ngwalyo kapilistu wakama ikeye lika wapandele kukobela ku Mwela wa Kujela Manene wa Tenti ya kukungulukila, uje wakupwile Mwela wa Kujela Manene wa tembele. Kwakele nanga ije yangunwine Mwela wa Kujela na Mwela wa Kujela Manene. Kapilistu wakama wakele na kuya lika kusambwa ya nanga ha Litangwa lya Kufwika Bubi. (Heve 9:1-3, 6, 7) Alone na baje bamwingile bababwabesele na kupwa tupilistu bakama simbu kanda baye ku sambwa ya nanga mpundu ije yakele mu Tenti ya kukungulukila. Mu ngila imolika, Yesu nendi bamubwabesele na kupwa Kapilistu Wakama wa tembele ya ku sipilitu yakama ya Yehova simbu kanda atse. Kutundaho, waile ku sambwa ya nanga nambe ngwetu watsile, co waile mwilu. (Heve 10:20) Mukemwo kapositolo Paulu wendekele ngwendi Yesu wapwile kapilistu wakama, co wetile mu ‘tenti yakama manene ya kujela, ije kubatungile kuli banu,’ co“waile mwilu.”—Heve 9:11, 24.

Cikumiiyo caciha cashangumukile kupanga mwaka uka? Cashangumukile kupanga Yesu mwaile mwilu na kukana ñombelo mwafwa yetu. Co walingile cuma ca kulibanga ku byuma bitatu bije byalingisile cikumiiyo caciha cishangumuke kupanga. Byuma muka bene obyo?

Ca kulibanga Yesu washolokele kuli Yehova. Ca mu cibali, Yesu wanene ñombelo kuli Yehova. Ca mu citatu, Yehova watambwile ñombelo ya maninga a Yesu. Ngeci, cikumiiyo caciha cashangumukile kupanga munima yebi byuma bitatu.

Mbimbiliya kuyatulekele litangwa lyatambwile Yehova ñombelo ya Yesu. Ngeci kutwasa kuzibuka litangwa licashangumukile kupanga cikumiiyo caciha. Oloni tuzibuka ngwetu Yesu waile mwilu matangwa 10 simbu kanda litangwa lya Pentekosita lyete. (Vili 1:3) Munima ya matangwa amandondo lika simbu kanda litangwa lya Pentekosita lyete, Yesu wanene ñombelo yendi, co Yehova waitambwile. (Heve 9:12) Byuma byalingiwile ha Pentekosita bikebyo bimwesa ngwabyo Njambi watambwile ñombelo ya Yesu. (Vili 2:1-4, 32, 33) Co cikumiiyo caciha cashangumukile kupanga.

Ngeci, cikumiiyo caciha cashangumukile kupanga omwo Yehova watambwile ñombelo ya Yesu. Co Yesu ikeye napu kapilistu wakama na muka-kwimanena eci cikumiiyo.—Heve 7:25; 8:1-3, 6; 9:13-15.