Jesus ja tyëjkë Saserdotë Wintsën mä jëmëjt 29 ko nyëbejty. ¿Wiˈix nnijäˈäwëm? Ko nyëbejty, ta nyaygyëyäjkë parë ttunäˈäny ti Dios tsyojkypy. Tyäˈädë yëˈë yˈandijpy ko kyëyakaambyë nety ja jyukyˈäjtën parë xyjyuuybyëtsëmäˈänëm (Gal. 1:4; Eb. 10:5-10). Ko ojts ttuunë Tyeetyë tsyojkën, duˈun nyajxy extëm ja altaar, ets ko tkëyajkyë jyukyˈäjtën, duˈunxyëp extëm dyajky ja wintsëˈkën mä ja altaar. Tyäˈädë altaar ja nyaxkëdaky ko Jesus nyëbejty. ¿Ets ti duˈun näjxp extëm ja templë? Yëˈë extëmë Dios të ttukniwitsë yˈawdatëdët ja naxwinyëdë jäˈäy ets myëwingonëdët mët yëˈëgyëjxm ko Jesus ojts xyjyuuybyëtsëˈëmëm. Ja templë, yëˈë mëj yaˈijtë ja altaar, nanduˈun ko yajtuny ti Dios tsyojkypy, yëˈë mëj yaˈijtëp extëmë Dios të ttukniwitsë yaˈˈawdatët (Mat. 3:16, 17; Heb. 5:4-6, TNM).

Extëmë Dios të ttukniwitsë yˈawdatëdët ja naxwinyëdë jäˈäy ets myëwingonëdët mët yëˈëgyëjxm ko Jesus ojts xyjyuuybyëtsëˈëmëm, yëˈë duˈun näjxp extëm ko nyaxkëdaky ja templë. Per mä tyäˈädë templë tsojkëbë nety tyunët tuˈugë Saserdotë Wintsën, etsë Jesus yëˈë diˈib duˈun yajwinˈijx mët “ja espiritë santë” (Apos. 10:37, 38; Mar. 1:9-11). Per ¿wiˈixë net nnijäˈäwëm ko Jesus ja yajtuunkmooy Saserdotë Wintsën mä nety kyaˈookynyëm ets mä kyajukypyëkynyëm? Parë nnijäˈäwëm min nˈokˈijxëmë yˈijxpajtënë Aarón mët pënaty ok tuundë saserdotë wintsën.

Ja Ley diˈibë Moisés yajmooy, duˈunë nety jyënaˈany ko ja saserdotë wintsën yëˈëyë mbäät tyëkëdë mä ja lugäärë Mëk Wäˈätspë diˈib yajpatp mä ja tabernakulo, ets ok, mä ja templë. Ja lugäärë Wäˈätspë, yëˈë nety yajnaywyäˈkxëp tuˈugë kortinë mët ja lugäärë Mëk Wäˈätspë, ets ja saserdotë wintsën ja nety mbäät jeˈeyë ttukˈyoˈoynyaxy ja Xëëw mä Yajpokymyaˈkxtë ja israelitëty (Heb. 9:1-3, 6, 7, TNM). Aarón mët pënaty ok tuundë saserdotë wintsën ja duˈun yajtuunkmooytyë mä kyajnëm ttukˈyoˈoynyaxtë ja kortinë diˈib yajpatp mä ja tabernakulo. Jesus nan ja yajwinˈijxy mä nety kyaˈookynyëm parë tyunët Saserdotë Wintsën mä ja templë diˈibë Jyobaa jyaˈäjtypy, jaˈa njënäˈänëm extëmë Dios të ttukniwitsë yˈawdatëdët ja naxwinyëdë jäˈäy, ets ok, ta net ttukˈyoˈoynyajxy ja kortinë, o ja “nyiniˈkx kyëbäjk” parë jyukyˈatäˈäny tsäjpotm (Heb. 10:20, TNM). Päätyë apostëlë Pablo jyënany ko Jesus “myiiny extëmë saserdotë wintsën”, ets ok, “ta ttukˈyoˈoynyajxy ja wittëjkë mas jëjpˈambë etsë mas wäˈätspë, diˈib kyaj të yˈoyë mëdë naxwinyëdë jäˈäyë yˈääw kyëˈë”, ets ok, ta pyatëjkë “tsäjpotm” (Heb. 9:11, 24, TNM).

Ko Jesus pyatëjkë tsäjpotm, ta ttukëdëjkë Tyeety ja jyukyˈäjtënë wäˈätspë diˈibë nety të dyaky extëmë wintsëˈkën parë naxwinyëdë jäˈäy. Min nˈokˈijxëm ti tyuun tëgëk pëky parë tsyowdëjkë ja wintsëˈkën.

Tim jawyiin, Jesus wyinguwäˈkë ja Tyeety. Ta net ttukkëdëjkë ja wintsëˈkën diˈibë nety të dyaky. Ets ok, ta Jyobaa ojts tˈaxäjë tyäˈädë wintsën mä Jesus tteemy dyojky ja nyëë nyeˈpyny. Ko tyäˈädë duˈun ttuundääy, ta net tyuundëjkë ja jembyë kajpxyˈatypyë.

Biiblyë kyaj ttimnigajpxy näˈäjënë Jyobaa dyajtsoowdëjkë ja wintsëˈkën diˈibë netyë Jesus të dyaky. Pääty, kyaj mbäät yajxon ndimnigäjpxëm näˈäjën tyuundëjkë ja jembyë kajpxyˈatypyë. Per diˈibën tëy nnijäˈäwëm, yëˈë ko ja mäjk xëëwë nety yˈaktëgoyˈaty parë tyunëdët ja Pentekostes xëëw ko Jesus pyäˈtëjkë tsäjpotm (Apos. 1:3). Mä taabë tiempë, ja mä Jesus ttukkëdëjkë ja Tyeety nuˈunënë nety tsyobääty ja wintsëˈkën diˈib yäjk etsë Jyobaa kyupëjk (Eb. 9:12). Mä Pentekostes xëëw ja mä yajxon nyigëxëˈky ko ja jembyë kajpxyˈatypyë të nety tyuundëkë (Apos. 2:1-4, 32, 33).

Extëm të nˈijxëm, ko Jyobaa dyajtsowdëjkë ja nëë neˈpyny diˈibë Jesus tyaam yojk, ta nanduˈun tsyowdëjkë ja jembyë kajpxyˈatypyë, mä yajkumaytsyowëdë pënaty nëjkxandëp tsäjpotm. Ets ta tyuuntsondakyë Jesus extëmë Saserdotë Wintsën diˈib xykyudënäˈäyëm (Heb. 7:25; 8:1-3, 6; 9:13-15, TNM).