Zezi ti vinn Gran Pret lan 29 Nou Lepok kan li ti pran batem. Kouma nou konn sa? Kan li ti pran batem, Zezi ti montre ki li ti dispoze pou sakrifie so lavi lor enn lotel sinbolik ki reprezant “volonte Bondie.” (Gal. 1:4; Ebre 10:5-10) Sa lotel sinbolik la ti koumans existe apartir batem Zezi. Alor, gran tanp spiritiel, setadir bann dispozision ki Zeova inn pran pou ki nou ador Li ek ki baze lor laranson, li osi ti koumans existe apartir batem Zezi. Sa lotel sinbolik la ena enn plas bien inportan dan gran tanp spiritiel.​—Mat. 3:16, 17; Ebre 5:4-6.

Asterla ki gran tanp spiritiel ti etabli, ti bizin ena enn gran pret. Alor, Zeova ti etabli Zezi kouma Gran Pret ek ti “vers pwisans Lespri Sin” lor li. (Zist. 10:37, 38; Mark 1:9-11) Me kouma nou kapav sir ki Zezi ti vinn Gran Pret avan so lamor ek so rezireksion? Lexanp Aaron ek bann lezot gran pret ki ti vinn apre li, pou ed nou pou reponn sa kestion-la.

Anba Lalwa Mozaik, se zis gran pret ki ti kapav rant dan parti ki Pli Sin dan tabernak, ek dan parti ki Pli Sin dan tanp. Ti ena enn rido ant parti ki Sin ek parti ki Pli Sin. Gran pret ti kapav travers sa rido-la zis pandan Zour Rekonsiliasion. (Ebre 9:1-3, 6, 7) Aaron ek bann lezot gran pret ki ti vinn apre li, ti bizin fini etabli kouma gran pret avan ki zot kapav travers rido ki ti ena dan tabernak. Dan mem fason, Zezi ti’nn bizin fini etabli kouma Gran Pret dan gran tanp spiritiel Zeova avan so lamor, ek lerla li ti kapav travers rido, ki ti reprezant “so prop lekor,” pou ki li al dan lesiel. (Ebre 10:20) Se pou sa rezon-la ki lapot Pol ti dir ki Zezi ti bizin vini kouma “gran pret” avan ki li “travers enn latant pli gran e pli parfe, ki pa finn fabrike par lame imin,” setadir, “lesiel.”​—Ebre 9:11, 24.

Pena okenn diferans ant moman ki nouvo lalians ti etabli ek moman kot li ti rant anviger. Kifer? Kan Zezi ti al dan lesiel ek li’nn prezant valer so sakrifis devan Zeova, li ti fer premie parmi trwa letap ki ti etabli sa nouvo lalians-la. Se sa bann letap lamem ki ti fer sa lalians-la rant anviger. Ki sa bann letap-la sa?

Premierman, Zezi ti al devan Zeova; deziemman, li ti prezant valer so sakrifis devan Zeova; ek trwaziemman, Zeova ti aksepte valer sakrifis Zezi. Tanki pa ti ena sa bann letap-la, nouvo lalians pa ti rant anviger.

Labib pa dir nou kan exakteman Zeova ti aksepte valer sakrifis Zezi. Alor, nou pa kapav dir exakteman kan nouvo lalians ti etabli ek ti rant anviger. Selman, nou kone ki Zezi ti mont dan lesiel dis zour avan Lapantkot. (Zist. 1:3) Dan sa lespas letan-la, li ti prezant valer so sakrifis devan Zeova, ek Zeova ti aksepte sa. (Ebre 9:12) Apartir Lapankot, ti gagn bann prev bien kler ki nouvo lalians ti etabli ek ti rant anviger.—Zist. 2:1-4, 32, 33.

An rezime, nouvo lalians ti etabli ek ti rant anviger kan Zeova ti aksepte valer sakrifis Zezi ek ti donn bann Kretien ki ena lesperans pou al dan lesiel posibilite pou rant dan sa lalians-la. Lerla, nouvo lalians ti rant anviger avek Zezi kouma Gran Pret ek Mediater.​—Ebre 7:25; 8:1-3, 6; 9:13-15.