Yɛlã sẽn yɩ to-to wã wilgda vẽeneg tɩ yaa yʋʋmd 29 wã a Zeezi lisgã raar la a lebg maan-kʋʋdb kãsma. Bõe yĩng tɩ d yet woto? A Zeezi lisgã sasa, a wilgame t’a sakame n na n dɩk a vɩɩmã n maan maoong tẽn-kugr buud zugu. Tẽn-kug-kãng makda Wẽnnaam “raabã.” (Gal. 1:4; Ebre. 10:5-10) Sẽn mik tɩ yaa a Zeezi lisgã tɛk la tẽn-kug-kãng be wã, tog n yaa wakat kãng me la wẽnd-doog ning sẽn pa ninsaalb nus n me wã puk-yã, bala tẽn-kugrã bee wẽnd-do-kãng pʋgẽ. Wẽnd-do-kãng makda bũmb nins fãa a Zeova sẽn maan tɩ d tõe n tũ-a wa sẽn segdã, a Zeezi maoongã maasem yĩnga.—Mat. 3:16, 17; Ebre. 5:4-6.

Wẽnd-doog ning sẽn pa ninsaalb nus n me wã sẽn luglã, ra yaa tɩlɛ tɩ maan-kʋʋdb kãsem me zĩnd be. Rẽ n kɩt t’a Zeova zae a Zeezi ne ‘vʋʋsem sõng la a kõ-a pãnga,’ t’a lebg maan-kʋʋdb kãsma. (Tʋʋ. 10:37, 38; Mark 1:9-11) La bõe yĩng tɩ d tõe n kɩs sɩd t’a Zeezi lebga maan-kʋʋdb kãsma, n yaool n da nan pa ki la a vʋʋge? A Aarõ ne maan-kʋʋdb kãsem-dãmb nins sẽn ledg-a wã kibarã tõe n sõng-d lame tɩ d leoke.

Tõogã ra yetame tɩ yaa maan-kʋʋdb kãsmã bal n tõe n kẽ sɛk-roogã zĩ-sõng sẽn yɩɩdã pʋgẽ. Wa n yɩɩ woto me ne wẽnd-doogã zĩ-sõng sẽn yɩɩdã. Fu-lilldg n da welg zĩ-sõng sẽn yɩɩdã ne zĩ-sõngã. Yaa Paasg daarã bal la maan-kʋʋdb kãsmã ra pagsd fu-lilldgã n kẽ zĩ-sõng sẽn yɩɩdã pʋgẽ. (Ebre. 9:1-3, 6, 7) A Aarõ ne maan-kʋʋdb kãsem-dãmb nins sẽn ledg-a wã reng n paama zaeeb n lebg maan-kʋʋdb kãsem-dãmba, n yaool n ‘pasg fu-lilldgã’ n kẽ sɛk-roogã zĩ-sõng sẽn yɩɩdã pʋgẽ. Woto me, tog n yaa nand t’a Zeezi ki wã la a lebg wẽnd-doog ning sẽn pa ninsaalb nus n me wã maan-kʋʋdb kãsmã, n yaool n wa tõog n ‘pasg fu-lilldgã, rat n yeel t’a yĩn-nemsã,’ n tɩ vɩɩmd saasẽ. (Ebre. 10:20) Rẽ n kɩt tɩ tʋm-tʋmd a Poll gom a Zeezi yell n yeel t’a waame n lebg “maan-kʋʋdb kãsmã,” t’a “kẽe fu-roog ning sẽn yaa kãseng n yɩɩd la sẽn zems zãng n yɩɩdã pʋgẽ,” la tɩ “fu-ro-kãng pa ninsaalb nus n tilg” ye. Yaa “saasẽ meng” la a kẽ-yã.—Ebre. 9:11, 24.

Welgr ka be kaool-paalgã luglg daar ne a sɩngrã daar sʋk ye. Bõe yĩnga? A Zeezi sẽn kẽng saasẽ n tɩ wilg a Zeova a vɩɩmã sẽn zems zãngã a sẽn sak n kõ tɩ yɩ maoongã yõodã, a maana bũmb kaool-paalgã luglg yĩnga. Yaa wakat kãng me la kaool-paalgã sɩng-yã. Bõe ne bõe la a Zeezi maan-yã?

Pipi, a Zeezi reng n kẽnga a Zeova taoore. Rẽ poore, a wilga a Zeova a vɩɩmã sẽn zems zãngã a sẽn sak n kõ tɩ yɩ maoongã yõodo. Sẽn na n baase, a Zeova saka a Zeezi maoongã sẽn zems zãngã. Ra yaa tɩlɛ tɩ bõn-kãensã a tãabã maane, tɩ kaool-paalgã yaool n sɩnge.

Biiblã pa togs wakat ning takɩ a Zeova sẽn sak a Zeezi maoongã sẽn tar yõodã ye. Rẽ wã, d pa tõe n yeel wakat ning takɩ kaool-paalgã sẽn luglã ye. D sẽn mi bala, yaa t’a Zeezi kẽnga saasẽ Pãntekotã ket tɩ rasem piiga. (Tʋʋ. 1:3) Yaa wakat bilf kãng pʋgẽ la a wilg a Zeova a maoongã sẽn tar yõodã, t’a Zeova sak n deege. (Ebre. 9:12) Bũmb ning sẽn maan Pãntekotã daarã wilgda rẽ vẽenega. (Tʋʋ. 2:1-4, 32, 33) Dẽnd yaa vẽeneg tɩ kaool-paalgã ra luglame, la t’a sɩngame.

D sã n na n kʋmse, d na n yeelame tɩ yaa a Zeova sẽn wa n sak a Zeezi maoongã yõodã la kaool-paalgã lugl-yã. Leb n yaa wakat kãng la a sɩng-yã, t’a Zeezi yaa maan-kʋʋdb kãsmã la kaoolã se-yõkdã.—Ebre. 7:25; 8:1-3, 6; 9:13-15.