Pregunta ña̱ kéʼé na̱ káʼvi tutu yóʼo
¿Ama ni̱xa̱a̱ ta̱ Jesús ndu̱ura su̱tu̱ káʼnu?
Ta̱ Jesús ni̱xa̱a̱ra ndu̱ura su̱tu̱ káʼnu tá nda̱kuchira ña̱ ku̱i̱ya̱ 29. ¿Nda̱chun va̱ʼa kúnda̱a̱-iniyó ña̱yóʼo? Ná ka̱ʼa̱nyó xa̱ʼa̱ña. Tá nda̱kuchira ni̱na̱ʼa̱ra ña̱ kúni̱ra taxira ña̱ tákura nu̱ú altar, ta ña̱yóʼo kúni̱ kachiña ña̱ keʼéra ña̱ kúni̱ Ndióxi̱ (Gál. 1:4; Heb. 10:5-10). Ña̱ altar yóʼo xa̱a̱ íyoña nda̱a̱ tá nda̱kuchi ta̱ Jesús, ña̱kán kivi ka̱ʼa̱nyó ña̱ xa̱a̱ íyotu templo espiritual saá, saáchi ña̱ altar yóʼo kúú iin ña̱ ndáyáʼviní ña̱ íyo ti̱xin templo espiritual. Ta, ña̱ templo yóʼo kúú ña̱ ndákiʼin nu̱ú ndiʼi ña̱ʼa ña̱ táxi ndasakáʼnuyó Jehová nda̱a̱ táki̱ʼva kúni̱ miíra, ta va̱ʼa kéʼéyó ña̱yóʼo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (Mat. 3:16, 17; Heb. 5:4-6).
Tá xa̱a̱ ki̱xáʼa íyo ña̱ templo espiritual yóʼo, xi̱niñúʼu kootu iin ta̱ su̱tu̱ káʼnu. Xa̱ʼa̱ ña̱yóʼo Jehová xi̱niñúʼura espíritu santora ña̱ va̱ʼa ndaka̱xinra ta̱ Jesús ña̱ koora su̱tu̱ káʼnu (Hech. 10:37, 38; Mar. 1:9-11). Soo, ¿nda̱chun va̱ʼa kúnda̱a̱-iniyó ña̱ ni̱xa̱a̱ ta̱ Jesús ndu̱ura su̱tu̱ káʼnu tá kúma̱níka kuvira ta ndatakura? Ejemplo ta̱ Aarón xíʼin inkaka na̱ ni̱xi̱yo su̱tu̱ káʼnu, kúú ña̱ chindeétáʼan xíʼinyó ña̱ ndakuiinyó pregunta yóʼo.
Ña̱ ley xi̱ka̱ʼa̱nña, ña̱ iinlá ta̱ su̱tu̱ káʼnu kúú ta̱ kivi ki̱ʼvi ini ña̱ Santísimo ña̱ ni̱xi̱yo ini ña̱ tabernáculo, tá ni̱ya̱ʼa tiempo ña̱yóʼo ni̱xa̱a̱ña ndu̱uña templo. Iin cortina kúú ña̱ xi̱ndataʼví ña̱ Santo xíʼin ña̱ Santísimo, ta ta̱ su̱tu̱ káʼnu xi̱kiʼvira yóʼo tá xi̱kuuña ki̱vi̱ ña̱ Expiación (Heb. 9:1-3, 6, 7). Ta̱ Aarón xíʼin na̱ nda̱kiʼin nu̱úra ni̱xa̱a̱na ndu̱una su̱tu̱ káʼnu tá kúma̱níka ki̱ʼvina chí nu̱ú tíkaa cortina ini ña̱ tabernáculo. Ta saátu ta̱ Jesús ni̱xa̱a̱ra ndu̱ura su̱tu̱ káʼnu ña̱ templo espiritual tá kúma̱níka kuvira, tándi̱ʼi “ni̱ya̱ʼara chí nu̱ú tíkaa cortina ña̱ kúú ku̱ñura” ña̱ va̱ʼa koora chí ndiví (Heb. 10:20). Xa̱ʼa̱ ña̱yóʼo ta̱ apóstol Pablo ni̱ka̱ʼa̱nra ña̱ ki̱xi ta̱ Jesús “táki̱ʼva íyo iin su̱tu̱ káʼnu” tándi̱ʼi “ni̱ki̱ʼvira ini iin veʼe ña̱ ndáyáʼviní, ña̱ va̱ʼaní na̱kuva̱ʼa, ta su̱ví na̱ yiví níkeʼé ña̱yóʼo” ña̱yóʼo kúú ndiví (Heb. 9:11, 24).
¿Á xa̱a̱ síín ki̱vi̱ nda̱kiʼin Ndióxi̱ trato ña̱ xa̱á ta á xa̱a̱ síín ki̱vi̱ ki̱xáʼa káchíñu ña̱ trato yóʼo?
Va̱ása, chi inkáchi tiempo ku̱u ña̱yóʼo. ¿Nda̱chun káʼa̱nyó ña̱yóʼo? Saáchi, tá ni̱xa̱a̱ ta̱ Jesús chí ndiví ni̱ka̱ʼa̱nra xíʼin yivára ña̱ ná ndakiʼinra ña̱ ke̱ʼéra xa̱ʼa̱ na̱ yiví, tasaá kúú ña̱ ki̱xáʼara kéʼéra sava ña̱ʼa ña̱ va̱ʼa nda̱kiʼin Ndióxi̱ trato ña̱ xa̱á, ta kixáʼaña kachíñuña. U̱ni̱ ña̱ʼa kúú ña̱ ke̱ʼéra. ¿Ndáaña kúúña?
Ña̱ nu̱ú, ta̱ Jesús ni̱xa̱a̱ra nu̱ú íyo Jehová. Ña̱ u̱vi̱, ni̱ka̱ʼa̱nra xíʼin yivára ña̱ ná ndakiʼinra ña̱ ke̱ʼéra xa̱ʼa̱ na̱ yiví. Ta, ña̱ u̱ni̱, Jehová nda̱kiʼinra ña̱yóʼo. Ña̱kán, trato ña̱ xa̱á ki̱xáʼa káchíñuña tá xa̱a̱ ke̱ʼéra ndiʼi ña̱yóʼo.
Ña̱ Biblia va̱ása káʼa̱nña ama kúú ña̱ nda̱kiʼin Jehová ña̱ ke̱ʼé ta̱ Jesús xa̱ʼa̱ na̱ yiví. Ña̱kán, va̱ása kívi ka̱ʼa̱n káxiyó ama kúú ña̱ nda̱kiʼin Ndióxi̱ trato ña̱ xa̱á ta ki̱xáʼaña káchíñuña. Soo ña̱ xa̱a̱ kúnda̱a̱-iniyó kúú ña̱ nda̱kiʼin ta̱ Jesús ku̱a̱ʼa̱nra chí ndiví tá kúma̱níka u̱xu̱ ki̱vi̱ koo ña̱ Pentecostés (Hech. 1:3). Sana saá kúú ña̱ ni̱ka̱ʼa̱nra xíʼin yivára ña̱ ná ndakiʼinra ña̱ ke̱ʼéra xa̱ʼa̱ na̱ yiví, ta nda̱kiʼinva Jehová ña̱yóʼo (Heb. 9:12). Ta, tá ni̱xi̱yo ña̱ Pentecostés, saá kúú ña̱ ni̱na̱ʼa̱ káxi Jehová ña̱ nda̱kiʼinra trato ña̱ xa̱á (Hech. 2:1-4, 32, 33). Ta xa̱ʼa̱ ña̱ ku̱u kán, kúnda̱a̱ káxi iniyó ña̱ xa̱a̱ ki̱xáʼa káchíñu trato ña̱ xa̱á.
Ña̱kán, tá nda̱kiʼin Jehová ña̱ ke̱ʼé ta̱ Jesús xa̱ʼa̱ na̱ yiví, saá kúú ña̱ nda̱kiʼinra trato ña̱ xa̱á ta ki̱xáʼa káchíñuña ta nda̱a̱ na̱ nda̱kaxinra ku̱ʼu̱n chí ndiví ni̱ki̱ʼvi ti̱xin ña̱yóʼo. Ta ta̱ Jesús, ta̱ kúú su̱tu̱ káʼnu kúú ta̱ ki̱xáʼa káchíñu xíʼin ña̱yóʼo (Heb. 7:25; 8:1-3, 6; 9:13-15).
