Kuno zvinovonesa kuti Jesu wakava Mupiri Mukuru paakandopera kubhabhatijwa mu gore ro 29. Tinozvizivisa kudini? Jesu paakapera kubhabhatijwa, iyena wakatatija kuti waida kupira upenyu hwake pa dandiro ro kuezanisira rinoimirira “kuda” ka Mwari. (VaGalàsia 1:4; Vaheberi 10:5-10) Kare dandiro rainga divi rinosisira ro themberi, ngo kudaro, tingananga kuti themberi huru yo kumujimu yakatanga kuvepo pa rubhabhatijo hwa Jesu kwenda mberi. Themberi iyi ndi zvese zviya zvinoita Jehovha naakacijikira pa muripo wa Jesu kuitira vandhu vese vanomunamata mu njira yakacena.​—Mateu 3:16, 17; Vaheberi 5:4-6.

Kudari inga kare, themberi yaidikana kuva no mupiri mukuru, themberi huru yo kumujimu yaidikanavo kuva no mupiri mukuru. Kuti aite basa iri, Jesu wakazojwa ndi Jehovha ecishandisa “[mujimu] mucena no simba.” (Maitiro o Vapostori 10:37, 38; Marco 1:9-11) Asi tingavisa kudini no cokwadi co kuti Jesu, wakagajwa inga Mupiri Mukuru pa kubhabhatijwa kwake acito afa no kumuswa? Muezaniso wa Aroni no wo vapiri vakuru vakazotevera sure kwake, unotibesera kuti tidavire muvhunjo uwu.

Mutemo wakapuwa Mosi, wainanga kuti mupiri mukuru ndiyena waidikana kunghwina basi mu ndau Yakacenesesa yo tabherinakeri perapo wonghwina mu ndau Yakacena yo themberi. Kuti vaparajanise ndau Yakacenesesa no ndau Yakacena vaishandisa koritina. Mupiri mukuru waikhirira ngo pa koritina iya basi pa njiku yo Kupfujuhwa Zvishaishi. (Vaheberi 9:1-3, 6, 7) Aroni no vanarume vamweni vakagondeka vakazojwa inga vapiri vakuru vacito vakhirira ngo pa koritina kana “nguvo” kuti vanghwine mu ndau Yakacenesesa. Ngo njira yakafanana, Jesu acito afa waidikana kugajwa kuti ave Mupiri wozopinda ngo pa “nguvo iri muviri wake.” Muviri wo kunyama wa Jesu waidari inga koritina, kuti awane upenyu mu denga Jesu pakutanga waidikana kuzojwa inga Mupiri Mukuru. (Vaheberi 10:20) Ngo ndava yazvo, mupostori Pauro wakananga kudari ngo pamusoro pa Jesu: “Inga mupiri mukuru . . . Kristu aazivi kunghwina mu ngome yakavakwa ngo vandhu, . . . asi wakanghwina mugore.”​—Vaheberi 9:11, 24.

Apana musiyano pakati po njiku yakatendera Mwari citenderano cipsa no njiku yo cakatanga kushanda. Ngenyi? Iyena wakaita ciro cokutanga pa zviro zvitatu kuitira kutendehwa ko citenderano cipsa. Zviro zvitatu izvi, zvakaitazve kuti citenderano cipsa ici citange kushanda. Ngozvapi zviro zvitatu izvi?

Cokutanga, Jesu wakapinda pamberi pa Jehovha. Cocipiri, Jesu wakavonesa mutengo wo muripo wake kuna Jehovha. Cocitatu, Jehovha wakatendera mutengo wo ngazi yakapopomejwa ya Jesu. Zviro zvitatu izvi zvicito zvaitwa, citenderano cipsa ici cainga cicito catanga kushanda.

Bhaibheri arinangi kamare kuti Jehovha wakatenda rini mutengo wo muripo wa Jesu. Ngokudaro, atingakwanisi kunanga njiku yakatanga kutendehwa citenderano cipsa no kushanda kwaco. Zvatinonasa kuziva kamare isusu ngo zvokuti, Jesu wakahwirira kudenga gumi ro njiku Pentekoste icito yatanga. (Maitiro o Vapostori 1:3) Pa nguva doko iyi, Jesu wakakhombija mutengo wo muripo wake kuna Jehovha, iyena wakautendera. (Vaheberi 9:12) Cikhombijo cakajeka no cinovoneka co zviro izvi ngo cakaitika mu Pentekoste yo gore ro 33. (Maitiro o Vapostori 2:1-4, 32, 33) Pacina kukana-kana, citenderano cipsa cainga cotanga kushanda.

Mukugurisira, citenderano cipsa cakatendehwa no kutanga kushanda, Jehovha paakapera kutendera mutengo wo ngazi yakapopomejwa ya Jesu. Citenderano cipsa cakatanga kushanda cecitungamirihwa ndi Jesu, Mupiri Mukuru, inga muviiranisi waco.​—Vaheberi 7:25; 8:1-3, 6; 9:13-15.