Tobali Ere Sebua Yesu me tebayagö ia idanö me döfi 29 M. Hezo tola taʼila daʼö? Me tebayagö ia idanö, hulö no ilulu waʼaurinia tobali sumange yawa ba naha wanunu sumange, si no amaedola ”ohitö dödö Lowalangi”. (Gal. 1:4; Heb. 10:5-10) Börö daʼö, iʼotarai me tebayagö idanö Yesu, no so zi no amaedola naha wanunu sumange andrö. Ba börö me no nahia si tohude ba gosali naha wanunu sumange, daʼö geluahania wa no so göi gosali ba wamati iʼotarai daʼö. Osali ba wamati andrö, no amaedola gamakhoita si tobali dela ba niha enaʼö tola lafosumange Lowalangi ba lala satulö si teʼodane-dane ba höli nibeʼe Yesu.​—Mat. 3:16, 17; Heb. 5:4-6.

Moguna so zi tobali ere ba gosali ba wamati andrö. Daʼö mbörö wa ifataro Yesu Yehowa ”faoma eheha niʼamoniʼö ba tebeʼe khönia waʼabölö”. (Hal. 10:37, 38; Mrk. 1:9-11) Tobali, hana wa tola faduhu dödöda wa no mufataro Yesu tobali Ere Sebua fatua lö mate ba tesusugi ia? Tola taʼila wanema linia na tatutunö duma-duma salua khö Gere Sebua sotöi Aʼaroni hegöi niha böʼö sanohugö halöwönia.

Moloʼö Oroisa Moze, ha ere sebua zi tola möi bakha ba Nahia Wondrege Niʼamoniʼö si so ba nose Lowalangi hegöi ba gosali. So nukha si tobali baʼa-baʼa samasafi Nahia Wondrege Niʼamoniʼö hegöi Nahia Niʼamoniʼö. Ha ba Ngaluo Wangatulö tola itörö mbaʼa-baʼa andrö Ere Sebua. (Heb. 9:1-3, 6, 7) Mufataro Gaʼaroni tobali Ere Sebua hegöi niha böʼö sanohugö halöwönia, fatua lö latörö nukha si tobali baʼa-baʼa ba weʼamöi ba Nahia Wondrege Niʼamoniʼö. Andrö, mufataro göi Yesu tobali Ere Sebua, fatua lö mate ia ba itörö ”nukha baʼa-baʼa andrö, yaʼia daʼö botonia”, ba möi ia ba zorugo. (Heb. 10:20) Daʼö mbörö wa iwaʼö Faulo wa Tohare Yesu ”tobali ere sebua”, ba ”italuʼi nose sabölö moguna ba sabölö moʼahonoa, tenga nifazökhi danga niha”, ba möi ia ba ”zorugo”.​—Heb. 9:11, 24.

Hamega mufotandro gamabuʼula li si bohou? Me no möi Yesu ba zorugo, ifaʼema khö Yehowa zumange si no ibeʼe ba wangöhöli yaʼita. Daʼö lala si oföna mufalua ba wamotandro amabuʼula li si bohou, ba tola ibörögö muʼogunaʼö. Hadia manö nifalua ba wamotandro amabuʼula andrö?

Si oföna, möi Yesu ba wangondrasi Yehowa. Aefa daʼö, ifaʼema khö Yehowa zumange si no ibeʼe ba wangöhöli yaʼita. Ba safuria, itema Yehowa mböli ndro Yesu si no aduwa. Na no mufalua zi tölu ngawalö andrö, awena tola muʼogunaʼö gamabuʼula li si bohou.

Lö ifatunö khöda Sura Niʼamoniʼö hamega itema Yehowa mböli ndro Yesu si no ibeʼe tobali sumange. Börö daʼö, lö taʼila sibai hamega mufotandro ba ibörögö muʼogunaʼö gamabuʼula li si bohou andrö. Hizaʼi, aboto ba dödöda wa no möi Yesu ba zorugo fulu hari fatua lö mufalua Wendrakose. (Hal. 1:3) Me so ia ba zorugo, tatu no ifaʼema Yesu khö Yehowa mböli zumange si no ibeʼe, ba no itema daʼö Yehowa. (Heb. 9:12) Oroma sibai daʼö me inötö mufalua Wendrakose. (Hal. 2:1-4, 32, 33) Ba ginötö daʼö, no ibörögö muʼogunaʼö gamabuʼula li si bohou andrö.

Rahu-rahunia, no mufotandro gamabuʼula li si bohou ba ibörögö muʼogunaʼö ia, me itema Yehowa mböli ndro Yesu si no aduwa. Börö me Ere Sebua Yesu, yaʼia zi tobali Dela ba mbuʼusa li andrö.​—Heb. 7:25; 8:1-3, 6; 9:13-15.