Emyatsi yikakanganaya ngoko Yesu mwabya Muhereri Mukulu omughulu abatisibawa oko mwaka 29 M.W. Tukaminya ekyo kyo tuti? Omughulu Yesu abatisibawa mwakangania ngoko anayiteghekire eriyiherera iyuwene-wene oko kiherero ky’erisosekania ni bughambu erikola “erisonda” ly’oMungu. (Gal. 1:4; Ebr. 10:5-10) Erilua omughulu Yesu abatisibawa ekiherero ky’erisosekania ekyo kyabirihirwaho, n’ehekalu ngulu y’obunya-kirimu​—eyikasosekanaya endegheka y’eriramya ry’ekwenene rya Yehova erikatokekana erilabira embanulo​—nakyo kitokekene muyahirwaho oko mughulu mughumerera oyo. Ekiherero kiwite omughaso munene omo hekalu y’obunya-kirimu.​—Mat. 3:16, 17; Ebr. 5:4-6.

Ehekalu ngulu y’obunya-kirimu yabisighikwa, kyabya kitolere ihabya omuhereri mukulu. Eribya Muhereri Mukulu, Yesu mutulirwa “kw’ekirimu kibuyirire n’obutoki.” (Emib. 10:37, 38; Mar. 1:9-11) Aliwe, ni kyahi ekyangaleka itwikirirya ngoko Yesu mwasombolwa mo Muhereri Mukulu embere ahole n’erilubukibwa? Erilengekania oko ky’erileberyako kya Haruni n’ababya bahereri bakulu enyuma siwe erikwamana n’emighambo eyo Mungu aha Musa, kikatuwatikaya erisubirya oko ribulya eryo.

Erikwamana n’emighambo eyo oMungu aha Musa, omuhereri mukulu musa yo wabya akingira Ahabuyirire Kutsibu h’ehema y’erihindanamo n’enyuma waho yo wabya akingira Ahabuyirire Kutsibu h’ehekalu. Omo katikati k’Ahabuyirire Kutsibu n’Ahabuyirire habya ekisukuliryo kutse epazia. Omuhereri mukulu inyakalaba omo pazia eyo Ekiro ky’Erisaba Obughanyiri kisa. (Ebr. 9:1-3, 6, 7) Ngoko Haruni n’abosi ababya bahereri bakulu enyuma siwe mubatsuka erisombolwa mo baherreri bakulu embere ‘balabe omo pazia’ n’eringira Ahabuyirire Kutsibu h’ehema y’erihindanamo, kutya kyabya kitolere Yesu naye inyatsuka erisombolwa mo Muhereri Mukulu w’ehekalu ngulu ya Yehova embere ahole ‘n’erilaba omo pazia eyikasosekanaya omubiri wiwe’ neryo inyabana engebe y’elubula. (Ebr. 10:20) Busana n’ekyo, omukwenda Paulo mwakania oko Yesu ati, “Kristo abirihika “ngʼomuhereri Mukulu” n’erilaba omo “Hema nene kwilaba eyindi, eyihikene kwilaba. Ni Hema eyitalukawa nʼebyala byʼabandu,” “elubula.”​—Ebr. 9:11, 24.

Erihirwaho ly’endaghane nyihya-nyihya sirisighene n’omughulu owo yatsuka erikola. Busanaki? Omughulu Yesu asambira elubula n’erikangania obughuli bw’engebe yiwe y’ekinya-mubiri eyihika-hikene, mwakola omwatsi w’erimbere w’oko myatsi isatu eyangalekire endaghane nyihya-nyihya iyaliwa. Emyatsi isatu eyo, yikahanganaya endaghane nyihya-nyihya kutse yikaleka iyatsuka erikola. Emyatsi isatu eyo ni yahi?

Ow’erimbere, Yesu mwahika embere sya Yehova; ow’akabiri, mwaha Yehova y’obughuli bw’eriyiherera liwe; n’ow’akasatu, Yehova mwaligha obughuli b’omusasi wa Yesu owutika. Endaghane nyihya-nyihya muyatsuka erikola emyatsi isatu eyo yabikoleka.

EBiblia siyibughire Yehova nga mwaligha obughuli bw’eriyiherera lya Yesu mughulu wahi. Neryo sitwangaminya kwenene-kwenene endaghane nyihya-nyihya nga muyaliwa mughulu wahi n’eritsuka erikola. Aliwe, tunasi ngoko Yesu mwasambira elubula ebiro ikumi embere sye Pentekoste. (Emib. 1:3) Kiro kirebe omo biro bike ebyo, Yesu mwaha Yehova y’obughuli bw’eriyiherera liwe na Yehova mwaligharyo. (Ebr. 9:12) Omwatsi oyo mwalangirika burora-rora oko Pentekoste. (Emib. 2:1-4, 32, 33) Neryo endaghane nyihya-nyihya muyaliwa n’eritsuka erikola.

Omo kikuhi, endaghane nyihya-nyihya muyaliwa n’eritsuka erikola, Yehova abiligha obughuli b’omusasi wa Yesu owutika. Neryo endaghane nyihya-nyihya yamatsuka erikola na Yesu amabya Muhereri Mukulu kandi Musangania w’endaghane eyo.​—Ebr. 7:25; 8:1-3, 6; 9:13-15.