Bohlatse bjo bo lego gona bo bontšha gore Jesu o thomile go ba Moperisita yo a Phagamego ge a be a kolobetšwa ka 29 C.E. Bohlatse bjoo ke bofe? Ge Jesu a be a kolobetšwa, o ile a bontšha gore o be a ikemišeditše go neela bophelo bja gagwe aletareng ya seswantšhetšo gore a dire “thato” ya Modimo. (Bagal. 1:4; Baheb. 10:5-10) Ka ge aletare yeo ya seswantšhetšo e be e dutše e le gona go tloga ge Jesu a be a kolobetšwa go fihla gona bjale, gona go ra gore le tempele e kgolo ya moya e bile gona go tloga ka nako yeo. Tempele e kgolo ya moya e swantšhetša dilo ka moka tšeo di re thušago go hlankela Modimo ka tsela yeo a e amogelago ka baka la sehlabelo sa Jesu sa topollo. Aletare ke karolo ya bohlokwa ya tempele yeo ya moya.—Mat. 3:16, 17; Baheb. 5:4-6.

Go be go nyakega moperisita yo a phagamego gore a tle a hlankele tempeleng yeo. Ka gona Jehofa o ile a tlotša Jesu “ka moya o mokgethwa le ka matla” gore e be moperisita yo a phagamego. (Dit. 10:37, 38; Mar. 1:9-11) Eupša re ka kgodišega bjang gore Modimo o kgethile Jesu go ba Moperisita yo a Phagamego pele a ka hwa gomme a tsošwa? Go ithuta ka mohlala wa Arone le wa baperisita ba bangwe ba phagamego bao ba ilego ba kgethwa ka morago ga gagwe go tla re thuša go araba potšišo ye.

Molao woo Jehofa a bego a o neile Moshe o be o laetše gore ka Sekgethwakgethweng sa taberenakele go tsene feela moperisita yo a phagamego, gomme ka morago ge tempele e be e agilwe o be a tlo tsena ka Sekgethwakgethweng sa tempele. Sekgethwakgethwa se be se arogantšwe le Sekgethwa ka seširo goba gareteine. Moperisita yo a phagamego o be a tsena ka Sekgethwakgethweng ka Letšatši la Poelano feela. (Heb. 9:1-3, 6, 7) Arone le baperisita ba phagamego bao ba kgethilwego ka morago ga gagwe ba be ba tlotšwa pele ba ka ‘phatša seširo’ sa kgonthe sa taberenakele gomme ba tsena ka Sekgethwakgethweng. Ka gona, Jesu le yena o ile a tlotšwa gore e be Moperisita yo a Phagamego pele a ka hwa ke moka a “[phatša] seširo, ke gore nama ya gagwe” gomme a rotogela legodimong. (Baheb. 10:20) Ka baka leo, moapostola Paulo o ile a bolela ka Jesu gore o tlile “e le moperisita yo a phagamego,” gomme a “phatša ka tenteng e kgolo le e phethagetšego kudu yeo e sego ya dirwa ka diatla tša batho” gomme a tsena “legodimong.”—Baheb. 9:11, 24.

Ga go na phapano magareng ga nako yeo kgwerano e mpsha e tiišitšwego ka yona le yeo e kgakotšwego ka yona. Ke ka baka la’ng go se na phapano? Ke ka gobane ge Jesu a be a rotogela legodimong gomme a nea Modimo mohola wa bophelo bja gagwe bjo bo phethagetšego bakeng sa rena, o ile a gata mogato wa pele wa megato e meraro go dira gore kgwerano e mpsha e be molaong. Yona megato yeo e ile ya dira gore kgwerano e mpsha e kgakolwe goba e thome go šoma. Megato yeo ke efe?

Sa pele, Jesu o ile a ya pele ga Jehofa. Sa bobedi, Jesu o ile a nea Jehofa mohola wa sehlabelo sa gagwe. Sa boraro, Jehofa o ile a amogela mohola wa sehlabelo sa Jesu. Kgwerano e mpsha e thomile go šoma feela ka morago ga gore Jehofa le Jesu ba dire dilo tšeo tše tharo.

Beibele ga e re botše nako ya maleba yeo Jehofa a ilego a amogela mohola wa sehlabelo sa Jesu. Ka baka leo re ka se kgone go bolela gore kgwerano ye e mpsha e tiišitšwe neng ka go lebanya gomme ya thoma go šoma. Eupša seo re se tsebago ke gore Jesu o rotogetše legodimong matšatši a lesome pele ga letšatši la Pentekoste. (Dit. 1:3) Nengneng nakong yona yeo e kopana, o ile a nea Jehofa mohola wa sehlabelo sa gagwe, ke moka Jehofa a o amogela. (Baheb. 9:12) Re tseba seo ka baka la seo se ilego sa direga ka letšatši la Pentekoste. (Dit. 2:1-4, 32, 33) Ka nako yeo go be go le molaleng gore kgwerano e mpsha e be e thomile go šoma.

Ka bokopana re ka re, kgwerano e mpsha e tiišitšwe le go kgakolwa ka morago ga gore Jehofa a amogele mohola wa sehlabelo sa Jesu. Ka gona kgwerano yeo e ile ya thoma go šoma Mmoelanyi wa yona e le Jesu, yena Moperisita yo a Phagamego.—Baheb. 7:25; 8:1-3, 6; 9:13-15.