Sesusi wakala Omunene-nakwa monthiki ambatisalwa, menima 29. Oñgeni tuetyinoñgonoka? Tutyii mokonda monthiki ambatisalwa, walekesa ku Siovaa okuti ankho wafuapo opo aave omuenyo wae ngotyilikutila. Ongatyina Siovaa ena omutala wovilikutila, pahe Sesusi eya opo akale otyilikutila. (Gal. 1:4; Heb. 10:5-10) Okuhimbikila monthiki oyo, Siovaa akala nomutala wovilikutila. Okuti tyitavela okukala nomutala wovilikutila, ohakala nondyuo yatyo? Au. Ngotyo, okupolelela monthiki Sesusi ambatisalwa, Siovaa ahimbika okuyeka ovanthu vakale omapanga ae, nokumufenda ngetyi ahanda, mokonda ankho utyii okuti Sesusi mevenkhila. Otyipuka otyo Siovaa alinga, ongetyi ankho tyilingwa mondyuo yae. Ongatyina ondyuo ya Siovaa na hono nkhele ili pano pohi. Tyimwe ankho tyihapondola okukamba pondyuo opo, omutala wovilikutila. — Mat. 3:16, 17; Heb. 5:4-6.

Mokonda pahe Siovaa ankho una ondyuoyae, tupu ankho mesukisa omunene-nakwa maundapa-mo. Aholovona Sesusi akale omunene-nakwa, emulembula ‘nononkhono mbae, nevililo’ liae. (Ovil. 10:37, 38; Malu. 1:9-11) Otyo tyilekesa okuti Sesusi wakala Omunene-nakwa etyi ehenenkhie. Ñgeni ngotyo? Opo tutyinoñgonoke, matulilongesa etyi ankho tyilinga Alau novanene-nakwa vemupingile.

Ovitumino viapelwe Moisesi ankho vipopia okuti omunene-nakwa, oe vala ankho una okunyingila Momphangu Onthyukuki Unene. Pokati Komphangu Onthyukuki, Nomphangu Onthyukuki Unene, ankho patetwa nekulutina. Mahi omunene-nakwa ankho ukuata vala pekulutina olio okuenda Komphangu Onthyukuki Unene, Monthiki Yokupata Ononkhali. (Heb. 9:1-3, 6, 7) Alau novanene-nakwa vemupingile, valambelele vala pekulutina olio mokonda tete valembulilwe na Huku. Ine ankho ha vanene-nakwa-ko, ñgeno kavakuatele pekulutina olio. No pu Sesusi ongotyo tyaendele! Wakala omunene-nakwa wondyuo ya Huku etyi ehenenkhie. Pahe etyi atutiliswa nolutu lwo andyu, ongatyina ‘alambela pekulutina.’ (Heb. 10:20) Otyo apositolu Paulu apopilile okuti Sesusi ‘wakala omunene-nakwa,’ konyima “anyingila mekaka enene nokuavilapo vali lihalingilwe nomavoko.” Ekaka patyi ankho ekahi nokupopia? Eulu. — Heb. 9:11, 24.

Onalupi omphango omphe yetavelwa na Huku iya onalupi yahimbika okufuisapo otyilinga tyayo? Aviho vialingilwa vala kokulike. Omokonda yatyi tupopila ngotyo? Etyi Sesusi atutiliswa, akondoka keulu, apopila Siovaa okuti wafuisapo otyilinga emutumine tyokunkhila ovanthu. Otyipuka otyo alinga, otyipuka tyo tete ankho tyesukisa opo Siovaa etavele omphango omphe. Ankho pakamba vali ovipuka vivali. Tupu ovipuka ovio, ovio ankho viesukisa opo omphango omphe ihimbike okukuatesako ovanthu. Ovipuka ovio, ovipi?

Tete, Sesusi wapita atee pu Siovaa. Vali, emupopila oñgeni aendeka otyilikutila tyae. Tatu, Siovaa etyitavela. Omphango omphe yahimbika vala okuundapa etyi ovipuka ovio vitatu vialingwa.

Ombimbiliya kaipopi onthiki Siovaa etavela otyilikutila tya Sesusi. Ngotyo, katutyii onalupi Siovaa etavela omphango omphe. Etyi twii, okuti Sesusi waya keulu etyi kuakambela ononthiki ekwi opo onthiki yo Pendekoste yenima 33 ihike-po. (Ovil. 1:3) Mokamuvo oko kehehi, omo mualingwa ovipuka ovio vitatu viapopiwa konyima. Wapopila Siovaa oñgeni aendeka otyilikutila tyae, ngwe etavela. (Heb. 9:12) Otyo tutyii mokonda yetyi tyaendele-po mo Pendekoste. (Ovil. 2:1-4, 32, 33) Mo Pendekoste, omphango omphe pahe ankho ikahi nokulinga otyilinga tyayo.

Oityi tuelilongesa? Tuelilongesa okuti etyi Siovaa etavela otyilikutila tya Sesusi, tupu wetavela Omphango omphe, iya pomuvo opo, omphango omphe aihimbika okulinga otyilinga tyayo. Omunene-nakwa Sesusi, oe Onkhalakati yomphango oyo. — Heb. 7:25; 8:1-3, 6; 9:13-15.