Kede mesa el kmo a Jesus a mlo Ngarbab el Prist er sera lemetecholb er a 29 C.E. Ngera olechotel tiang? Sera lemetecholb e a Jesus a uldersii a klengar er ngii el mo tenget er a okesiu el olengetongel el omtechei er a “soal” a Dios. (Gal. 1:4; Heb. 10:5-10) Me tia el okesiu el olengetongel a mlo er ngii er sera lemetecholb a Jesus el mei er chelechang, me a templo er a klereng el ngii omtechei er a bliochel el omengull el bla leketmeklii a Jehovah loeak a olubet a dirrek el mlo er ngii er seikid el taem. Me tia el olengetongel a klou a ultutelel telengtengil a templo er a klereng.​—Mt. 3:16, 17; Heb. 5:4-6.

Tia el templo er a klereng a uluusbech er a ngarbab el prist. Me a Jehovah chileltii a Jesus el mo ngarbab el prist loba “Chedaol Reng ma klisiich.” (Rel. 10:37, 38; Mk. 1:9-11) Engdi ngmekera sebechel mo ulterekokl a rengud el kmo a Jesus a miltutk el mo Ngarbab el Prist er a uchei er a lemad e lebekiis? Ngsebeched el mo medengelii a uchul me kede oumerang er tia el tekoi sel bo dorriter er a blekeradel lurruul er ngii a Aron me tirke el mlo oeak uriul el ngarbab el prist el ngar cheungel a Llach er a Moses.

A doltirakl er a Llach er a Moses e ngdi ta el ngarbab el prist a sebechel mo soiseb er a Kmal Chedaol Delemerab er a chedaol Tento, el uriul e ngmlo Kmal Chedaol Delemerab er a templo. Ngmla er ngii a chebill el meleakl er tia el delemerab er a Chedaol Delemerab. Ngike el ngarbab el prist a di sebechel mo soiseb er a Kmal Chedaol Delemerab er sel Sils er a Tngakireng. (Heb. 9:1-3, 6, 7) Me ngdi ua Aron me tirke el uleakuriul er ngii el milechilt el mo ngarbab el prist er a uchei er a lsiseb er a “chebill” er a chedaol Tento, a Jesus a mle kirel mechilt el mo Ngarbab el Prist er a templo er a klereng er a uchei er a lemad e lengelakl er a “chebill el okiu a tenget el bedengel” el mora eanged. (Heb. 10:20) Sei a uchul, me a apostol Paulus a milsaod er a Jesus er a lemei el “ngarbab el prist” e mlo soiseb er a “kuk klou e lmuut el ungil el tento el diak le rruul er a re chad,” el mora “eanged.”​—Heb. 9:11, 24.

Me ngdiak a klekakerous er sera lemoterekokl a beches el telbiil me sera lemotaut. E ngera uchul me ngdiak? E le Jesus er a lebora eanged e lodersii a cherrungel el klengar er ngii el kired, e ngkiltmeklii a teletael el mo olterekokl er tia el beches el telbiil. E tia el osisiu el teletael a ultutii tia el telbiil me a lechub e ngrirellii el mo oureor. Me ngera el bakes a ngar tia el teletael?

A kot, e a Jesus a mlo duum er medal a Jehovah, e a ongingil, e nguldersii a kerresel a tengetengel el mora Jehovah, e a ulebongel er ngii, a Jehovah a kilengei er a kerresel a mloitel el rsechel. Ngmle kirel meketmokl aika el tekoi, e ngmo sebechel tia el beches el telbiil el mo oureor.

A Biblia a diak louchais er a ulterekokl el taem el Jehovah kilengei er a kerresel a tengetengel a Jesus. Me ngdiak dodengelii a ulterekokl el taem el lemloterekokl e lemotaut a beches el telbiil. Engdi kede medengei el kmo a Jesus a mlo er a eanged er a teruich el klebesei er uchei er a Pentekost. (Rel. 1:⁠3) Me ngmla er a delongelel tiakid el taem me a Pentekost e nguldersii a kerresel tia el tengetengel el mora Jehovah me ngkilengei er ngii. (Heb. 9:12) Me a olechotel a kmo tia el telbiil a mla mo oureor a mleues er a Pentekost. (Rel. 2:1-4, 32, 33) Me ngmle bleketakl el kmo a beches el telbiil a mla moterekokl e mla mo oureor.

Me a beches el telbiil a mloterekokl e mlotaut er a uriul er a Jehovah lekengei er a kerresel a tengetengel a mloitel el rsechel a Jesus e lerelleterir a rengellitel el mo chedal tia el telbiil. Me tia el telbiil a mlo oureor e a Jesus a mesiou el Ngarbab el Prist e Melekingel.​—Heb. 7:25; 8:1-3, 6; 9:13-15.