Jesus wort aune 29 de Huaga Priesta, aus hee sikj deepen leet. Woo weet wie daut? Derch siene Doop bewees Jesus, daut hee reed wia, sien Läwen to jäwen. Hee wudd daut soo to sajen opp dän Aultoa opfren, waut Gott sienen Wellen väastald (Gal. 1:4; Heb. 10:5-10). Dis Aultoa es een wichtjet Poat von dän grooten jeisteljen Tempel. No daut no mott daut uk disen jeisteljen Tempel von Jesus siene Doop aun jejäft haben. Jehova sien groota jeistelja Tempel es een Jlikjnis fa aul daut, waut daut mäajlich moakt, daut wie Jehova derch Jesus sien Opfa rajcht deenen kjennen (Mat. 3:16-17; Heb. 5:4-6).

De groota jeistelja Tempel brukt eenen Huagen Priesta. Doawäajen deed “Gott dän Heiljen Jeist un siene Krauft äwa Jesus . . . jeeten” (Apj. 10:37-38; Mar. 1:9-11). Oba woo weet wie, daut Jesus aul ver sienen Doot un ver sien oppstonen aus Huaga Priesta aunjestalt wort? Daut woa wie seenen, wan wie ons unjastonen, woo daut en de Tiet von daut Jesaz Moses bie Aaron un bie de aundre Huage Priestasch wia.

Daut Jesaz Moses säd, daut bloos de Huaga Priesta en de Aulaheilichste Stow von daut Aunbädungszelt ooda vom Tempel nengonen kunn. Tweschen de Heilje Stow un de Aulaheilichste Stow wia een Väahank, ooda eene Gardien. De Huaga Priesta jinkj bloos aun dän Veseenungsdach derch de Gardien (Heb. 9:1-3, 6-7). Aaron un de aundre Priestasch no am musten ieescht aus Huaga Priesta aunjestalt woaren un dan kunnen dee en daut Aunbädungszelt “derjch den Väahang” gonen. Krakjt soo must uk Jesus ieescht aus Huaga Priesta von Jehova sienen grooten jeisteljen Tempel aunjestalt woaren, ea hee no sienen Doot “derjch den Väahang, daut es sien Fleesch” em Himmel nenn kunn (Heb. 10:20, Friesenbibel). Doawäajen säd de Apostel Paulus, daut Jesus “aus Huagapriesta” kjeem un dan derch “daut jratre un volkomne Zelt, daut nich von Menschen jebut es” en dän “Himmel selfst” nenjinkj (Heb. 9:11, 24).

Doa es kjeen Unjascheet tweschen wanea de niea Bunt jeltich wort un wanea dee aunfunk to schaufen. Wuarom nich? Aus Jesus nom Himmel fua toom doa sien volkomnet Läwen aus Mensch fa ons opfren, deed hee de ieeschte beid von dree Sachen, waut needich wieren toom dän nieen Bunt jeltich moaken. Un krakjt dise dree Sachen brochten daut uk bat doa, daut de niea Bunt aunfunk to schaufen. Woone dree Sachen wieren daut?

Ieeschtlich kjeem Jesus doa ver Jehova. Dan brocht hee soo to sajen sien Opfa no Jehova. Un tolatst neem Jehova daut aun, daut Jesus sien Bloot vegoten haud. Ea dise dree Sachen jedonen wieren, schauft de niea Bunt nich.

De Schreft sajcht nich krakjt, wanea Jehova Jesus sien Opfa aunneem. Doawäajen kjenn wie nich krakjt sajen, wanea de niea Bunt jeltich wort un aunfunk to schaufen. Oba wie weeten, daut Jesus tieen Doag ver Pinjsten nom Himmel fua (Apj. 1:3). Un irjentwanea en dise tieen Doag brocht Jesus dan sien Opfa ver Jehova, un Jehova neem daut aun (Heb. 9:12). Un daut, waut dan aun janen Pinjstdach aunjinkj, es een gaunz kloara Bewies doafäa, daut de niea Bunt aul mott sennen jeltich jewast un fa voll aum schaufen (Apj. 2:1-4, 32-33).

De niea Bunt wort aulsoo jeltich, nodäm aus Jehova Jesus sien vegotnet Bloot aus Opfa aunneem un de Jesaulwde Poat von disen Bunt muak. Doaderch funk de niea Bunt aun to schaufen, wua de Huaga Priesta Jesus de Vemedla wia (Heb. 7:⁠25; 8:⁠1-3, 6; 9:⁠13-15).