Jesusqa bautizakusqanmantapachan 29 watapi uma sacerdote kapuran. ¿Imaynapin chayta yachanchis? Jesuspa bautizakusqanwanmi. Payqa bautizakushaspan juj sacrificio jina Jehová Diosman qokuran. Chhaynapin “Diospa munayninta junt’aran” (Gál. 1:4; Heb. 10:5-10). Jehová Diospa munaynintaqa juj altarwanmi rijch’anachikun. Chayraykun Jesús wañuspaqa juj altarpipas wañushanman jina karan. Chay altarqa Jesuspa wañusqanmantapachan rijurimuran. Chaymantapachan espiritual templopas rijurimullarantaq. Chay espiritual temploqa Jehová Diosta imayna servisqanchismi (Mat. 3:16, 17; Heb. 5:4-6).

Espiritual templopiqa kananpunin karan juj uma sacerdote. Chaymi Jehová Diosqa, Jesusta uma sacerdoteta jina ‘santo espiritunwan’ ajllaran bautizakusqan p’unchaypi (Hech. 10:37, 38; Mar. 1:9-11). ¿Imaynapin yachanchis manaraq wañushaspa Jesús uma sacerdote kasqanta? Chaypaqqa Aaronmanta, payta qatiq uma sacerdotekunamantawan yachaymi yanapawasunchis.

Ñaupa tiempopi Jehová Diospa yupaychana karpanqa iskayman t’aqasqan kasharan. Ñaupaq kaq cuartotan nikuran: “Ch’uya parte” nispa. Iskay kaq cuartotataq nikuran: “Ch’uyay-ch’uya parte” nispa, chay iskay kaq cuartomanqa uma sacerdotellan jaykuq watapi juj kutillata. Chayqa karan jucha pampachay p’unchaypin (Heb. 9:1-3, 6, 7). Aaronpas wawankunapas uma sacerdote jinan ajllasqa karanku. Ajllasqa kasqanku qhepamanñan ‘Ch’uyay-ch’uya partemanqa’ jaykuranku. Chhaynallataqmi Jesuspas manaraq wañushaspaqa uma sacerdote jina ajllasqa karan. Chay qhepamanñan payqa “cortina ukhunta pasaspa ch’uyay-ch’uya parteman jaykuran, chay cortinaqa paypa cuerponmi” (Heb. 10:20). Chaymi apóstol Pablo niran: ‘Jesusqa uma sacerdote jinan jamuran’, nispa. Chaymantapas nillarantaqmi: “‘Aswan allin karpaman jaykuran’, ‘chay aswan jatun carpaqa’ ‘kikin janaq pachan’”, nispa (Heb. 9:11, 12, 24).

Mosoq rimanakuyqa kaq tiempollapin valeran inagurakuranpas. ¿Imaraykun chayta ninchis? Jesusqa wañusqan qhepatan janaq pachaman wichapuran, chaypin runakunarayku wañusqanta Jehová Diosman jaywaran. Chaypin mosoq rimanakuyqa valepuran, inagurakuranpas (otaq qallariranpas). ¿Imakunatan ruwakunan karan mosoq rimanakuy qallarinanpaq?

Ñaupaqta, Jesusmi janaq pachapi Jehová Diospa ñaupanpi presentakuran. Iskaypi, runakunarayku sacrificakusqantan Jehová Diosman jaywaran. Kinsapitaq, Jesuspa sacrificakusqantan Jehová Dios chaskiran. Jesuspas Jehová Diospas chaykunata ruwaqtinkun mosoq rimanakuyqa qallariran otaq inagurakuran.

Bibliaqa manan willanchu ima p’unchaypipunichus Jehová Dios Jesuspa sacrificakusqanta chaskiran chaytaqa. Jesusqa janaq pachamanmi ripuran, chunka p’unchay ñaupaqta Pentecostés fiesta manaraq qallarishaqtin (Hech. 1:3). Chay p’unchaykunapin Jesusqa sacrificakusqanta Jehová Diosman jaywaran, chaypitaq Jehová Diosqa chaskiran (Heb. 9:12). Jehová Dios wawan Jesuspa sacrificakusqanta chaskisqanqa Pentecostés fiesta p’unchaypin sut’ita rikukuran (Hech. 2:1-4, 32, 33). Chay p’unchaypin rikullarantaq mosoq rimanakuy qallarisqanta.

Jehová Diosqa Jesuspa wañusqantan chaskiran, chaymantapachan mosoq rimanakuyqa valepuran inagurakuranpas. Mosoq rimanakuypiqa Jesusmi uma sacerdote jina yanapakushan (Heb. 7:25; 8:1-3, 6; 9:13-15).