Akaari maira te au akapapuanga e kua riro mai a Iesu ei Taunga Maata i tona papetitoanga i te mataiti 29 T.N. Eaa te akapapuanga? I tona papetitoanga, kua oronga a Iesu iaia uaorai ei atinga ki runga i te atarau ma te “inangaro” i te Atua. (Gala. 1:4; Ebe. 10:5-10) Mei te mea kua akamata te atarau akatutu ua mei to Iesu papetitoanga e aere ua atu, ko te iero maata i te pae vaerua—tei akatutu i te akanoonooanga no te akamorianga mou a Iehova tei akatumuia ki runga i te oko—papu kua akamata katoa i te reira taime. E tuanga puapinga te atarau o te reira iero pae vaerua.—Mata. 3:16, 17; Ebe. 5:4-6.

No te mea kua akanooia te iero maata i te pae vaerua, kua anoanoia tetai taunga maata. Kia akatupu i te reira, kua akatainuia a Iesu “ki te vaerua tapu e te mana ra.” (Anga. 10:37, 38; Mare. 1:9-11) Inara, akapeea tatou i papu ei e kua ikiia a Iesu ei Taunga Maata i mua ake i tona mateanga e te tuakaouanga? Ka kite tatou i te akapapuanga me akara tatou i te akaraanga o Aarona e te aronga tei tavini ei taunga maata i raro ake i te Ture a Mose.

Tei umuumuia e te Ture, ko te taunga maata anake ua te ka tomo ki roto i te Ngai Tapunui o te tapenakara, e i muri roa mai ki roto i te Ngai Tapunui o te iero. Kua akatakakeia teia tuanga e te paruru mei te ngai Tapu. Ka aere te taunga maata na roto i te reira paruru i te Rā Tapokiangaara. (Ebe. 9:1-3, 6, 7) Mei ia Aarona e te aronga tei akatainuia ei taunga maata i mua ake ka tomo ei “na roto i te [arai] paruru” o te tapenakara, papu kua ikiia a Iesu ei Taunga Maata o to Iehova iero maata pae vaerua i mua ake ka mate ei aia, e mei reira, kua aere aia “na roto i te paruru ra, koia oki tona kopapa” ki te oraanga i te rangi. (Ebe. 10:20) No reira te apotetoro ko Paulo i tuatua ai e te aere maira a Iesu “ei taunga maata” e kua aere na “roto i te are maata e te meitaki rava, kare i angaia e te rima ra,” e “tei te rangi mou ra.”—Ebe. 9:11, 24.

Kare e tuke i te koreromotu ou tei akamanaia e tei akatinamouia. Eaa te tumu? Te aere anga a Iesu ki te rangi, kua oronga aia i tona oraanga apa kore ei oko ia tatou, kua akamana aia me kore kua akatika i te koreromotu ou. Kua riro katoa te reira ei akatinamou i teia koreromotu. Eaa te au takainga tei raveia?

Mea mua kua aere a Iesu ki mua i te aroaro o Iehova; aru mai, oronga a Iesu i tona atinga puapinga kia Iehova; e i te openga, kua āriki a Iehova i to Iesu toto puapinga tei akamaringiia. Me kare teia au takainga e raveia, kare te koreromotu ou i akamata ake.

Kare te Pipiria i akakite mai inaea a Iehova i āriki ei i te puapinga o to Iesu atinga. No reira, kare i papu inaea te koreromotu ou i akamanaia ai e i akamataia ai. Noatu rai, kua kite tatou e kua aere a Iesu ki te rangi e tai ngauru rā i mua ake ia Penetekote. (Anga. 1:3) I roto i te reira tuatau poto ua, kua oronga aia i te puapinga o tona atinga kia Iehova, tei āriki i te reira. (Ebe. 9:12) Kua akapapuia teia i tei kite mataia i Penetekote. (Anga. 2:1-4, 32, 33) Kua akanooia e kua akamata iora te koreromotu ou.

No reira, kua akamanaia e kua akatinamouia te koreromotu ou i muri ake i te āriki anga a Iehova i te puapinga o to Iesu toto akamaringiia. Akamata iora te koreromotu kia Iesu ei Taunga Maata, e ei Rotopu no te reira.—Ebe. 7:25; 8:1-3, 6; 9:13-15.