O dokazija sikavena kaj o Isus ulo Prvosvešteniko keda krstingja pe ko 29 berš a.e. Kotar džanaja akava? Keda krstingja pe, o Isus sikavgja kaj tano spremno te del plo životo sar žrtva ko simbolično žrtveniko kova so pretstavinela e Devleskiri „volja“ (Gal. 1:4; Evr. 10:5-10). O simbolično žrtveniko postojnela taro momenti keda o Isus krstingja pe. Adaleske šaj te vakera kaj o baro duhovno hrami postojnela taro adava momenti, soske o žrtveniko tano glavno delo taro adava duhovno hrami. Ko akava hrami, okola so sikavena vera ki otkupno žrtva e Devleskere Čhaveskiri šaj te služinen e Jehovaske ko prifatlivo način (Mat. 3:16, 17; Evr. 5:4-6).

Otkeda počmingja te postojnel o baro duhovno hrami, potrebno sine prvosvešteniko te služinel adari. Adaleske o Jehova pomazingja e Isuse „sveti duhoja hem silaja“ (Dela 10:37, 38; Mar. 1:9-11). Sepak, soske šaj te ova sigurna kaj o Isus sine čhivdo sar Prvosvešteniko angleder te merel hem te voskresninel? E Aroneskoro primer hem e prvosveštenikongoro so služingje pali leste ka pomožinen amenge te odgovorina ko akava pučibe.

Sprema e Mojseeskoro zakoni, samo o prvosvešteniko smejnela sine te khuvel ki Najsveto svetinja. Akaja prostorija sine odvojmi zavesaja tari Svetinja. O prvosvešteniko khuvela sine pali adaja zavesa samo ko Dive prostibaske o grevija (Evr. 9:1-3, 6, 7). O Aron hem leskere naslednikija sine pomazime sar prvosveštenikija angleder te khuven pali doslovno zavesa ko sveto šatori. Znači, o Isus da mora sine te ovel čhivdo sar Prvosvešteniko ko e Jehovaskoro baro duhovno hrami angleder te merel hem palo adava te nakhel ko životo ko nebo preku i simbolično zavesa, koja so pretstavinela leskoro manušikano telo (Evr. 10:20). Tari adaja pričina, o apostol Pavle vakerela kaj o Isus alo „sar prvosvešteniko“ hem palo adava khuvgja „ko nebo“ (Evr. 9:11, 24).

O nevo sojuz sine vospostavimo hem počmingja te važinel ko isto vreme. Soske vakeraja akava? Te šaj adava sojuz te ovel vospostavimo hem te počminel te važinel, sine potrebna trin čekorija. Kola sine adala?

Prvo, o Isus pojavingja pe anglo Jehova; dujto, o Isus rodingja taro Jehova te prifatinel i žrtva koja so ov dengja la; hem trito, o Jehova prifatingja leskiri žrtva. O nevo sojuz našti sine te počminel te važinel sa džikote na sine kerde akala trin čekorija.

I Biblija na vakerela amenge keda točno o Jehova prifatingja e Isuseskiri žrtva. Adaleske, našti točno te vakera ko kova momenti o nevo sojuz sine vospostavimo hem počmingja te važinel. Sepak, džanaja kaj o Isus gelo ko nebo deš dive angleder i Pedesetnica (Dela 1:3). Ko nesavo momenti taro adava kratko periodi, ov dengja pli žrtva e Jehovaske, koja so ov prifatingja la (Evr. 9:12). Akava jasno dikhlja pe ki Pedesetnica (Dela 2:1-4, 32, 33). Jasno tano kaj tegani o nevo sojuz više važinela sine.

Znači, o nevo sojuz sine vospostavimo hem počmingja te važinel otkeda o Jehova prifatingja e Isuseskiri žrtva hem vklučingja e pomazanikon ko adava sojuz. O Prvosvešteniko o Isus ulo posredniko ko adava sojuz (Evr. 7:25; 8:1-3, 6; 9:13-15).