Okuli kw’Ebibliya kuyerekine oku Yezu abire Mudahwa Mukulu erhi abatizibwa omu mwaka gwa 29 mwakano kasanzi kirhu. Bici birhuyemezize ntyo? Obubatizo bwa Yezu bwâli nka nterekêro ahanâga oku mazabahu lyo ciba cimanyiso c’okuhikiriza “obulonza” bwa Nnamhanga. (Gal. 1:4; Habr. 10:5-10) Amazabahu gali gabulagirire bwenene omu hekalu. Erhi Yezu abatizibwa arhondeza ehekalu nkulu y’ekiroho, caba cimanyiso c’okuha Yehova enterekêro ecîre kugerera engombôlo ya Yezu. Enterekero nayo yarhangiraga yahanwa erhi Yezu ahâna obuzine bwage nterekêro. Amazabahu ciri cigabi cikulu c’enterekêro y’ekiroho.​—Mat. 3:16, 17; Habr. 5:4-6.

Erhi ehekalu nkulu y’ekiroho erhondêra, byahûna oku omudahwa mukulu naye abonekane lyo enterekêro zikajirikana. Ly’oyo mudahwa mukulu abonekana, Yezu ‘ashigwa amavurha n’iroho litagatifu n’okuyunjuzwa misi.’ (Ebijiro by’Entumwa 10:37, 38; Marko 1:9-11) Ka Yezu abîre Mudahwa Mukulu embere z’okufâ n’okufûlwa kwage? Neci. Olwiganyo lwa Haruni n’abandi badahwa bayishâga enyuma zage lwanarhurhabala rhushuze neci kw’er’idoso.

Nk’oku Irhegeko lya Musa lyal’irhegesire, Omudahwa Mukulu yene ye wal’ikwanine aje omu Hatagatifu, na buzinda aje omu Hatagatifu-Bwenene h’ehekalu. Aho Hatagatifu hali hagabe n’erido. Omudahwa Mukulu akag’ija omo olusiku lw’okushukulula ebyaha. (Habr. 9:1-3, 6, 7) Nka kula Haruni n’abandi badahwa bashigagwa amavurha embere bayigule “erido” y’etabernakulo, Yezu naye ajijirwe Mudahwa Mukulu w’ehekalu y’ekiroho ya Yehova embere afê na buzinda ahâna akalamo kage na ntyo ayigula erido, kw’okuderha ahâna omubiri gwage gw’obumuntu gube ‘nterekêro.’ (Habr. 10:20) Oko kwa rhumaga, entumwa Paolo yaderha oku Yezu ali “nka mudahwa mukulu,” ajire ‘omw’ihema linene na liyubake bwinja arhali n’enfune z’omuntu,’ omu “mpingu” mwo nnanene.​—Habr. 9:11, 24.

Nta lubero luli ekarhi k’amango endagano mpyahya yarhondêraga n’amango yamanyikanaga. Bulya gurhi? Erhi Yezu aja empingu ahâna akalamo kage kimana erhi rhwe rhurhumire. Omu kujira ntyo, ajira ecijiro carhumaga endagano mpyahya yarhondêra. N’omu kujira ntyo, kwarhabala endagano mpyahya emanyikane bwinja n’obulagirire bwayo.

Burhangiriza Yezu abonekine embere za Yehova; akulikiza aha Yehova obulagirire bw’enterekêro yage na buzinda Yehova ayemera omuko gwa Yezu gw’engulo ndarhi gwabulajikaga. Endagano mpyahya erhal’icirhondêra yakola embere ebyo byoshi bijirikane.

Ebibliya erharhubwiziri n’obwalagale mangaci Yehova ayemerâga enterekêro y’engulo ndarhi ya Yezu. Co cirhumire rhurhakamany’iderha n’obwalagale mangaci endagano mpyahya yamanyikana erhi kurhondêra kwakola. Cikoki, rhumanyire oku Yezu ajîre empingu nsiku ikumi embere z’epantekoste. (Ebijiro by’Entumwa 1:3) Bibonekine oku mw’ako kasanzi kasungunu, Yezu aha Yehova enterekêro na Yehova ayiyemera. (Habr. 9:12) N’ebiyerekire ntyo byabonesire bwinja oku Pentecoste omu mwaka gwa 33 mwakano kasanzi kirhu. (Ebijiro by’Entumwa 2:1-4, 32, 33) Ago mango gwo endagano mpyahya yabonekine yanarhondêra yakola.

Kwa bofofi, endagano mpyahya yayemeragwa n’okurhondêra yakola enyuma za Yehova okuyemera omuko gwa Yezu gw’engulo ndarhi gwabulagâgwa. Ago mango ly’endagano mpyahya yarhonderaga yakola na Yezu ye Mulagizi muli eyo ndagano.​—Habr. 7:25; 8:1-3, 6; 9:13-15.