Taje leellishshanno garinni, Yesuusi Kakkalaanote Biilo ikkinohu 29 M.D. cuuami woyiteeti. Tenne mayinni anfeemmo? Isi cuuami woyite Maganu fajjo riqiwannohu lawishshunnihu kakkalote bayicho heeshshosi kakkalo assate maahoyye yiinota leellishino. (Gal. 1:4; Ibi. 10:5-10) Kuni lawishshunnihu kakkalote bayichi loosu aana hosa hanafinohu Yesuusi cuuami yannanni kayiseeti; hakko daafira, Yihowara qullaawa magansiˈra shiqishiˈrate kaaˈlitannonke qixxaawo riqiwannohu ayyaanaamittennihu qullaawu minino loosu aana hosa hanafinohu hatte yannara ikkikki digatino. Kakkallanni bayichi ayyaanaamittennihu qullaawu mini giddo lowo geeshsha hasiisannoho.—Mat. 3:16, 17; Ibi. 5:4-6.

Bayiru ayyaanaamittennihu qullaawu mini xintami woyite, hakko soqqamannohu kakkalaanote biili hasiisino. Konnira Yihowa, Yesuusa “Qullaawu Ayyaaninni buurino” hattono “wolqa uyinosi.” (Soq. 10:37, 38; Maq. 1:9-11) Ikkina, Yesuusi reyaranna reyotenni kaˈˈara albaanni Kakkalaanote Biilo ikke buuraminota mayinni anfeemmo? Aarooninna sirchisi Muse seeri garinni kakkalaanote biilo ikkite soqqantanno yannara ikkannore xiinxalline tenne huwata dandiineemmo.

Muse Seeri garinni, gallanni dunkaanira nooha Qullaawa Holgeno ikko yannate gedensaanni qullaawa mine nooha Qullaawa Holge ea dandaanohu kakkalaanote biilo callaho. Qullaawa Holge Qullaawu Dargiwiinni baddannoti dukkote. Kakkalaanote biili hatte dukko widoonni hige saˈˈa dandaannohu Cubbo Agursiisate Barra callaati. (Ibi. 9:1-3, 6, 7) Aarooninna sirchisi kakkalaanote biilo ikkite buurantinohu gallanni dunkaanira noo “dukko” widoonni higge saˈara albaanni ikkinonte gede, Yesuusino Yihowahu bayiru qullaawu minira Kakkalaanote Biilo ikke buuraminohu reyara albaanninna “dukkote widoonni, hatto yaano mannimmasi” widoonni iimira eara albaanni ikkikki digatino. (Ibi. 10:20) Soqqamaasinchu Phaawuloosi Yesuusi Kakkalaanote Biilo ikke dayinotanna ‘mannu anganni seekkinoonnikki dukkana’ yaano iimira einota coyiˈrinohu iseraati—Ibi. 9:11, 24.

Yesuusi iimira haˈre ninke daafira guuta heeshshosi shiqishi woyite haaru gondoori loosu aana hosanno woy kaajjanno doogo hanafisiisino. Kuni ikkinohu hiittoonniiti?

Umihunni, Yesuusi, Yihowa albira shiqino; hakkiinni, kakkalosi waaga Yihowara shiqishino; jeefote Yihowa duˈnantinote Yesuusi mundee waaga adhino. Haaru gondoori loosu aana hosinohu kuni sasunku coyi ikkihu gedensaanniiti.

Qullaawu Maxaafi Yihowa Yesuusi mundee waaga adhino yanna bade dikulanno. Konnira haaru gondoori loosu aana hosa hanafinohu tenne yannaraati yine coyiˈra didandiineemmo. Ikkollana, Yesuusi iimira harinohu Phenxeqosxete ayyaana ayirrinsara tonnu barri gate heeˈreenna ikkinota anfoommo. (Soq. 1:3) Kuri barruwa giddo Yesuusi kakkalosi waaga Yihowara shiqishino; Yihowano Yesuusi mundee waaga adhino. (Ibi. 9:12) Phenxeqosxete ayyaani barra ikkinori haaru gondoori loosu aana hosinota xawise leellishanno. (Soq. 2:1-4, 32, 33) Hatte yannara haaru gondoori loosa hanafe nooti dihuluullissannote.

Haranchunni, haaru gondoori loosu aana hosa hanafinohu, Yihowa Yesuusi mundee waaga adhihunna buurantinori konni gondoori wido ikkitanno gede assihu gedensaanniiti. Hakkiinni Kakkalaanote Biili Yesuusi mereerima ikkinohu haaru gondoori loosa hanafino.—Ibi. 7:25; 8:1-3, 6; 9:13-15.