Tolekɔ la tolembetelo tɛnyɛ djɛ Yeso ayalaka Nkfudji k’Ekekete wina wɔ ndabatizama lá 29 Ɛ.K. (l’ɛtɛndɔ kɛso). Wopo wɔkɔnge ewaso n’kambo n’tshɔ? Wina wɔ Yeso ndabatizama, nde ɛnyɛka djɛnde akɔpaka nangha ɛkɔpa kɛ Ndjambe. N’kambo n’tshɔ nsakisolaka djɛnde akɔpa ndambola lowiko lɔnde ngete olambo djɛ nfuta oshinga wɔ mbendo. (Nga. 1:4; Heb. 10:5-10) Idjena yiyatshumbaka elambo oyalawɔnde djingingi djɛ ɛkɔpa kɛ Yehova. Wina wɔ Yeso ndalambola lowiko lɔnde, ayalaka ngete amboyalambola lá idjena yolambolawɔ elambo. Idjena yɛ djingingi yiyatshumbaka elambo iwangaka wina wɔ Yeso ndalongola batishimo. Ndjokamaka djɛ tɛmpɛlɔ k’ekekete kɛ lonyuma kewangaka ngo lá wina wɔ Yeso ndɔtshi batisimo. Djɛkondeke tɛmpɛlɔ k’ekekete kɛ lonyuma alekɔ djingingi djɛ akano ankfumɔ wa Yehova ndɔshi wa tokotshɛ djɛ ndɔtɛmɔla lá lɛdji lɔ wɔlɔ má okotshɔ wɔ olambo wɔ Yeso.​—Mat. 3:16, 17; Heb. 5:4-6.

Ladjikɛnde tɛmpɛlɔ k’ekekete kɛ lonyuma kembopikama, ayalaka djonyi djɛ nkfudji k’ekekete ntokamba l’eteyi. Dj’iwɔ nkotshɛ n’kambo n’tshɔ, Ndjambe akfutaka Yeso avuta la ‘nyuma k’ekina edjinge la nkfulu.’ (Ele 10:37, 38; Mar 1:9-11) Iya, wopo wɔkɔnge woyɛso ladjɛ ndaatshikikɛ djɛ Yeso akomaka Nkfudji k’Ekekete la ntondo kɛ nyɔyi edjinge kɛ ekfundwelo kɛnde? Iso ntanaka okoma wɔ sɔlɔ wina woshishimaso ndjɔmbɔmba kɛ Arɔna edjinge kɛ wɔhɛnisa wayisa ndokamba ngete ankfundji yɛ l’adjiko wel’anse k’ɛlɛmbɛ wɛ Mɔsɛ.

Etengo ɛlɛmbɛ iyalɔmbaka, ngo nkfundji k’ekekete ndeke lokokaki ndjingela lá Idjena y’Ekina k’efula lá tabɛrnaklɛ, m’eteyi, lá Idjena yɛ Ekina k’efula yelá Tɛmpɛlɔ. Esendja k’odjipɔ kákapolaki Idjena yɛ Ekina k’efula kɛsɔ la Idjena y’Ekina. Nkfudji k’ekekete ahetaki lá wedji w’esendja (irido) yɛkɔ ngo Loshi lɔ Edjipisanyelo k’evunga. (Heb. 9:1-3, 6, 7) Ngo ngete Arɔna nya ɛhɛna wɛnde iya kfutamaka avuta djɛ ndjala ankfundji yɛ kekete lá ntondo kɛnde mpeta tá wedji onkina wɔ “esendja kɛ odjipɔ [kɛ nsɔsɔlɔ]” djelá tabɛrnaklɛ, djɛko ndeke Yeso ayalaka ngo ladjɛ nkfutama avuta ngete Nkfudji k’Ekekete kelá tɛmpɛlɔ k’ekekete kɛ lonyuma kɛ Yehova la ntondo kɛnde mvɔ edjinge m’eteyi mpeta tá wedji onkina wɔ “esendja k’odjipɔ, kana ntepela ente demba djɛ nde” tá lowiko lotá olongo. (Heb. 10:20) Ngo l’elonga kɛsɔ, ndeke ɔpɔstɔlɔ Poolo ndatepela lá n’kambo djɛ Yeso ante nde ayɛka ntondo ntondo ngete ‘Nkfudji k’Ekekete’ edjinge m’eteyi ‘nde ingelaka lá mvulu kɛ mpɛma keleka ekekete la keleka djɔ ketapikama la ɛwɔ’ ntepala ente ‘l’olongo.’​—Heb. 9:11, 24.

Lako otshikitano wolekɔ lá wina wopikamisa iseke yɛ bango edjinge wina wɔ ndawange olemo. Wopo wɔkɔnge? Wina wɔ Yeso ndahande t’olongo edjinge ndɔtɛnyɛ lowiko lɔnde ngete onto wɔ djɔ lá wapɔ wɔso, nde atapolaka djina djɛ ntondo má wiina asato windayale ladjɛ nyɛnyɛ ante iseke yɛ bango yimbompikama. Wiina wasɔ wananghaka djɛ iseke ntateyɛ l’olemo. Wiina wakɔnge waso?

Djɛntondo, Yeso ɛnamaki lá ntondo kɛ Yehova: m’eteyi, Yeso apɛyɛka oshinga wɔ olambo wɔnde te Yehova, l’ekomo Yehova awolaka ekila wɛ n’tsho wɛ Yeso wetshandjisa, ngo wiina wasɔ ndeke iseke yɛ bango ndookamba olemo.

Bible m’patoshimela kɔɔ wina wɔ Yehova ndawola olambo wɔ n’tsho wɔ Yeso. Djɛko ndeke topakoke ntepela la eshikikelo kenkfumɔ wina wɔkɔnge iseke yɛ bango iyatatshɛ n’kamba olemo wɔnde. Lakoko, iso ndjewaka ente Yeso ahandaka t’olongo lá ntondo kɛ nshi djomi yɛ Pantekɔsta. (Ele 1:3) Lá mbamba imɔtshi l’etena k’itenyi kɛso, nde ɛnyɛka oshinga wɔ n’tsho wolekɔ la olambo wɔnde te Yehova edjinge Yehova owawolaka. (Heb. 9:12) Nsɔsɔlɔ kɛ djoyi n’tshɔ Kɛnamaka papoo lá Pantekɔsta. (Ele 2:1-4, 32, 33) Wina wɔsɔ iseke yɛ bango yepikamaka nsɔsɔlɔ edjinge yetatshɛka n’kamba olemo.

Lá yopasɛ. Iseke yɛ bango ishikimalaka edjinge iyɛka ndoshila mɔkɔngɔ wɔ Yehova ndjawola oshinga w’ekila wɛ Yeso winda tshanghanyɛ. M’eteyi, iseke yɛsɔ itateyɛka n’kamba olemo, edjinge Yeso Nkfudji k’Ekekete alekɔ nkamba ngete Ontepedji.​—Heb. 7:25; 8:1-3, 6; 9:13-15.