Kwi myanda ayilesha’shi Yesu baadi mufikye bu Tshite-mwakwidi mukata e panundu nsaa ibaadi mubatshishibwe mu kipwa kya 29 bino bipungo byetu B.B. Atwibyuuku naminyi? Nsaa ibaadi mubatshishibwe, baadi muleshe’shi baadi akumiina kulambula muwa waye bu kipwandjikisho kya kilambwilo akilesha ‘kikyebe’ ky’eshimba dy’Efile Mukulu. (Nga. 1:4; Eb. 10:5-10) Kilambwilo nyi nkitu kii na muulo ukata mu ntempelo, na abimweka’shi tempelo a mu kikudi baadi naaye mwikale kwanka nka dyaadya efuku dya kubatshishibwa kwa Yesu. Ntempelo mukata a mu kikudi a Yehowa alesha mpángo yadi mwate bwa’shi tumulangwile mu mushindo wibuwa wimeene pa mulambu wa Yesu.​—Mat. 3:16, 17; Eb. 5:4-6.

Ntempelo mukata a mu kikudi baadi na lukalo lwa tshite-mwakwidi mukata e pa nuundu. Bwa kupudisha luno lukalo, Yesu baadi mwedibwe mwimu ku “bukome bwa kikudi kiselele.” (Bik. 10:37, 38, EEM; Mak. 1:9-11) Byabya, mushindo kinyi watushinkamisha’shi abaadi basangule Yesu bu Tshite-mwakwidi mukata e pa nuundu kumpala kwa kufwa na kusaanguka kw’aye? Kileshesho kya Aaron na batshite-mwakwidi abafikile kunyima kwaye, akitukwasha bwa kwaluula ku luno lukonko.

Mwiya wa Moyiise ubaadi awamba’shi, nka penda tshite-mwakwidi mukata e pa nuundu nyi baadi mulombene kutwela mu Mbalo ikile Kishila ya mu tabernakele, na kunyima mu Mbalo ikile Kishila ya mu Ntempelo. Rideau nyi baadi mwabuule Mbalo ikile Kishila na Mbalo ya Kishila. Tshite-mwakwidi baadi akidi uno rideau penda Mwifuku dya kushimisha milwisho. (Eb. 9:1-3, 6, 7) Nka bu bibaabadi basangule Aaron na booso bafube kunyima kwaye kumpala kwa kutwela mu Kadimbo kakile kishila, Yesu naamu baadi musangudibwe bu tshite-mwakwidi mukata e pa nuundu kumpala kwadya kufwa, paapa aye nkusabuka ‘lushiko [rideau] kwamba’shi mbidi yaaye,’ bwa muuwa mwiyilu. (Eb. 10:20) Bwa kano kabingilo, Mpoolo mutumiibwa amba Yesu bu “tshite mwakwidi mukata” na mukile mu “shibo y’epema yikile bukata na yikile kupwidika yishii yibakiibwe na maasa,” kwamba’shi “yishii ya pa yino nsenga.”​—Eb. 9:11, 24.

Ta kwi kwilekena pankatshi pa nsaa ibaabadi bakumiine kilombeno kipya na ibakidi kibangye kufuba nya. Bwakinyi byabya? Nsaa ibaadi Yesu mwende mwiyilu, na kulambula muwa waye upwidjikye bwetu, bakitshine etabula dya kumpala dya ku matabula asatu abaadi aatungu bwa’shi kilombeno kipya kikumiinyibwe. Aa matabula amune nyi abaadi alombene kukita bwa’shi kilombeno kibangye kufuba. Matabula kinyi?

Mwanda wa kumpala, Yesu bafikile kumpala kwa Yehowa; wakabidi, baadi mutushe mulambu kwi Yehowa; na wakasatu, Yehowa baadi mukumiine muulo wa mase abaadi Yesu mutuushe. Kumpala kwa ino myanda kukitshika, kilombeno kipya takibaadi kibande kubanga kufuba nya.

Bible talesha efuku dibaadi Yehowa mukumiine mulambu wa Yesu. Nyi bwakinyi, tatwibalombene kwakula na kushinkamisha kooso efuku dibaadi Yehowa mukumiine kilombeno kipya na mafuku akidi kibangye kufuba. Anka atuuku’shi, Yesu baadi mwende mwiyilu mafuku ekumi kumpala kw’Efuku dya Pantekote. (Bik. 1:3) Munda mwa aa mafuku apeela, baadi mutushe mulambu kwi Yehowa, aye nkwi ukumiina. (Eb. 9:12) Kishinkamisho kya bino kibaadi kimwenekye patooka mwifuku dya Pentekote. (Bik. 2:1-4, 32, 33) Nka paapa, kilombeno kipya kibaadi kibangye kufuba.

Mu kikoso, kilombeno kipya kibaadi kikumiinyibwe na kufuba kunyima kwa Yehowa kukumiina mulambu wa mase a Yesu. Ku banga paapa, kilombeno kipya kibabangile kufuba na Tshite-mwakwidi mukata e pa nuundu, Yesu, mwikale bu mmufumankashi sunga’shi mediatere aakyo.​—Eb. 7:25; 8:1-3, 6; 9:13-15.