Soni dë di ta lei taa Jesosi bi toon Gaan Mindima di a bi tei dopu a di jaa 29 Ba.K. Andi ta lei u di soni dë? Wë di Jesosi bi tei dopu, a bi lei taa a bi dë kabakaba u du andi Gadu „kë”. Di soni aki bi kë taki taa a bi dë kabakaba u dëdë paka paima da u (Gal. 1:4; Heb. 10:5-10). A bi dë da Jehovah kuma Jesosi bi tja wan soni go buta a wan begi tafa u tjuma dëën. U di di begitafa aki da wan pisi u di Wosu u Gadu di wa sa si ku wojo, mbei u ta biibi taa di Wosu aki seti a di ten di di begitafa seti. Di Wosu u Gadu di wa sa si ku wojo da hii dee soni di Jehovah seti fuu sa dini ën a di soifi fasi.​—Mat. 3:16, 17; Heb. 5:4-6.

Di Wosu u Gadu bi abi wan gaan mindima fanöudu. Fëën mbei Jehovah salufu Jesosi faa toon gaan mindima. A bi salufu ën ku „di jeje fëën”, söseei ku „di gaan kaakiti fëën” (Tjab. 10:37, 38; Maik. 1:9-11). Ma unfa u sa sabi ee Jesosi bi toon Gaan Mindima ufö a dëdë, söseei ufö a weki ko a libi baka? Wë di woto u Alon ku dee woto gaan mindima dee bi ko nëën baka, o heepi u fuu ko sabi di soni aki.

Dee wëti dee Jehovah bi da Mosesi bi ta taki taa di gaan mindima wanwan bi sa denda go a di Möön Santa kamian. Wan gaan koosu bi ta paati di Möön Santa kamian ku di Santa kamian. Di gaan mindima bi ta wai di gaan koosu aki denda go a di Möön Santa kamian, a di daka ka dee Isaëli sëmbë bi ta begi Gadu faa da de paadon u dee zöndu u de (Heb. 9:1-3, 6, 7). De bi salufu Alon ku dee woto womi dee bi ta du di mindima wooko ufö de bi sa wai di gaan koosu denda go a di Möön Santa kamian. Sö nöö u sa taki taa de bi salufu Jesosi faa toon Gaan Mindima ufö a dëdë. Nöö ’di sinkii u Masa Jesosi, hën wë da di gaan koosu di tënë jabi da u fuu sa go dou a Gadu awaa’ (Heb. 10:20). Di soni aki mbei apösutu Paulosu bi taki u Jesosi taa a ko kuma wan „Gaan Mindima”, nöö „an bi denda go a wan wosu di libisëmbë maun mbei”. Di soni aki ta lei taa di wosu ka Jesosi bi denda go, da liba ala.​—Heb. 9:11, 24.

Na un ten di njunjun buka bigi wooko? Dii soni bi musu pasa ufö di njunjun buka bigi wooko. Andi da dee dii soni aki?

Di fosu soni, hën da Jesosi bi musu go a Jehovah fesi a liba ala. Baka di dë, Jesosi bi musu hakisi Jehovah faa tei di paima di a paka. Nöö di lasiti soni, hën da Jehovah bi musu tei di paima di Jesosi paka ku di buuu fëën. Baka di hii dee soni aki bi pasa, nëën ufö di njunjun buka bigi wooko.

Di Bëibel an ta piki u na un ten Jehovah bi tei di paima u Jesosi. Fëën mbei wa sa taki na un ten di njunjun buka bigi wooko. Ma u sabi taa Jesosi bi toona go a liba ala, teni daka ufö di Pensiti daka (Tjab. 1:3). A di kölö pisiten dë, a da Jehovah di paima, hën Jehovah tei di paima (Heb. 9:12). U sa dë seiki u di soni aki, u di wan soni bi pasa a di Pensiti daka u di jaa 33 Ba.K. (Tjab. 2:1-4, 32, 33). Di njunjun buka bi seti kaa, nöö Jehovah bi ta wooko ku ën.

Wë ee fuu taki ën, di njunjun buka bi seti di Jehovah bi tei di paima di Jesosi bi paka ku di buuu fëën. Di njunjun buka bi bigi ta wooko sensi di ten dë, nöö Jesosi da di Gaan Mindima.​—Heb. 7:25; 8:1-3, 6; 9:13-15.