Yesus tron granpriester di a dopu na ini a yari 29. Fa wi du sabi disi? Di Yesus dopu a sori taki a ben de klariklari fu du a „wani” fu Gado èn fu gi en libi leki wan ofrandi (Gal. 1:4; Hebr. 10:5-10). Gi Yehovah a ben de neleki Yesus ben tyari wan ofrandi tapu wan altari. Na agersi altari disi seti di Yesus dopu. Èn fu di na altari na wan pisi fu na agersi tempel, meki wi e bribi taki na agersi tempel seti na a srefi ten. Na agersi tempel disi na ala den sani di Yehovah seti so taki wi kan anbegi en na a yoisti fasi.​—Mat. 3:16, 17; Hebr. 5:4-6.

Na agersi tempel ben abi wan granpriester fanowdu. Dati meki Yehovah poti Yesus leki granpriester. A salfu en „nanga santa yeye èn nanga krakti” (Tori 10:37, 38; Mark. 1:9-11). Ma fa wi du sabi taki Yesus tron granpriester fosi a dede èn fosi a kisi wan opobaka? Na eksempre fu Aron nanga den wan di ben tron granpriester baka en e yepi wi fu feni a piki.

A Wet ben taki dati soso a granpriester ben mag go na ini a Moro Santa Presi fu a tabernakel. Wan garden ben prati a Santa Presi fu a Moro Santa Presi. A granpriester ben kan pasa a garden dati soso tapu a dei te sma ben e tyari ofrandi fu tapu den sondu (Hebr. 9:1-3, 6, 7). Aron nanga den tra Leifisma ben tron granpriester fosi den ben „pasa a garden” fu go na ini a Moro Santa Presi fu a tabernakel. Na so a de tu taki Yesus ben tron granpriester kaba fosi a dede èn fosi a pasa a garden fu go na hemel. „A garden dati na en skin” (Hebr. 10:20). Dati meki na apostel Paulus taki dati Yesus kon „leki wan granpriester” èn a go na ini „hemel srefi”.​—Hebr. 9:11, 24.

O ten a nyun frubontu bigin wroko? Dri sani ben musu pasa fosi a nyun frubontu ben o bigin wroko. San na den dri sani disi?

A fosi sani na taki Yesus ben musu kon na fesi Yehovah na ini hemel. A di fu tu sani na taki Yesus ben musu aksi Yehovah fu teki na ofrandi fu en. A lasti sani na taki Yehovah ben musu teki na ofrandi fu Yesus. Baka di den dri sani disi du, dan a nyun frubontu bigin wroko.

Bijbel no e taigi wi o ten Yehovah teki na ofrandi fu Yesus. Dati meki wi no man taki sortu dei a nyun frubontu bigin wroko. Ma wi sabi taki Yesus go na hemel tin dei fosi a Pinksterfesa (Tori 1:3). Na ini a syatu pisi ten dati a aksi Yehovah fu teki na ofrandi fu en èn Yehovah ben feni na ofrandi fu en bun (Hebr. 9:12). Den sani di pasa na a Pinksterfesa e sori wi taki a nyun frubontu ben bigin wroko.​—Tori 2:1-4, 32, 33).

Soleki fa wi si, a nyun frubontu bigin wroko di Yehovah teki na ofrandi fu Yesus èn di a tyari den salfuwan kon na ini a frubontu disi. Yesus na a granpriester èn a mindriman fu a nyun frubontu.​—Hebr. 7:25; 8:1-3, 6; 9:13-15.