Vumbhoni byi kombisa leswaku Yesu u ve Muprista Lonkulu endzhaku ka loko a khuvuriwile hi 29 C.E. Hi byihi vumbhoni bya kona? Hi siku leri a khuvuriweke ha rona, Yesu u tinyikerile tanihi xitlhavelo ealitarini leyi fanekiselaka ku endla ku “rhandza” ka Xikwembu. (Gal. 1:4; Hev. 10:5-10) Leswi alitari yoleyo yo fanekisela yi veke kona ku sukela loko Yesu a khuvuriwile, swi vula leswaku tempele leyikulu ya moya, leyi yimelaka vugandzeri lebyi tengeke bya Yehovha lebyi sekeriweke egandzelweni ra nkutsulo, na byona byi fanele byi sungule hi nkarhi wolowo ku tirha. Alitari i ya nkoka swinene etempeleni yoleyo ya moya.—Mat. 3:16, 17; Hev. 5:4-6.

Leswi se a ku ri ni tempele leyikulu ya moya, a ku laveka muprista lonkulu loyi a ta tirha eka yona. Hikwalaho, Yehovha u tote Yesu “hi moya lowo kwetsima ni matimba.” (Mint. 10:37, 38; Mar. 1:9-11) Xana hi nga tiyiseka njhani leswaku Yesu u hlawuriwe ku va Muprista Lonkulu a nga si dlayiwa ni ku pfuxiwa? Xikombiso xa Aroni swin’we ni muprista lonkulu loyi a n’wi siveke ehansi ka Nawu wa Muxe, xi hi pfuna ku kuma nhlamulo.

Hi ku ya hi Nawu, i muprista lonkulu ntsena loyi a fanele ku nghena endhawini yo Kwetsima Ngopfu etabernakeleni kutani endzhakunyana endhawini yo Kwetsima Ngopfu etempeleni. Tindhawu leti to Kwetsima a ti hambanisiwe hi nguvu. Muprista lonkulu a tsemakanya nguvu yoleyo hi Siku ro Kombela ku Rivaleriwa ntsena. (Hev. 9:1-3, 6, 7) Tanihi leswi Aroni ni mutlhandlami wakwe va totiweke va va vaprista lavakulu emahlweni ko va va nghena etabernakeleni va tsemakanya “nguvu” ya xiviri, Yesu na yena u fanele a hlawuriwe ku va Muprista Lonkulu wa tempele leyikulu ya moya ya Yehovha a nga si dlayiwa ni ku pfuxiwa. (Hev. 10:20) Hi yona mhaka leyi muapostola Pawulo a vulavuleke hi Yesu tanihi loyi a taka “a ri muprista lonkulu” naswona a tsemakanyeke “ntsonga lowukulu ni lowu hetisekeke ngopfu lowu nga endliwangiki hi mavoko,” ku nga “etilweni hi koxe.”—Hev. 9:11, 24.

A ku na ku hambana exikarhi ka siku leri ntwanano lowuntshwa wu simekiweke ha rona ni siku leri wu sunguleke ku tirha ha rona. Hikwalahokayini hi vula tano? Loko Yesu a tlhandlukele etilweni kutani a nyikela hi vutomi byakwe lebyi hetisekeke hikwalaho ka hina, u teke goza ro sungula eka manharhu lawa a fanele a ma teka leswaku a simeka ntwanano lowuntshwa ximfumo. Nakambe goza rero ri endle leswaku ntwanano wolowo wu namba wu sungula ku tirha. Hi wahi magoza wolawo lawa hi vulavulaka ha wona?

Ro sungula, Yesu u ye emahlweni ka Yehovha; ra vumbirhi, Yesu u nyikele xitlhavelo xakwe eka Yehovha; ra vunharhu, Yehovha u amukele ngati ya Yesu leyi halatiweke. Loko magoza lawa ma nga si tekiwa, ntwanano lowuntshwa a wu nga si simekiwa.

Bibele a yi hi byeli leswaku kahlekahle Yehovha u xi amukele rini xitlhavelo xa Yesu. Hikwalaho, a hi nge swi koti ku boxa hi ku kongoma leswaku ntwanano wa nawu wu simekiwe ni ku sungula ku tirha rini. Kambe lexi hi xi tivaka hileswaku Yesu u tlhandlukele etilweni ka ha sale masiku ya khume leswaku ku fika Pentekosta. (Mint. 1:3) Hi nkarhinyana wolowo, u nyikele hi xitlhavelo xakwe eka Yehovha naswona Yehovha u xi amukerile. (Hev. 9:12) Vumbhoni bya leswaku ntwanano lowuntshwa se wa tirha byi vonake kahle hi Pentekosta. (Mint. 2:1-4, 32, 33) Hi nkarhi wolowo, a swi ri erivaleni leswaku ntwanano lowuntshwa se wu simekiwile naswona se wu sungurile ku tirha.

Hi ku komisa, ntwanano lowuntshwa wu simekiwe ni ku sungula ku tirha endzhaku ka loko Yehovha a amukele ngati ya Yesu leyi halatiweke ni ku nghenisa vatotiwa eka ntwanano wolowo. Loko ntwanano wolowo wu sungula ku tirha, Yesu u ve Muprista Lonkulu, tlhelo Muhlanganisi.—Hev. 7:25; 8:1-3, 6; 9:13-15.