Иисус Быдӟым священник луиз, куке асьме вакытысь 29 арын пылатӥськиз. Кытысь ми сое тодӥськомы? Пылатӥськыкуз Иисус возьматӥз, Инмарлэсь эриксэ быдэстон понна, аслэсьтыз улонзэ курбонлы сётыны дась шуыса. Инмарлэсь эриксэ ӵошатыны луэ курбон сётон интыен (Гал. 1:4; Евр. 10:5—10). Та курбон сётон инты кылдӥз Иисус пылатӥськон дыръя. Нош курбон сётон инты храмлэн оглюкетэз луэ бере, озьыен, быдӟым духовной храм со дыре ик кылдӥз, вылды. Быдӟым духовной храм — со Иеговаен кылдытэм радлык, кудӥз Иисуслэн мозмытӥсь курбонэзлы луыса адямиослы юрттэ Инмарлы йыбыртъяны (Матф. 3:16, 17; Евр. 5:4—6).

Быдӟым духовной храмын быдӟым священник ужаны-тыршыны кулэ. Та ужез быдэсъяны Иегова бырйиз аслэсьтыз Пизэ. Со «Иисусэз Святой Духен но кужымен... зырӟыса пуктӥз» (Ап. уж. 10:37, 38; Марк 1:9—11). Нош малы ми оскиськомы, Иисус кулэмезлэсь но улӟемезлэсь азьло Быдӟым священник луиз шуыса? Та юанлы валэктон шедьтон понна, эскеромы Ааронлэсь но со бӧрсьы ужась-тыршись мукет быдӟым священникъёслэсь примерзэс.

Моисей Законъя, скиниялэн, нош берлогес храмлэн но, Святойлэсь но Святой интыяз быдӟым священник гинэ пыраны быгатӥз. Святой интылэсь со катанчиен люкемын вал. Катанчи сьӧры быдӟым священник Чылкытатӥськон-сузяськон нуналэ гинэ пыралляз (Евр. 9:1—3, 6, 7). Аарон но мукет священникъёс скинияысь катанчи сьӧры пыраны ӧз быгатэ, быдӟым священник луытозязы. Озьыен, Иисус Иеговалэн быдӟым духовной храмаз Быдӟым священник луыса пуктэмын вал кулэмезлэсь азьло, озьы ик, «ын пыр — Солэн мугорыз пыр» потыса, инме берытскемезлэсь азьло (Евр. 10:20). Тӥни малы апостол Павел гожтӥз, Христос, «азьпал улонысь ӟечлыклэн Архиереез» луыса, «бадӟымгес но чылкак дун-шектэм, киын лэсьтымтэ скиния пыр... лыктӥз» но «Инме ӝутӥськиз» шуыса (Евр. 9:11, 24).

Выль тупанкыл кутэмын вал но ужаны кутскиз одӥг дыре. Малы ми озьы малпаськомы? Куке Иисус инме ӝутскиз но Инмарез куриз ми понна сётэм курбонзэ басьтыны, со лэсьтӥз куд-ог вамышъёс, кудъёсызлы луыса выль тупанкыл кутэмын вал но ужаны кутскиз. Кыӵе со вамышъёс?

Нырысетӥез, Иисус берытскиз инме Иегова доры; кыкетӥез, Иисус куриз Иеговаез сётэм курбонзэ басьтыны; но куинетӥез, Иегова та курбонэз басьтӥз. Та вамышъёсты лэсьтытозь, выль тупанкыл ӧз ужа.

Библия шонерак уг вера, ку Иегова Иисуслэсь курбонзэ басьтӥз. Озьыен, ми ум быгатӥське шонерак вераны, ку выль тупанкыл кутэмын вал но ужаны кутскиз. Озьы ке но ми тодӥськомы: Иисус инме ӝутскиз асьме вакытысь 33-тӥ арын Витьтонэтӥ нуналлэсь 10 нуналлы азьлогес (Ап. уж. 1:3). Соин ик вераны луоз, ӵапак та вакчи дыр куспын Иисус Иеговаез куриз сётэм курбонзэ басьтыны но, Иегова сое басьтӥз (Евр. 9:12). Витьтонэтӥ нуналэ луэм учыръёсысь адӟыны луиз, выль тупанкыл ужаны кутскиз шуыса. Со дыре луэм учыръёс яркыт возьматӥзы, талы быдэсак оскыны луэ шуыса (Ап. уж. 2:1—4, 32, 33).

Озьыен, йылпумъян лэсьтомы. Выль тупанкыл, кудаз Дурбасьтӥсь луэ Быдӟым священник Иисус, кутэмын но ужаны кутскиз тазьы: Иисус кулӥз, улӟиз но ӝутскиз инме, кытын куриз Иеговаез сётэм курбонзэ басьтыны но кытысен берлогес дышетскисьёсыз вылэ святой дух кисьтӥз (Евр. 7:25; 8:1—3, 6; 9:13—15).