იესოქ მღვდელმთავარო გინირთჷ, მუჟამსით ახ. წ. 29 წანას ინათ. სოვრეშე მიჩქნა თენა? მუჟამსით იესოქ დინათ, თიქ მუშ სიცოცხლე წარადგინ სიმბოლურ სამსხვერპლოს, მუთ ღორონთიშ „ნებას“ განასახიერენს (გალ. 1:4; ებრ. 10:5—10). სამსხვერპლო ტაძარიშ მნიშვნელოვან ნაწილ რე. სიმბოლურ სამსხვერპლო იესოშ ნათუაშე მოჸუნაფილ არსებენს. ათეშენ, დიდებულ სულიერ ტაძარქ ხოლო თე დროს ოკო დიჭყკო არსებობა. იეჰოვაშ დიდებულ სულიერ ტაძარ განასახიერენს ირფელს, მუთ საშვალებას მარზენა, იეჰოვას თეშ ფცათ თაყვან, მუჭოთ მუს მოწონს; თენა იესოშ მსხვერპლიშ საფუძველშა რე შეიოლებერ (მათ. 3:16, 17; ებრ. 5:4—6).

დიდებულ სულიერ ტაძარს მღვდელმთავარ ოკო ჸუნდკო. ათეშენ იეჰოვაქ იესო წმინდა შურით დანიშნჷ მღვდელმთავარო დო „ქიმეჩ ძალა“ (საქ. 10:37, 38; მარ. 1:9—11). მუშენ შემლებნა დარწმუნებულ ვორდათ, ნამდა იესოქ მღვდელმთავარო ღურა დო გათელებაშახ გინირთჷ? თეშ საფუძვლიან მიზეზის ქობძირუნთ, მუჟამსით გუვარჩიენთ აარონ დო თიშ გამნარყიშ მაგალითის, მით მოსეშ კანონით მღვდელმთავრეფო მსახურენდეს.

თე კანონით ხვალე მღვდელმთავარს შეულებუდ კარავიშ დო უმოს გვიანო, ტაძარიშ წმინდათაწმინდაშა მინულა. წმინდათაწმინდა ფარდათ რდუ გიშართილ წმინდაშე. მღვდელმთავარ წმინდათაწმინდაშა ხვალე გიშაჸიდირალიშ დღას მინიშ (ებრ. 9:1—3, 6, 7). აარონ დო თიშ გამნარყეფ წმინდათაწმინდაშ მინულაშახ რდეს ცხებულეფ მღვდელმთავრეფო. თეშნერო, იესო ხოლო ღურაშახ ოკო რდუკო ცხებულ დიდებულ სულიერ ტაძარიშ მღვდელმთავარო დო თეშ უკულ ზეციურ ცხოვრებაშა „ფარდაშ საშვალებათ, შხვა სიტყვეფით ქოფთქუათინ, მუშ ხორცით“ ოკო მინორთკო (ებრ. 10:20). ათეშენ, მოციქულ პავლექ თქუ, ნამდა იესოქ მორთჷ, „მუჭოთ მღვდელმთავარქ“ დო უკულ გემნორთჷ „უმოს დიდ დო უმოს სრულყოფილ კარავით, ნამუთ კოჩიშ ნაკეთებ ვა რე“, შხვა სიტყვეფით ქოფთქუათინ „ზეცაშა მინორთჷ“ (ებრ. 9:11, 24).

ახალ შეთანხმებაშ დამტკიცება დო ძალაშა მიშულა შხვადოშხვა დროს ვა მოხვალამე. მუშენ იფჩიებუთ თეს? მუჟამსით იესოქ ზეცაშა ეშართჷ დო მუშ სრულყოფილ სიცოცხლეშ ფასი იეჰოვას წარუდგინ, თეშნერო თიქ ახალ შეთანხმებაშ დამტკიცებელო სუმ ნაბიჯშე პირველ ნაბიჯ გეგნოდგჷ. იგივე ნაბიჯეფიშ საშვალებათ მიშართჷ ძალაშა თე შეთანხმებაქ. მუ ნაბიჯეფშე მეურს ჩიება?

პირველ, იესოქ იეჰოვაშ წოხლე ქიგედირთჷ; მაჟია, იესოქ მუშ მსხვერპლიშ ფასი წარუდგინ იეჰოვას; დო მასმა, იეჰოვაქ მიწონუ იესოშ დობუნილ ზისხირიშ ფასი. თე ნაბიჯეფიშ გინოდგუმაშახ ახალ შეთანხმება ვა მოქმედენდჷ.

ბიბლია ვამრაგადნა ზუსტ დროს, მუჟამ მიწონუ იეჰოვაქ იესოშ მსხვერპლი. ათეშენ, ჩქი ვა მარაგადენა კონკრეტულ დრო, მუჟამ დემტკიც დო მიშართჷ ძალაშა ახალ შეთანხმებაქ. მარა მიჩქნა, ნამდა იესოქ ჟარნეჩდომავითა დღაშ დღახუშახ ვით დღათ ადრე ეშართჷ ზეცაშა (საქ. 1:3). თე დროშ დინახალე, მუდგარენ მომენტის იესოქ მუშ მსხვერპლიშ ფასი წარუდგინ იეჰოვას, ნამდგაქ მიწონუ თინა (ებრ. 9:12). ახალ შეთანხმება ძალაშა მიშულირ რდუნ, თეს ამტკიცენს, ახ. წ. 33 წანაშ ჟარნეჩდომავითა დღაშ დღესასწაულს მოხვალამირ მოვლენა (საქ. 2:1—4, 32, 33). არგამა რდუ, ნამდა თე დროს ახალ შეთანხმება დამტკიცებულ დო ძალაშა მიშულირ რდუ.

თაშ ნამდა, ახალ შეთანხმებაქ დემტკიც დო ძალაშა მიშართჷ თიშ უკულ, მუთ იეჰოვაქ მიწონუ იესოშ დობუნილ ზისხირიშ ფას დო ცხებულეფწკუმა ქუდოდვ შეთანხმება. შეთანხმებაქ მოქმედება დიჭყჷ მღვდელმთავარიშ, იესოშ საშვალებათ, ნამუთ თე შეთანხმებაშ შუამავალ რე (ებრ. 7:25; 8:1—3, 6; 9:13—15).