Bivisa bimmonisa ti Yesu, wubieku Mfumu yi Zinganga Nzambi bo kabotama mu mvu 29 T.K. Buidi tuzabidi mawu? Bo Yesu kabotama, nandi wumonisa ti wuba wukubama mu kuvana luzingu luandi buka nkhayilu muingi kuvanga “luzolo” lu Nzambi. Bo kavanga mawu, nandi wuvana nkhayilu va yilu kikuma. (Ngalatia 1:4; Ebeleo 10:5-10) Mu thangu yikhulu, kikuma kiba kiuma ki nkinza beni ku tempelo. Buawu, tulenda tubila ti kikuma beni kitona mu thangu Yesu kabotama. Diawu tulenda tuba ti tempelo yi kiphevi yi Yave mvandi yitona bo Yesu kabotama. Tempelo beni yinsundula mamoso Yave kamvanganga mu nzila nkhayilu yi khudulu yi Yesu, muingi batu bambuongimina mu phila yisulama. —Matai 3:16, 17; Ebeleo 5:4-6.

Dedi bo mu thangu yikhulu vabe tombuluanga mfumu yi zinganga Nzambi muingi kusadila ku tempelo, bobuawu mvandi bo tempelo yi kiphevi yivangama Yesu wutambula “phevi yinlongo ayi lulendu” kuidi Yave muingi kununga kuvanga kiyeku beni. (Mavanga 10:37, 38; Malako 1:9-11) Vayi, buidi tulenda bela lufiatu ti Yesu wubieku Mfumu yi Zinganga Nzambi ava kafua ayi kavulubuka? Kifuani ki Aloni ayi zinganga Nzambi zinkaka bayiza kumbus’andi kinkuiza tusadisa kubaka mvutu wu kiuvu akiokio.

Nsiku Mose katambula, waba tuba ti mfumu yi zinganga Nzambi nandi to wuba nsua wu kukota ku Kibuangu Kilutidi Kinlongo ki nzo yinlongo. Ayi bo bayiza tunga tempelo, nandi mvandi to wuba nsua wu kukota ku Kibuangu Kilutidi Kinlongo ki tempelo. Ayi nledi wuba ku tempelo wawu wabe kabulanga kibuangu Kinlongo ayi Kilutidi Kinlongo. Mfumu yi zinganga Nzambi, khumbu yimueka to mu mvu kabe viokilanga va nledi beni mu kilumbu ki kudinda nlemvu. (Ebeleo 9:​1-3, 6, 7) Aloni ayi zimfumu zi zinganga Nzambi zinkaka ziyiza ku mbus’andi bakota to ku Kibuangu “Kilutidi Kinlongo” mu thangu basolu kuidi Yave mu kiyeku beni. Bobuawu mvandi, Yesu wubieku Mfumu yi zinganga Nzambi ava kafua. Kibila nyitu’andi yaba kuntula nkaku muingi kukota ku diyilu Kibuangu Kilutidi Kinlongo. (Ebeleo 10:20) Mu kibila akiokio, buawu mvuala Polo katubila mu matedi Yesu: ‘Banga Mfumu yi zinganga Nzambi, nandi wukota ku kibuangu kinlongo kilutidi tola ayi kivedila voti ku diyilu, kibuangu kikhambu vangulu mu mioko mi batu.’​​—⁠Ebeleo 9:​11, 24.

Vasi ko ni disuasana dimueka. Mu kibila mbi? Kibila bo Yesu kavutuka ku diyilu ayi kayundula kuidi Nzambi luzingu luandi lusonga kavana mu kibila kitu, nandi wuvanga kiuma kitheti mu mambu matatu mabe tombulu muingi Yave katsikika ayi kakikinina luwawanu lumona. Ayi mambu amomo matatu, mawu mazibula luwawanu lumona voti kuvanga luawu lutona kusalama. Vayi mambu mbi mabe tombulu?—Ngalatia 3:15; Ebeleo 9:18

Ditheti, Yesu wuyenda vantuala Yave. Dimuadi, Yesu wuyundula kuidi Yave thalu yi luzingu luandi kavakula. Dintatu, Yave wukikinina thalu yi menga mo Yesu katengula. Tulenda tuba ti luwawanu lumona, lusa tona ko kusalama ava Yesu kavanga mambu matatu amomo.

Kibibila kisinsudikisa ko buboti kilumbu Yave kakikinina nkhayilu yi khudulu Yesu kavana. Diawu, tuisi ko bu kuzabila buboti kilumbu luwawanu lumona lutsikama ayi kilumbu luawu lutona kusalama. Vayi, befu tuzebi buboti ti Yesu wuvutuka ku diyilu kumi di bilumbu ava nkungi wu Pantekoti wuvangama. (Mavanga 1:3) Ayi tulenda tuba ti va khati bilumbu beni, vawu Yesu kayundula thalu yi luzingu luandi kavakula, ayi Yave wukikinina nkhayilu beni. (Ebeleo 9:12) Tulenda mona kivisa mu kutala mambu mamonika mu nkungi wu Pantekoti wu mvu 33. (Mavanga 2:1-4, 32, 33) Bukiedika, tuisi ko divuda ti luwawanu lumona lutona kusalama mu thangu beni.

Mu bukufi, tulenda tuba ti luwawanu lumona lu tsikama ayi lutona kusalama bo Yave kakikinina thalu yi menga ma Yesu matengulu. Yesu Mfumu Zinganga Nzambi, nandi wuyiza ba mvuala bo luwawanu beni lumona lutona kusalama.—Ebeleo 7:25; 8:1-3, 6; 9:13-15