▪ Beeda gaca Jesús Sumo Sacerdote dxi guyuunisa lu iza 29. ¿Ximodo nánnanu ni yaʼ? Guidúʼyanu. Ra guyuunísabe, bisihuínnibe nuube dispuestu gudiibe xpídabe lu ti altar simbólico ni runi representar gaca «ni ná Dios» (Gál. 1:4; Heb. 10:5-10). Cumu dede dxi guyuunisa Jesús nga guyuu altar simbólico ca la? nánnanu laaca tiempu queca guyuu yuʼduʼ espiritual, purtiʼ altar riʼ nga tobi de ca cosa ni risaca nuu ndaaniʼ yuʼduʼ espiritual. Yuʼduʼ espiritual stiʼ Dios runi representar ni guiráʼ ni nápanu para guni adorarnu Jehová jneza ne randa rúninu ni pur rescate stiʼ Jesús (Mat. 3:16, 17; Heb. 5:4-6).

Dxi maʼ nuu yuʼduʼ espiritual que, maʼ caquiiñeʼ ni ti sumo sacerdote. Nga runi gulí Jehová Jesús «né espíritu santu ne bidii poder laabe» (Hech. 10:37, 38; Mar. 1:9-11). Peru ¿ximodo nánnanu guca Jesús Sumo Sacerdote ante gatiʼ ne ante guiasa de lade gueʼtuʼ yaʼ? Zanda guininu zacá ra guidúʼndanu ejemplu stiʼ Aarón ne ca ni guca sumo sacerdote despué de laabe tiempu yenándacabe Ley stiʼ Moisés.

Ley que ná sumo sacerdote que si nga zanda chuʼ ndaaniʼ Santísimo stiʼ tabernáculo que, ne despué maʼ ndaaniʼ templu. Ra nuu Santo ne Santísimo la? guyuu ti cortina galaa de laacani ni runi separar cani, ne dxi rixá stonda binni nga ridiʼdiʼ sumo sacerdote cortina que para chuʼ ndaaniʼ Santísimo (Heb. 9:1-3, 6, 7). Aarón ne ca ni guyuu despué de laa beeda gácacaʼ sumo sacerdote ante tídicaʼ «cortina» stiʼ tabernáculo que. Zacaca bizaaca né Jesús, guca nombrarbe Sumo Sacerdote stiʼ yuʼduʼ espiritual stiʼ Jehová ante gátibe, ne despué gudíʼdibe «ti cortina, laani nga xcuérpube» para guibánibe guibáʼ (Heb. 10:20). Nga runi, guníʼ apóstol Pablo beeda Jesús «casi sumo sacerdote» ne despué «biuube ndaaniʼ tabernáculo jma naroʼbaʼ ne jma galán ne cadi binni bicuí ni», laani nga «guibáʼ» (Heb. 9:11, 24).

▪ Cadi gadxé gadxé tiempu guca legalizar ne guca inaugurar pactu nacubi que. ¿Xiñee yaʼ? Purtiʼ ora guyuu Jesús guibáʼ ne biʼniʼ presentarbe Bixhózebe xquendanabánibe perfectu para binni guidxilayú, raqué nga bizulú ti procesu para gaca legalizar pactu nacubi que ne laaca guca inaugurar ni. Para guca procesu riʼ, guca chonna cosa. ¿Xi laacani yaʼ?

Primé, guca presentar Jesús nezalú Jehová. Guiropa, biluiʼbe Bixhózebe pabiáʼ risaca sacrificiu bíʼnibe. Ne guionna, gucuaa Jehová rini risaca ni bixhiibe pur binni. Bizulú biʼniʼ pactu nacubi riʼ dxiiñaʼ despué de guionnaʼ cosa ni bizéʼtenu riʼ.

Qué ruzeeteʼ diʼ Biblia pora peʼ gucuaa Jehová sacrificiu risaca ni biʼniʼ Jesús. Nga runi, qué zanda guininu padxí peʼ nga guca legalizar ne bizulú pactu nacubi que cayuni dxiiñaʼ. Peru nánnanu guyé Jesús guibáʼ chii gubidxa ante de saa Pentecostés (Hech. 1:3). Lu tiempu ca nga biʼniʼ presentarbe Jehová sacrificiu risaca ni bíʼnibe, ne gucuaa Jehová ni (Heb. 9:12). Peru lu Pentecostés bihuinni maʼ cayuni pactu cubi que dxiiñaʼ (Hech. 2:1-4, 32, 33). Raqué nga bihuinni dxichi maʼ bizulú pactu que cayuni dxiiñaʼ.

Nga runi zanda guininu ora gucuaa Jehová rini risaca ni bixhii Jesús, guca legalizar ne guca inaugurar pactu nacubi que, laaca guyuu ca ungidu lu pactu riʼ, ne bizulú Jesús biʼniʼ dxiiñaʼ de Sumo Sacerdote, ne beeda gaca ti Mediador (Heb. 7:25; 8:1-3, 6; 9:13-15).