1. Eeghe iyaạr kụ edị aPọl aghaạph amiteom ilọ aloor odị?

OTELHEDOM mọ aPọl aghaạph ni amiteom mọ eeni amem odị alhoghoma ghan ni ḍidugh. Odị aḅẹm mọ aḍizu phọ onọ “reḅọr” kụ mọ iwạ ghan ni mọ onọ alhọgh iboom inyaạm orue oḍighi ipẹ enhighẹ bọ, ḅilhẹ kẹn mọ k’/oomo amem kụ edị aZihova aphagharanhaạn ghan iiḅereghị phọ odị eten phọ epẹ odị aatughiạn bọ. (2 Kọr. 4:16; 12:7-9; Rom. 7:21-23) APọl aḅilhẹ kẹn amạ amiteom mọ buphẹ rosophoghom ghan bọ nyodị umhiịn nyodị idiphọ oye dị adugh. * Kuolọ odị o/mheera mọ ekarạph ephoghom abunhọn obobọ aḍidugh odị, eḍighi idị odị kaloghoma mudị odị o/mhoọgh maạr oḍighinhom.—2 Kọr. 10:10-12, 17, 18.

2. Odaphạn 2 Korịnt 12:9, 10, eeghe ephigh iyaạr kụ edị aPọl atuughạ?

² APọl atuughạ ni ephigh iyaạr—mọ oye katue ni amoọgh iikpọ ghalhamọ r’amem dị adugh ni. (Bạl 2 Korịnt 12:9, 10.) AZihova aḅenhị Pọl mọ “iikpọ phọ amị relom ghan mem lọ nạ adugh,” iduọn phọ pọ remạ ghan mọ aZihova kangọ ni iikpọ phọ aPọl rawạ bọ. Uguạ, ophụr ooḅeghiọn omhiịn iyaạr phọ i/wạ bọ dị yira kokạgh ghan olhoghi mem dị amulhọgh ḍien phọ ayira uufolhomhi iyira.

3. Eeghe kụ iḍighi kụ ewạ bọ dị yira komiloghọm ghan roofolha?

³ Onyọ ayira o/lho dị aroofolha eḅeraạn. Toroboiperolbọ, yira kotue ni oḅonyonhu ozuan eḍighi maạr dị yira ootughiạn ghan iboom ilọ araraạr aroofolha dị amulhọgh ḍien phọ ayira oghaạph. (Prov. 24:10) Ewạ mọ yira osighẹ ghan ika roofolha phọ abuọ isophoghom mọ ayira ruufolhomhi ghan bọ iyira? Idiphọ aPọl, ewạ mọ yira ‘omiloghọm ghan . . . roofola’ phọ. (2 Kọr. 12:10) Eeghe kụ iḍighi? Loor esi dị aroofolha ḅilhẹ r’isophoghom remạ  ghan keḍeenhaan mọ yira kụ abumatuạn phọ aZizọs ni. (1 Pit. 4:14) AZizọs aḅẹm ni mọ kogbiphoghọm ni bumatuạn phọ odị. (Jọn 15:18-20) Iphẹn phọ ikạr ri emite siphẹ oḅẹl okuron asiạ phọ. Mem mọ amuphẹ phọ, abuphẹ odaphạn ghan bọ iḍighinhom araraạr abuọ aGrik phọ umhiịn Kristẹn idiphọ awe dị u/maạr ḍinyạ ḅilhẹ odugh. Awe aJu phọ umhiịn Kristẹn idiphọ “iḅar awe . . . dị ḍinyạ u/maạr” idiphọ abutelhedom mọ Pita r’aJọn. (Iiḍighi 4:13) Oḅiilha ophogh ekịgh mudị aKristẹn phọ odugh ni, loor esi dị bidị u/loom aani siphẹ iikpọ itooghị phọ obobọ u/moọgh weye eghạm, ḅilhẹ kẹn awe omiịn bidị idiphọ awe dị oroph ogbeph siphẹ emhạ phọ.

4. Abuḅẹl aKristẹn phọ umhegheron ika kụ oghị esi ekarạph ephoghom mọ abuọ isophoghom mọ omhoọgh bọ oghị esi abidị?

⁴ Abuḅẹl aKristẹn phọ umheera ni mọ ekarạph ephoghom abuọ isophoghom mọ abidị esophoghom bidị ḍughụm? Eeye. Esi omaạm, abutelhedon mọ aPita ḅilhẹ r’aJọn umhiịn idiphọ eghuan dị kogbiphoghọm bidị loor iduọn bidị rodạph bọ Zizọs ḅilhẹ rokaạph bọ ilọ itughemhị phọ odị koḅenhị we. (Iiḍighi 4:18-21; 5:27-29, 40-42) Abumatuạn phọ u/moọgh iyaạr otuạn oghiil umugholoor. Okạr ophogh, abuḅẹl aKristẹn phọ orọl bọ siphẹ oḅẹl okuron asiạ phọ kụ uḍighi imạ araraạr ongọ omhạr awe opu buọ isophoghom mọ abidị. Esi omaạm, arinyạ phọ ipẹ Enhaạn ephum bọ bidị ogẹ phọ ekiọm ni ghisigh reloghonhaạn ḍighaạgh keḅilhẹ engọ oḍuomolhoghi irubal awe, ḅilhẹ kẹn Omhạr phọ opọ bidị ogbeelhom ghan bọ odi ni ratooghị epẹ k’akẹ, kụ moọny amem katooghị ni angọ oomo omhạr awe siẹn ade phọ. (Mat. 24:14) Ḍieriphọ aḍighaạgh phọ, iikpọ itooghị phọ esophoghom ghan bọ Kristẹn phọ abuphẹ phọ m’emheel li k’asiạ dị meten epẹ omhạn. Kuolọ iduọn rokaạph bọ, abumatuạn phọ abuphẹ okpẹ bọ oḍuomolhoghi phọ moḍighi ruw-emhạ epẹ k’akẹ. Kuolọ, abuọ isophoghom mọ abidị momhuughu, kụ eḍighi maạr dị oḅerion ni bidị siphẹ aḍuugh phọ, pọ bidị kotọl eeḍiạn Omhạr phọ abuḅẹl aKristẹn phọ abuphẹ bidị olhọgh bọ ḍien phọ ogbeelhom ghan bọ.—Ogan. 5:10.

5. Odaphạn Jọn 15:19, eeghe kụ iḍighi kụ awe aḅirinhi phọ ropogh ghan bọ kosooromhi we phọ aZihova?

⁵ Ḍio arodon, idiphọ aweye aZihova eeni amem ruphogh ghan ni iyira kosooromhi koḅilhẹ ugilaạm iyira mọ yira maạr u/legheri ḅilhẹ mọ yira odugh. Eeghe kụ iḍighi? Loor esi dị yira u/meera uḅophoghạn aani iḍighinhom araraạr abuphẹ ukitonhom bọ iyira. Yira rokparaghạ ghan oḍighi awe dị osooromhi loor, buphonheẹn, ḅilhẹ ronaghanhạn ghan. Ḍieriphọ aḍighaạgh phọ, aḅirinhi phọ romoọgh ghan ḍiḅeraạn k’oghị esi oye dị aphoophe loor, raadaraghu, ḅilhẹ ragbagharạn ghan. Oḅarạm isiphẹ, yira ro/ḍighom aani ghan imirighan itooghị phọ, ḅilhẹ r’aweye eghạm atorobọ eelhe. Loor esi iduọn yira u/meera bọ mọ aḅirinhi phọ upiloghọm iyira eghighimaạm, aḅirinhi phọ umhiịn iyira idiphọ awe dị odugh.—Bạl Jọn 15:19; Rom. 12:2.

6. Eeghe araraạr kụ edị aZihova masighẹ we phọ odị aḍighinhom?

⁶ Etigheri ipẹ aḅirinhi phọ rootughiạn ghan bọ ilọ ayira, aZihova usighẹ ni iyira raḍighinhom raraạr dị ebụgh ni iboom. Odị usighẹ ni iyira ragbeelhom iiḅi iinhaghạn phọ eten dị ke/rọl ghan. Ḍio arodon, arebenhẹ phọ odị kụ awe dị ogbạ otenheghi kụ oḅilhẹ odiighi rinyạ dị epelheghiom siẹn ade phọ, ḅilhẹ osighẹ ni Baibul phọ roḍighinhom olhoghonhaạn aḍighaạgh irubal awe onhighemhị adọl aghuḍum mọ abidị. Yira rongọ oomo aḍisẹph aZihova esi araraạr phọ iphẹn odị maḍighi bọ, esi osighẹ egu awe dị oghịgh mudị odugh ni oḍighinhom araraạr dị elheeny kipekipẹ. Kuolọ kokaạph aani ika ilọ atorobọ onyọ ayira? AZihova katue ni ulhoghonhaạn iyira ḍighaạgh omhoọgh iikpọ ḍughụm? Eḍighi maạr dị eḍighi idiphọ, ewạ mọ yira oḍighi ika orue omhoọgh aani olhoghonhaạn aḍighaạgh phọ? Uguạ, ooḅeghiọn iraạr araraạr dị  yira kotue otuughạ esi eḍeenhaan otelhedom mọ Pọl.

7. Eeghe kụ eniin iyaạr dị yira otuughạ esi eḍeenhaan phọ aPọl?

⁷ Eniin iyaạr dị yira otuughạ esi eḍeenhaan phọ aPọl pọ: Ka/beḍenhọm ghan inyaạm anạ, obobọ emhaạr anạ mem dị nạ rakumu aZihova. Odaphạn ephoghom awe, aPọl amhoọgh ni raraạr otuạn obaga, ḅilhẹ obeḍenhọm aloor. Uukonhom nyodị epẹ Tasọs, egbogh ekpanhạ emhạ awe phọ aRom. ATasọs aḍighi ni ekpisi dị eghughuronhu ni iboom ḅilhẹ ekpisi dị emhoọgh igbogh asiskul agey. APọl aghị ni askul agey—oniin oḍiemhiom abuọ aJu phọ dị olhọgh ghan eegu agey, dị oghol mọ GamelieI kụ atughemhị nyodị. (Iiḍighi 5:34; 22:3) Amem irọl li dị aPọl aḍighi oye dị aghị ghisigh iboom igbo awe aJu phọ. Odị aḅẹm mọ: “Esi ooko eḍighinom iyaạr ayoor abuọ aJu phọ, mị upu ni ibadị iigbo amị.” (Gal. 1:13, 14; Iiḍighi 26:4) Kuolọ aPọl o/beḍenhọm loor.

8. Odaphạn Filipai 3:8, aPọl amhiịn ika raraạr phọ ipẹ odị awilhẹ yogh bọ, ḅilhẹ eeghe kụ iḍighi kụ odị ‘amiloghọm ghan bọ sidugh’?

⁸ APọl aḅaạl li olhoghi awilhẹ yogh oomo araraạr phọ eḍighi bọ idị odị amhoọgh iikpọ odaphạn ephoghom aḅirinhi phọ. Okạr oghaạph, odị amhiịn raraạr phọ ipẹ odị amhoọgh ghan bọ eghịgh bọ mudị asuọ phọ idiphọ araraạr dị ekpẹ ‘oroḅologhi.’ (Bạl Filipai 3:8.) APọl asoman ni ḍikparamhinheẹn asidọl iduọn odị aḍighi bọ onyọ amatuạn aKraist. Okạr eelhe phọ odị bịn ulhọgh ni nyodị ḍien. (Iiḍighi 23:12-14) Kụ abuọ aRom mọ oḍighi bọ buọ emhạ phọ odị ugurọgh ni nyodị oḅilhẹ okasaghiọm ikoli. (Iiḍighi 16:19-24, 37) Oḅarạm isiẹn, asidugh phọ aPọl ikọm ni kẹn eboom eephinha engọ nyodị. (Rom. 7:21-25) Kuolọ kparipẹ romheera mọ amulhọgh ḍien phọ obobọ asidugh phọ eḅonyon nyodị ezu, odị ‘amhiloghọm ghan.’ Eeghe kụ iḍighi? Loor esi dị mem dị odị adugh kụ edị odị ramiịn ghan dị iikpọ Enhaạn reḍighi oḍighi loor odị.—2 Kọr. 4:7; 12:10.

9. Ewạ mọ yira osighẹ ika raraạr dị retu ghan oḍighi idị yira kologhoma mọ yira u/moọgh maạr oḍighinhom?

⁹ Eḍighi maạr dị yira rowạ omhoọgh iikpọ ḍighaạgh aZihova, pọ yira kuu/tughiạn mọ inyaạm ayira, askul dị yira oghị, ekpisi phọ yira oḍuạ bọ kụ omite, obobọ eelạ dị yira omhoọgh kụ keḍighi iyaạr dị yira komạn maạr. Araraạr phọ iphẹn kụ ka/raraạr dị aZihova katuạn usighẹ  iyira aḍighinhom. Okạr oghaạph, ibadị awe phọ Enhaạn ‘u/legheri iyaạr, u/moọgh iikpọ r’adọl eghuan.’ Kparipẹ ghụn, aZihova masaḅạr “buphẹ awe aḅirini phọ ogbiighom bọ modugh ni.” (1 Kọr. 1:26, 27) Kụ iḍighi kụ, eḍighi maạr dị nạ u/moọgh aani raraạr phọ iphẹn phọ, pọ kaa/tughiạn mọ kekikima nyinhạ okumu aZihova. Kparipẹ ghụn, miịn idiphọ eepoogh omhiịn dị iikpọ phọ Enhaạn keḍighi oḍighi siphẹ aloor phọ anạ. Esi omaạm, eḍighi maạr dị awe rokparaghạ ghan oḍighi idị nạ kamoọgh iikia esi omheeraam mọ anạ, pọ ḅeeḅereghị aZihova angọ nyinhạ oḅom emhụ dị nạ kagbaạm omheeraam mọ anạ ameremhị. (Efẹ. 6:19, 20) Eḍighi maạr dị nạ asoman egbagarạ e/moon, pọ ḅeeḅereghị aZihova angọ nyinhạ inyaạm pidị nạ arue alhọgh ghan mem mọ amuphẹ nạ katue bọ siphẹ arukumuan phọ odị. Torobọ amem lọ nạ amhiịn olhoghonhaạn aḍighaạgh phọ aZihova siphẹ aghuḍum mọ anạ, omheeraam mọ anạ kapoph ni ḅilhẹ kẹn nạ akpạr.

10. Eeghe kụ iḍighi kụ ewạ bọ ni mọ yira otuughạ eḍeenhaan awe aBaibul phọ okpẹ bọ oḍuomolhoghi phọ ogọ bọ siphẹ Hibru 11:32-34?

¹⁰ APọl atuughạ ghan agey ḍinyạ iigbia phọ. Odị alhegheri ni ibadị ariphigh, odị aḅilhẹ kẹn atuughạ ilọ areḍeenhaan awe dị ogẹ siphẹ Ekpo Onhụ phọ Enhaạn. Odị agẹ bọ rakiọm ookpomhoghan phọ aHibru, odị aḅenhị bidị mọ ootughiạn reḍeenhaan arebenhẹ phọ aZihova okpẹ bọ oḍuomolhoghi epẹ omhạn. (Bạl Hibru 11:32-34.) Ooḅeghiọn eḍeenhaan oniin onyọ abidị, Uw-emhạ phọ Devid. Odị akaran ni isophoghom ḍighaạgh amulhọgh ḍien odị ḅilhẹ kẹn r’aḍighaạgh awe dị okạr ri oḍighi righirị odị. Iduọn yira ropogh bọ eḍeenhaan phọ aDevid, yira komiịn ni inyaạm dị aPọl amhoọgh iduọn odị agbirima bọ eḍeenhaan adọl aghuḍum mọ aDevid, ḅilhẹ kẹn yira komiịn idị yira kotue otuughaạny aani Pọl.

11. Eeghe kụ iḍighi kụ eghịgh bọ mudị aDevid adugh ni? (Miịn afoto oḅẹl opoḍi phọ.)

¹¹ Ophelhegbe oye eghạm mọ Golayạt amhiịn Devid idiphọ oye dị adugh. Mem mọ Golayạt amhiịn bọ Devid, odị “amhilhọgh ni ilọ arigilaạm.” Ii, okiririom ophogh, aGolayạt phọ abụgh, anyaaghiạn ilọ eghạm, ḅilhẹ kẹn motughemhị ilọ eghạm. Ḍieriphọ aḍighaạgh phọ, aDevid aḍighi oopho ephurukpu oḅumoọny dị u/nyaaghiạn ḅilhẹ u/legheri aani ilọ eghạm. Kuolọ aDevid asighẹ ḍidugh phọ odị aḍiẹn phọ atene inyaạm. Odị abeḍenhọm iikpọ aZihova, kụ akpạr apu mulhọgh ḍien phọ odị.—1 Sam. 17:41-45, 50.

12. Ighẹn inhọn ipaanhaạn kụ edị aDevid akaran?

¹² ADevid akaran ni inhọn ipaanhaạn dị m’itue ni eḍighi idị odị muloghoma mọ onọ adugh ḅilhẹ inyaạm o/mhoọgh. ADevid akumuan ghan angọ opọ aZihova masaḅạr bọ oḍighi uw-emhạ Izrạl, Sọl. Uw-emhạ phọ aSọl eḅẹl amem mọ alhọgh ghan ni Devid eegu. Kuolọ esighẹ rekị bịn ophoophe aloor aḍighi idị aSọl amhoọgh eḍịm aghị esi aDevid. ASọl azoọm ni Devid ekarạph eten, dị tutụ awạ oghiigh aDevid.—1 Sam. 18:6-9, 29; 19:9-11.

13. ADevid amhegheron ika esi ekarạph eten phọ Uw-emhạ phọ aSọl azoọm bọ nyodị?

¹³ Etigheri ekarạph eten phọ Uw-emhạ phọ aSọl azoọm bọ nyodị, aDevid aghiọm ni ghisigh alhọgh eegu uw-emhạ phọ aZihova masaḅạr bọ. (1 Sam. 24:6) ADevid o/kpalhạm aZihova esi ikarạph araraạr phọ aSọl aḍighi bọ nyodị. Kparipẹ ghụn, aDevid abeḍenhọm aZihova ongọ odị inyaạm mọ ewạ bọ orue okparạm odẹgh ophogh phọ.—Ps. 18:1, superscription.

14. Otelhedom mọ aPọl asoman eeghe adọl dị eghimaạm nyepẹ aDevid?

¹⁴ Otelhedom mọ aPọl asoman aani iniin phọ ipaanhaạn phọ aDevid asoman bọ. Amulhọgh ḍien phọ aPọl umhoọgh ni iikpọ agey opu nyodị. Ibadị abuḍiemhiom dị oolheghaany mem mọ odị, ulhọgh ni nyodị ḍien. Ibadị amem, bidị ugurọgh ghan nyodị oroph osumeeny otu ikoli. Idiphọ aDevid, awe phọ abuphẹ oḍighi ghan bọ righirị  aPọl uzoọm ni nyodị eten dị i/nighẹ. Ghalhamọ r’isiphẹ ookpomhoghan aKristẹn phọ bịn abuniin usophoghom ghan ni nyodị. (2 Kọr. 12:11; Fil. 3:18) Kuolọ aPọl akpạr ri apu oomo phọ abidị. Ika? Odị aghiọm ghisigh agbeelhom ghan iiḅi iinhaghạn phọ etigheri isophoghom. Odị aḅạr ri bumor phọ r’abumarani phọ odị ghalhamọ r’amem dị bidị obi nyodị. Idị epelheghiom oomo phọ idị, odị arọl li dọl dị ekpẹ oḍuomolhoghi aghị esi Enhaạn phọ odị tutụ odị amhugh. (2 Tim. 4:8) Inyaạm dị odị amhoọgh kụ i/ḍighi bọ iyaạr phọ odị akpạr bọ apu isophoghom mọ iphẹn phọ, Kuolọ iduọn odị abeḍenhọm bọ aZihova.

15. Eeghe kụ aḍiigbu ayira, ḅilhẹ ika kụ idị yira kotue oteẹny?

¹⁵ Nạ masoman ghan ni roofolha obobọ ikpuuroghọm ḍighaạgh abuọ ekụ anạ, bulọ r’anạ roḍighi ghan oḍighi, obobọ siya anạ dị ro/tu aani ghan ituughạ ḍughụm? Oye isiẹn ookpomhoghan phọ mazoọm ghan ni nyinhạ eten dị i/kpeanhaạn ḍughụm? Eḍighi idiphọ, pọ tuutughiạn eḍeenhaan phọ aDevid r’aPọl. Nạ katue ni asighẹ ‘igey . . . azuoghom ikarạph.’ (Rom. 12:21) Iduọn phọ pọ ro/ḅẹm ghan mọ nạ katạph aani elhor oye ekpo abaạy idiphọ aDevid, kuolọ nạ kaḍighi idị Ekpo Onhụ phọ Enhaạn keḍigh ilhoghi r’iiḅi arokpom. Nạ katue aḍighi iduọn phọ esi osighẹ ghan aBaibul phọ kụ ophagharanhaạm ghan aḍipuru dị awe opuru nyinhạ, ozoọm ghan eyoghoyoghọ eten r’olhọgh eegu buphẹ ozoọm bọ nyinhạ eten dị i/nighẹ, ḅilhẹ r’esi oḍighi ghan igey oghị esi oomo awe, ghalhamọ kẹn amulhọgh ḍien phọ anạ.—Mat. 5:44; 1 Pit. 3:15-17.

16-17. Eeghe iyaạr kụ edị aPọl u/bulha?

¹⁶ Kụ aPọl agbi bọ oḍighi onyọ amatuạn aKraist, odị aḍighi ghan ni ogbagarạ onyọ ugheel oọny dị agbiphoghọm ghan bumatuạn phọ aZizọs. (Iiḍighi 7:58; 1 Tim. 1:13) AZizọs r’aloor kụ asophoghom Pọl, mem mọ opọ olhegheriom bọ nyodị idiphọ aSọl, dị rakị ogbiphoghọm ookpomhoghan aKristẹn phọ. AZizọs arọl epẹ k’akẹ kụ aḅaanhaạn Sọl kụ aḍighi idị odị u/miịn mun eten. Oḍighi idị odị kaḅilhẹ amiịn eten, iwạ ni dị aPọl kawạ olhoghonhaạn aḍighaạgh awe phọ abuphẹ odị agbiphoghọm ghan bọ. Odị asooromhi ni loor asighẹ olhoghonhaạn aḍighaạgh, ḍighaạgh otelhedom dị oghol mọ Ananayạs, opọ aḍighi bọ idị odị aḅilhẹ amhiịn eten.—Iiḍighi 9:3-9, 17, 18.

 ¹⁷ Onyebel r’oten aPọl aḅilhẹ ni aḍighi oye dị aalheghaan siphẹ ookpomhoghan aKristẹn phọ, kuolọ r’amem r’amem odị o/wulha ipẹ emitenhaan bọ nyodị mem mọ odị aḍuạ bọ rakị Damaskọs. APọl asooromhi ni loor asighẹ olhoghonhaạn aḍighaạgh abumor r’abumarani phọ. Odị aḅẹm mọ, “bidị ruloghonhaạn ghan imị ḍighaạgh iboom.” —Kọl. 4:10, 11.

18. Eeghe kụ iyaạr dị ketue ni eḍighi idị iyira ki/phụ osighẹ olhoghonhaạn aḍighaạgh abunhọn?

¹⁸ Eeghe kụ iyaạr dị yira otuughạ ḍighaạgh aPọl? Eḅẹl amem mọ yira omhiigh bọ ooḅughonhaan r’awe phọ aZihova, r’ikpukpụ yira uwạ ghan ni osighẹ olhoghonhaạn aḍighaạgh abunhọn, yira ulhọgh ni elhegh mọ yira oḍighi ibạm anmụny dị rowạ olhoghonhaạn aḍighaạgh eten aruwaloor, kụ rowạ ni otuughạ. (1 Kọr. 3:1, 2) Kuolọ kokaạph aani ika nyiidiphọ? Eḍighi maạr dị yira momhiigh ni okumu aZihova esi ibadị asiạ ḅilhẹ motuughạ ni omhiịn raraạr kirokirọ, iyira ki/phụ ghan mun osighẹ olhoghonhaạn aḍighaạgh, ekạr ekpaariọm ḍighaạgh awe dị ko/rọl aani siẹn igey phọ obia. Kuolọ ewạ mọ olhegheri mọ, aZihova rukparamhị ghan iyira dị eego esi abumor r’abumarani phọ ayira. (Rom. 1:11, 12) Ewạ mọ yira olhegheri ipẹ phọ, eḍighi maạr dị yira rowạ ni omhoọgh iikpọ phọ aZihova rangọ ghan bọ.

19. Eeghe kụ iḍighi bọ iyaạr phọ aPọl amhoọgh bọ ekol phọ?

¹⁹ APọl aḍighi ni raraạr dị eḍighan elhegh mem mọ odị aḍighi bọ onyọ aKristẹn. Eeghe kụ iḍighi? Idị eḍighi bọ odị atuughạ amhiịn mọ omhoọgh ekol i/loonhaan esi iikpọ dị oye amhoọgh, askul dị oye aghị, eelạ, obobọ ekpisi phọ oye phọ aḍuạ bọ kụ aru, Kuolọ edi esi osooromhi aloor ḅilhẹ r’obeḍenhọm aZihova. Eḍighi idị oomo ayira kotuughaạny Pọl (1) esi obeḍenhọm ghan aZihova, (2) esi otuughaạny areḍeenhaan aBaibul phọ (3) ḅilhẹ r’esi omheera ghan mọ abumor r’abumarani phọ ayira ulhoghonhaạn ghan iyira ḍighaạgh. Mem dị yira oḍighi iduọn phọ, etigheri torobọ aḍidugh dị yira olhoghoma, aZihova k’ungọ ni iyira inyaạm!