1. Апостол Павел нени оҥдоп туратан?

АПОСТОЛ Павел кезикте бойыныҥ уйанын кӧрӱп туратан. Ол су-кадыгыныҥ уйадап турганын, Кудайдыҥ айтканыла јӱрерге бойыла тартыжып турганын ла Иегова кезикте мӱргӱӱлдерине карууны оныҥ сакыганы аайынча бербей турган деп бичиген (2 Кор. 4:16; 12:7—9; Рим. 7:21—23). Анайда ок Павел ӧштӱлери оны уйан кӧрӱп турган деп билер болгон *. Је ол уйан јандарынаҥ улам ла улус оны јаман кӧрӱп турганынаҥ улам бойын эш-кереги јок деп сананбаган (2 Кор. 10:10—12, 17, 18).

2. 2 Коринфтегилерге 12:9, 10-ло болзо, Павел кандый јаан учурлу чындыкты оҥдоп алган?

² Павел мындый бир јаан учурлу чындыкты оҥдоп алган: кижи бойын уйан да деп кӧрӱп турза, кӱчтӱ болор аргалу. (2 Коринфтегилерге 12:9, 10 кычырыгар.) Иегова «сен чине јок тужыҥда Мениҥ кӱчим толо кемине једет» деген сӧстӧрлӧ Павелге керектӱ ийде-кӱч берер деп кӧргӱскен. Бу јӧрмӧлдӧҥ бис Павелдиҥ теминеҥ неге ӱренер аргалу деп кӧрӧрис. Је озо баштап улус бисти јамандап турза, нениҥ учун кунукпас керек деп сананып ийектер.

3. Улус бисти јамандап турза, бис нениҥ учун сӱӱнер аргалу?

³ Кемге де улуска јамандадарга јарабай јат эмей. Је улустыҥ  јамандаганына ӧйинеҥ ӧткӱре санаарказаас, бис кунугып калардаҥ айабазыс (Укаа 24:10). Айдарда, улус бисти јамандап турза, нени эдер керек? Улуска јамандадып турзаас, бис Павел ле чилеп сӱӱнип јадыс (2 Кор. 12:10). Нениҥ учун дезе јамандадып, истедип турзаас, Христостыҥ чындык ӱренчиктери болгоныс кӧрӱнет (1 Петр 4:14). А Иисус дезе, оныҥ ӱренчиктери истедер деп айткан (Иоанн 15:18—20). Баштапкы чакта чыннаҥ ла истежӱлер башталган. Ол ӧйдӧ грек культурага јайылган улус христиандарды неме аайлабас, тенексӱ улус деп кӧрӧтӧн. Андый кӧрӱм иудейлерде де болгон. Темдектезе, Петр ла Иоаннды «бичик билбес, тегин улус» дежетен (Ап. ижи 4:13). Оныҥ учун улус христиандарды уйан, бойы учун туруп болбос деп кӧрӱп туратан. Олорго политический јанынаҥ болужатан кижи болбогон, оныҥ учун олорго кандый бир табару болзо, олор бойлорын корулап болбос эди. Улус олорды коркышту јабыс кӧрӱп туратан.

4. Баштапкы чактыҥ христиандары истежӱлерге кандый кӧрӱмдӱ болгон?

⁴ Христиандар истежӱлердеҥ улам коркып отурып калган ба? Јок. Темдектезе, Иисус керегинде јарлаганы учун ла Христостыҥ ӱренчиктери болгоны учун истеткен апостол Петр ла Иоанн истежӱлерди јаан кӱндӱ деп кӧргӧн (Ап. ижи 4:18—21; 5:27—29, 40—42). Айдарда, баштапкы чактыҥ христиандарында бойыныҥ бӱдӱмјизинеҥ уйалатан неме јок болгон. Нениҥ учун дезе Кудайдыҥ јобош ишчилери олорды истешкендерге кӧрӧ, улуска канча киреге кӧпти эткен. Темдектезе, Агару Бичикке кирген бу христиандардыҥ бичиген бичиктери бӱгӱнги де кӱнде миллиондор тоолу улуска болужат ла ижемји берет. Анайда ок олордыҥ јарлаган Каандыгы бӱгӱнги кӱнде јӱк ле тургузылып калган эмес, је удабас бастыра јердиҥ ӱстиле башкарар (Матф. 24:14). А христиандарды истешкен улу империянаҥ не де артпаган. Бого ло коштой Христостыҥ ол ӧйдӧги чындык ишчилери эмди теҥериде башкарат. А олорды истешкен улус божоп калган. Келер ӧйдӧ Кудай олорды тиргизип те салза, олорго бу Каандыктыҥ башкарузыныҥ ӧйинде јадарга келижер (Ачыл. 5:10).

5. Иоанн 15:19-ла болзо, бу телекей Иегованыҥ ишчилерин нениҥ учун уйан кӧрӧт?

⁵ Бӱгӱнги кӱнде Иегованыҥ ишчилерин кезик улус база неме аайлабас ла тенексӱ деп кӧрӧт, олорды јабыс кӧрӧт лӧ олорго каткырыжып јат. Нениҥ учун дезе бис бӱгӱнги телекейдиҥ кӧрӱмиле јӱрбей јадыс. Бис јобош ло јымжак болорго албаданадыс. А телекей дезе, улуркак ла бийиркек улусты јарадат. Анайда ок бис кандый да ороондо јадып турган болзоос, политикага киришпей јадыс ла черӱге барбай јадыс. Бис бу телекейдиҥ нормаларына чек келишпей јадыс, оныҥ учун ол бисти уйан кӧрӧт. (Иоанн 15:19 кычырыгар; Рим. 12:2).

6. Иегова бойыныҥ ишчилерине кандый једимдерге једерге болушкан?

⁶ Бу телекей бисти уйан кӧрӱп турган да болзо, је Иегова бис ажыра сӱрекей јаан иш эдет. Ол бастыра јердиҥ ӱстинде сӱрекей јаан јарлаар ишти башкарат. Оныҥ ишчилериниҥ чыгарып турган журналдары бастыра јердиҥ ӱстинде башка-башка тилдерге эҥ ле кӧп кӧчӱрилип јат ла эҥ ле кӧп тиражла чыгат. Иегованыҥ Керечилери улусты ырысту јӱрзин деп болужарга, Агару Бичик тузаланат. Улустыҥ кӧзинде не де кире бодолбой турган улус јӱк ле Иегованыҥ болужыла сӱрекей јаан једимдерге јединет. Је Иегова бистиҥ кажыбыска ла болужат па?  Ол биске ийде-кӱч берер бе? Эйе болзо, биске нени эдер керек? Апостол Павелдиҥ темин шӱӱп сананып, бис кандый ӱч немеге ӱренер аргалу деп кӧрӱп ийектер.

7. Бис Павелдиҥ теминеҥ неге ӱренедис?

⁷ Баштапкызында, апостол Павелдиҥ теминеҥ Иеговага иштееринде бойыстыҥ ийде-кӱчиске ле јайалталарыска иженбес керек деп ӱренедис. Павел бийиркенип, јӱк ле бойына иженер аргалу болгон. Нениҥ учун дезе ол Римниҥ Киликия деп провинциязында ӧзӱп јаранып јаткан Тарс деген каланаҥ болгон. Бу кала бийик ӱредӱ берип турган тӧс јер болгон. Павел иудейлердиҥ ады јарлу Гамалиил деп ӱредӱчинеҥ бийик ӱредӱ алган (Ап. ижи 5:34; 22:3). Кандый да ӧйдӧ Павел иудейлердиҥ ортозында бойы да тоомјыда јӱрген. Ол мынайып айткан: «Иудейлердиҥ чӱм-јаҥын бӱдӱреринде јажыт улус ортодо меге једери јок болгон» (Гал. 1:13, 14; Ап. ижи 26:4). Је Павел бойына иженбеген.

8. Филиппыдагыларга 3:8-ле болзо, Павел артыргыскан немезине кандый кӧрӱмдӱ болгон ло уйан болгонына нениҥ учун сӱӱнген?

⁸ Павел бу телекейдиҥ кӧрӱмиле јаан јамылу болгонын бир де карамдабай артыргызып койгон. Бу ӱзе немени ол сӱре-чӧп деп кӧргӧн. (Филиппыдагыларга 3:8 кычырыгар.) Павел Христостыҥ ӱренчиги болорго, јаан баа тӧлӧгӧн. Оны бойыныҥ ла албатызы јаман кӧргӱлеген (Ап. ижи 23:12—14). А римляндар оны согуп, тӱрмелеп туратандар (Ап. ижи 16:19—24, 37). Анайда ок ол бойыныҥ уйан јандарына тыҥ санааркаган (Рим. 7:21—25). Је ол истежӱлердеҥ де, бойыныҥ јастыраларынаҥ да улам ал-санаага тӱшпеген. Карын уйан болгонына сӱӱнип јӱрген. Нениҥ учун дезе уйан болгон тужында Кудайдыҥ болужын кӧргӧн (2 Кор. 4:7; 12:10).

9. Улус бисти уйан кӧрӱп турза, биске кандый санаалу артар керек?

⁹ Кудайдаҥ ийде-кӱч аларга турган болзоос, Кудай бисти ийде-кӱчтӱ, бийик ӱредӱлӱ, бийик культуралу ла акча-јӧӧжӧлӱ болгоныс учун баалап турган деп сананбас керек.  Кудайдыҥ албатызында «ойгор... кӱчтӱ ле укту-тӧстӱ улус» кӧп эмес, карын Иегова «телекейде чине јок дегенди» талдап алган (1 Кор. 1:26, 27). Оныҥ учун ӧрӧги тоололгон немелер јоктоҥ до слер Иеговага иштеп ийер аргалу. Карын мынайып слер Иегованыҥ болужыла кӱчтӱ болуп калараар. Темдектезе, слердиҥ бӱдӱмјигерди алаҥзыдып турган улустаҥ коркып турган болзогор, бӱдӱмјигерди корулаарга, Иегованаҥ ийде-кӱч сурагар (Еф. 6:19, 20). Эмезе слер эмделбес оорула ооруп турган болзогор, аргагар бар јарлаар ишке туружып турарга, Иегованаҥ ийде-кӱч сурагар. Слер Иегованыҥ болужын канча ла кире кӧп кӧрзӧгӧр, бӱдӱмјигер ончо ло кире тыҥ болуп калат ла слер кӱчтӱ болуп каладаар.

10. Биске нениҥ учун Кудайдыҥ чындык ишчилериниҥ темдеринеҥ, ол тоодо Еврейлерге 11:32—34-тӧ дӧ айдылган улустыҥ теминеҥ ӱренер керек?

¹⁰ Павел Агару Бичимелди лаптап шиҥдеп туратан. Ол Кудайдыҥ Сӧзинде бичилген Иегованыҥ чындык ишчилериниҥ теминеҥ кӧп немеге ӱренген. Павел еврей укту христиандарга бичиген самаразы ажыра олорды бу улустыҥ темдерин шӱӱп сананзын деп кӱӱнзеткен. (Еврейлерге 11:32—34 кычырыгар.) Олордыҥ бирӱзи Давид каан. Оны јӱк ле ӧштӱлери истешкен эмес, је најылары да истешкен. Давидтиҥ темин кӧрӱп ийеле, Павелге оныҥ темин шӱӱп сананганы канайып болушкан деп кӧрӱп ийектер. Анайда ок бис Павелдиҥ теминеҥ неге ӱренер аргалу деп шӱӱжип ийерис.

11. Давид нениҥ учун уйан деп кӧрӱнген? (Кадарындагы јурукты кӧрӱгер.)

¹¹ Голиаф деп кӱчтӱ јуучылга Давид уйан деп билдирген. Ол Давидти кӧрӱп ийеле, «оны немеге бодободы». Нениҥ учун дезе Голиаф јуу-согушка јакшы белетелген бийик сынду, мылтык-јепселдӱ јуучыл болгон. Ого кӧрӧ јиит Давид јуулажар нези де јок уйан јуучыл деп кӧрӱнген. Је чынынча болзо, Давид сӱрекей јаан ийде кӱчтӱ болгон, нениҥ учун дезе ол Иеговага иженген. Иегованыҥ болужыла ол ӧштӱни јеҥип алган (1 Сам. 17:41—45, 50).

12. Давидке база неле тартыжарга келишкен?

¹² Давид база бир шылтактаҥ улам бойын уйан ла кӱч јок деп сескен болор. Ол Иегованыҥ Израиль албатыга тургускан Саул деп каанныҥ чындык ишчизи болгон. Баштап тарый Саул Давидти тооп туратан, је оноҥ бийиркене береле, Давидке кӱйӱнип баштаган. Керек дезе Саул Давидти јаман кӧрӱп, ӧлтӱрерге де албаданган (1 Сам. 18:6—9, 29; 19:9—11).

13. Саул Давидке јаман баштанып турарда, Давид ого канайып баштаган?

¹³ Саул Давидке јаман да баштанып турарда, Давид оны тӱҥей ле тоогон, нениҥ учун дезе Саул Иегованыҥ майлатканы болгон (1 Сам. 24:6). Давид Иегованы Саулдыҥ калју керектери учун бир де бурулабаган. Карын Иеговага иженип, бу уур ченелтени ӧдӧргӧ, Кудай ого ийде-кӱч берер деп бӱткен (Сар. 18, надписание; 18:1).

14. Павелдиҥ айалгазы Давидтиҥ айалгазына незиле тӱҥей болгон?

¹⁴ Апостол Павел база мындый айалгага туштаган. Оныҥ ӧштӱлери оноҥ канча киреге кӱчтӱ болгон. Ол ӧйдиҥ кудай јаҥыныҥ ла политиканыҥ башчылары Павелди кӧрӧр кӱӱндери јок болгондор. Олордыҥ јакарузыла Павел канча катап соктырткан ла тӱрмелеткен. Павел Давид ле чилеп најыларына да јаман кӧрдӱрген. Темдектезе, јуундагы кезик христиандар ого удурлажып туратан (2 Кор. 12:11; Флп. 3:18). Је Павел ого удурлашкан улустыҥ ончозын јеҥип алган.  Канайып? Ол будактарга кӧрбӧй, оноҥ ло ары јарлап туратан. Јуундагы ака-эјелер ого јаман баштанган да болзо, ол олорго бир де ачынбаган. Је эҥ керектӱзи, Павел јӱрӱминиҥ учына јетире Кудайга чындык арткан (2 Тим. 4:8). Ол коркышту јаан кӱчтер ӧткӧн, нениҥ учун дезе ол бойыныҥ кӱӱчине эмес, је Иеговага иженген.

15. Бис кандый амадуга једерге албаданадыс? Бу амадуга једерге нени эдер керек?

¹⁵ Слер кожо ӱренип турган балдарга, кожо иштеп турган улуска эмезе Керечил эмес тӧрӧӧндӧрӧӧргӧ јаман кӧрдӱредигер бе? Ол эмезе слерге јуунныҥ улузы јаман баштанган болор. Андый болзо, Давидтиҥ ле Павелдиҥ темин ундыбагар. Слерде јаманды јакшыла јеҥетен арга јаантайын бар (Рим. 12:21). Улус слерге удурлажып турза, слердиҥ амадугар — олорго Давид чилеп Голиафка удура ташту чыгар керек эмес, је Иегова ла Агару Бичик керегинде куучындаарга албаданып, јаманды јакшыла јеҥери. Слер улустыҥ сурактарына Агару Бичиктиҥ болужыла каруу берип турзаар, слерге јаман баштанган улуска тоомјылу баштанып турзаар ла ончо улуска, керек дезе ӧштӱлереерге де јакшыны эдип турзаар, мындый амадугарга јединереер (Матф. 5:44; 1 Пет. 3:15—17).

16, 17. Павел кандый ӱредӱни бир де ундыбай јӱрген?

¹⁶ Апостол Павел христиан болордоҥ озо, Иисустыҥ ӱренчиктерин коркышту тыҥ истешкен (1 Тим. 1:13; Деян. 7:58). Павелди (ол ӧйдӧ Савл деп адыла јарлу болгон) христиан јуундарды истежеринеҥ Иисус бойы токтоткон. Иисус Павелге теҥеринеҥ баштанып, оны сокортып ийген. Кӧзи ойто кӧрзин деп, Павелге бойыныҥ ла истеген улузына баштанарга келишкен. Анайып Павел Христостыҥ Анания деп ӱренчигиниҥ болужын јобош алынып ийерде, кӧзи ачыла берген (Ап. ижи 9:3—9, 17, 18).

¹⁷ Кийнинде Павел христиан јуунда јаан иш эткен. Је ол Дамаск баратан јолдо болгон Иисустыҥ ӱредӱзин бир де ундыбаган. Павел јобош болгон ло ака-эјелердиҥ болужын алып туратан. «Олор меге коот болгондор» — деп, ол айткан (Кол. 4:10, 11).

18. Кезик христиандар улустыҥ болужын нениҥ учун албай јат?

 ¹⁸ Павелдиҥ теминеҥ неге ӱренедис? Иегованыҥ Керечилериле баштап ла танышкан ӧйдӧ, бис ака-эјелердиҥ болужын сӱӱнип алынган болорыс, нениҥ учун дезе кӧгӱс јанынаҥ јаш балдар болгонысты ла кӧп немени билбес болгонысты оҥдоп туратаныс (1 Кор. 3:1, 2). А эмди? Эмди дезе, Иеговага узак јылдардыҥ туркунына иштеп, ченемелис јаан болуп каларда, бис улустыҥ болужын, анчада ла бистиҥ кийнистеҥ чӧҥӱрилген ака-эјелердиҥ болужын кезикте аларга кӱӱнзебей турган болорыс. Је Иегова биске шак ла ака-эјелер ажыра болужат (Рим. 1:11, 12). Оныҥ учун Иегова биске ийде-кӱч берзин деп турган болзоос, биске ака-эјелердиҥ болужын алар керек.

19. Павел недеҥ улам кӧп кайкамчылу керектер эткен?

¹⁹ Павел Христостыҥ ӱренчиги болуп калала, кӧп кайкамчылу керектер эткен? Ого не болушкан? Ол дезе, бу ончо неме кижиниҥ ийде-кӱчтӱ болгонынаҥ, јакшы ӱредӱлӱ болгонынаҥ ла арга-чакту јатканынаҥ эмезе угы-тӧзи кандый болгонынаҥ камаанду эмес деп оҥдогон. Карын Иеговага иженип турган јобош улус мындый кӧп кайкамчылу керектер эдет. Айдарда, Павелдеҥ тем алып, мындый шӱӱлтелерди ундыбай јӱректер: 1) Иеговага иженер керек, 2) библиялык темдердеҥ ӱренер керек ле 3) ака-эјелердиҥ болужын алар керек. Ол тушта бис бойысты кандый да уйан деп сезип турзаас, Иегова бисти ийде-кӱчтӱ эдип салар!