1. Pakayni pakayraan noniyah, mansanay ko sowal no tarokos ci Pawlo hani?

IHKALAY ko sowal no tarokos ci Pawlo, latekay malonayay ko niyah sanay miharateng. Sowal ningra ‘palidlid sanay malonay’ ko tireng no niyah, somowalayho misaˈicel ngaˈ matatodongay ko demak no niyah. Latekay, cowa ka tooren ni Yihofa ko milongocan ni Pawlo a pacaˈof to satolon ningra. (2 Korinto 4:16; 12:7-9; Loma 7:21-23) Roma i, somowalay ci Pawlo cowa ka samaan cingra, o malonayay * sanay ko misafelitay cingranan. Soˈlin malonay anca malikaf no tao ko niyah, cowa piharateng ci Pawlo to awaay ko kapo no niyah.—2 Korinto 10:10-12, 17, 18.

2. Mikitini 2 Korinto 12:9, 10, mananamay ni Pawlo ko maanan kalimlaan a kimad?

² Mananamay ni Pawlo ko cecay kalimlaan a kimad, itini kalonayan ningra a tatokian wa ngaˈayho tanektek a tomireng. (ˈOsien ko 2 Korinto 12:9, 10.) Pasowalan ni Yihofa ci Pawlo, o ˈicel Ningra ‘itini kalonayan no tamdaw a mahapinang to malefotay,’ tatodong i, o papafelien Ningra ci Pawlo to ˈicel. Dotoc, nengnengen ita, hano cowa ko caciharateng kita to kapilikaf no tao.

3. Hano makahi kita mihadidi to pipakangodo hani?

³ Ano pakangodo ko tao kitaanan, caay ka rihaday ko harateng ita, kawra paifalocoˈ han ita ko sowal no tao, o mamatoled ko falocoˈ. (Taneng 24:10) O sasamaan kita misiˈayaw to pipakangodo hani? Malecad ci Pawloan, wa ngaˈay minanam kita ‘makahi mihadidi to sapakangodo.’ (2 Korinto 12:10) Misamanay hani? Samanen malikaf anca misafelit ko tao kitaanan, misawacayay to o soˈlinay a Krisciyang kita. (1 Pitiro 4:14) Sowal ni Yis o nisawawaan ningra o tatahacada to sapalak. (Yohani 15:18-20) Mahaenay ko saka 1 hahekalan a Krisciyang. Itiya, mafiyoray no serangawan no Kirisiya a tamdaw o mafolaay malonayay ko Krisciyang sanay, harateng no Yutaya tamdaw i, o Krisciyang malecaday to tarokos ci Pitiroan aci Yohanian, o ‘cowa picudad a kalo tamdaw’ sanay. (Dmak 4:13) Roma i, harateng no ˈalomanay o malonayay awaay ko inaneng no Krisciyang, samanen o kapiliˈan no ˈalomanay, manaˈayayho mirienang to mikowanay, cowa pakafiyor to mikowanay, hanaca manaˈayayho malasofitay, awaay ko ˈicel a midipot to niyah.

4. Masakahmaw no tamdaw ko salakatay Krisciyang, kawra samaanay ko demak nangra hani?

⁴ Masakahmaw no tamdaw ko salakatay Krisciyang, hawad sanayto mihakelong ci Yisan hokira? Cowa. Tinakoen o tarokos ci Pitiro aci Yohani, harateng nangra, pakayni pihakelong ci Yisan ato padama to tao mafanaˈ ci Yisan tahacada to sapalak, o kalikoan a demak sanay. (Dmak 4:18-21; 5:27-29, 40-42) Cowa ko kangodoan sanay ko piharateng noya Krisciyang. O sapadama nangra to tao, ikakaay ko adihay to misafelitay cangranan a tamdaw. Tinakoen, o roma Krisciyang micadaay to sakayat no Kawas, mitiliday to Fangcalay Cudad, oniya matiliday a cudad pairaay to sapadama ato hatokel no masacaˈolay masaemangay a tamdaw. Oya milasilan nangra a Hongti Kitakit, tomirengayto i kakarayan, hanaca caka halafin wa mikowan to polong a tamdaw. (Matay 24:14) Kawra oya na mikariˈangay to Krisciyang a mikowanay, malahdawayto. Oya madimadiay a Krisciyang itiniayto i kakarayan mikowan, oya misafelitay cangranan a tamdaw mapatayayto. Soˈlin papatikol cangra maˈorip no ikor, wa itini pikowan noya na mikaˈintehan nangra a Krisciyang.—Paˈarawan 5:10.

5. Mikitini Yohani 15:19, o finawlan ni Yihofa hano masakahmaw no hekal tamdaw hani?

⁵ Anini, finawlan ni Yihofa misakahmawan no tao alatek, o roma tamdaw sanay ko sowal o mafolaay malonayay kita sanay. Misamaanay hani? Samanen o waywayan ita cowa ka lecad tono hekal a tamdaw, misaˈicelay kita malo misapoeneray damsayay a tamdaw, kawra masemeray ko hekal tamdaw to misatakaraway a tamdaw. Roma i, manaˈayayho kita malasofitay anca mirienang to mikowanay. Cowa picapid kita tono hekal a waywayan, mansa masakahmaw no hekal tamdaw.—ˈOsien ko Yohani 15:19; Loma 12:2.

6. Misakadademakan ni Yihofa ko finawlan Ningra palaˈosi to maanan kasapaan a demak?

⁶ Soˈlin masakahmaw no hekal tamdaw kita, kawra misakadademakan ni Yihofa kita palaˈosi to kasapaan a demak. Anini, o mitosilay a demak taˈangayay ko kacowat. O finawlan no Kawas saadihayay ko sasowalen a mitepangan ato saadihayay ko palilaman a casi, misakadademakayho to Fangcalay Cudad padama to masaemangay a tamdaw malipahak ko kaˈorip. Oniya kihcod sahtoay o minaroˈan ni Yihofa, misakadademakan Ningra ko hato malonayay a tamdaw palaˈosi toniya demak. Mankora, samaan kita hani? Wa padama ci Yihofa kitaanan  o kahacecay a tamdaw malaˈosi ko demak Ningra han? Samaan kita milifok to ˈicel Ningra hani? Dotoc, wa milengo kita mikitini ci Pawloan ngaˈay minanam to manan toloay a pakayraan.

7. Mikitini ci Pawloan wa ngaˈay kita minanam to maanan a pakayraan hani?

⁷ Mikitini ci Pawloan wa ngaˈay kita minanam to cecay a pakayraan: Aka miˈtier to inaneng no niyah midoko ci Yihofaan. O pinengneng no tamdaw, iraay ko lalangian ni Pawlo misatakaraw ato miˈtier to niyah. Itiniay i Tarsus lomahad cingra, o kalimlaan a niyaˈro no Loma, satenokan no pinanaman, hanaca tada cihafayay. ˈAkawangay ko picudadan ni Pawlo, o singsi ningra o ˈakawangay ko saaroˈan i Yutayakiyo ci Kamalil. (Dmak 5:34; 22:3) Salakat, itini lalomaˈ no Yutaya tamdaw ngaˈayay ko ngangan ni Pawlo, sanay cingra: “Ikaka no ˈalomanay a finacadan a selal ako ko lalok ako a mitoor tono Yutaya a pakayraan.” (Kalatiya 1:13, 14; Dmak 26:4) Kawra, cowa ka piˈtier ci Pawlo to niyah.

8. Mikitini Filipi 3:8, samanay ko pinengneng ni Pawlo to misawadan ningra a dafong hani? Hano ‘mihadidiay to kalonay’ ci Pawlo?

⁸ Salo sanay ci Pawlo misawad to misalimlaan no hekal tamdaw a dafong, hanaca ‘o hadec sanay ko pinengneng’ toniya dafong. (ˈOsien ko Filipi 3:8.) Ikor no malo Krisciyang, tahalifaay ci Pawlo to adihayay a roray. Mikaˈintehan no Yutaya tamdaw cingra. (Dmak 23:12-14) Soˈlin o Loma ko kika ningra, kawra mipekpekan ato mipalitan no Loma tamdaw cingra. (Dmak 16:19-24, 37) Roma i, pakayni dangoc no niyah tada makesemay ci Pawlo. (Loma 7:21-25) Kawra ‘mihadidiay to kalonay’ ci Pawlo, cowa ka pakayni pisafelit no tao ato dangoc no niyah ecato ka malo Krisciyang. Misamanay hani? Samanen itini kalonayan ningra i, pafelian no Kawas cingra to kasapaan a ˈicel.—2 Korinto 4:7; 12:10.

9. Sasamaan kita minengneng to dangoc no niyah hani?

⁹ Ano sapilifokaw kita to sapafeli ni Yihofa a ˈicel, aka tano picudadan, tanoktok no tireng, hafay anca saaroˈan toniya hekal ko sapilalat to epoc no niyah. Cowa ko kalimlaan sanay  ko pinengneng ni Yihofa toniya dafong. Soˈlinay i, lalomaˈ no finawlan no Kawas, cowa ka ˈaloman ko citanengay, cowa ka ˈaloman ko cifadangalay, ‘cowa ka ˈaloman ko tadamaanay a tamdaw’, kawra ‘o malonayay toni hekal ko mipiliˈan’ no Kawas malo finawlan Ningra. (1 Korinto 1:26, 27) Mihaenay, hamaan papicaraen ko dangoc no niyah to pidoko iso ci Yihofaan, tawliken ko pinengneng to pakayraan no niyah. O mamaˈaraw iso ko pipafeli ni Yihofa kisowanan to kasapaan a ˈicel. Tinakoen, ano cisasa ko tamdaw tisowanan a matalaw ko harateng, ngaˈayay cangacangen ci Yihofa pafeli tisowanan to timolo a miˈading to pihakelongan. (Ifiso 6:19, 20) Ano pakayniay i adada a maroray kiso, ngaˈayay cangacangen ci Yihofa pafeli to ˈicel tisowanan, ho ngaˈay kiso misarocod a matayal saki Cingraanan. Maˈaraw iso ko pisaliyaliyaw ni Yihofa padama tisowanan, mamatongal ko pakasoˈlin iso, matongal ko tanektek.

10. Itini Hipray 11:32-34 masowalay ko adihayay madimadiay sikawdan no Kawas, hano maminanam kita cangranan ato roma ngaˈayay taˈarawan i Fangcalay Cudad hani?

¹⁰ Misongilaˈay ci Pawlo minanam to Fangcalay Cudad, mikitini ngaˈayay taˈarawan no Fangcalay Cudad minanam to adihayay a pakayraan. Patikami cingra to Hipray a Krisciyang i, pakalalokay cangranan miharateng to pakasoˈlinay ci Yihofaan a tamdaw. (ˈOsien ko Hipray 11:32-34.) Tinakoen ci Tafiti, o macadaay ningra a pisafelit cowa ko ˈada aca, iraayho ko nano widang i salakat. Dotoc lengoen ita ko taˈarawan ni Tafiti, nengnengen ita o malifaay ni Tafiti hano ngaˈay pakalalok ci Pawloan, ato sasamaan kita pasayra ci Pawloan a minanam.

11. Miharateng ci Koliyat hano katangay tapiˈen ci Tafiti hani? (Nengnengen ko papotalay coka.)

¹¹ Tanektekay ko tireng a Koliyat ‘misakahmaway ko pinengneng ci Tafitian,’ kantangay tapiˈen sanay. Tanektekay ko tireng ni Koliyat, marocekay ko sapilood a lalosidan, adihayay ko milifetan a milood, ci Tafiti saan kaemangayho, cowaho ka pilood, kantangay ko sapilood a lalosidan. Kawra, masafaay koniyah caka saan ci Tafiti a miharateng, pakasoˈlinay cingra ci Yihofaan, hanaca mitiˈer to ˈicel no Kawas milowid toniya katalawan a ˈada.—1 Samuil 17:41-45, 50.

12. Wa misiˈayawho ci Tafiti to maanan a sapalifet hani?

¹² Ikor to, wa misiˈayawho ci Tafiti to mitoleday cingranan a sapalifet alatek. O minilnilan no Kawas ci Sawlo a hongti, na madimadiay ci Tafiti matayal saki cingraanan, misalimlaanho ni Sawlo. Ikorto i, pakayni pisatakaraw ningra misatapangay a mapodoh ci Tafitian. Mipalakay ci Sawlo ci Tafitian, sapipatayaw cingranan.—1 Samuil 18:6-9, 29; 19:9-11.

13. Soˈlin micada to sapalak ni Sawlo, kamayan misamaan ko demak ni Tafiti?

¹³ Soˈlin micada to sapalak ni Sawlo, kamayanho mikangodo ci Tafiti ci Sawloan, samanen o minilnilan ni Yihofa a hongti ci Sawlo. (1 Samuil 24:6) Ci Tafiti cowa ka pakayni i demak ni Sawlo a ngaliwngiw ci Yihofaan, ao mitadiˈecay to sapafeli ni Yihofa a ˈicel, malaˈosi ko pilakowit toniya sapalifet.—ˈOlic 18:1 ato lalangian.

14. Malifaay ni Pawlo ko maanan malecaday ni Tafiti a pakayraan?

¹⁴ O malifaay ni Pawlo a pakayraan malecaday ci Tafitian. O ˈada ni Pawlo mikikakaay ko ˈicel cingranan. ˈAlomanay ko ci fadangalay a tamdaw tada ˈintehay cingranan, mansa kinapinaay a mapekpek, mapalit cingra. O roma tamdaw nao hawidang ni Pawlo, kawra tada tatiihay cingraanan, ano i kopangay to a tamdaw  misafelitay cingranan. (2 Korinto 12:11; Filipi 3:18) Kawra, malowiday ni Pawlo ko polong misafelitay cingranan a tamdaw. Misiˈayaw to sapalak, padotocay cingra tanektek a mitosil. Soˈlin pakatoled ko salikaka cingranan, kamayanho a madimadi cingra cangraanan. Sakakaay i, padotocay cingra a madimadi ci Yihofaan. (2 Timoti 4:8) Ngaˈay cingra miremo to masakenaay a pasangaray, cowa ko niyah a ˈicel ko mitiˈeran, ao mitiˈeray to ˈicel ni Yihofa.

15. Ano tahalifa to pisafelit i, o patosokan iso o manan? Sasamaan milaˈosi toniya patosokan?

¹⁵ Cafay micudad, cafay matayal, cowa pihakelong a paro no lomaˈ malikafay anca mipalakay tisowanan hokira? Iraay ko salikaka cowa kangaˈay tisowanan hokira? Ano iraay i, haratengen ko ngaˈayay taˈarawan ni Tafiti aci Pawlo. Wa ngaˈay kiso ‘tano ngaˈayay milowid to tatiihay.’ (Loma 12:21) Ano tahalifa to pisafelit i, o patosokan iso cowa ko mamalecad ci Tafitian tano fakeloh mipadik to tao, ao tano sowal no Kawas a mipatemer to falocoˈ nangra. Saka laˈosiaw no patosokan, tatano Fangcalay Cudad ko sapacaˈof to salicay nangra, padotoc a mikangodo cangranan, mitafo to damsayay, midemak to ngaˈayay i polong a tamdaw, mahawpay ko ˈada iso.—Matay 5:44; 1 Pitiro 3:15-17.

16-17. Cowa ka pawan ci Pawlo to maanan?

¹⁶ ˈAyaw no malo Krisciyang ko tarokos ci Pawlo i, na mariˈangay a mipalak to nisawawaan ni Yis. (Dmak 7:58; 1 Timoti 1:13) Ikor, ci Yis ko micongeday ci Pawloan padotoc a midokaˈ to Krisciyang. Mikitiniay i kakarayan ci Yis pasowal cingraanan, hanaca mipohaw cingranan to cecay liyad, telocto pasayraay ci Pawlo i mipalakan ningra a tamdaw misaali to sapadama. Misapoeneray cingra micada to sapadama ni Ananiya, ikor miliyaway a pakaˈaraw.—Dmak 9:3-9, 17, 18.

¹⁷ Ikorto itini kasakopang mikangodoan no ˈalomanay tamdaw ci Pawlo, kawra cowa ka pawan cingra to mananamay no niyah a demak i fatad no sakatayra i Tamaseke. Padotocay ci Pawlo a misapoener to falocoˈ, makahi a micada to sapadama no salikaka, sowal ningra o salikaka ko ‘patanektekay cingranan.’—Kolosay 4:10,11 ato roma pihongyak.

18. Itini manan pakayraan, cowato ka makahi kita micada to sapadama alatek?

 ¹⁸ Mikitini ci Pawloan mamananam ita ko maanan hani? Satapang aca micawmaˈ kita to finawlan no Kawas i, mitokelay padama ko tao kitanan alatek, samanen cowaho katenes ko niyah, adihayayho ko hananamen a demak. (1 Korinto 3:1, 2) Kawra nohatini i? Ano halafinayto kita a midoko ci Yihofaan, hanaca adihayay ko milifetan, cowato ka makahi micada to sapadama alatek. O sapadamaaw kitaanan a tamdaw cowaho ka halafin a midoko to Kawas, wa ecato picada kita to sapadama alatek. Kawra marariday ci Yihofa misaka dademak to salikaka a padama kitaanan. (Loma 1:11, 12) Ano sapilifokaw kita to sapafeli ni Yihofa a ˈicel, oha mamicada to sapadama no tao.

19. Hano malifok ni Pawlo ko kasemeran a minaroˈan no demak?

¹⁹ Ikor no malo Krisciyang ci Pawlo i, kasemeran ko minaroˈan no demak. Samanay a madangal ningra hani? O mitiˈeran ningra cowa ko picudadan, tanektek no tireng, hafay ato saaroˈan, ao ci Yihofa, mitafoayho cingra to misapoeneray, mansa malaˈosi ko adihayay makapahay a demak. Nanay todongen ita ci Pawlo, (1) mitiˈer ci Yihofaan, (2) mikitini ngaˈayay taˈarawan i Fangcalay Cudad a minanam, (3) micada to sapadama no salikaka. Mihaen, ano samaanto ko kalonay no niyah, o papatomesen ni Yihofa kita to ˈicel!