1. Pablo, ¿chem pi ñom piwke mu?

ÑOM piwke mu, Pablo feypi ñi yafüluwkenon kiñeke mu. Pablo ka feypi ñi kutrankülerpuken, ñi küdawtuken tañi femal Jewba tañi ayükeel. Ka feypi kiñeke mu Jewba wiñoldungukelaeyew tañi llellipun chumngechi tañi ayükefel (2 Kor. 4:⁠16; 12:⁠7-9, TNM; Rom. 7:⁠21-23). Pablo ka feypi yafüngenolu trokikefeyew kiñeke tañi pu kayñe.⁠ * Feley llemay, Pablo weda dunguyengekefuy ka welulkawkefuy, welu falintuwkefuy (2 Kor. 10:⁠10-12, 17, 18).

2. Ñi feypin 2 Korintio 12:⁠9, 10, ¿chem falin dungu kimürpuy Pablo?

² Pablo kimürpuy kiñe falin dungu, tati pu che newenküleafuy weda duamkülele rume. Chaw Dios feypifi ta Pablo: “Iñche tañi kutranpiwkeyecheken fentepuwkay eymi mu, ngañwadkülelu eymi iñche tañi newen doy yafültukueymu”. Feymu Pablo feypi: “Rume ayüwkülen mallmawan reke tañi ngañwadkülen mew, femngechi Kristo tañi newen yafülduamelenew kiñe ellkawpeyüm reke. Feymu ayüwülkeenew ñi ngañwadkülen, weda pingen mu,  filla dungu mu, kayñetungen ka weda rupan, Kristo ñi duam mu. Ngañwadkülekelu am iñche, fey newen-ngeketun” (2 Korintio 12:⁠9, 10, TNM). Jewba feypifi ta Pablo: “Ngañwadkülelu eymi iñche tañi newen doy yafültukueymu”. Femngechi Jewba feypifi ta Pablo ñi newentukuafiel fente tañi duamnieel. Fewla peaiñ chumngelu weda duamlayaiñ weda pingen mu.

3. Weda pingeliyiñ rume, ¿chumngelu ayüwküleafuiñ?

³ Iney no rume ayükelay tañi weda pingeal. Welu rume longkontukunieliyiñ taiñ weda pingeel, weda duamnagafuiñ (Prov. 24:⁠10). Feymu, ¿weda pingeliyiñ kay? ¿Chem mülefuy taiñ femal? Pablo reke ayüwküleafuiñ weda pingen mu (2 Kor. 12:⁠10, TNM). ¿Chumngelu am? Taiñ weda pingeken ka taiñ kayñetungeken pengelkey taiñ rüf cristiano ngen (1 Ped. 4:⁠14). Jesus feypi ñi kayñetungeal tañi pu inanieetew (Juan 15:⁠18-20). Tati pu wünenke cristiano femngechi dungu rupay. Feychi antü mu, fentren che inakefuy pu griego ñi kimeltun. Tüfa engün newe kimnolu trokifingün tati pu cristiano ka illamkafingün. Tati pu judio ka femngechi illamkakefingün tati pu cristiano. Kiñe rupa, feypifi Pedro ka Juan ñi newe kim papeltunon engu (Hecho 4:⁠13). Tati pu cristiano konkelafuy politica dungu mu ka tati pu militar mu, feymu newenkülenolu trokifingün ka illamkafingün.

4. Kayñetungelu pu wünenke cristiano, ¿chumingün?

⁴ Kayñetungelu tati pu wünenke cristiano, ¿fentekünupeyngün may ñi serfiniefiel ta Jewba? Femlay llemay. Apostol Pedro ka Juan kayñetungeyngu tañi inaniefiel ta Jesus ka tañi kimeltuchen, feymu ayüwkülefuyngu (Hecho 4:⁠18-21; 5:⁠27-29, 40-42). Tati pu cristiano yewentukuwlayngün tañi cristiano ngen mu. Feytachi pu cristiano weda trokingefulu engün rume, welu kidu engün rume küdawi ñi kelluafiel tati pu che. Kiñeke tüfachi pu cristiano ñi wirintukuel ta Biblia mu rume kellufi pütrünke che kuyfi mu, ka femngechi famülke mu. Feytachi pu cristiano amuldungukefuy Chaw Dios tañi Gobierno mu. Feytachi Gobierno ngüneniey wenu ka pichiñma mu ngünenieafi kom ti Mapu (Mat. 24:⁠14). Welu tati pu romano ñi kayñetukefiel pu wünenke cristiano fachantü ngewetulay. Fewla tüfachi pu cristiano ngüneniekeyngün wenu mu, welu kom tati che ñi kayñetukefetew kom layngün. Wiñomongetufule engün, ngünenietuaeyew Chaw Dios tañi Gobierno (Apok. 5:⁠10).

5. Ñi feypin Juan 15:⁠19, ¿chumngelu illamkangekeiñ?

⁵ Fachantü iñchiñ Jewba tañi pu che ngen, ayentungekeiñ, illamkangekeiñ, ka müte kimnolu trokingekeiñ. ¿Chemu am ta femkeeiñmu pu che? Iñchiñ trürlaiñ tati pu che mu. Iñchiñ yafüluwkeiñ taiñ ñom chengeal ka inayal taiñ feypietew Chaw Ngünechen, feymu üdengekeiñ. Welu doy falintungekey pu mallma chengelu ka pu kidu ngünewkelu. Ka femngechi iñchiñ taiñ pu cristiano ngen, konkelaiñ politica dungu mu ka pu militar mu. Iñchiñ am femkenolu kidu engün tañi femken, feymu illamkakeeiñmu (papeltunge Juan 15:⁠19; Rom. 12:⁠2).

6. ¿Chem fentren küdaw femkeiñ Jewba tañi duam mu?

⁶ Iñchiñ illamkangeliyiñ rume, Jewba tañi  duam mu femürpukeiñ fütrake dungu. Jewba tañi duam mu amuldungungekey wall Mapu püle. Chumkawnorume fente femngekelafuy. Jewba tañi trokiñche entukey revista fentren kewün dungu mu, wall Mapu püle wülngekey. Enseñalkefiyiñ tati pu che chem pin ta Biblia, femngechi ñi doy küme mongen nietual. Fey illamkangeliyiñ rume, Jewba adniekeeiñmu taiñ femürpual fütrake dungu. Kake kiñeke iñchiñ, ¿kellupeafeiñmu may Jewba taiñ newen-ngeal? Femfule, ¿chumafuiñ taiñ kelluaetew? Peaiñ küla dungu Pablo tañi femün.

7. ¿Chem kimeltukeeiñmu ñi femün ta Pablo?

⁷ Pablo tremi Tarso mapu mu, kiñe falin waria Roma mu mülelu. Tarso waria mu, küme felekefuy ta che ka mülekefuy kiñe fütra universidad. Pablo kimeltukefeyew kiñe fütra kimeltufe, feymu rume kim wentrungefuy (Hecho 5:⁠34; 22:⁠3). Pablo müna falin wentru ngerpuy pu judio mu. Kidu feypi: “Tati pu judio ñi wimtun dungu mew, iñche ta doy küme famkonkülekefun fentren kakelu che mew” (Gal. 1:⁠13, 14; Hecho 26:⁠4). Feymu Pablo rume falintungekefuy. Ka wentru ngefule ta Pablo, kidutu mallmawafuy ka kidutu maneluwafuy. Welu tañi cristiano ngerpun mu, femlay. ¿Chem kimeltukeeiñmu tañi femün ta Pablo? Iñchiñ serfifiel mu ta Jewba, maneluwlayaiñ kidu taiñ kimün mu ka kidu taiñ newen mu.

8. 1) Ñi feypin Filipense 3:⁠8, ¿chem rakiduamkey Pablo tañi elkünuel? 2) ¿Chemu feypi Pablo ñi ‘ayüwülkeetew ñi ngañwadkülen’?

⁸ Pablo ayüwünkechi elfi tañi falin wentru ngekefel ta pu judio mu, fey “kiñe falinochi dungu reke trokinietufiñ” pi (papeltunge Filipense 3:⁠8). Pablo cristiano ngerpulu, müna weda dungu rupafuy. Pablo üdeeyew tati pu judio (Hecho 23:⁠12-14). Ka femngechi tati pu romache wülelkaeyew ka carceltukueyew (Hecho 16:⁠19-24, 37). Pablo  küdawtukefuy ñi femal Chaw Dios tañi ayükeel tañi culpafe ngen mu (Rom. 7:⁠21-25). Fentren wedake dungu rupafulu rume, Pablo fentekünulay ñi inayafiel ta Kristo. Doy may pekefi reke chumngechi tañi kellukeetew ta Jewba, feymu feypi: “Ayüwülkeenew ñi ngañwadkülen” (2 Kor. 4:⁠7, TNM; 12:⁠10, TNM).

9. Newen-ngenolu trokiwliyiñ rume, ¿chem mülefuy taiñ rakiduamal?

⁹ Taiñ llowal Jewba tañi newen, longkontukuaiñ Jewba ngüneduamkelay tunte taiñ newen-ngen, tunte taiñ kimün-ngen, tunten plata taiñ nieel ka taiñ tuwün no rume. Epe kom iñchiñ taiñ poyekefiel ta Jewba fütrake kimün nielaiñ, ülmen tuwün nielaiñ, feymu illamkangekeiñ. Welu Jewba “dullifi tati illamniefelchi pu che” (1 Kor. 1:⁠26, 27). Feymu pofrengeliyiñ rume ka fentren educacion nienoliyiñ rume, serfiafuiñ ta Jewba. Femngechi doy küme peafuiñ chumngechi taiñ kellukeetew Jewba. Pu che weda piñmaeliyiñmu taiñ feyentukeel, llükayafuiñ chi. Feymu ngillatuafiyiñ ta Jewba taiñ eluaetew ta newen, femngechi ingkañpeafiyiñ taiñ feyentukeel (Efes. 6:⁠19, 20). Weda kutran nieliyiñ, kutrankawafuiñ. Feymu ngillatuafuiñ ta Jewba taiñ eluaetew ta newen, femngechi taiñ doy küme serfinieafiel. Doy pefiliyiñ taiñ kelluetew ta Jewba, doy maneluwaiñ kidu mu, fey doy newentukuaeiñmu.

10. Ebrew 11:⁠32-34 nütramkay fentren che poyekefilu ta Jewba kuyfi, ¿chumngelu ngüneduamafiyiñ ñi rupan engün?

¹⁰ Pablo rume chillkatukefuy Chaw Dios ñi dungu, femngechi kimürpukefuy ñi femün kakelu che poyekefilu ta Jewba. Pablo ngülamtufi pu ebrew ñi ka femngechi femal (papeltunge Ebrew 11:⁠32-34). Pablo pichi acordafi ta David. David kayñetueyew fentren che, kenü kiñeke tañi pu weni. Fewla ngüneduamafiyiñ ñi femün ta David, femngechi kimaiñ chumngechi tañi rupan kellufi ta Pablo. Ka kimaiñ chumngechi inayentuafuiñ ta Pablo.

11. ¿Chumngelu newen-ngenolu kechilefuy David? (Inaduamnge ti adentun wenulelu).

¹¹ Goliat doy alüfuy ta David mu ka doy pepikawkülefuy tañi weychayal. Welu David weche wentru ngefuy ka müte pepikawkülelafuy ti weychan mu. Feymu Goliat pefilu ta David, “ayentufi ka illamkafi”. David newen-ngenolu kechilefuy, welu maneluwkülefuy Jewba tañi newen mu. Feymu kidu newentukueyew, fey wewfi ta Goliat (1 Sam. 17:⁠41-45, 50).

12. ¿Ka chem dungu rupay ta David?

¹² Rupachi antü mu, David ka dungu chaftufi. Kidu küdawelkefuy ta Saul, Jewba ñi elkünuelchi rey. Ellaka mu, Saul yamkefuy ta David. Welu rupachi antü mu, ütrirfi ta David. Feymu kayñeturpufi ka epe langümfuy (1 Sam. 18:⁠6-9, 29; 19:⁠9-11).

13. Weda femetew Saul, ¿chumi David?

¹³ David kimniefuy Jewba ñi reykünufiel ta Saul. Feymu chumetew rume ta Saul, David yamkefuy (1 Sam. 24:⁠6). David culpalafi ta Jewba tañi weda femetew ta Saul, doy may David maneluwi Jewba mu tañi kelluaetew ñi chaftual feytachi weda dungu (Sal. 18:⁠1, ka wenuntu mew ti versiculo 1).

14. David reke, ¿chem wedake dungu mu rupay Pablo?

¹⁴ David reke, ka femngechi rupakefuy Pablo. Pablo kayñetueyew rume falinke che. Üdekeeyew fentren longkolechi religioso ka  fentren longkolechi politico. Kidu engün fentren rupa wülelkafingün ka carceltukufingün ta Pablo. David reke, Pablo kayñetueyew kiñeke che tañi femnoafetew, kenü kiñeke peñi ka lamngen kayñetueyew (2 Kor. 12:⁠11; Filip. 3:⁠18). Kayñetungelu rume, Pablo amulerpuy ñi amuldungumeken. Weda duamelngelu rume, Pablo piwkeyeniefi tañi pu peñi ka tañi pu lamngen. Doyelchi may Pablo serfiniefi ta Jewba tunte puwlu tañi mongen (2 Tim. 4:⁠8). ¿Chem kellueyew tañi femngechi femal? Maneluwlay kidu tañi newen mu, doy may maneluwi Jewba mu tañi newentukuaetew.

15. 1) ¿Chem ayünieiñ taiñ femal? 2) ¿Chumngechi femürpuafuiñ?

¹⁵ ¿Eymi kay? ¿Kayñetukepeeymu may tami pu compañ colegio mu, küdaw mu ka tami pu che mu? ¿Wedalkangepeymi may trawünche mu? Femngechi dungu mu rupalmi, inayentuafuymi Pablo ka David. Chumngechi ñi feypin ta Biblia, “wewafimi küme femün mew tati weda femün” (Rom. 12:⁠21). Kayñetueliyiñmu pu che, wedalkalayafiyiñ. Doy may kelluafiyiñ engün ñi kimafiel ta Jewba ka tati Biblia. ¿Chumngechi femürpuafuiñ? Pengelelafuiñ Biblia ta che taiñ wiñoldunguafiel engün. Pu che kayñetueliyiñmu rume, pengelelafiyiñ taiñ piwkeyeniefiel ka yamniefiel. Chumeliyiñmu rume tati pu che, kom kümelkayafiyiñ engün (Mat. 5:⁠44; 1 Ped. 3:⁠15-17).

16, 17. Pablo longkolerpulu rume, ¿chem femkefuy?

¹⁶ Petu ñi cristiano ngerpunon Pablo, Sawlu pingekefuy. Che trokichekelafuy ka kayñetukefuy tati pu cristiano (Hecho 7:⁠58; 1 Tim. 1:⁠13). Jesus dungurumefi ta Sawlu, feypifi ñi kayñetunoafiel tati pu cristiano, fey trawmalfi. Tañi pelotual, Sawlu kintufi ñi kelluaetew feychi che tañi kayñetukefiel. Sawlu ñom piwke mu eluwi ñi kelluaetew kiñe cristiano Anania pingelu, feymu pelotuy (Hecho 9:⁠3-9, 17, 18).

 ¹⁷ Rupachi antü mu, Pablo longkolerpuy trawünche mu. Welu femfulu rume, amulerpuy ñi ñom piwkengen ka eluwkefuy ñi kelluaetew tañi pu peñi ka pu lamngen. Pablo feypi ñi rume kelluetew ka yafültukuetew engün (Kol. 4:⁠10, 11).

18. ¿Chemu küdawtuafuiñ taiñ kellungeal?

¹⁸ ¿Chem kimafuiñ Pablo mu? We kimfilu iñchiñ tati rüf dungu, kimniefuiñ taiñ müte kimnon, feymu ayüwünkechi eluwkefuiñ taiñ kellungeal (1 Kor. 3:⁠1, 2). Welu fentren tripantu yenieliyiñ taiñ poyekefiel ta Jewba, fentren kimün nieafuiñ chi. Feymu eluwlayafuiñ taiñ kellungeal, doyelchi may ngülamtueliyiñmu kiñe peñi kam lamngen pichin tripantu yenielu. Welu Jewba adniekefi taiñ pu peñi ka pu lamngen taiñ kelluaetew (Rom. 1:⁠11, 12). Feymu ayüliyiñ taiñ kelluaetew Jewba, eluwaiñ taiñ kelluaetew pu peñi, pu lamngen.

19. ¿Chumngelu femürpuy Pablo falinke dungu?

¹⁹ Cristiano ngerpulu Pablo, falinke dungu femi. ¿Chemu am? Pablo kimniefuy, ñi küme tripayal tañi mongen mu ngelafuy ñi maneluwal kidu tañi kimün mu, kidu tañi newen mu, ka tañi nieelchi plata mu. Doy may mülefuy ñi ñom chengeal ka maneluwal Jewba mu. Feymu llemay, inayentuafiyiñ ñi femün ta Pablo. Maneluwaiñ Jewba mu. Ngüneduamaiñ ñi femün pu poyekefilu ta Jewba kuyfi. Ka eluwküleaiñ taiñ kellungeal. Femngechi newenkülenoliyiñ rume, Jewba newentukuaeiñmu llemay.