1. ¿Kunsa Pablojj jupa pachpat säna?

 APÓSTOL PABLOJJ pisi chʼamaniw awisajj uñjasta sasaw säna. Cuerpojajj ‘merqʼesiskiwa’, kunatï walïki uk lurañatakis chʼamachasisktwa, Jehová Diosajj janiw kunjamtï suykta ukhampun oracionanakajar jayskituti sasaw sarakïna (2 Cor. 4:16; 12:7-9; Rom. 7:21-23). Enemigonakajajj pisi chʼamanitwa uñjapjjetu sasaw Pablojj säna. * Ukampis jupat jan walinak parlapjjatapasa, pantjasitanakapasa, janis kunatak sirvkaspa ukham janiw amuyaykänti (2 Cor. 10:10-12, 17, 18).

2. Kuntï 2 Corintios 12:9, 10 textojj siski ukarjamajja ¿kunsa Pablojj yateqäna?

² Maynejj pisi chʼamanïkaspas ukhamsa amuyaskchejja, wali chʼamanïskaspawa, ukwa Pablojj yateqäna (2 Corintios 12:9, 10 liytʼañataki). Diosajj Pablor akham sänwa: “Kunapachatï jumajj aynachtʼatäkta ukhaw nayan chʼamajajj jukʼamp qhan amuyasi” sasa. Ukham sasajja nayaw chʼam churäma sañwa munaskäna. Enemigonakasajj jiskʼachapjjestani ukhajj kunatsa jan sint llakisiñasäki uk nayraqat yatjjatañäni.

3. ¿Kunatsa jiskʼachatäsajj kusissna?

³ Janiw khitirus jiskʼachatäñajj gustkistuti. Ukampis enemigonakasajj jiskʼachapkistu ukak lupʼisksna ukhajj aynachtʼsnawa (Prov. 24:10). Ukhamajj ¿jiskʼachapkistu ukhajj kunsa lurañasa? Pabljamaw “jiskʼachata” uñjasisajj kusisiñasa  (2 Cor. 12:10). ¿Kunatsa? Jiskʼachata, arknaqata uñjasitasajj Jesusan discipulopätaswa uñachtʼayi (1 Ped. 4:14). Discipulonakajajj arknaqataw uñjasipjjani sasaw Jesusajj säna (Juan 15:18-20). Ukaw nayrïr patak maranakan pasäna. Sañäni, griegonakan costumbrenakapamp apayasiri jaqenakajja, cristianonakarojj jan kun yatiri, pisi chʼamani jaqenakäpkaspas ukhamwa uñjapjjäna. Judionakasti, ‘jan yatjjatata aleq jaqekïpkaspas’ ukhamwa cristianonakar uñjapjjarakïna, apóstol Pedrompiru Juanampirojj ukhamwa uñjapjjarakïna (Hech. 4:13). Cristianonakajj janiw politicarusa ni ejercitorus mitisipkänti, ukatwa jan chʼaman jaqenakjam uñjatäpjjäna, janirakiw respetomp uñjatäpkänti.

4. Enemigonakapajj jan wal parlapkäna ukhajja, ¿kunsa nayrïr cristianonakajj lurapjjäna?

⁴ Nayrïr cristianonakajja, enemigonakapajj jupanakat jan walinak parlapkäna ukhajj janiw aynachtʼapkänti. Sañäni, Pedro ukat Juan apostolonakatakejja, Jesusan discipulopäpjjatap layku, Jesusan yatichäwinakap yatiyapjjatap layku uñisitäñajj kusiskañänwa (Hech. 4:18-21; 5:27-29, 40-42). Nayrïr cristianonakatakejj janiw kunat phenqʼasiñas utjkänti. ¿Kunatsa? Uñisirinakapat sipansa uka humilde cristianonakaw jaqenakar jukʼamp yanaptʼapjjäna. Amuytʼañataki, uka cristianonakat yaqhepajja, Diosan amuytʼayatäsajj Bibliankir libronakwa qellqapjjäna, uka qellqatanakajj jichhakamaw walja millón jaqenakar yanaptʼaski, chuymachtʼaskaraki. Predicapkäna uka Reinojj alajjpachan apnaqjjewa, niyaw aka oraqe apnaqjjarakini (Mat. 24:14). Ukampis cristianonakar uñisiri nayra Roma markan gobiernopajj janiw utj-jjeti. Jesusan nayrïr discipulonakapajj alajjpachan reyinakäjjapjjewa, ukampis enemigonakapajj jiwatäjjapjjewa, jaktanipkani ukhasa cristianonakajj predicapkäna uka Reinomp apnaqatäpjjaniwa (Apoc. 5:10).

5. Juan 15:19 textorjamajja, ¿kunatsa akapachankir jaqenakajj uñisipjjestu?

⁵ Jichhürunakanjja jaqenakajj ukhamarakiw Testigonakar uñisipjjestu, jiskʼachapjjestu, janis kuns yatksna, janis chʼamanïksna ukham amuyapjje. ¿Kunatsa? Janiw jupanakjam piensktanti ni sarnaqktansa. Akapachankir jaqenakajja, jachʼa jachʼa tukurinakaru, pʼeqe waytat sarnaqerinakaru, jan istʼasirinakaruw jachʼañchapjje. Ukampis Testigonakajj humildëñataki, llampʼu chuymanïñataki, istʼasirïñatakiw wal chʼamachastanjja. Janirakiw kawkïr markansa politicarusa ni ejercitorus mitisktanti. Testigonakajj janiw akapachankir jaqenakjamäktanti, ukatwa janis kunäksna ukham uñjapjjestu (Juan 15:19 liytʼañataki; Rom. 12:2).

6. ¿Kunanak lurañatakis Jehová Diosajj yanaptʼaskistu?

⁶ Akapachankir jaqenakajj jan walsa jiwasat amuyapkchejja, Jehová Diosajj sumanak lurañatakiw yanaptʼaskistu. Sañäni, oraqpachan predicañatakiw yanaptʼaskistu. Servirinakapajj kunayman arunakar revistanak traducisajj oraqpachanwa jaqenakar churtanjja, Bibliampiw walja millón jaqenakar sum jakasipjjañapatak yanaptʼaraktanjja. Ukanakajja Diosan yanaptʼapampiw lurasi, jan chʼamani jaqenakjam uñjatäpki ukanakaruw ukham lurañapatak Diosajj chʼam churi. ¿Sapa mayni jiwasanakat kamsaraksnasa? ¿Jehová Diosajj chʼamanir tukuyistaspati? Ukhamäspa ukhajja, ¿kunsa Diosan chʼamap katoqañatakejj lurañasa? Kunanaksa apóstol Pablot yateqassna uk kimsa toqet uñjañäni.

7. ¿Kunsa Pablon sarnaqäwipat yateqtanjja?

⁷ ¿Kunsa Pablon sarnaqäwipat yateqtanjja?  Jehová Diosar sirvkasin janiw chʼamasaru, kuntï lurañ yatktan ukar confiyañasäkiti. Pablojj wali yatjjattʼatänwa, sumwa kuns lurarakïna, ukatwa waljanejj respetapjjäna, jupajj facilakiw jachʼa jachʼa tukuspäna, jupa pachparus confiyasispäna. Jupajj Tarso markanwa jilsüna, ukajj Roma markan mä provinciapan capitalapänwa. Tarsojj wali qollqen markänwa, wali uñtʼat universidadanirakïnwa. Pablosti wali yatjjattʼat jaqënwa ¿kunatsa? Gamaliel sat yatichirimpi yatichatänwa, uka tiemponjja, Gamaliel yatichirejj judionakan pʼeqtʼirinakapat maynïrïnwa, wali respetatarakïnwa (Hech. 5:34; 22:3). Pablojj judionak taypin wali uñtʼatänwa, ukatwa akham säna: “Markajankir mita masinakajat sipansa wali sumaw judionakan religionapan nayrar sarantaskayäta” sasa (Gál. 1:13, 14; Hech. 26:4). Ukhamäkchïnsa Pablojj janiw jupa pachpar confiyaskänti.

8. 1) Filipenses 3:8 textorjamajja, ¿kunanaktï Pablojj jaytkäna ukanakat kamsänsa? 2) ¿Kunatsa Pablojj aynachtʼatäkasas wal kusisïna?

⁸ Kunanakatï akapachan wali importantet Pablor uñjaykäna ukanak jan arrepentisisaw jaytäna. “Basuräkaspas ukhamwa” uñjarakïna (Filipenses 3:8 liytʼañataki). Jesusan discipulopäñatakejj kunayman jan walinakanwa uñjasïna. Pachpa markapankirinakajj wal uñisipjjäna (Hech. 23:12-14). Romano masinakapamp nuwjata, carcelar llawintataw uñjasirakïna (Hech. 16:19-24, 37). Ukatjja pantjasirïtapa, kunatï walïki uk lurañajj jupatak chʼamätapwa Pablojj amuyasïna, ukanakaw jupar llakisiyarakïna (Rom. 7:21-25). Ukampis enemigonakapamp jan waltʼayatäsasa, pantjasirïtap yatkasasa Jesusar arkaskakïnwa. Akham sarakïnwa: “Aynachtʼata [...] uñjasta ukhajja, nayajj wal kusista” sasa. ¿Kunatsa ukham säna? Aynachtʼatäkäna ukhaw Diosan yanaptʼap sum uñjäna (2 Cor. 4:7; 12:10).

9. Párrafo qalltan parlaniwayktan ukanakajj jan utjkchistu ukhajja, ¿kunsa jan amuyañasäki?

⁹ Jehová Diosan chʼamapamp yanaptʼatäñatakejja, janiw jan usutäñasa, suma yatjjattʼatäñasa, suma markatäñasa, wali qollqenïñas wakiskaspa ukham amuyañasäkiti. Diosajj janiw ukanakarjam valoranit uñjkistuti.  Cheqas Diosan markapanjja, “jaqen amuyuparjam wali yatiñan jaqet uñjatäpki ukanakatjja janiw waljanejj utjkiti, janirakiw chʼamani jaqenakatsa ni reyin familiapat jutir jaqenakatsa waljanejj utjkiti”. Jan ukasti, “jan chʼamanit uñjatäpki ukanakaruw Diosajj akapachat ajlli” (1 Cor. 1:26, 27). Ukhamasti aka párrafo qalltan parlaniwayktan ukanakajj jan utjkchistu ukhajja, janis Diosar serviñ puedksna ukham janiw amuyañasäkiti. Antisas kunjamsa Diosajj chʼamap churistu ukwa amuyañasa. Sañäni, kunarutï creyktan ukanakat jiskʼachapjjestu ukhajj aynachtʼsnawa, ukampis jan ajjsaras creencianakasat saytʼasiñatakejj Jehová Diosaruw chʼam mayisiñasa (Efes. 6:19, 20). Jan qollkay usunïstan ukhajja, jan qarjtas serviskakiñatakejj Jehová Diosaruw chʼam mayisiñasa. Diosajj kunjamsa chʼamapamp yanaptʼistu uk uñjasajj jukʼampiw Jupar confiyañäni, jukʼamp chʼamaniruw tukurakiñäni.

10. Diosar jan jitheqtas servirinakat yaqhepatjja Hebreos 11:32-34 textow parli ¿kunatsa jupanakat yatjjatañasa?

¹⁰ Pablojj Qellqatanakat yatjjatapunirïnwa. Ukham lurasaw Diosat jan jitheqtiri servirinakapat wal yateqäna. Hebreo cristianonakar qellqkäna uka cartapanjja, Diosat jan jitheqtas servirinakat yateqasipjjañapatakiw chʼamañchtʼäna (Hebreos 11:32-34 liytʼañataki). Ukanakat maynejj David reyïnwa, janiw enemigonakapakejj jupa conträpkänti, amigonakapat yaqhepas jupa conträpjjarakïnwa. Davidan sarnaqäwipat jukʼamp yatjjatañäni. Ukhamatwa qhawqsa Davidan sarnaqäwipat yatjjatañajj Pablor yanaptʼäna uk amuyañäni, kunjamsa Pablot yateqassna uksa amuyarakiñäni.

11. ¿Kunatsa Davidajj janis chʼamanïkaspa ukhamäna? (Nayrïr paginankir dibujo uñjjattʼäta).

¹¹ Wali chʼamani Goliat soldadojj Davidar janis chʼamanïkaspa ukhamwa uñjäna, ukatwa wal jiskʼachäna. Goliat soldadojj Davidat sipans wali jachʼänwa, nuwasiñatak wali suma armaduranïnwa, guerra toqets wali experiencianïnwa. Davidajj waynitütap laykojj nuwasiñatak jan experienciani, jan chʼamani ukhamänwa, ukampis Jehová Diosaruw confiyäna. Ukham luratapat Diosaw Davidarojj Goliatar atipjañapatak chʼam churäna (1 Sam. 17:41-45, 50).

12. ¿Kuna problemansa Davidajj uñjasirakïna?

¹² Davidajj yaqha problemanwa uñjasirakïna, ukaw janis jarkʼaqasiñ puedkaspa, pisi chʼamanïkaspas ukham amuyayäna. Jupajj Saulan jan jitheqtiri serviripänwa. Jehová Diosaw Saularojj Israelan reyïñapatak ajllïna. Qalltanjja Saulajj Davidar respetänwa, ukampis qhepat jachʼa jachʼa tukutapatwa Davidat envidiasjjäna, uñisjjarakïna, jiwayañ kun munarakïna (1 Sam. 18:6-9, 29; 19:9-11).

13. ¿Saúl reyimp jan wal luratas kunsa Davidajj luräna?

¹³ Saúl reyejj ina chʼusatsa Davidar tʼaqesiykchïnjja, Jehová Diosan ajllit reyïtap laykojj Davidajj respetaskakïnwa (1 Sam. 24:6). Janirakiw Saúl reyin jan walinak luratapat Diosar juchañchkänti. Antisas Diosaw aguantañatak chʼam churitani sasaw confiyäna (Sal. 18:1, pʼeqeñchäwipampi).

14. ¿Apóstol Pablojj kuna jan walinakansa David chachjam uñjasirakïna?

¹⁴ Apóstol Pablojja, Davidjamarakiw mä jan walin uñjasïna. Pablon enemigonakapajj jupat sipans jukʼamp chʼamanïpjjänwa. Religión pʼeqtʼirinakasa, política pʼeqtʼirinakas wal uñisipjjäna, walja kutiw nuwjayapjjäna, carcelarus llawintayapjjarakïna. Davidarjamarakiw amigonakapajj sufriyapjjäna. Congregacionansa,  yaqhepajj jupa contraw saytʼapjjäna (2 Cor. 12:11; Filip. 3:18). Ukampis janipuniw enemigonakapajj aynachtʼaykänti. Arknaqatpachas predicaskakïnwa. Jilat kullakanakajj jan walsa jupar lurapkchïnjja, Pablojj janiw jupanakar jaytjkänti. Jehová Diosarus jiwañkamaw servïna, ukaw jukʼamp importantënjja (2 Tim. 4:8). Taqe ukanakjja, chʼamapar confiyañat sipans Diosar confiyatapatwa luräna.

15. ¿Jan wal luratajj kunsa lurtanjja, kunjamsa uk lurtanjja?

¹⁵ ¿Escuelankir compañeronakasasa, trabajonkir compañeronakasasa, jan Testigöpki uka familiaranakasas jiskʼachapjjestuti, jan ukajj jan walcha lurapjjestu? ¿Congregacionan maynejj chuymti ustʼayistu? Ukhamächi ukhajj Davidampin Pablompin sarnaqäwinakapwa amtañasa, ukhamatwa ‘kunatï walïki ukampi jan walirojj atipjaskakiñäni’ (Rom. 12:21). Jaqenakajj jan wal lurapkistu ukhajj janiw kunjamtï Davidajj Goliatamp nuwaskäna ukham jupanakamp nuwasktanti, jan ukasti Jehová Diosampit Bibliampit yatichasaw jan walirojj atipjtanjja. ¿Kunjamsa uk lurtanjja? Jaqenakan jisktʼanakap Bibliampiw qhanañchtanjja, jan wal luratas munasiñampi respetompiw uñjtanjja, taqeniruw sum uñjtanjja, enemigonakasarus ukhamaraki (Mat. 5:44; 1 Ped. 3:15-17).

16, 17. ¿Kunsa Pablojj jan armkäna?

¹⁶ Janïr cristianökasajja, Pablojj Saulo satänwa, jan respetasiri waynänwa, Jesusan discipulonakaparus jan waltʼayañatakiw arknaqäna (Hech. 7:58; 1 Tim. 1:13). Ukampisa Jesusaw alajjpachat jupar parlanïna, juykhuptayarakïna. Congregacionar jan arknaqjjañapatakiw jarkʼarakïna. Mayamp uñj-jjañatakejja, Pablojj uñiskäna uka cristianonakan ukaruw saräna. Humilde chuymampiw Jesusan Ananías sat discipulopamp yanaptʼayasïna, jupaw mayamp uñj-jjañapatak yanaptʼarakïna (Hech. 9:3-9, 17, 18).

¹⁷ Mä qhawqha tiempotjja, Pablojj cristiano congregacionan wali uñtʼatäjjänwa, ukhamäkchïnsa Damasco markar sarkäna ukhajj kuntï Jesusajj alajjpachat parlanisin lurkäna  uk janiw armaskpachänti. Pablojj humilde chuymanïskakïnwa, jilat kullakanakampis yanaptʼayasïnwa. Jupanakaw yanaptʼapjjetu, chuymachtʼapjjarakitu sasaw säna (Col. 4:10, 11).

18. ¿Kunatsa jilat kullakanakamp yanaptʼayasiñajj chʼamakïspa?

¹⁸ ¿Kunsa Pablon sarnaqäwipajj yatichistu? Bibliat yateqañ qalltkayätan ukhajja, mayninakampi yanaptʼayasiñajj janiw jiwasatak chʼamäkpachänti. ¿Kunatsa? Yateqañajj wal utjatap amuyasaw yanaptʼayasiñ munayätanjja (1 Cor. 3:1, 2). ¿Ukampis jichhajj uka pachpti amuyaskaktanjja? Walja maranak Jehová Diosar sirvjjasasa, experiencianëjjasasa inas mayninakampi yanaptʼayasiñajj chʼamakëjjchi. Yamas jukʼa tiempok Diosar serviski uka jilatampi jan ukajj kullakampi yanaptʼayasiñajj jukʼamp chʼamäspawa. Ukampis jilat kullakanak toqew Jehová Diosajj jilpach chʼamañchtʼistu (Rom. 1:11, 12). Diosan chʼamap katoqañ munstan ukhajja, jilat kullakanakamp yanaptʼayasiñaw wakisi.

19. ¿Kunas Pablorojj walja sumanak lurañatak yanaptʼäna?

¹⁹ Cristianöjjasajja, Pablojj walja sumanakwa luräna. ¿Kunas ukanak lurañatak yanaptʼäna? Sumanak lurañatakejj janiw suma markatäñasa, jan usutäñasa, wali yatjjatatäñasa, wali qollqenïñas wakiskiti. Jan ukasti, humilde chuymanïña, Jehová Diosar confiyañaw wakisi, ukwa Pablojj yateqäna. Ukhamasti, apóstol Pabljamaw akanak lurañasa: 1) Jehová Diosaruw confiyañasa, 2) Diosan servirinakapat Biblian qellqatäki ukanakatwa yateqasiñasa, 3) jilat kullakanakampiw yanaptʼayasiñasa. Ukham lurañäni ukhajja, pisi chʼamanis amuyaskchiñänejj Jehová Diosaw chʼamanir tukuyistani.