1. Һәвари Булус нәји етираф етмишди?

ҺӘВАРИ БУЛУС бәзән өзүнү зәиф һисс етдијини етираф етмишди. О, бәдәнинин солдуғуну, јәни дүзҝүн иш ҝөрмәк үчүн өзү илә мүбаризә апардығыны вә дуаларына һәмишә истәдији кими ҹаваб алмадығыны демишди (2 Кор. 4:16; 12:7—9; Ром. 7:21—23). Бундан әлавә, Булус әлејһдарларынын ону зәиф * һесаб етдијини сөјләмишди. Амма о гојмурду ки, башгаларынын мәнфи фикирләринә, јахуд өз зәиф ҹәһәтләринә ҝөрә өзүнү лазымсыз һисс етсин (2 Кор. 10:10—12, 17, 18).

2. 2 Коринфлиләрә 12:9, 10 ајәләринә әсасән, һәвари Булус нә өјрәнди?

² Булус дәјәрли бир шеј өјрәнди: баша дүшдү ки, инсан һәтта зәиф оланда белә ҝүҹлү ола биләр. (2 Коринфлиләрә 12:9, 10 ајәләрини охујун.) Јеһова Булуса демишди ки, «сән зәиф оланда Мәним ҝүҹүм өзүнү бүтүнлүклә ҝөстәрир». Јәни Булусда чатышмајан ҝүҹү Јеһова верәҹәкди. Илк өнҹә, ҝәлин ҝөрәк нә үчүн әлејһдарларымыз бизи тәһгир едәндә руһдан дүшмәмәлијик.

3. Нәјә ҝөрә тәһгирләрә гатлашмагдан һәзз алырыг?

³ Һеч биримиз тәһгирә мәруз галмаг истәмирик. Лакин дүшмәнләримиз бизи тәһгир едәндә онларын дедикләрини үрәјимизә салсаг, руһдан дүшә биләрик (Мәс. 24:10). Бәс онда тәһгирләрә неҹә јанашмалыјыг? Булус кими, биз дә тәһгирләрдән һәзз алмалыјыг (2 Кор. 12:10). Чүнки тәһгир вә тәгибләрлә үзләшмәјимиз Исанын һәгиги давамчысы  олдуғумузу ҝөстәрир (1 Бут. 4:14). Иса давамчыларынын тәгиб олунаҹағыны демишди (Јәһ. 15:18—20). Биринҹи әсрдә онун дедији кими олду. Јунан мәдәнијјәтинин тәсири алтында оланлар мәсиһиләрә јухарыдан ашағы бахыр, онлары дардүшүнҹәли һесаб едирдиләр. Јәһудиләр дә мәсиһиләри савадсыз, садә адам һесаб едирди, мәсәлән, онлар Бутрус вә Јәһјаја белә јанашырды (Һәв. 4:13). Мәсиһиләр кәнардан зәиф ҝөрүнүрдү; онларын нә сијаси нүфузу, нә дә һәрби гүввәси вар иди. Онлара ҹәмијјәтин галығы кими бахырдылар.

4. Биринҹи әсрдәки мәсиһиләр әлејһдарларынын пис мүнасибәтинә неҹә јанашырды?

⁴ Бәс әлејһдарларын бу ҹүр мүнасибәти мәсиһиләрин әл-голуну јанына салды? Хејр. Мәсәлән, һәвари Булус вә Јәһја Исанын ардынҹа ҝетдикләринә вә онун тәлимләрини јајдыгларына ҝөрә тәгиб олунмағы өзләринә шәрәф һесаб едирдиләр (Һәв. 4:18—21; 5:27—29, 40—42). Онларын утанмаларына һеч бир сәбәб јох иди. Чүнки бу тәвазөкар мәсиһиләр әлејһдарларынын һеч биринин етмәдији хејирхаһ ишләр едирдиләр. Мәсәлән, бу мәсиһиләрдән бәзиләринин Аллаһын илһамы илә јаздығы китаблар бу ҝүнәдәк милјонларла инсана фајда ҝәтирир вә үмид бәхш едир. Онларын мүждәләдији Падшаһлыг һал-һазырда идарә едир, ҝәләҹәкдә исә бүтүн бәшәријјәт үзәриндә һакимијјәт сүрәҹәк (Мәт. 24:14). Мәсиһиләри тәгиб едән гүдрәтли Рома һөкумәти бу ҝүн тарихин күл јығынына чеврилиб, һәмин садиг мәсиһиләр исә ҝөјдә падшаһ кими идарә едир. Онларын дүшмәнләри исә өлүб, ишдир, ҝәләҹәкдә дирилсәләр белә, онлар нифрәт етдији мәсиһиләрин мүждәләдији Падшаһлығын табелијиндә олаҹаглар (Вәһј 5:10).

5. Јәһја 15:19 ајәсинә әсасән, нәјә ҝөрә дүнја Јеһованын халгына хор бахыр?

⁵ Бу ҝүн дә бәзи инсанлар Јеһованын халгы олан бизләрә хор бахыр вә бизи савадсыз, дардүшүнҹәли һесаб едиб лаға гојурлар. Нә үчүн? Чүнки биз онларын бахышларына шәрик дејилик. Биз тәвазөкар, һәлим, итаәткар олмаға чалышырыг. Бу дүнјадакы инсанлар исә гүрурлу, ловға вә үсјанкар инсанлары бәјәнир. Үстәлик, биз сијасәтә гарышмырыг, һеч бир өлкәнин һәрби гүввәләринә гошулмуруг. Бу дүнјанын гәлибинә ујғун ҝәлмәдијимиз үчүн һеч сајылырыг. (Јәһја 15:19 ајәсини охујун; Ром. 12:2.)

6. Јеһова халгы васитәсилә нәләри һәјата кечирир?

⁶ Дүнјанын бизим һагда нә дүшүнмәсиндән асылы олмајараг, Јеһова бизә шәрәфли ишләр һәвалә едиб. О бизим васитәмизлә тарихдә ҝөрүнмәмиш мигјасда тәблиғ ишини һәјата кечирир. Бу ҝүн Јеһованын хидмәтчиләри дүнјада ән чох дилә тәрҹүмә олунмуш вә ән ҝениш јајылмыш журналлар нәшр едир, Мүгәддәс Китабын васитәсилә милјонларла инсана һәјатда хошбәхтлик тапмаға көмәк едир. Бүтүн бу мөһтәшәм наилијјәтләр Јеһованын сајәсиндәдир; О, дүнјанын зәиф сандығы инсанлар васитәсилә белә гүдрәтли ишләр һәјата кечирир. Бәс ајры-ајрылыгда һәр биримиз һагда нә демәк олар? Јеһова бизи ҝүҹлү едә биләр? Бәс бунун үчүн нә етмәлијик? Ҝәлин һәвари Булусун һәјатына нәзәр салаг, ҝөрәк ондан үч саһәдә нә өјрәнә биләрик.

7. Һәвари Булусдан өјрәндијимиз биринҹи дәрс һансыдыр?

⁷ Һәвари Булусдан өјрәнә биләҹәјимиз биринҹи дәрс: мәсиһи Јеһоваја хидмәтдә  өз ҝүҹүнә вә баҹарығына ҝүвәнмәмәлидир. Инсан дүшүнҹәси илә Булусун гүрурланмаға, өзүнә архаланмаға там әсасы вар иди. О, Рома әјаләти Киликијанын пајтахты Тарсда бөјүмүшдү. Тарс өз дөврүнә ҝөрә инкишаф етмиш шәһәр иди вә орада мәшһур елм оҹағы вар иди. Булус јүксәк тәһсилли инсан иди, о, һәмин вахт ән һөрмәтли јәһуди мүәллимләриндән бири олан Гәмлаилдән дәрс алмышды (Һәв. 5:34; 22:3). Һәмин вахт Булус јәһуди ҹәмијјәтиндә мүәјјән нүфуза саһиб иди. О демишди: «Јәһуди мәзһәбиндә сојдашларым арасында бир чох һәмјашыдымдан хејли габаға ҝетмишдим» (Гал. 1:13, 14; Һәв. 26:4). Буна бахмајараг, Булус өзүнә ҝүвәнмирди.

8. Филиппилиләрә 3:8 ајәсинә әсасән, Булус ваз кечдији шејләрә неҹә бахырды вә нәјә ҝөрә о, зәифликләрә гатлашмагдан һәзз алырды?

⁸ Булус дүнјанын ҝөзүндә ону нүфузлу едән һәр шејдән бөјүк мәмнунијјәтлә ваз кечмишди. О, әввәлләр саһиб олдуғу бүтүн бу шејләри зибил һесаб едирди. (Филиппилиләрә 3:8 ајәсини охујун.) Мәсиһи олмаг үчүн о, чох әнҝәлләр ашмышды. Халгынын нифрәтинә туш ҝәлмишди (Һәв. 23:12—14). Һәмвәтәнләри, ромалылар ону дөјмүш вә һәбс етмишдиләр (Һәв. 16:19—24, 37). Бир тәрәфдән дә, о өз зәиф ҹәһәтләриндән аҝаһ иди, бу да она әзаб верирди (Ром. 7:21—25). Лакин әлејһдарларынын пис мүнасибәтинә вә өз сәһвләринә бахмајараг, тәслим олмурду, зәифликләрә гатлашмагдан һәзз алырды. Чүнки о өз һәјатында Јеһованын ҝүҹүнү мәһз зәиф оланда һисс едирди (2 Кор. 4:7; 12:10).

9. Бу дүнјанын ҝөзүндә бизи зәиф кими ҝөстәрән шејләрә неҹә бахмалыјыг?

⁹ Бизим дәјәримизи физики ҝүҹүмүз, тәһсилимиз, мәдәнијјәтимиз вә мадди имканларымыз мүәјјән етмир. Бизи Јеһова үчүн јарарлы едән бу шејләр дејил. Јеһованын халгы арасында «инсан ҝөзү илә бахсаг, мүдрик, ҝүҹлү, әсил-нәҹабәтли адам чох дејил». Јеһова «дүнјанын зәиф сајдығы адамлары» сечиб (1 Кор. 1:26, 27).  Буна ҝөрә дә дүнјанын гојдуғу мејарлара ујғун ҝәлмириксә, бу о демәк дејил ки, Јеһоваја хидмәт үчүн јарарсызыг. Әксинә, зәифлијимизә фүрсәт кими, Јеһованын ҝүҹүнү ҝөрмәк фүрсәти кими бахмалыјыг. Мәсәлән, етигадыныза кинајә илә бахан инсанлардан горхурсунузса, Јеһоваја дуа един ки, иманынызы мүдафиә етмәк үчүн сизә ҹәсарәт версин (Ефес. 6:19, 20). Хроники хәстәликдән әзијјәт чәкирсинизсә, Јеһоваја дуа един ки, Она баҹардығыныз гәдәр хидмәт етмәк үчүн сизә ҝүҹ версин. Һәр дәфә Јеһованын көмәјини һисс етдикҹә иманыныз артаҹаг вә сиз ҝүҹлү олаҹагсыныз.

10. Ибраниләрә 11:32—34 ајәләриндә ады чәкилән мөмин бәндәләрин нүмунәсини нә үчүн арашдырмалыјыг?

¹⁰ Һәвари Булус Мүгәддәс Јазылары арашдырмагда маһир иди. О, тәкҹә билик әлдә етмәмишди, орадакы иман өрнәкләриндән дә чох шеј өјрәнмишди. Булус ибрани мәсиһиләрә јаздығы мәктубда Јеһованын сәдагәтли хидмәтчиләринин адларыны садаламышды вә мәсиһиләри онлардан нүмунә ҝөтүрмәјә тәшвиг етмишди. (Ибраниләрә 11:32—34 ајәләрини охујун.) Ҝәлин бу мөмин бәндәләрдән биринин, Давуд падшаһын нүмунәсинә нәзәр салаг. Дүшмәнләри бир јана галсын, бир заманлар онунла јахын дост олан инсанлар да она гаршы чыхмышды. Давудун нүмунәсини нәзәрдән кечирдикҹә ҝөрәҹәјик ки, онун һәјат јолу һагда дүшүнмәк Булусу неҹә ҝүҹләндирмишди вә биз Булусдан нә өјрәнирик.

11. Нәјә ҝөрә Давуд гырагдан зәиф ҝөрүнүрдү? (Үз габығындакы шәклә бахын.)

¹¹ Давуд физики ҹәһәтдән ондан ҝүҹлү олан Ҹалутун јанында зәиф ҝөрүнүрдү. Ҹалут Давуду ҝөрәндә һәгарәтлә ҝүлдү. Доғрудан да, Ҹалут нәһәнҝ иди, даһа јахшы силаһланмышды, даһа јахшы дөјүш тәлими кечмишди. Давуд исә зәиф силаһланмыш, нашы бир ҝәнҹ кими ҝөрүнүрдү. Амма о, зәиф ҝөрүнсә дә, әслиндә, ҝүҹлү иди. Чүнки Јеһоваја ҝүвәнирди вә Онун вердији ҝүҹ сајәсиндә дүшмәнинә галиб ҝәлди (1 Ишм. 17:41—45, 50).

12. Давудун башга һансы чәтинлији вар иди?

¹² Давуд башга бир сәбәбә ҝөрә дә өзүнү зәиф вә ҝүҹсүз һисс едә биләрди. О, Јеһованын тәјин етдији Исраил падшаһы Талутун гуллуғунда сәдагәтлә дајанырды. Әввәл-әввәл Талут падшаһын Давуда мүнасибәти јахшы иди. Амма сонралар гүрур уҹбатындан она пахыллыг етмәјә башлады. О, Давудла пис рәфтар едирди, һәтта дәфәләрлә ону өлдүрмәјә ҹәһд етмишди (1 Ишм. 18:6—9, 29; 19:9—11).

13. Талут падшаһын һагсыз рәфтарына бахмајараг, Давуд неҹә давранды?

¹³ Талут падшаһын һагсыз рәфтарына бахмајараг, Давуд јенә дә Јеһованын тәјин етдији бу падшаһа һөрмәт ҝөстәрирди (1 Ишм. 24:6). О, Талутун әлиндән чәкдији әзаблара ҝөрә Јеһованы ҝүнаһландырмырды. Әксинә, әмин иди ки, Јеһова она һәјатынын бу чәтин дөнәминдә дөзмәјә ҝүҹ верәҹәк (Зәб. 18:1, мүгәддимә).

14. Һәвари Булус Давудун үзләшдији һансы охшар вәзијјәтлә үзләшмишди?

¹⁴ Һәвари Булус Давудун үзләшдији охшар вәзијјәтлә үзләшмишди. Дүшмәнләри Булусдан чох ҝүҹлү иди. О дөврүн бир чох нүфузлу рәһбәри она нифрәт едирди. Дәфәләрлә ону дөјдүрүб, һәбсә атдырмышдылар. Давуд кими, Булус да она  дост олмалы инсанлар тәрәфиндән пис рәфтара мәруз галмышды. Јығынҹагда бәзиләри һәтта она дүшмән кәсилмишди (2 Кор. 12:11; Филип. 3:18). Амма Булус она гаршы чыханлара јенилмәди. Үзләшдији тәгибләрә рәғмән, тәблиғ етмәјә давам едирди. Баҹы-гардашлар онун етимадыны доғрултмајанда белә онлардан үз чевирмирди. Ән әсасы исә өмрүнүн ахырына гәдәр Аллаһа садиг галды (2 Тим. 4:8). О, бүтүн бунлары өз ҝүҹүнә јох, Јеһоваја ҝүвәндији үчүн баҹарды.

15. Мәгсәдимиз нәдир вә она неҹә наил ола биләрик?

¹⁵ Бәс сиз синиф вә иш јолдашларыныз, јахуд Јеһованын Шаһиди олмајан аилә үзвләриниз тәрәфиндән тәһгирләрә вә тәгибләрә мәруз галырсыныз? Бәлкә дә, јығынҹагдан кимсә сизинлә пис рәфтар едиб. Бу заман Давудун вә Булусун нүмунәсини јадыныза салын. Сиз бундан сонра да пислијә јахшылыгла галиб ҝәлә биләрсиниз (Ром. 12:21). Тәбии ки, пис рәфтара мәруз галанда инсанларын алнына Давуд кими даш атмајаҹағыг, онларын ағлына вә үрәјинә Аллаһын Кәламыны санҹаҹағыг. Бу мәгсәдә чатмаг үчүн инсанларын суалына Мүгәддәс Китабдан ҹаваб вермәли, бизимлә пис рәфтар едәнләрлә һөрмәтҹил вә меһрибан давранмалы, һәтта дүшмәнләримизә јахшылыг етмәлијик (Мәт. 5:44; 1 Бут. 3:15—17).

16, 17. Һәвари Булус һансы дәрси өмрүнүн сонуна кими унутмады?

¹⁶ Һәвари Булус мәсиһи олмаздан габаг Исанын давамчыларыны тәгиб едән азғын адам иди (Һәв. 7:58; 1 Тим. 1:13). О вахтлар Шаул адланан Булусун мәсиһи јығынҹағына һүҹум етмәсинин гаршысыны алмаг үчүн Иса Мәсиһ өзү мүдахилә етмишди. О, гејбдән Булусла данышмыш, ону кор етмишди. Ҝөзләринин јенидән ачылмасы үчүн Булус тәгиб етдији инсанлардан көмәк истәмәли иди. О, тәвазөкарлыг ҝөстәриб Һәнәнја адлы шаҝирдин көмәјини гәбул етди вә ҝөзләри ачылды (Һәв. 9:3—9, 17, 18).

 ¹⁷ Сонралар Булус мәсиһи јығынҹағынын ҝөркәмли үзвү олду. Амма Дәмәшгә ҝедән јолда Мәсиһин она вердији дәрси өмрүнүн сонуна кими унутмады. Булус тәвазөкар галды, о, баҹы-гардашларын көмәјини гәбул етмәјә һәмишә һазыр иди. Булус диндашларынын она дајаг олдуғуну демишди (Кол. 4:10, 11).

18. Нәјә ҝөрә башгаларынын көмәјини гәбул етмәк бәзән чәтин олур?

¹⁸ Һәвари Булусдан нә өјрәнирик? Биз Јеһованын Шаһидләри илә тәзә-тәзә таныш оланда баша дүшүрдүк ки, һәлә руһани ҹәһәтдән көрпәјик, чох шеји билмирик, буна ҝөрә дә башгаларынын көмәјини һәвәслә гәбул едирдик (1 Кор. 3:1, 2). Бәс инди? Ола билсин, Јеһоваја узун илләрдир хидмәт едирик, тәҹрүбәмиз чохдур, буна ҝөрә дә башгаларындан, хүсусилә дә һәгигәтә биздән сонра ҝәлән инсандан көмәји гәбул етмәк бизә чәтин ҝәлә биләр. Амма Јеһова чох вахт бизи мәһз баҹы-гардашларымыз васитәсилә мөһкәмләндирир (Ром. 1:11, 12). Јеһовадан ҝүҹ алмаг истәјириксә, бу данылмаз факты гәбул етмәлијик.

19. Булусун уғурунун сирри нә иди?

¹⁹ Булус мәсиһи оландан сонра бөјүк ишләр ҝөрдү. Нәјин сајәсиндә? О өз тәҹрүбәсиндән өјрәнди ки, уғур инсанын физики ҝүҹүндән, тәһсилиндән, мадди вә сосиал вәзијјәтиндән јох, тәвазөкар олмасындан вә Јеһоваја ҝүвәнмәсиндән асылыдыр. Ҝәлин биз дә һәвари Булус кими 1) Јеһоваја ҝүвәнәк, 2) Мүгәддәс Китабдакы мөмин бәндәләрдән өрнәк алаг вә 3) диндашларымызын көмәјини гәбул едәк. Бунлары етсәк, өзүмүзү чох зәиф һисс етдијимиз анларда белә, Јеһова бизи ҝүҹлү едәҹәк!