1. Aha do na didok si Paulus taringot dirina?

DIBOTO apostel Paulus do, sipata boi do ibana gabe gale. Diakkui ibana do nungnga ‘lam gale dagingna’, jala dang mura di ibana lao mangulahon na sittong. Jala sipata cara ni Jahowa mangalusi tangiangna dang sarupa tu na dihalomohon ibana. (2 Kor. 4:16; 12:7-9; Rom 7:21-23) Diboto si Paulus do muse godang do akka musuna na marpikkir halak na gale do ibana. * Alai dang gabe metmet roha ni si Paulus nang pe adong halak na mandok na so denggan taringot ibana, manang nang pe adong hagaleonna.​—2 Kor. 10:10-12, 17, 18.

2. Hombar tu 2 Korint 12:9, 10, aha do parsiajaran na didapot si Paulus?

² Didapot si Paulus do sada parsiajaran na rikkot. Boi do sasahalak gabe margogo nang pe gale. (Jaha 2 Korint 12:9, 10.) Didok Jahowa, ‘lam balga do huasona alani hagaleon’ ni si Paulus. Lapatanna, lehonon ni Jahowa do gogo na dihaporluhon si Paulus. Na parjolo, taulas ma boasa dang pola marsak hita tikki adong musu na mangaleai hita.

3. Boasa boi las rohatta tikki dileai?

³ Dang adong sian hita na olo dileai. Alai boi do gabe metmet rohatta molo adong musu na mangaleai hita jala molo marsak hita alani i. (Poda 24:10) Jadi boha do molo adong musu na mangaleai hita? Songon si Paulus boi do hita marlas ni roha “tingki dileai”. (2 Kor. 12:10) Boasa? Alana molo adong na mangaleai jala mangalo hita, on patuduhon na tutu do hita sisean ni Jesus. (1 Ptr. 4:14) Jesus pe mandok na lao dianiaya do akka halak na mangihutton ibana. (Joh. 15:18-20) I ma na masa di abad na parjolo. Di tikki i, godang do halak Junani na marpikkir molo halak Kristen i dang hea sikkola jala gale. Jala didok halak Jahudi, halak “na so parsingkola” do halak Kristen i, songon apostel Petrus dohot Johannes. (Ul. 4:13) Memang hira na gale do idaon halak Kristen di tikki i, alana dang dohot nasida tu sada partai politik, jala dang dohot nasida gabe tentara, jadi godang do halak na so mangargai nasida.

4. Boha do pakkilalaan ni halak Kristen di abad na parjolo tikki adong halak na mangaleai nasida?

⁴ Gabe metmet do roha ni halak di abad na parjolo ala dileai halak nasida? Daong. Songon si Petrus dohot si Johannes, dihilala nasida sada hasangapon do molo dianiaya ala mangihutton Jesus jala marbarita taringot ibana. (Ul. 4:18-21; 5:27-29, 40-42) Dang gabe maila nasida alani i. Jala molo taida saonari, unggodang do hasil ni akka ulaon ni nasida sian ulaon ni akka musuna najolo. Misalna, adong do piga-piga sisean ni Jesus na manuratton bukku na adong di Bibel. Hasilna, adong marjuta halak na gabe mamboto taringot Harajaon ni Debata sian bukku na disurat nasida i. Harajaon ni Debata na dibaritahon nasida nungnga mamaretta be di surgo jala Harajaon i ma annon na mamaretta tano on. (Mat. 24:14) Saonari, nungnga gabe raja be akka sisean i di surgo. Hape akka parhuaso na di Rom na menganiaya halak Kristen najolo dang adong be saonari ala nungnga mate nasida. Molo adong pe sian nasida na dipahehe, akka sisean ni Jesus i ma na mamaretta nasida haduan.​—Pgk. 5:10.

5. Hombar tu Johannes 15:19, boasa adong halak na leas rohana mangida naposo ni Jahowa?

⁵ Saonari on, adong do piga-piga halak na mangaleai naposo ni Jahowa. Jala didok nasida do hita halak na oto jala gale. Boasa? Alana, dang olo hita maniru parange ni akka halak na adong di humaliangta. Marsitutu do hita patuduhon serep ni roha, lambok jala unduk. Hape di portibi on, godang do halak na holan pasangappon dirina, ginjang rohana jala mangalo. Asing ni i, dang olo hita dohot tu partai politik, jala dang olo hita gabe tentara. Ala imbar hita sian akka halak di portibi on, gabe leas do roha ni nasida mangida hita.​—Jaha Johannes 15:19; Rom 12:2.

6. Aha do ulaon na massai balga na boi taulahon ala diurupi Jahowa?

⁶ Nang pe songon i pandapot ni akka halak di portibi on, alai dipakke Jahowa do akka naposona lao mangulahon ulaon na massai balga. Diurupi do hita lao mambaritahon barita na uli di liat portibi on. Boi do hita pabissarhon majalah na unggodang diterjemahon sian akka sijahaon na asing. Jala tapakke do Bibel lao mangurupi marjuta halak asa lam denggan ngolu ni nasida. Sude on boi saut alani pangurupion ni Jahowa do. Jadi nang pe gale hita diida akka halak, dipakke Jahowa do hita lao mangulahon tugas na massai balga. Alai songon dia Jahowa mangurupi hita ganup marsada-sada? Aha do na ikkon taulahon asa diurupi hita? Parrohahon ma tolu na boi taparsiajari sian apostel Paulus.

7. Aha do na boi taparsiajari sian si Paulus?

⁷ Adong parsiajaran na boi tadapot sian si Paulus. Molo naeng marhobas tu Jahowa hita, unang ma mangasahon gogo manang bakatta sandiri. Najolo, godang do halak na lomo rohana mangida si Paulus. Sasittongna, boi hian do si Paulus pasangappon dirina sandiri. Tubu di Tarsus do ibana, ibukota ni Kilikia, sada provinsi na adong di Rom. Kota na mora do Tarsus i, jala adong sikkola na terkenal disi. Jadi, timbo do sikkola ni si Paulus on. Jala si Gamaliel do guruna, i ma sahalak pamimpin agama Jahudi na sangap di tikki i. (Ul. 5:34; 22:3) Jala najolo hea do si Paulus gabe halak na sangap di halak Jahudi. Didok ibana, “Martimbangkon dongan satorbangku dohot dongan sabangsoku, ahu ma na dumenggan mangihuthon aturan ni agama Jahudi.” (Gal. 1:13, 14; Ul. 26:4) Alai dang olo si Paulus mangasahon dirina sandiri.

8. Songon na didok di Pilippi 3:8, boha do pakkilalaan ni si Paulus tu akka naung ditadikkon ibana, jala boasa boi las rohana tikki gale?

⁸ Las do roha ni si Paulus manadikkon akka na boi mambahen ibana sangap di portibi on. Gariada, didok ibana “songon sampah” do sudena i. (Jaha Pilippi 3:8.) Ala gabe sisean ni Jesus, jotjot do ibana mangadopi hasusaan. Sogo do roha ni akka halak sabangsona tu ibana. (Ul. 23:12-14) Hea do ibana dipukkuli jala dipenjarahon halak Rom. (Ul. 16:19-24, 37) Asing ni i, diboto si Paulus do dang sempurna ibana, jala maol do di ibana lao mangulahon na sittong. (Rom 7:21-25) Alai nang pe mangadopi godang hasusaan, dang na gabe so olo be ibana mangihutton Kristus. Gariada boi do ibana marlas ni roha “tingki gale”. Boasa? Alana tikki gale ibana, boi ma idaonna songon dia gogo na sian Jahowa mangurupi ibana ganup ari.​—2 Kor. 4:7; 12:10.

9. Ikkon songon dia do caratta mangida hagaleonta?

⁹ Asa boi mandapot gogo sian Jahowa, unang ma mangasahon gogo, sikkola, suku manang hamoraonta. Dang i na mambahen hita gabe mararga di Jahowa. Sasittongna, dang godang naposo ni Debata ‘na marbisuk di jolo ni jolma, na marhuaso, jala na ro sian keluarga na sangap’. Gariada, dipillit  Jahowa do “angka na gale di portibi on”. (1 Kor. 1:26, 27) Jadi nang pe dang adong di hamu akka na dipaboa di mula ni paragraf on, alai unang ma hagaleonmuna i na mangambati hamu lao manomba Jahowa. Gariada, bahen ma i gabe kesempatan di hamu lao mangida songon dia Jahowa mangalehon gogo tu hamu. Contohna, molo mabiar hamu ala adong na mangaleai haporseaonmuna, martangiang ma tu Jahowa asa barani hamu membela haporseaonmuna. (Eps. 6:19, 20) Manang molo marsahit na posi hamu, pangido ma gogo sian Jahowa asa boi hamu toktong manomba Ibana sian nasa tolapmuna. Tikki diida hamu pangurupion ni Jahowa, gabe lam togu ma haporseaonmuna jala lam margogo ma hamu.

10. Boasa porlu taparsiajari akka naposo ni Jahowa na setia na disurat di Bibel, misalna songon na dipaboa di Heber 11:32-34?

¹⁰ Ringgas do si Paulus marsiajar Hata ni Debata. Godang do parsiajaran na dapotna sian akka naposo ni Jahowa na disurat disi. Tikki mambahen surat tu halak Heber, dijujui si Paulus do nasida asa mangarimangi akka naposo ni Jahowa na setia. (Jaha Heber 11:32-34.) Pikkirhon ma sada contoh, i ma Raja Daud. Jotjot do ibana mangadopi paraloan dang holan sian musuna, alai dohot do sian akka halak na hea gabe donganna. Molo taida contoh ni si Daud on, taboto ma boasa gabe dipatogu si Paulus ala pengalaman ni si Daud, jala songon dia hita boi maniru si Paulus.

11. Boasa si Daud songon na gale idaon? (Ida gambar sampul.)

¹¹ Dirippu si Goliat, gale do si Daud. Tikki diida ibana si Daud, ‘lea do rohana mida si Daud’. Alana balga do si Goliat, godang sinjatana, jala nga tarlatik be ibana lao marporang. Hape, poso dope si Daud, dang adong pengalamanna. Jala dang tarlatik ibana lao marporang. Alai dang gabe gale si Daud alani situasi i. Diasahon ibana do gogo sian Jahowa, jala boi ma ditaluhon ibana si Goliat.​—1 Sam. 17:41-45, 50.

12. Aha do muse ambat-ambat na ikkon diadopi si Daud?

¹² Adong muse ambat-ambat na asing na ikkon diadopi si Daud. Unduk do ibana tu raja na dipillit Jahowa, i ma si Saul. Mulana, lomo do roha ni Raja Saul tu si Daud. Alai, gabe ginjang do roha ni Saul jala mangiburu do ibana tu si Daud. Jahat do ibana tu si Daud, gariada naeng bunuonna do si Daud.​—1 Sam. 18:6-9, 29; 19:9-11.

13. Aha do na diulahon si Daud tikki dibahen si Saul na so denggan tu ibana?

¹³ Nang pe jahat Raja Saul tu si Daud, alai toktong do unduk si Daud tu raja naung dipillit Jahowa i. (1 Sam. 24:7) Dang gabe disalahon ibana Jahowa ala dibahen si Saul na so denggan tu ibana. Gariada, pos do rohana lehonon ni Jahowa do gogo asa boi ibana martahan mangadopi ambat-ambat i.​—Ps. 18:2.

14. Songon si Daud, situasi aha do na diadopi si Paulus?

¹⁴ Sarupa do situasi ni apostel Paulus songon situasi ni si Daud. Umgogo do akka musu ni Paulus sian ibana. Godang do pamimpin ni agama na terkenal di tikki i na sogo rohana tu si Paulus. Jotjot do dipukkuli nasida si Paulus jala dipenjarahon. Asing ni i muse, adong piga-piga halak di huria na mangalo ibana. Dibahen nasida do na so denggan tu si Paulus. Hape sasittongna nasida ma nian na gabe donganna. (2 Kor. 12:11; Plp. 3:18) Alai, ditaluhon si Paulus do sude na mangalo ibana. Songon dia carana? Sai toktong do ibana marbarita, manang aha pe paraloan na masa. Toktong do setia ibana tu akka donganna,  nang pe hea dibahen haccit rohana. Jala na urrikkot, toktong do setia ibana tu Jahowa sahat tu na mate. (2 Tim. 4:8) Boi do marhasil ibana, dang alani gogona sandiri, alai ala pos rohana tu Jahowa.

15. Aha do tujuanta, jala songon dia do hita mangulahon i?

¹⁵ Adong do dongan sikkola, dongan sakarejo, manang keluarga na mangaleai manang menganiaya hamu? Hea do adong dongan di huria na mambahen haccit rohamu? Molo songon i, ingot ma contoh ni si Daud dohot si Paulus. Boi do hamu toktong ‘manaluhon hajahaton i marhite na denggan’. (Rom 12:21) Tujuanta dang na lao mangalo halak songon si Daud na mangalo si Goliat. Tujuanta, i ma mangurupi akka halak marsiajar taringot Jahowa dohot Bibel. Boi do hita marhasil mangulahon i molo tapakke Bibel lao mangalusi sukkun-sukkun ni halak taringot haporseaotta, toktong lambok tu halak na mambahen na so denggan tu hita, jala burju tu sude halak, tarmasuk akka musutta.​—Mat. 5:44; 1 Ptr. 3:15-17.

16-17. Aha do na so dihalupahon si Paulus?

¹⁶ Andorang so gabe sisean ni Jesus, si Paulus do na menganiaya halak Kristen. (Ul. 7:58; 1 Tim. 1:13) Jotjot do ibana menyerang halak Kristen di tikki i, alai diambati Jesus do ulaonna i. Makkatai ma Jesus sian surgo tu si Paulus, jala dibahen ma ibana gabe buta. Asa boi ibana marnida muse, ikkon dipangido ibana do pangurupion sian halak na hea dianiaya ibana. Serep do roha ni si Paulus. Olo do ibana diurupi sahalak sisean na margoar si Ananias. Jala si Ananias do na mangurupi ibana asa boi marnida muse.​—Ul. 9:3-9, 17, 18.

¹⁷ Ujungna ditanda do si Paulus gabe halak Kristen. Alai dang dihalupahon ibana parsiajaran na dapotna sian Jesus tikki di pardalanan tu Damaskus. Toktong do serep rohana, jala las rohana diurupi akka donganna. Diboto ibana do, akka donganna i do na patoguhon rohana.​—Kol. 4:10, 11.

18. Boasa sipata dang olo hita diurupi na asing?

¹⁸ Aha do na boi taparsiajari sian si Paulus?  Tikki parjolo sahali mananda hasittongan, tottu lomo do rohatta diurupi na asing, ala taboto godang dope na ikkon taparsiajari. (1 Kor. 3:1, 2) Alai boha do saonari? Olo do ra nungnga martaon-taon hamu di hasittongan, jala nga godang be pengalamanmuna. Jadi olo do dang lomo rohamu mangido pangurupion sian na asing, tarlumobi sian akka dongan na baru dope di hasittongan. Alai sasittongna, jotjot do dipakke Jahowa akka donganta lao patoguhon hita. (Rom 1:11, 12) Jadi asa boi mandapot gogo sian Jahowa, ikkon olo ma hita diurupi akka dongan.

19. Boasa si Paulus boi marhasil?

¹⁹ Dung gabe halak Kristen, godang do na boi diulahon si Paulus. Boasa? Ala diboto ibana boi do marhasil sasahalak dang alani gogona, sikkola, hamoraon manang sukuna. Alai ala serep do rohana jala toktong mangasahon Jahowa. Anggiat ma hita boi maniru si Paulus. Toktong ma hita (1) mangasahon Jahowa, (2) marsiajar sian akka contoh di Bibel, jala (3) olo diurupi akka donganta. Hasilna, nang pe gale hita, bahenon ni Jahowa do hita margogo!