1. Aha do na ibotoh apostel Paulus?

IBOTOH apostel Paulus do sipata boi do ia galek. Halani “roh burukni” dagingni, ra do lang urah bani mangkorjahon na sintong. Janah lang tongtong ibalosi Jahowa tonggoni songon na iharosuhkonsi. (2 Kor. 4:16; 12:7-9; Rom 7:21-23) Ibotoh si Paulus do homa halak na galek do ia ididah munsuh-munsuhni. * Hassi pe sonai lang ipaturut ia hagalekonni atap pe hata ni halak mambahen ia maretek ni uhur.​—2 Kor. 10:10-12, 17, 18.

2. Domu bani 2 Korint 12:9, 10, aha ma na iarusi si Paulus?

² Ihatahon Jahowa do hubani si Paulus, ‘Ibagas hagalekon do gabe gok hagogohon-Ku.’ Artini, ibere Jahowa do hagogohan na ihaporluhon si Paulus. Hunjon gabe iarusi si Paulus ma boi do halak na galek gabe margogoh use. (Basa 2 Korint 12:9, 10.) Halani ai, ulas hita ma lobei mase lang pala maretek ni uhur hita sanggah dong munsuh na pabajan-bajankon hita.

3. Mase boi sonang uhurta sanggah irisai?

³ Lang dong halak na rosuh irisai. Tapi, sanggah adong munsuh na pahirihon atap pe manrisai hita janah lalab do ipingkiri hita ai, on boi mambahen hita gabe maretek ni uhur. (Pod. 24:10) Jadi, aha ma na boi bahenonta sanggah dong munsuh na manrisai hita? Si Paulus  mangkatahon, “Sonang do uhurhu ibagas . . . hahirion.” (2 Kor. 12:10) Hita pe boi do sonang uhurta sanggah dong na manrisai. Mase? Halani ai do tandani anggo hita susian ni Jesus. (1 Ptr. 4:14) Jesus mangkatahon maningon iparburu do ganup susianni. (Joh. 15:18-20) Janah ai do na masa bani abad na parlobei. Ijia, halak Junani marpingkir halak na galek do halak Kristen ai, janah lang adong sikolahni. Anjaha halak Jahudi mangkatahon anggo halak Kristen, songon si Petrus pakon si Johannes, ‘sedo halak sijamah surat, tapi jolma na somal do’. (Lah. 4:13) Tongon, songon na galek do ijia halak Kristen halani lang ra sidea dihut bani politik, lang ra gabe pejabat, atap gabe tentara. Halani ai, gabe mapas do halak manonggor sidea.

4. Sonaha pangahap ni susian ni Jesus sanggah iapasi halak sidea?

⁴ Ai gabe maronti do halak Kristen mangidangi Jahowa halani iapasi halak? Lang. Sada hasangapon do bani si Petrus pakon si Johannes boi manaron na marsik halani mangihutkon Jesus ampa mambaritahon ajaranni. (Lah. 4:18-21; 5:27-29, 40-42) Lang maila sidea gabe susian ni Jesus. Martahun-tahun dobkonsi ai, bahatan do hasil na madear na idapot halak Kristen marimbangkon aha na ibahen munsuh ni sidea. Umpamani, surat na pansing na itulis susian ni Jesus hinan boi mangurupi halak ronsi sonari, janah mambere pangarapan bani sidea. Anjaha Harajaon na ibaritahon sidea hinan, sonari domma mamarentah i surga. Anjaha tongkin nari mamarentah ma ai hu sab tanoh on. (Mat. 24:14) Hape, anggo panguasa na mangarsik-arsik susian ni Jesus hinan, domma lang adong be sonari. Leganni ai, sonari gabe raja do susian ni Jesus i surga. Tapi, anggo munsuh ni sidea domma matei. Porini ipapuho pe holi sidea, maningon unduk do sidea hubani pamarentahan ni Naibata, na ibaritahon susian ni Jesus.​—Pangk. 5:10.

5. Domu bani Johannes 15:19, mase bahat halak mangapasi Saksi Jahowa?

⁵ Sonari, bahat do homa halak na mangapasi Saksi-Saksi Jahowa. Ihatahon sidea do anggo hita halak na oto janah galek. Mase? Halani lang iihutkon hita parlahou ni sidea. Marusaha do hita ase boi toruh maruhur, lamlam, ampa unduk bani aturan. Hape anggo halak i dunia on, marosuh pajuntul-juntulhon dirini, koras, janah lang ra mangihutkon aturan. Leganni ai, lang ra hita dihut bani politik atap pe gabe tentara. Halani ai, gabe mapas ma uhur ni halak mangidah hita.​—Basa Johannes 15:19; Rom 12:2.

6. Aha do na dob ibahen juakjuak ni Jahowa marhitei pangurupion-Ni?

⁶ Hassi pe sonai pingkiran ni dunia on, tapi igunahon Jahowa do halak na galek laho mangkorjahon tugas-tugas na ponting. Iurupi Ia do ase boi hita pararatkon ambilan na madear hu sab dunia on. Bahat tumang do publikasi na domma ibahen juakjuak-Ni, anjaha iterjemahkon do ai hu marbagei bahasa. Igunahon sidea do Bibel laho mangurupi marjuta halak ase lambin dear goluhni. Bani ganupan ai, Jahowa do na talup ipuji halani Ia do na mambere hagogohan hubani kalompok na galek ai ase boi mangkorjahon tugas-tugas na banggal. Tapi sonaha Jahowa mangurupi hita marsada-sada? Ai boi do ibahen Ia hita margogoh use? Anggo sonai, aha do na porlu bahenonta ase mandapot pangurupion ai? Ulas hita ma tolu parlajaran humbani si Paulus.

7. Parlajaran aha ma na boi dapot hita humbani si Paulus?

⁷ Parlajaran na boi dapot hita humbani si Paulus ai ma: Sanggah mangidangi Jahowa, ulang ma marpangunsandeian bani dirinta sandiri. Sasintongni, bahat do na boi mambahen si Paulus marpangunsandeian bani dirini sandiri. Umpamani, ia tubuh i Tarsus, ibu kota provinsi Rom. Bahat do halak na bayak ijai, janah dong sada sikolah na mantap. Ijai do ia marsikolah. Janah si Gamaliel do guruni, sahalak pambobai Jahudi na ipasangap buei halak. (Lah. 5:34; 22:3) Ijia, bahat do halak Jahudi na pasangapkon si Paulus. Ia mangkatahon, “Surungan do ahu humbani buei hasomanku magodang mangkorjahon [hasomalan ni halak Jahudi].” (Gal. 1:13, 14; Lah. 26:4) Hassi pe sonai, lang marpangunsandeian bani dirini ia.

8. Domu bani Pilippi 3:8, sonaha pangahap ni si Paulus bani ganup na dob itadingkonsi, janah mase ‘sonang uhurni ibagas hagalekonni’?

⁸ Malas do uhur ni si Paulus manadingkon ganupan ai halani songon “tompoh-tompoh” do iahap ia ganupan ai. (Basa Pilippi 3:8.) Tapi gabe bahat ma sitarononni halani mangihutkon Kristus. Umpamani, idomdomi bangsani do ia. (Lah. 23:12-14) Anjaha ongga do ia ibogbogi janah ipenjarahon. (Lah. 16:19-24, 37) Leganni ai, sunsah tumang do pangahapni halani dong hahuranganni. (Rom 7:21-25) Hassi pe sonai totap do iihutkon ia Kristus, janah “sonang do uhurni ibagas hagalekon”. Mase? Halani ibagas hagalekonni ai do boi ididah ia sonaha Naibata mampargogohisi.​—2 Kor. 4:7; 12:10.

9. Sonaha ma namin pangahapta mangidah hagalekonta?

⁹ Ase boi mandapot hagogohan humbani Jahowa, ulang ma iahap hita hagogohanta, sikolahta, sukunta, atap pe habayakonta na mambahen hita maharga. Sedo ai na mambahen hita marguna hubani Jahowa. Sasintongni, seng piga juakjuak ni Naibata “na pentar mangihutkon pardagingon, seng piga na markuasa, seng piga na sangap”. Tapi igunahon Jahowa  do halak “na galek ninuhur ni dunia on”. (1 Kor. 1:26, 27) Jadi, porini pe lang dong bamu songon na ipatugah nongkan ai, totap do ham boi mangidangi Jahowa. Halani ai, sanggah galek ham, ijai ma boi ididah ham sonaha Jahowa mambere hagogohan bamu. Umpamani, anggo mabiar ham sanggah irisai halak haporsayaonmu, martonggo ma bani Jahowa ase barani ham patugahkon hasintongan. (Ep. 6:18-20) Atap, anggo hona naborit na parah ham, pindo ma bani Jahowa ase ibere hagogohan bamu laho mangidangi-Si. Sanggah ididah ham sonaha Jahowa mangurupi, gabe lambin toguh ma haporsayaonmu.

10. Mase maningon iparlajari hita siusihan humbani Bibel, umpamani siusihan na ipatugah bani Heber 11:32-34?

¹⁰ Ringgas do si Paulus mamparlajari Hata ni Naibata. Bahat do parlajaran na dapot ia humbani juakjuak ni Naibata na isurat ijai. Sanggah itulis si Paulus surat hubani halak Heber na dob gabe halak Kristen, iojur do ase irimangi sidea siusihan humbani juakjuak ni Naibata na setia. (Basa Heber 11:32-34.) Pingkirhon hita ma sada contoh, ai ma Raja Daud. Bahat do halak na sihol manlawansi, seng pitah munsuhni, tapi dihut do hasomanni hinan. Anggo irimangi hita contoh humbani si Daud, gabe iarusi hita ma mase ai boi mangurupi si Paulus. Gabe ibotoh hita ma homa sonaha hita mangusihi si Paulus.

11. Mase si Daud songon na galek idahon? (Tonggor ma gambar sampul.)

¹¹ Anggo ibandingkon pakon si Goliat, daoh do etekan si Daud. Sanggah ididah si Goliat ia, “gabe mapas ma uhurni mangidahsi”. Anggo si Goliat banggal angkulani, lengkap sinjatani, janah domma bahat pangalamanni marporang. Hape anggo si Daud, poso ope janah lape ongga marporang. Tapi sasintongni gogohan do si Daud. Mase? Halani marpangunsandeian bani Jahowa do ia. Jadi, ibere Jahowa ma hagogohan bani laho manaluhon munsuhni.​—1 Sam. 17:41-45, 50.

12. Tantangan aha ope na roh hubani si Daud?

¹² Dong ope tantangan na roh hu bani si Daud na boi mambahen ia gabe galek. Setia do si Daud mangidangi si Saul, raja na dob ipilih Jahowa. Mungkahni, marosuh do Raja Saul on mangidah si Daud. Tapi dokah-dokah halani gijang uhurni, gabe simburu ma ia mangidah si Daud. Halani ai, marusaha ma ia laho mamunuh si Daud.​—1 Sam. 18:6-9, 29; 19:9-11.

13. Aha do na ibahen si Daud sanggah ibahen si Saul na jahat hu bani?

¹³ Hassi pe jahat pambahenan ni si Saul hubani si Daud, tapi totap do hormat ia hubani raja na dob ipilih Jahowa. (1 Sam. 24:7) Lang homa isalahkon ia Jahowa halani ipaturut si Saul mambahen na sisonai hu bani. Tapi, pos do uhurni sai ipargogohi Jahowa do ia ase boi totap martahan.​—Ps. 18:1-2.

14. Sonaha situasi ni si Paulus sarupa pakon si Daud?

¹⁴ Dos do situasi ni si Paulus pakon si Daud. Dong do munsuhni na gogohan hun bani. Bahat do homa pambobai ugama na sogam mangidahsi. Gati do ia ibogbogi janah ipamasuk hubagas penjara. Dong do homa hasoman-hasomanni na jahat hu bani. Gari i kuria pe, dong do sanina na manlawansi. (2 Kor. 12:11; Pil. 3:18) Tapi, italuhon si Paulus do ganupan ai. Sonaha carani? Hassi pe bahat parlawanan, totap  do ia marbarita. Hassi pe borit uhurni ibahen, totap do ia setia hubani sanina botou. Na sipontingan setia do ia hubani Naibata sadokah goluhni. (2 Tim. 4:8) Ganupan ai boi ihorjahon si Paulus halani tongtong marpangunsandeian hubani Jahowa.

15. Sanggah dong na jahat hubanta, aha do tujuanta, janah sonaha carani?

¹⁵ Ongga do ham irisai hasoman sakalas atap pe sahorja, atap kaluargamu na lang Saksi? Ai dong do sanina atap botou na jahat hu bamu? Anggo sonai, dingat ma siusihan na ibahen si Daud pakon si Paulus. Boi do ‘italuhon ham na jahat in marhitei na madear’. (Rom 12:21) Sanggah dong na jahat hubanta, tujuanta sedo laho manlawan sidea, songon si Daud manlawan si Goliat. Tapi, marusaha ma manaluhon na jahat marhitei mangurupi sidea laho mananda Jahowa ampa marlajar Bibel. Ase boi ibahen hita sonai, gunahon ma Bibel laho mambalosi sungkun-sungkun ni sidea. Totap ma ham basar, hormat, janah bujur hubani ganup halak, tarmasuk hubani munsuhmu.​—Mat. 5:44; 1 Ptr. 3:15-17.

16-17. Aha do na totap idingat si Paulus?

¹⁶ Sanggah si Paulus lape gabe susian ni Jesus, gati do iparburu ia halak Kristen. (Lah. 7:58; 1 Tim. 1:13) Tapi iparonti Jesus do si Paulus mangkorjahon ai. Sanggah ai, si Saul do goranni. Marsahap ma Jesus hun surga hubani si Paulus, janah ibahen ma ia mapitung. Ase boi ia mangidah use, maningon ipindahi ia do pangurupion humbani halak na ongga iparburu ia hinan. Halani toruh maruhur, ra do ia manjalo pangurupion humbani si Ananias. Ujungni gabe boi ma ia mangidah use.​—Lah. 9:3-9, 17, 18.

¹⁷ Dob ai, gabe halak Kristen ma si Paulus. Hassi pe sonai totap do idingat ia aha na iajarhon Jesus sanggah i pardalanan hu Damaskus hinan. Toruh maruhur do si Paulus, janah ra do ia manjalo pangurupion  humbani sanina botou. Ihatahon ia “gabe apoh-apoh do sidea” hu bani.​—Kol. 4:10, 11.

18. Mase sipata lang ra hita manjalo pangurupion humbani na legan?

¹⁸ Aha ma na boi iparlajari hita humbani si Paulus? Sanggah baru marlajar hasintongan, mintor ra do hita manjalo pangurupion humbani sanina botou halani iahap hita lape bahat pambotohta. (1 Kor. 3:1, 2) Tapi sonaha anggo sonari? Ra do domma dokah hita mangidangi Jahowa, anjaha domma bahat pangalamanta. Halani ai, ra do gabe lang ra hita manjalo pangurupion humbani na legan, tarlobih humbani sanina botou na baru ope ididi. Tapi sasintongni gati do igunahon Jahowa sanina botounta laho patoguhkon hita. (Rom 1:11, 12) Halani ai, anggo sihol hita iurupi Jahowa, maningon ra do hita iurupi sanina botou.

19. Aha do na mangurupi si Paulus ase marhasil?

¹⁹ Bahat do tugas na banggal na ihorjahon si Paulus dobkonsi gabe halak Kristen ia. Ibotoh ia ma sedo habayakon, sikolah na gijang, atap pe asalni na mambahen ia marhasil. Tapi halani totap martoruh ni uhur janah marpangunsandeian bani Jahowa, ai do na mangurupisi mangkorjahon tugas humbani Jahowa. Jadi, songon si Paulus totap ma hita: (1) marpangunsandeian bani Jahowa, (2) marlajar humbani siusihan na dong ibagas Bibel, ampa (3) manjalo pangurupion humbani sanina botou. Anggo sonai ibahen hita, gabe margogoh ma hita hassi pe pangahapta halak na galek do hita!