1. Kai saja si iakui Paulus kerna dirina ?

IAKUI Rasul Paulus maka mon-mon lemah iakapna bana. Iakuina maka dagingna “reh lemahna,” arus erjuang kel ia ngelakoken kai si benar, janah labo lalap ijawap Jahwe toto Paulus bagi si iarapkenna. (2 Kor. 4:16; 12:7-9; Rom. 7:21-23) Iakui Paulus ka maka kalak si nentang ia pe iakapna ia lemah. * Tapi aminna pe iadapi Paulus kerina si e ndai, iusahakenna terus positif perukurenna. La ipediatna si e ndai kerina erban ia erpengakap maka ia la meherga.​—2 Kor. 10:10-12, 17, 18.

2. Menurut 2 Korinti 12:9, 10, pelajaren si meherga kai si idat Paulus?

² Baca 2 Korinti 12:9, 10. Nina Jahwe man Paulus, “Paksa kam lemah, kuasaKu jadi sempurna i bas kam.” Maksudna ibere Jahwe gegeh si iperluken Paulus. Emaka, idat Paulus pelajaren si meherga. Kai e? Sekalak jelma banci megegeh aminna pe sangana ia lemah. Si pertama, sibahas lebe engkai maka la perlu siukuri kel ranan kalak si nghina kita.

3. Engkai maka banci senang siakap sanga ihina?

³ La lit sekalak pe si nggit ihina. Tapi, adi ihina musuhta kita janah siukuri kel rananna e, e banci erban kitik kel ukurta. (Kua. 24:10) Uga nge arusna perasanta? Bagi Paulus, banci sikataken, “Senang kuakap . . . sanga ihina.” (2 Kor. 12:10) Engkai? Perban adi kita ihina ntah pe  itentang, e mbuktiken maka kita tuhu-tuhu murid Jesus. (1 Pet. 4:14) Ikataken Jesus maka pengikutna pasti ianiaya. (Joh. 15:18-20) Enda terjadi man kalak Kristen i bas abad pertama. Paksa si e, kalak si enggo ipengaruhi kebiasan kalak Junani erpengakap maka kalak Kristen e lemah janah la lit sekolahna. Janah kalak Jahudi pe erpengakap maka kalak Kristen e “rakyat biasa si la erpendidiken,” bali bagi Rasul Petrus ras Johanes. (Perb. 4:13) Selain si e, kalak Kristen teridah lemah perban la lit pengaruhna bas politik bage pe bas militer, janah kalak e pe la ka iergai bas daerahna.

4. Bas abad pertama, kai si ilakoken kalak Kristen sanga lit si ngataken kai si la mehuli kerna kalak e?

⁴ La ipediat kalak Kristen bas abad pertama ranan si la mehuli arah penentangna erban kalak e ngadi jadi murid Jesus bage pe erberita. Contohna eme Rasul Petrus ras Johanes. Sada kehamaten kel iakap kalak e ianiaya perban jadi pengikut Jesus bage pe perban ngajarken kerna Jesus. (Perb. 4:18-21; 5:27-29, 40-42) Aminna pe kalak Kristen bas abad pertama la iergai bas daerahna, la kalak e mela. Situhuna, adi ibandingken ras penentangna, buen si ilakoken kalak e i bas nampati kalak si deban. Contohna, piga-piga arah kalak Kristen ndai nulis buku si lit bas Pustaka. Buku-buku e enggo nampati janah mereken arapen man jutan kalak. Kerajan si iberitaken kalak e, gundari merentah bas surga janah kentisik nari merentah bas doni. (Mat. 24:14) Sebalikna, pemerentahen Roma si mbarenda niksa kalak Kristen lanai lit. Selain si e, kalak Kristen e gundari enggo jadi raja bas surga. Tapi si nentang kalak e enggo mate. Janah amin pe si nentang e pagi ipekeke, arus kalak e patuh man Kerajan Dibata, eme Kerajan si mbarenda iberitaken kalak Kristen si segat ate kalak e.​—Ket. 5:10.

5. Menurut Johanes 15:19, engkai maka rendah iakap kalak Saksi Jahwe?

⁵ Gundari enterem kalak si la ngergai Saksi Jahwe janah itokoh-tokohina perban iakapna kita lemah janah la lit sekolahta. Engkai? Perban la kita nggit ngikutken perbahanen kalak si lit i sekelilingta. Siusahaken lalap meteruk ukur, lembut, janah patuh. Tapi kalak bas doni enda ngena atena kalak si meganjang rukur, tual, janah nggit mberontak. Selain si e, la kita nggit ikut bas politik ras dinas militer. Perban beda kita ras kalak si lit bas doni enda, emaka rendah iakap kalak kita.​—Baca Johanes 15:19; Rom. 12:2.

6. Alu penampat Jahwe pendahin si luar biasa kai si ilakoken umatNa?

⁶ Amin pe lemah iakap doni enda kita, tapi igunaken Jahwe kita ngelakoken melala pendahin si luar biasa. Salah sadana igunakenNa kita bas ngelakoken pendahin erberita si seh kel belinna. Gundari, melala kel majalah si iterjemahken umatNa janah ibagi-bagiken i belang-belang doni. Igunaken kalak e ka Pustaka nampati kalak gelah reh ulina kegeluhenna. Alu penampat Jahwe enda kerina banci terjadi. Igunaken Jahwe sada kelompok kalak si lemah iakap doni enda guna ngelakoken pendahin si luar biasa ndai. Tapi uga Jahwe nampati kita sekalak-sekalak? Banci nge sampati Jahwe kita gelah megegeh? Adi banci, kai nge si arus silakoken gelah  isampatiNa? Gundari, mari sibahas telu bagin si banci sipelajari arah Rasul Paulus.

7. Pelajaren kai si banci sidat arah Rasul Paulus?

⁷ Mbarenda, enterem kalak muji Paulus. Engkai? Ia galang-galang i Tarsus, ibu kota provinsi Kilikia i Roma. Tarsus e kota si makmur janah lit universitas si terkenal i je. Selain si e, ia iajar salah sada peminpin Jahudi si ihamati kel, gelarna eme Gamaliel. (Perb. 5:34; 22:3) Paulus e pernah jadi kalak si penting i tengah-tengah kalak Jahudi. Nina, “I bas ndalanken Agama Jahudi ndauh aku lebihen asangken kerina temanku si sebaya si sada bangsa ras aku.” (Gal. 1:13, 14; Perb. 26:4) Jadi kerina e banci erban menukah iakap Paulus jadi kalak si meganjang rukur janah ngandalken dirina. Tapi ia la bage. Kai pelajarenna? Ula andalken gegehndu ntah pe kengasupenndu i bas ngelayani Jahwe.

8. Menurut Pilipi 3:8, uga perasan Paulus sanga nadingken kerina si banci erban ia jadi kalak penting? Janah engkai maka senang iakapna sanga ia lemah?

⁸ La nyesal Paulus nadingken kerina si erban ia banci jadi kalak penting. Ianggapna kerina e bagi “sampah.” (Baca Pilipi 3:8.) Melala masalah si iadapi Paulus perban jadi pengikut Kristus. Misalna, segat ate sada bangsana ia. (Perb. 23:12-14) Ipekpeki ka ia janah ipenjaraken kalak Roma, padahal ia warga negara Roma. (Perb. 16:19-24, 37) Selain si e, perban ia la sempurna, mesera kel iakapna ngelakoken kai si mehuli. (Rom. 7:21-25) Aminna pe itentang kalak ia janah lit kelemahenna, tetap ia jadi pengikut Kristus. Nina, “Senang kuakap sanga aku lemah.” Engkai? Perban sanga ia lemah, igejapkenna uga Dibata nampati ia.​—2 Kor. 4:7; 12:10.

9. Uga arusna perasanta nandangi kai si erban kita lemah?

⁹ Banci saja lemah siakap banta perban lit pinakitta, la lit sekolahta, rendah  akap kalak sukuta, janah la lit ertata. Tapi adi sidat ateta gegeh arah Jahwe nari, ula siakap si e ndai kerina erban kita lanai erguna i lebe-lebe Jahwe. Tapi situhuna, labo enterem umat Dibata ‘kalak si pentar menurut manusia, kalak si erkuasa, bage pe kalak si rehna i bas keluarga terpandang nari.’ Sebalikna, ipilih Jahwe kalak “si lemah i doni enda.” (1 Kor. 1:26, 27) Emaka, adi lit si erbanca lemah iakapndu, kam banci tetap ngelayani Jahwe. Anggaplah situasindu e jadi kesempaten man bandu guna ngenen uga Jahwe mere gegeh man bandu. Contohna, adi lit kalak si erban kam ragu nandangi kinitekenndu, ertotolah mindo gegeh man Jahwe gelah pang kam ncakapken kerna kinitekenndu e. (Ep. 6:19, 20) Ntah adi mekelek sangana pinakitndu, pindolah gegeh man Jahwe gelah banci kam tetap sibuk ngelayani Ia. Tiap gejapkenndu penampat i bas Jahwe nari, reh paguhna me kinitekenndu.

10. Engkai maka arus sipelajari kerna kalak si setia si lit bas Pustaka si itulis bas Heber 11:32-34?

¹⁰ Semangat kel Paulus mpelajari Kata Dibata. Ibacana cerita kerna umat Dibata si setia janah melala ia erlajar arah usihen kalak e. Sanga itulis Paulus surat man kalak Kristen i Heber, isuruhna kalak e ngukuri kerna umat Jahwe si setia. (Baca Heber 11:32-34.) Perdiateken salah sada umat Jahwe si ituriken Paulus eme Raja Daud. Labo ngenca musuh-musuhna si nentang ia tapi teman-temanna pe ikut nentang ia. Sanga sipelajari kari kerna Daud, siteh me engkai maka ngukuri kerna Daud banci mpegegehi Paulus janah uga carata ngusih Paulus.

11. Engkai maka Daud e teridah lemah i lebe-lebe Goliat? (Nen gambar sampul.)

¹¹ Perban Goliat sekalak pejuang si seh kel gegehna, sepele kel ia ngidah Daud. Sanga idah Goliat Daud, “minter ia mekarus man bana.” Goliat e seh kel galangna, lengkap alat perangna, janah beluh kel ia erperang. Tapi Daud nguda denga, la lit pengalamenna erperang. Emaka teridah ia lemah. Tapi situhuna megegeh ia. Engkai? Perban iandalkenna Jahwe, ibereken Jahwe ia gegeh guna naluken Goliat.​—1 Sam. 17:41-45, 50.

12. Tentangen kai si iadapi Daud?

¹² Lit tentangen si iadapi Daud si erbanca lemah iakapna bana. Kai e? Paksa si e, setia Daud ngelayani Saul, raja si ipilih Jahwe. Tangtangna iergai Raja Saul Daud e. Bas pudi wari, perban meganjang rukur, cian ate Saul man Daud. La mehuli perbahanen Saul man Daud janah iusahakenna ka munuh Daud.​—1 Sam. 18:6-9, 29; 19:9-11.

13. Uga tanggapen Daud sanga la mehuli perbahanen Raja Saul man bana?

¹³ Amin pe la mehuli perbahanen Raja Saul man Daud, tetap iergai Daud raja si ipilih Jahwe e. (1 Sam. 24:6) La pernah isalahkenna Jahwe erkiteken situasi e. Sebalikna, ipindona gegeh man Jahwe gelah ngasup ia ngadapi situasi si mberat e.​—Msm. 18:1.

14. Situasi kai si iadapi Paulus si seri ras Daud?

¹⁴ Rasul Paulus ngadapi situasi si seri ras Daud. Gegehen musuh Paulus asangken ia. Enterem kel peminpin agama ras politik rate segat man bana. Rusur kel ia ipekpeki janah itamaken bas penjara.  Bali bagi Daud, Paulus pe labo mehuli perbahanen teman-temanna man bana. Piga-piga kalak Kristen bas runggun pe nentang ia. (2 Kor. 12:11; Pil. 3:18) Tapi, berhasil italuken Paulus kerina kalak si nentang ia. Uga carana? Terus ia erberita amin pe itentang. Tetap keleng atena turang seninana amin pe kitik ukurna iban kalak e. Janah si pentingna, setia ia man Dibata seh asa ia mate. (2 Tim. 4:8) Ngasup ia ngelakoken kerina e labo perban gegehna tapi perban iandalkenna Jahwe.

15. Kai tujunta, janah uga enda banci terjadi?

¹⁵ Sangana nge kam ianiaya ntah pe ihina teman sada kelasndu, teman sada dahinndu, ntah pe anggota keluargandu si la Saksi? Pernah nge la mehuli perbahanen turang senina bas runggun man bandu? Adi pernah, ingetlah contoh Daud ras Paulus. Banci ‘talukenndu kai si jahat alu ngelakoken kai si mehuli.’ (Rom. 12:21) Memang la silawan kalak si nentang kita bali bagi Daud ngelawan Goliat. Tapi, siusahaken nampati kalak erlajar kerna Jahwe bage pe kerna Pustaka. Sigunakenlah Pustaka sanga njawap penungkunen kalak. Perlu ka kita mehamat ras mehuli man kalak si la mehuli man banta. Janah mehulilah perbahanenta man kerina kalak, termasuk man musuhta.​—Mat. 5:44; 1 Pet. 3:15-17.

16-17. Kai si la pernah ilupaken Paulus?

¹⁶ Ope Rasul Paulus jadi murid Kristus, ia kalak si meganjang rukur si niksa pengikut Jesus. (Perb. 7:58; 1 Tim. 1:13) Gelah Paulus si paksa si e igelari Saul ngadi niksa kalak Kristen, ngerana Jesus arah surga nari man Paulus janah ibanna Paulus pentang. Gelah banci ka ia erpengidah mulihi, arus ipindona penampat arah kalak si pernah ianiayana. Alu meteruk ukur nggit ia isampati sekalak murid si gelarna Ananias si banci erban Paulus erpengidah mulihi.​—Perb. 9:3-9, 17, 18.

 ¹⁷ Dungna Paulus itandai selaku anggota runggun si mehuli. Tapi la pernah ia lupa pelajaren si idatna arah Jesus i bas perdalanenna ku Damaskus. Tetap Paulus meteruk ukur janah nggit ia ngaloken penampat arah turang seninana. Iakui Paulus maka kalak e “si mpegegehi” ia.​—Kol. 4:10, 11.

18. Engkai maka mon-mon la kita nggit ngaloken penampat kalak?

¹⁸ Kai si banci sipelajari arah Paulus? Sanga tangtangna sipelajari kebenaren, banci saja meriah siakap isampati perban sadar kita maka arus kita mbue erlajar. (1 Kor. 3:1, 2) Tapi uga gundari? Adi enggo ertahun-tahun kita ngelayani Jahwe janah enggo melala ka pengalamenta, banci saja lanai kita nggit ngaloken penampat kalak, apai ka si mereken penampat e mbaru denga bas kebenaren. Tapi situhuna, rusur igunaken Jahwe turang seninata guna mpegegehi kita. (Rom. 1:11, 12) Emaka, adi sidat ateta gegeh arah Jahwe nari, arus sialoken penampat arah turang seninata.

19. Engkai maka banci ilakoken Paulus pendahin si luar biasa?

¹⁹ Melala pendahin si luar biasa si ilakoken Paulus kenca ia jadi kalak Kristen. Engkai? Perban ia meteruk rukur ras ngandalken Jahwe. Iteh Paulus maka kesehaten, pendidiken, kebayaken, ntah pe latar belakang sekalak jelma labo penting. Mbera kita kerina ngusih Paulus alu (1) ngandalken Jahwe, (2) erlajar arah contoh-contoh si lit bas Pustaka, bage pe (3) ngaloken penampat arah turang seninata. Alu bage, la soal uga lemahna siakap banta, pasti ibereken Jahwe kita gegeh!