1. Ka katei lasubudirubei apostolu Pábulu furangu?

SUBUDI lumuti meha apostolu Pábulu furangu anihein lan dan débili lan lasandiragun lungua. Ariñagati “agumuchagueina liña lan” lúgubu murusun murusun, láfaaguña lan lun ladügüni le buídubei ani mama lan súnwandan lóunabuni Heowá lafurieidun kei le aubei lagurabei (2 Ko. 4:16; 12:7-9; Rom. 7:21-23). Subuditi meha giñe lun ariñaga hamá láganiñu débili lan. * Lau sun lira, mígirunti lun ladügüba lan hasaminarun amu wuriba luagu ni lidebilin guánarügü lun lasandiragun lungua mouni lan (2 Ko. 10:10-12, 17, 18).

2. Según 2 Korintuna 12:9, 10, ka katei súdiniti lafurendeirubei Pábulu?

² Furendeiti Pábulu aban katei súdiniti: gayara lan lasandiragun aban gürigia lungua débili lan, ani le linarün katei, héreti (aliiha huméi 2 Korintuna 12:9, 10). Dan le lariñagunbei Heowá lun Pábulu “buítimati larihín nubafu buagu dan le débili ban”, le labusenrunbei lariñagun lun líchugubei lan erei le lemegeirubei lun. Furumiñe, ariha waméi ka lan uagu moun lumuti lubéi wadiheridun saragu dan le hanabaguniwa wáganiñu.

3. Ka uagu gayara lubéi wagundaarun dan le ‘wanabúniwa’?

³ Úati ni aban gürigia gúndaati lanabúniwa. Gama lumoun, ánhawa adiherida saragu luagu wanabúniwa, gayaraati lábürüha warüna (Ari. 24:10). Ligíati, ida luba warihini wóuseraguniwa? Gayaraati wadügün kei Pábulu, wagundaarun dan le ‘wanabúniwa’ (2 Ko. 12:10). Ka uagu? Ladüga arufuda lumuti wanabún  luma wéibaahoun wagíatima lan lánibei Kristu disipulugu (1 Fe. 4:14). Ariñagati Hesusu héibaahouba lan ha afalarubalin (Huan 15:18-20). Ani ligía asuseredubei lidan furumiñeti sígulu. Kei hénpulu, ha meha ígiraguagüdübaña houngua lun háyeihani hagaburi gürieguna, ibidiouguati meha hau kristiánugu houn ani barǘ hamutiña kei ni kata. Ánhañati huríu, ariha hamutiña meha kristiánugu kei ‘gürigia ha maturiahatiña saragu, ani kei furumiñeguarügü’, ítara kei hariñagun luagu apostolu Féduru luma Huan (Adü. 4:13). Saminatiña meha saragu gürigia mabafu hamá kristiánugu, ladüga mádaragun hamá houngua lidoun polítika ni lidoun asudarahani, ani iyereegutiña meha houn.

4. Ida liña meha hóunabun furumiñetiña kristiánugu dan le hayanuhabei háganiñu wuriba hawagu?

⁴ Mígiraguagüdüntiña meha furumiñetiña kristiánugu houngua lun ladügün hayanuhan háganiñu wuriba hawagu lun lábürühan harüna. Kei hénpulu, aban meha lubuidun chansi lun apostolu Féduru luma lun Huan héibaahoun ladüga lánigu hamá Hesusu disipulu luma luagu harufudahan houn amu luagu le larufudahabei Hesusu houn (Adü. 4:18-21; 5:27-29, 40-42). Mébunati meha lun habusigaridun kristiánugu ha lánina furumiñeti sígulu. Lugundun buiti meha le hadügübei houn gürigia sügǘ lau le hadügübei háganiñu. Kei hénpulu, líburu to habürüdüboun lau lídehan Bungiu, anuhagua ahuuda houn gürigia, ru tuguya emenigini houn saragu míñunu. Arúeihani le uágubei hapurichiha, mámarügüñein aban katei inarüniti woun uguñe weyu, yarafa madise larúeihani sun ubóu (Mat. 24:14). Anhein buriti arúeihani gabafuti le éibaahabaliña luagu aban dan, gumugua lubafu. Ani uguñe weyu, disipulugu úaraguatiña hagüra, urúeihaña sielu. Ánheinti háganiñu hilagua; ani ánhaña ásaara, larúeihabaña Arúeihani le meha hapurichihabei kristiánugu ha meha iyereegubaña houn (Aruf. 5:10).

5. Según Huan 15:19, ka uagu iyereegu wabéi houn lílana ubóu?

⁵ Uguñe weyu, añahein gürigia ha únbaña iyereegu wamá, adügatiña bula wau, ariha hamutiwa kei ibidiougua tau ani ni kata wagía houn. Ka uagu? Ladüga magaburi wamuti hagaburi gürigia ha geyegubaña wau. Gürigia ha barüguabaña ungua, ha pántabaña hama ha maganbadibaña, hagía hínsiñebaña lun ubóu. Ánheinti wagía, áfaaguatiwa lun ǘnabugu wamá, lun darangilu wamá luma lun gaganbadi wamá. Ani mádaraguntiwa woungua lidoun polítika ni lidoun asudarahani. Kei mada lániwa katei lánina ubóu, arihúatiwa kei ni kata (aliiha huméi Huan 15:19; Rom. 12:2).

6. Ka katei hanarimeburiti ladügübei Heowá lau layusuruniwa?

⁶ Meberesenga le lasaminarubei ubóu wawagu, layusuruñadiwa Heowá lun ladügün katei hanarimeburiti. Kei hénpulu, lapurichihóuña lidan sun ubóu. Wagía le lubúeingu, wagumeiraguagüdüñoun garüdia tótima afanreinhounboun lidan sun ubóu, ani yusu wamutu giñe Bíbülia lun wíderaguniña saragu míñunu gürigia abuiduragüdei habagari. Susereti sun lira, seremei lun Heowá, le ayusurubei aban sétanu le ñein habéi gürigia ha anügǘbaña kamá ni kata lun ladügǘniwa lubuidun dasi le. Guentoti, ka gayaraabei wariñaguni luagu kada aban wádangiñe? Gayaraati san líderaguniwa Heowá lun here wamá? Anhein ítara liña lubéi, ka lunbei wadügüni lun líderaguniwa? Ariha wamá ǘrüwa katei le wafurendeirubei lídangiñe lani apostolu Pábulu hénpulu.

7. Ka furumiñeti katei wafurendeirubei lídangiñe lani Pábulu hénpulu?

⁷ Furumiñeti katei le wafurendeirubei lídangiñe lani Pábulu hénpulu, dan le lan weseriwidun lun Heowá mama lunti wafiñerun luagu were o luagu iarani le wawagubei.  Lidan lisaminan ubóu, gébunati hamuga lun lapantahan Pábulu luma lun chouru lan lasandiragun lungua. Lidan meha aban uburugu gíriti Tárüsu laweirida, aban uburugu le lichügüdinabei aban lídangiñe fulasu le aubei lariha Roma, awanseti meha uburugu ligía ani anuhoun meha luban furendei súdinitu ñein. Aban meha wügüri furendeiti Pábulu, lugundun aban meha hádangiñe ábutigu huríu le inebewabei lidan dan ligía lumaisturubei, le gíribei Gamalieli (Adü. 5:34; 22:3). Chülüti meha aban dan lun gabafu lan lererun Pábulu lidan hageira huríu. Ariñagati: “Sügügua numutiña meha saragu hádangiñe nupaisanun ha madiseguati hágurahoun numa” (Gal. 1:13, 14; Adü. 26:4). Íbini ítara, madügünti meha sun le lun lafiñerun luougua.

8. a) Según Filipuna 3:8, ka meha lisaminanbei Pábulu luagu burí katei le ígira láalibei? b) Ka uagu lariñaga Pábulu gunda lan lau débili lan?

⁸ Lau sun lugundan Pábulu lígirei katei burí le gayaraabei ladügün lun larihín kei aban wügüri gabafuti según lisaminan ubóu. Darí lun lariñagun barǘ lani sun katei le meha libihubei lidan ubóu “kei ifei” (aliiha huméi Filipuna 3:8). Gama lumoun, mosu meha lagagibudagun luma saragu lénrengunga lun ábanbei lan lani Kristu disipulu. Aban liyereegudun houn lílana lageira (Adü. 23:12-14). Ani ánhaña rómana ha lupaisanun, agayuahatiña luagun ani daü haméi (Adü. 16:19-24, 37). Lanwoun lira, subudi lumuti meha giñe chará lan ani hénrengu lan lun ladügüni le buídubei (Rom. 7:21-25). Íbini ítara, mígirunti lun hadügün láganiñu o lichara guánarügü lun lábürühan larüna. Lubaragiñe lira, ariñagati: “Ligía nagundaarúnbei lau débili”. Ka uagu? Lugundun dántima débili lan, ligíatima meha larihini lubafu Heowá (2 Ko. 4:7; 12:10).

9. Ida luba warihini débili le úmabei wagagibudagua?

⁹ Anhein busén wabéi lun líchugun Heowá ubafu woun, moun lumuti wasaminarun ubafu lan le wawagubei lídangiñeti lan were guánarügü, furendei le ibiha wamaalibei, ligaburi wagüriarúniwa o ladüga lan umegeguni le wámabei. Mama katei le adügübei lun hu wamá ligibugiñe lagu Heowá. Le linarün katei, hadan lubúeingu Bungiu, mama sun hagía “chuti hau según ubóu, ni wéirigutiña, o hádangiñetiña lan iduheñu íñugutiña”. Lubaragiñe lira, anúadira  laaña Heowá “ha débilibaña según ubóu” (1 Ko. 1:26, 27). Ligíati, mariha waméi wadebilin kei aban katei le eredehabalin weseriwidun lun Heowá, lubaragiñe lira, ariha waméi kei aban chansi lun warihini ida liña lan líderaguniwa lubafu Heowá. Kei burí hamuga, anhein áluga somu gürigia ladügün lun machourun wamá luagu wafiñen ani aba wasandirun anufudei luagu kaba lan wariñaga, amuriaha wamá ganigi lidan furíei lun wayanuhan luagu wafiñen (Efe. 6:19, 20). Anhein wagagibudaguña lubéi luma aban sandi mareidaguaditi, amuriaha wamá erei luma Heowá lun wasigirun adügei sun wayaraati lidan weseriwidun lun. Ságüme warihini líderaguniwa, ábatimame laganwoundun wafiñen ani ábame giñe héretima wamá.

10. Ka uagu lunti lubéi wakutihani hénpulu le harufudubei gürigia úaraguatiña ha uágubaña tayanuha Bíbülia kei lariñaguni Ebüréu 11:32-34?

¹⁰ Héchuti meha Pábulu aturiahoun Lererun Bungiu. Adügati lira lun lasubudirun saragu katei, luma lun lafurendeirun saragu katei hámagiñe lubúeingu Heowá ha úaraguabaña ha meha uágubaña laliiha. Tidan gárada to labürühaboun houn kristiánugu ebüréu, ínchaha lumutiña Pábulu áyeihei hénpulu le harufudubei lubúeingu Bungiu úaraguatiña ha (aliiha huméi Ebüréu 11:32-34). Samina wamá luagu aban hádangiñe, luagu urúei Dawidi. Mosu meha lagagibudagun luma héibaahani láganiñu luma héibaahani ha meha lumadagubaña luagu aban dan. Akutiha waméi lani Dawidi hénpulu buidu. Ítara luba warihini ida liña lan meha líderaguni lasaminarun Pábulu luagu libagari Dawidi luma ida luba lan wáyeihani Pábulu.

11. Ka meha uagu genege lubéi débili lan Dawidi? (Ariha huméi dibuhu le luágubei tidáü).

¹¹ Dan le larihinbalin gawuribuhati Goliadi, Dawidi, “aba lanügüni katei kei huraraü”. Le linarün katei, wéiritimati meha Goliadi luéi Dawidi ani aransetimaati meha giñe Goliadi lun awuribuhani. Aban meha nibureinti Dawidi le ibidiñeti luáguti wuribu lun ani genegeti maranserun lan giñe lubá. Gama lumoun afiñeti meha luagu lubafu Heowá. Le meha genegebei lun Goliadi aban lan huraraü, ligía aban lanarime agañeiruni lun Dawidi (1 Sam. 17:41-45, 50).

12. Ka turobuli úmabei lagagibudagua Dawidi?

¹² Gagibuguati giñe Dawidi luma amu turobuli le gayaraabei hamuga ladügün lun lasaminarun mouni lan o lábuguarügüñein lan. Aban meha lubúein Saulu le úaraguati Dawidi, ani Saulu meha urúei le lanúadirubei Heowá Ísüraeli. Furumiñe, inebeti meha lun Saulu. Gama lumoun lau lásügürün dan aba ladügün pantaü lun lagimugaruni Saulu Dawidi. Ábati lagumeserun óuserei wuriba darí lun lálugun láfaruni hilagubei (1 Sam. 18:6-9, 29; 19:9-11).

13. Ida liña lóunabun Dawidi lun luriban lóuseruni Saulu?

¹³ Íbini óusera lani Saulu Dawidi wuriba, inebememeti lun Dawidi, lugundun subudi lumuti meha ligía lan urúei le lanúadirubei Heowá (1 Sam. 24:6). Michu lumuti giñe duru luagu Bungiu luagu wuribani le ladügübei Saulu. Lubaragiñe lira, afiñeti luagu líderagubei lan Heowá lun gayara lan lawanduni óuchawaguni hénrenguti le úmabei lagagibudagua (Sal. 18:1).

14. Ka sügǘ genegeguati luma le lásügürübei Dawidi úmabei lagagibudagua Pábulu?

¹⁴ Gagibuguati meha apostolu Pábulu luma aban sügǘ libe le lásügürübei Dawidi. Gíbetiña meha láganiñu ani gabafutiña meha sügǘ lau. Geyegu liña meha hau alidihatiña gabafutiña ha únbaña iyereegu lan ani saragu wéiyaasu óunahatiña agayuaha luagun ani daü haméi. Ítara kei Dawidi, súfuriti meha giñe Pábulu louserúniwa wuriba hámagiñe ha yebe lúnbaña lumadagu hamá. Darí lun añahein lan meha lílana damuriguaü kristiánu garabaguatiña  luagun (2 Ko. 12:11; Fili. 3:18). Gama lumoun, mígiraguagüdünti lungua lun hadügün láganiñu lun lábürühan larüna. Sigiti apurichiha íbini léibaahouniwa. Úaraguati houn líbirigu íbini adüga hamá lun lagañidun. Ani lóugiñe sun katei, úaraguati lun Bungiu darí lounwen (2 Tim. 4:8). Íbini magundan hamá meha saragu gürigia lau, mábürühanti larüna ladüga mama lan meha luagu lubafu guánarügü lafiñera, luagu meha Heowá lafiñera.

15. Ka wabusenrubei wadügün ani ida luba wibihini?

¹⁵ Mosu san wawanduni hanabuniwa o héibaahaniwa wánigu paaná tidan leskuela, lidan wadagimanu o waduheñu ha mama Gefentiña? Óusera láadiwa san somu lílana damuriguaü wuriba? Anhein ítara liña lubéi, haritagua waméi lani Dawidi luma Pábulu hénpulu. Sigí wamá agañeirei “wuribani lau buiti” (Rom. 12:21). Inarüni, le wabusenrubei mama lun wachüürün dübü lereberugun aban gürigia kei ladüga Dawidi, lubaragiñe lira, busentiwa lun wayusurunu Lererun Bungiu lun wachülürün tidoun hanigi gürigia ha arufudubaña aban lubuidun igaburi. Ida luba wibihini? Lau wayusurunu Bíbülia lun wóunabuni hálügüdahan gürigia, lau warufudun areiduni luma inebehabúni houn ha óuserubaliwa wuriba luma lau wadügüni le buídubei houn sun gürigia, íbini houn wáganiñu (Mat. 5:44; 1 Fe. 3:15-17).

16, 17. Ka katei mabulieidun lubéi Pábulu?

¹⁶ Lubaragiñe meha aban lan lani Kristu disipulu apostolu Pábulu —le subudiwabei lidan dan ligía kei Saulu— éibaaha lumutiña meha lani Hesusu disipulugu lau saragu furundei (Adü. 7:58; 1 Tim. 1:13). Gama lumoun, ayanuhati Hesusu guánarügü luma Pábulu siélugiñe, adügati lun lerederun marihinga luma lun lararamun léibaahaniña lílana damuriguaü. Lunya libihini larihin, mosu meha lidin Pábulu hamoun burí gürigia ha léibaahabaña. Arufudati ǘnabuguni ani ánhati lun líderaguni aban disipulu gíriti Ananíasi, le adügübei lunya larihin (Adü. 9:3-9, 17, 18).

¹⁷ Dan lárigiñe, aban liabin Pábulu lun ábanbei lan aban hádangiñe lílana damuriguaü kristiánu le súdiniti, gama lumoun mabulieidun lumuti le larufudahabei Hesusu lun dan le lídinbei Damasüku. Arufudati ǘnabuguni ani ánhati lau  sun lugundan lun híderaguni dandu íbirigu wügüriña kei würiña. Ariha lumuti íderagua hamani ru hagía dǘgüdaguaü lun (Kol. 4:10, 11).

18. Ka uagu gayara lubéi hénrengu lan woun wánharun lun híderaguniwa amu?

¹⁸ Ka larufudahabei lani Pábulu hénpulu woun? Dan le wagumeserunbei aturiahoun Bíbülia, háfuga anha wamá lau sun wagundan lun meha híderaguniwa amu, lugundun subudi wamuti meha ítara waña lan kei irahüñü lidan luáguti wamadagua luma Bungiu ani mosu lan meha wafurendeirun saragu katei (1 Ko. 3:1, 2). Agiati guentó? Anhein barühadiwa lubéi saragu irumu eseriwida lun Heowá ani subuditi luáguti saragu katei woun, másiñati mígirunbadiwa lan lun híderaguniwa amu, dántima le gürigia lan ha málügiña lidan inarüni álugubaña híderaguniwa. Gama lumoun, liibe-agei dan yusu lumutiña Heowá íbirigu wügüriña hama würiña lun líchugun dǘgüdaguaü woun (Rom. 1:11, 12). Mosu gabaroun wamani katei le anhein busén wabéi lun líderaguniwa Heowá lau lubafu.

19. Ka uagu ibiha lubéi Pábulu fiu katei buíduburiti?

¹⁹ Lárigiñebei ladügagun Pábulu lungua kristiánume, ibihati fiu katei buíduburiti. Ka uagu? Lugundun aban gunfuranda lani mama lan ubafu le luágubei gürigia, furendei le ibiha láalibei, lirisin o lubara hagibugiñe amu adügübei lun buidu lan lidin lun somu gürigia, lugundun le adügübei lun buídubei lan lidin lun aban gürigia ǘnabuguni le larufudubei luma lau lafiñerun luagu Heowá. Ligíati ítara wamá kei Pábulu: afiñe wamá luagu Heowá, furendei wamá hámagiñe gürigia ha uágubaña tabahüdaha Bíbülia ani ánhara wamá lun híderaguniwa wábirigu. Ítara, íbini anhein débili lubéi wasandiragun woungua, líchuguba Heowá erei woun.