1. Unsay giadmitir ni apostol Pablo?

SI APOSTOL Pablo miadmitir nga usahay mobati siyag kaluya. Siya miingon nga ang iyang lawas “nagkahugo,” nga kinahanglan siyang maningkamot sa paghimo kon unsay matarong, ug nga usahay ang tubag ni Jehova sa iyang mga pag-ampo lahi kay sa iyang gidahom. (2 Cor. 4:16; 12:7-9; Roma 7:21-23) Miingon sab si Pablo nga ang iyang mga magsusupak nag-isip kaniya nga huyang. * Pero wala niya tugoti ang negatibong panglantaw sa uban o ang iyang mga kahuyangan nga makapabati kaniya nga way pulos.​—2 Cor. 10:10-12, 17, 18.

2. Sumala sa 2 Corinto 12:9, 10, unsang importanteng leksiyon ang nakat-onan ni Pablo?

² Si Pablo nakakat-on ug importanteng leksiyon​—ang usa ka tawo mahimong lig-on bisan pag mobati siyang huyang. (Basaha ang 2 Corinto 12:9, 10.) Giingnan ni Jehova si Pablo nga ang Iyang gahom “mas kusgan . . . dihang huyang” si Pablo. Nagpasabot ni nga hatagan ni Jehova si Pablo sa kusog nga iyang gikinahanglan. Una, atong susihon kon nganong dili ta angayng mabalaka sa dihang insultohon ta sa mga magsusupak.

3. Nganong ikalipay nato ang mga panginsulto?

³ Walay usa kanato ang gustong insultohon. Pero, kon insultohon ta sa atong mga kaaway ug maapektohan kaayo ta sa ilang isulti, mahimong maluya ta. (Prov. 24:10) Busa unsay  angay natong panglantaw sa ilang mga panginsulto? Sama kang Pablo, puwede natong ‘ikalipay ang mga panginsulto.’ (2 Cor. 12:10) Ngano? Tungod kay ang mga panginsulto ug pagsupak maoy mga timailhan nga kita tinuod nga mga tinun-an ni Jesus. (1 Ped. 4:14) Si Jesus miingon nga ang iyang mga sumusunod pagalutoson. (Juan 15:18-20) Nahitabo kana sa unang siglo. Niadtong panahona, kadtong naimpluwensiyahan sa kultura sa Gresya nag-isip sa mga Kristohanon ingong way grado ug ubos. Ug taliwala sa mga Hudiyo, ang mga Kristohanon giisip ingong “ordinaryong mga tawo ug dili edukado,” sama kang apostol Pedro ug Juan. (Buh. 4:13) Ang mga Kristohanon morag huyang tan-awon. Wala silay politikal nga impluwensiya o militaryong gahom, ug ang mga tawo nagsalikway kanila.

4. Unsay reaksiyon sa unang mga Kristohanon sa negatibong panglantaw sa ilang mga magsusupak?

⁴ Gitugotan ba sa unang mga Kristohanon nga mahunong ang ilang buluhaton tungod sa negatibong panglantaw sa ilang mga magsusupak? Wala. Pananglitan, giisip ni Pedro ug Juan nga usa ka kadungganan nga lutoson sila tungod sa pagsunod kang Jesus ug pagtudlo sa uban bahin kaniya. (Buh. 4:18-21; 5:27-29, 40-42) Ang mga tinun-an walay angayng ikaulaw. Sa ngadtongadto, ang maong mapainubsanong mga Kristohanon sa unang siglo mas daghag nahimong kaayohan sa uban kay sa ilang mga magsusupak. Pananglitan, ang mga basahon sa Bibliya nga gisulat sa pipila sa maong mga Kristohanon padayong naghatag ug tabang ug paglaom ngadto sa milyonmilyong tawo. Ug ang Gingharian nga ilang gisangyaw nagmando na karon sa langit ug sa dili madugay magmando sa tanang katawhan. (Mat. 24:14) Ang gamhanang gobyerno nga naglutos sa mga Kristohanon dugay nang nahanaw, samtang ang maong maunongong mga tinun-an naghari na karon sa langit. Pero, ang ilang mga magsusupak nangamatay na; ug kon banhawon man galing sila, mandoan sila sa Gingharian nga gisangyaw sa mga Kristohanon nga ilang gidumtan.​—Pin. 5:10.

5. Sumala sa Juan 15:19, nganong gitamay ang katawhan ni Jehova?

⁵ Karon, ang pipila ka tawo nagtamay sa mga Saksi ni Jehova ug nag-isip kanatong way grado ug ubos. Ngano? Tungod kay ang atong panglantaw lahi nianang sa kalibotan. Naningkamot ta nga mahimong mapainubsanon, lumo, ug masinundanon. Pero ang mga tawo karon ganahan sa mga hambogiro, mapahitas-on, ug rebelyoso. Dugang pa, dili ta mag-apil-apil sa politika ug dili ta magsundalo. Lahi ta sa mga tawo sa kalibotan maong giisip ta nilang ubos.​—Basaha ang Juan 15:19; Roma 12:2.

6. Unsay napalampos ni Jehova pinaagi sa iyang katawhan?

⁶ Bisag unsa pay hunahuna sa kalibotan kanato, si Jehova naggamit nato sa paghimog talagsaong mga butang. Sa iyang tabang nagmalamposon ang kinadak-ang buluhatong pagsangyaw sa kasaysayan sa tawo. Ang iyang mga alagad karon nag-imprenta sa kinadaghanag hubad ug naapod-apod nga mga magasin sa tibuok kalibotan, ug gigamit nila ang Bibliya sa pagtabang sa milyonmilyong tawo sa pagpauswag sa ilang kinabuhi. Si Jehova ang angayng pasidunggan niining dakong mga kalamposan. Iyang gigamit ang mga tawo nga giisip sa kalibotan nga huyang sa paghimo niining talagsaong mga butang. Pero komosta ang matag usa kanato? Makatabang ba si Jehova kanato sa paghimog talagsaong mga butang? Kon mao, unsay kinahanglan natong buhaton aron tabangan ta niya? Hisgotan nato karon ang tulo ka butang nga atong makat-onan kang apostol Pablo.

7. Unsay usa ka leksiyon nga atong makat-onan kang Pablo?

⁷ Ang usa ka leksiyon nga atong makat-onan kang Pablo mao kini: Ayawg salig sa kaugalingong kusog o katakos diha sa imong pag-alagad kang Jehova. Sa panglantaw sa tawo, si Pablo may katarongan nga manghambog ug mosalig sa kaugalingon. Nagdako siya sa Tarso, ang kaulohang siyudad sa usa ka probinsiya sa Roma. Ang Tarso usa ka mauswagong siyudad ug may sikat nga unibersidad. Si Pablo edukado. Siya gitudloan sa usa sa labing tinahod nga Hudiyong lider sa iyang panahon, si Gamaliel. (Buh. 5:34; 22:3) Kaniadto, si Pablo tinamod diha sa Hudiyong komunidad. Siya miingon: “Diha sa Judaismo nalabwan nako ang daghang Hudiyo nga akong kaedad.” (Gal. 1:13, 14; Buh. 26:4) Pero si Pablo wala mosalig sa kaugalingon.

8. Sumala sa Filipos 3:8, unsay panglantaw ni Pablo sa mga butang nga iyang gibiyaan, ug nganong ‘nalipay siya sa mga kahuyangon’?

⁸ Si Pablo nalipay nga biyaan ang mga butang nga nakapahimo niyang importante sa kalibotan. Gani ang mga butang nga nabatonan niya kaniadto, nga daw nakahatag niyag bentaha, giisip niya ingong “basura.” (Basaha ang Filipos 3:8.) Si Pablo nakasinatig daghang kalisdanan dihang nahimo siyang sumusunod sa Kristo. Gidumtan siya sa iyang kaugalingong katawhan. (Buh. 23:12-14) Ug siya gibunalan ug gipriso sa iyang mga isigkalungsoranon, ang mga Romano. (Buh. 16:19-24, 37) Dugang pa, nakaamgo si Pablo nga tungod sa pagkadili-hingpit lisod kaayo para niya ang paghimog matarong. (Roma 7:21-25) Imbes maluya tungod sa mga pagsupak o sa iyang mga kasaypanan, siya ‘nalipay sa mga kahuyangon.’ Ngano? Tungod kay sa dihang siya huyang, nakita niya ang tabang sa Diyos.​—2 Cor. 4:7; 12:10.

9. Unsay angay nimong panglantaw sa mga butang nga daw makapahimo nimong huyang?

⁹ Kon gusto natong tabangan ta ni Jehova, dili ta angayng maghunahuna nga ang atong kusog, edukasyon, kultura, o bahandi makapahimo natong bililhon. Kining mga butanga dili maoy makapahimo natong mapuslanon kang Jehova. Gani, dili daghan sa katawhan  sa Diyos ang “maalamon sumala sa sukdanan sa tawo, dili daghan ang gamhanan, dili daghan ang halangdon ug kagikan.” Hinunoa, gipili ni Jehova “ang mga butang sa kalibotan nga giisip nga huyang.” (1 Cor. 1:26, 27) Busa bisag wala nimo mabatoni ang mga butang nga daw makahatag ug bentaha, makaalagad gihapon ka kang Jehova. Hinunoa, isipa ang imong kahimtang sa positibong paagi​—ingong kahigayonan nga makita nimo kon sa unsang paagi tabangan ka ni Jehova. Pananglitan, kon mahadlok ka sa mga magsusupak, pag-ampo kang Jehova nga hatagan kag kaisog sa pagdepensa sa imong pagtuo. (Efe. 6:19, 20) Kon nag-antos ka sa grabeng sakit, hangyoa si Jehova nga hatagan kag kusog aron makapabiling aktibo kutob sa imong maarangan diha sa pag-alagad kaniya. Sa matag higayon nga makita nimo ang tabang ni Jehova, mas modako ang imong pagtuo ug mas molig-on ka.

10. Nganong angay natong tun-an ang ehemplo sa matinumanong mga alagad ni Jehova, sama nianang gihisgotan sa Hebreohanon 11:32-34?

¹⁰ Si Pablo makugihong nagtuon sa Kasulatan. Daghan siyag nakat-onan nga mga kamatuoran, pero nakakat-on sab siya sa ehemplo sa mga tawo nga narekord diha sa Pulong sa Diyos. Dihang nagsulat siya sa Hebreohanong mga Kristohanon, giawhag niya sila nga palandongon ang ehemplo niining matinumanong mga alagad ni Jehova. (Basaha ang Hebreohanon 11:32-34.) Tagda ang usa kanila, si Haring David. Giatubang niya ang pagsupak dili lang gikan sa iyang mga kaaway kondili sa pipila usab nga mga higala niya kaniadto. Samtang tun-an nato ang ehemplo ni David, atong masabtan kon nganong ang pagpamalandong bahin sa kinabuhi ni David posibleng nakapalig-on kang Pablo. Masayran sab nato kon sa unsang paagi masundog nato si Pablo.

11. Nganong si David huyang tan-awon? (Tan-awa ang hulagway sa atubangan sa magasin.)

¹¹ Si David giisip nga huyang sa kusgan kaayong manggugubat nga si Goliat. Dihang nakita ni Goliat si David, iyang “gitamay siya.” Kon buot hunahunaon, si Goliat mas dako, mas armado, ug mas anad sa pagpakiggubat. Sa laing bahin, si David usa lang ka batan-on nga walay kasinatian sa pagpakiggubat ug kulag armas. Si David huyang tan-awon, pero sa tinuoray lang siya kusgan kay misalig siya kang Jehova. Tungod niana, gihatagan siya ni Jehova ug kusog ug napildi niya ang iyang kaaway.​—1 Sam. 17:41-45, 50.

12. Unsay laing problema nga giatubang ni David?

¹² Giatubang ni David ang laing problema nga posibleng makapabati niyang huyang. Si David maunongong nag-alagad sa tinudlo ni Jehova nga hari sa Israel, si Saul. Sa sinugdan, gitahod niya si David. Sa ulahi, tungod sa garbo, si Saul nasina kaniya. Dili na maayo ang pagtratar ni Saul kang David. Gani misulay siya sa pagpatay kang David.​—1 Sam. 18:6-9, 29; 19:9-11.

13. Unsay gihimo ni David sa dili maayong pagtratar kaniya ni Haring Saul?

¹³ Bisan pa sa dili maayong pagtratar ni Haring Saul, si David padayong nagtahod sa hari nga gitudlo ni Jehova. (1 Sam. 24:6) Wala niya basola si Jehova sa daotang mga butang nga gihimo ni Saul. Nangayo hinuon siyag kusog kang Jehova aron malahutay ang maong lisod nga pagsulay.​—Sal. 18:1, superskripsiyon.

14. Unsay giatubang ni Pablo nga susama nianang kang David?

¹⁴ Si apostol Pablo nakaatubang ug situwasyon nga susama nianang kang David. Ang mga kaaway ni Pablo gamhanan kaayo kon itandi  kaniya. Gidumtan siya sa daghang impluwensiyadong lider sa iyang panahon. Sagad, ila siyang bunalan ug prisohon. Sama kang David, si Pablo nakasinatig dili maayong pagtratar sa mga tawong higala unta niya. Ang pipila diha sa kongregasyon misupak pa gani niya. (2 Cor. 12:11; Filip. 3:18) Pero nagmadaogon si Pablo sa tanan nga misupak niya. Sa unsang paagi? Nagpadayon siya sa pagsangyaw bisan pa sa mga pagsupak. Nagmaunongon siya sa mga igsoon bisan dihang napasakitan nila siya. Ug labaw sa tanan, nagmatinumanon siya sa Diyos hangtod sa iyang kamatayon. (2 Tim. 4:8) Nahimo niya kanang tanan, dili tungod sa iyang kaugalingong kusog, kondili tungod kay misalig siya kang Jehova.

15. Unsay atong tumong, ug sa unsang paagi mahimo nato kana?

¹⁵ Nakasinati ka bag mga panginsulto o paglutos gikan sa imong mga klasmet, kauban sa trabaho, o sa dili Saksing mga membro sa pamilya? Duna bay igsoon nga dili maayog pagtratar kanimo? Kon oo, hinumdomi si David ug Pablo. Padayong “daoga ang daotan pinaagi sa maayo.” (Roma 12:21) Dihang supakon ta sa mga tawo, dili ta makig-away nila sama sa gihimo ni David kang Goliat. Hinunoa, tumong nato nga daogon ang daotan pinaagi sa pagtabang nila nga makakat-on bahin kang Jehova ug sa Bibliya. Mahimo nimo kana pinaagi sa paggamit sa Bibliya sa pagtubag sa pangutana sa mga tawo, pinaagi sa pagpakitag pagtahod ug kaayo niadtong dili maayog pagtratar kanimo, ug pinaagi sa pagbuhat ug maayo sa tanan, bisan sa imong mga kaaway.​—Mat. 5:44; 1 Ped. 3:15-17.

16-17. Unsay wala kalimti ni Pablo?

¹⁶ Sa wala pa si Pablo mahimong tinun-an sa Kristo, siya usa ka bagis nga batan-on nga naglutos sa mga sumusunod ni Jesus. Niadtong panahona, siya nailhan ingong Saulo. (Buh. 7:58; 1 Tim. 1:13) Si Jesus mismo ang mipugong kang Pablo sa paglutos sa kongregasyon. Si Jesus nakigsulti kang Pablo gikan sa langit ug gibutaan niya kini. Aron maulian, si Pablo kinahanglang mangayog tabang sa mismong mga tawo nga iyang gilutos. Mapainubsanon niyang gidawat ang tabang sa tinun-ang  si Ananias nga maoy nagpasig-uli sa iyang panan-aw.​—Buh. 9:3-9, 17, 18.

¹⁷ Sa ulahi, si Pablo nahimong iladong membro sa kongregasyon, pero wala gyod siya malimot sa leksiyon nga gitudlo kaniya ni Jesus diha sa dalan paingon sa Damasco. Si Pablo nagpabiling mapainubsanon, ug kinabubut-on niyang gidawat ang tabang sa mga igsoon. Siya miingon nga sila “nakapalig-on” kaniya.​—Col. 4:10, 11, footnote.

18. Nganong usahay, dili ta ganahang modawat ug tabang?

¹⁸ Unsay atong makat-onan kang Pablo? Sa dihang nagsugod ta pagpakig-uban sa katawhan ni Jehova, tingali dali ra tang modawat ug tabang sa uban kay nahibalo ta nga bag-o pa ta sa kamatuoran ug daghan pa tag angayng makat-onan. (1 Cor. 3:1, 2) Pero komosta karon? Kon dugay na tang nag-alagad kang Jehova ug taas nag kasinatian, tingali dili na ta daling modawat ug tabang, ilabina kon ang nagtanyag niana dili nato sama ka dugay sa kamatuoran. Pero sagad gamiton ni Jehova ang mga igsoon sa pagpalig-on kanato. (Rom. 1:11, 12) Kon gusto tang makadawat ug kusog gikan kang Jehova, kinahanglang dawaton nato ang tabang sa mga igsoon.

19. Nganong nakahimo si Pablo ug talagsaong mga butang?

¹⁹ Si Pablo nakahimog talagsaong mga butang human siya mahimong Kristohanon. Ngano? Tungod kay nakat-onan niya nga ang kalamposan wala magdepende sa kaugalingong kusog, edukasyon, bahandi, ug kagikan, kondili sa iyang pagkamapainubsanon ug pagsalig kang Jehova. Hinaot nga sundogon natong tanan si Pablo pinaagi sa (1) pagsalig kang Jehova, (2) pagkat-on gikan sa mga ehemplo sa Bibliya, ug (3) pagdawat sa tabang sa mga igsoon. Pinaagi niana, bisag mobati tang huyang, si Jehova makahimo natong gamhanan!