1. Yika postolo Paulu anyingikine?

HA MASHIMBU amwe, postolo Paulu kapwile ni kulivwa ngwe keshi tachi. Yamba ngwenyi, tachi jenyi “jinatepuluka,” che kwamba, kapwile ni kupinda chinji mba alinge yuma yinalite. Chipwe yilemba yenyi ha mashimbu amwe te keshi kuyikumbulula ngwe chize azangile. (2 Kori. 4:16; 12:7-9; Roma 7:21-23) Paulu yanyingika nawa ngwenyi, chipwe akwa kole jenyi te kakumulelesa. * Chipwe chocho, Paulu kakahongele ha mukunda wa ulelu wenyi ni yize akwo apwile ni kumwamba.—2 Kori. 10:10-12, 17, 18.

2. Kulita ni 2 A-Korindu 12:9, 10, chikuma chika chilemu postolo Paulu alilongesele?

² Paulu kalilongesele chikuma chilemu. Yanyingika ngwenyi, mutu mahasa kupwa ni tachi chipwe muze anahongo. (Tanga 2 A-Korindu 12:9, 10.) Yehova kalwezele Paulu ngwenyi, tachi Jenyi “kakujipwisa jingunu mu ulelu,” che kwamba, tachi ja Yehova te mujikwasa Paulu muze anahongo. Chitangu, mutumona mumu liaka twatambile kulipikala muze akwa-kole matwihia.

3. Mumu liaka mutuhasa kuwahilila muze matwihia?

³ Kukushi mutu yoze wakuzanga hanga amwihie. Alioze, ha mashimbu amwe akwa kole jetu kakutwihia. Nyi mutulipikala  chinji ha yuma yize akutwamba, mutuhasa kuhonga. (Yishi. 24:10) Kuchi mutuhasa kukumba yihungumiona? Mutuhasa kupwa ngwe Paulu, ha kuwahilila “ni yihungumiona.” (2 Kori. 12:10) Mumu liaka? Mumu yihungumiona yakusolola ngwo, tuli tumbaji a Yesu. (1 Petu. 4:14) Yesu katowezele tumbaji twenyi ngwenyi, te maahungumiona. (Yoa. 15:18-20) Yino ye yalingiwile ku sekulu yitangu. Ha mashimbu jacho, A-Ngregu kapwile ni kulelesa akwa-Kristu ni kwamona ngwe yihepuke. Kuli A-Yunda, akwa-Kristu kapwile ngwe atu waze “kalongolokele ha masona.” Chenacho nawa apwile ni kumona apostolo Petulu ni Yoano. (Yili. 4:13) Akwa-Kristu kapwile ni kusoloka ngwe keshi ni ulemu. Mumu te keshi kulinjisa mu yuma ya mafwefwe chipwe kunjila mu uswalale. Atu anji kapwile ni kumona akwa-Kristu ngwe keshi ni ulemu.

4. Yika akwa-Kristu a ku sekulu yitangi apwile ni kulinga muze te akwahungumiona kuli akwa kole jo?

⁴ Shina akwa-Kristu a ku sekulu yitangu, kanakalitwamina kwambujola, mumu lia kwehia ni kwahungumiona? Ka. Chakutalilaho, postolo Petulu ni Yoano kanyingikine ngwo, kwahungumiona mumu lia kukaula Yesu ni kwambujola malongeso jenyi, chili chiwape chinene. (Yili. 4:18-21; 5:27-29, 40-42) Tumbaji a Yesu kakapwile ni kwivwa sonyi mumu lia kwahungumiona. Kwamba pundu, akwa-Kristu kakwashile chinji atu, kuhiana akwa-kole jo. Chakutalilaho, mikanda yize amwe a kuli akwa-Kristu asonekene, yinanungu ni kukwasa atu anji musono ni kwaha kutalatala. Wanangana uze apwile ni kwambujola, haliapwila unayulu mu malilu. Kwasala hakehe uyule hano hashi. (Mateu 24:14) Mianangana waze apwile ni kuhungumiona akwa-Kristu a ku sekulu yitangu, eswe hanakuu. Alioze, akwa-Kristu jacho ashishika, haliapwila kali mu malilu. Atu waze apwile ni kwahungumiona, eswe hanafu. Chipwe ngwe makaahindwisa, nihindu makalilongesa kwononokena Wanangana uze tumbji jacho apwile ni kwambujola.—Uso. 5:10.

5. Kulita ni Yoano 15:19, mumu liaka atu ja Yehova akwalelesa?

⁵ Musono, atu anji kakutulelesa ni kutwihia. Ayo kakunyonga ngwo, atu ja Yehova kajingala, kanyingikine ni yimwe. Mumu liaka? Mumu kutushi kwimbulula yitanga ya atu a hano hashi ha Satana. Yetu twakusa tachi hanga tupwe akwa-kulikehesa, akwa-kushishika ni kwononokena Yehova. Alioze, akwa-hashi kakulemesa chinji atu waze akwete kuzo, akwa-kulikenya ni yihulia. Chikwo nawa, yetu kutushi kulinjisa mu yuma ya mafwefwe, chipwe kuya mu uswalale mu chifuchi chize twatwama. Kutushi kulinga yuma ya hano hashi, kashika akutulelesa kuli atu.—Tanga Yoano 15:19; Roma 12:2.

6. Yuma yika yilemu Yehova analingi kupalikila muli atu jenyi?

⁶ Chipwe ngwe akwa-hashi kakutulelesa, nihindu Yehova kakulinga yuma yinji yilemu kupalikila muli yetu. Kakutuma atu jenyi hanga alinge mulimo wa kwambujola hashi heswe. Tuvumbi ja Yehova kakulumbununa ni kufwambwisa mikanda yinji ni kuyitetela kuli atu hashi heswe. Kakulongesa atu anji Mbimbiliya hanga apwe ni mwono upema. Yuma yeswe yize akulinga, yakufumanyisa Yehova. Iye kakutuma atu waze akusoloka ngwe keshi ulemu kuli akwa-hashi hanga alinge mulimo ulemu. Mba yena? Shina Yehova mahasa kukukwasa hanga upwe ni tachi? Yika watamba kulinga mba Yehova akukwase? Tutalenu yikuma yilemu yitatu yize mutuhasa kulilongesa ha chilweza cha postolo Paulu.

7. Yika twalilongesa ha chilweza cha Paulu?

⁷ Chikuma chitangu twalilongesa ha chilweza cha Paulu chili chino: Muze tunalingila Yehova, kutwatambile kujikijila ha tachi jetu hanji ha utotombo wetu. Paulu kapwile ni yitela yinji ya kulizata hanji kulinangamisa. Iye kanakakolela mu Tarsu, mbonge yinene ya Roma. Tarsu yapwile mbonge yinene yalufuma, nawa mwapwile mashikola anene-anene. Paulu katambwile fumbo lipema, kamufumbile kuli umwe kasongo mulemu chinji wa A-Yunda te avuluka ngwo, Ngamaliele. (Yili. 5:34; 22:3) Ha mashimbu amwe, Paulu kapwile ni ulemu unji kuli A-Yunda. Iye yamba ngwenyi: “Mu Uyunda nasenyene kulutwe kuhiana anji a kuli masepa jami mu vungu lietu.” (Ngala. 1:13, 14; Yili. 26:4) Chipwe chocho, Paulu kakapwile ni kulijikijila mwene.

8. Kulita ni A-Fwilipu 3:8, kuchi Paulu apwile ni kumona yuma ya hashi? Nawa mumu liaka ambile ngwo “kakuwahilila ni ulelu” wenyi?

⁸ Paulu kehukile yuma yeswe yize yapwile ni kumupwisa mulemu ku meso ja akwa-hashi. Kwamba umwenemwene, yuma yize akwa-hashi apwile ni kumona ngwe yilemu, Paulu kapwile ni kuyimona ngwe yiswaswa. (Tanga A-Fwilipu 3:8.) Paulu kapalikile mu yihungumiona yinji ha kukaula Kristu. Akwa-vungu lienyi yaputuka kumuvwila kole. (Yili. 23:12-14) Kamulambile chinji ni kumusa mu zuwo lia ususu kuli akwa-vungu lienyi, A-Roma. (Yili. 16:19-24, 37) Chikwo nawa, Paulu kapwile ni kupinda mumu lia ulelu wenyi. (Roma 7:21-25) Iye kakechele hanga ulelu wenyi ni akwa-kole jenyi amukumbe. Shimbu alinge chino, iye “yawahilila ni ulelu.” Mumu liaka? Mumu muze apwile ni kulivwa ngwe keshi tachi, Zambi kapwile ni kumukwasa.—2 Kori. 4:7; 12:10

9. Kuchi twatamba kumona ulelu wetu?

⁹ Nyi tunazange hanga Yehova atwehe tachi, kutwatambile kujikijila ha tachi jetu, ha kalasa, ha upite hanji ha lufuma wetu. Yehova keshi kutulemesa ha mukunda wa yuma yino. Kwamba umwenemwene, kulita ni mana ja atu, hakachi ka atu ja Zambi kuheshi “akwa mana, akwa tachi chipwe yilolo. Alioze,  Yehova “hanatongola yuma ya uhepuke ya hano hashi.” (1 Kori. 1:26, 27) Chipwe ngwe kuushi ni ulemu ku meso ja atu, nihindu muhasa kuwayila Yehova. Kanda upala yize atu a hano hashi akwamba, alioze, ulelu we uli jila ya kwichilamo ukwaso kuli Yehova. Chakutalilaho, nyi wakwivwa woma wa atu waze akulimika ni ufulielo we, lemba kuli Yehova hanga akwehe hamu uhase kukalila ufulielo we. (Efwe. 6:19, 20) Nyi unapinda ni umwe musongo uze kuushi kuya, eta kuli Yehova hanga akwehe tachi ulihane chinji mu mulimo wenyi. Kumona chize Yehova anakumbulula yilemba ye, muchikukwasa kukolesa ufulielo we.

10. Mumu liaka chili chilemu kulilongesa chilweza cha tuvumbi ashishika a ku shakulu ngwe chize anatongola ha A-Hepreu 11:32-34?

¹⁰ Paulu kapwile ni kulilongesa chinji Yisoneko. Kashika alilongesele yuma yinji ni yilweza ya atu ashishika waze ali ni sango jo mu Mbimbiliya. Muze asonekenene akwa-Kristu A-Hepreu, Paulu yeta hanga anyonge ha yilweza yize ahichikile tuvumbi ja Yehova ashishika a ku mashimbu akunyima. (Tanga A-Hepreu 11:32-34.) Tutalenu chilweza cha umwe wa kuli tuvumbi jacho ashishika, Mwanangana Ndawichi. Kapwile ni kumuhungumiona chinji kuli akwa-kole jenyi. Chilweza cha Ndawichi, kota chatakamishine Paulu, nyi twapukuna ha chilweza chacho, ni yetu mutuhasa kutakama.

11. Mumu liaka Ndawichi asolokele ngwe mulelu ku meso ja Ngoliate? (Tala chizulie ha chifukilo.)

¹¹ Ndawichi kapwile ni kumumona kuli Ngoliate ngwe keshi tachi. Muze Ngoliate amwene Ndawichi, yaputuka “kumulelesa.” Mumu Ngoliate kapwile munene chinji kuhiana Ndawichi. Kapwile ni yikumba ya jita, nawa te hanakumbu jita yinji. Ndawichi kapwile mukweze, nawa te kanda asa kama jita ku mwono wenyi. Alioze, Ndawichi yoze alelesele yapwa ni tachi, yajikijila ha ndundo ja Yehova. Hachino, yakumba mukwa-kole wenyi.—1 Samue. 17:41-45, 50.

12. Kapinda mukwo muka Ndawichi apalikile?

¹² Ndawichi kapalikile mu kapinda mukwo yoze te mahasa kumuvwisa ngwe keshi ulemu. Kapwile ni kulingila Saulu, Mwanangana wa mu Izalele, yoze Yehova atongwele. Alioze, ha kupalika cha mashimbu, Saulu yaputuka kuvwila Ndawichi chipululu, yaputuka kumuhungumiona, nawa yafupa kumushiha.—1 Samue. 18:6-9, 29; 19:9-11.

13. Yika Ndawichi alingile muze amuhungumionene kuli Mwanangana Saulu?

¹³ Chipwe ngwe Saulu kapwile ni kuhungumiona chinji Ndawichi, nihindu Ndawichi yanunga ni kumusolwela vumbi ni zango, mumu kanyingikine ngwenyi, Saulu kamutongwele kuli Yehova hanga apwe Mwananagana. (1 Samue. 24:6) Ndawichi kakalamikijile Yehova ha yuma yipi yize amulingile kuli Saulu. Shimbu alinge chino, yafuliela muli Yehova ngwenyi, mamukwasa hanga anyongonone mu kapinda wacho.—Samu 18:1, maliji a ha mutwe.

14. Kapinda muka Paulu apalikile unalifu ni wa Nawichi?

¹⁴ Postolo Paulu neye, kapalikile mu kapinda ngwe wa Ndawichi. Akwa-kole ja Paulu kapwile ni ndundo jinji kuhiana iye. Tusongo anji ha mashimbu jacho, kapwile ni kuvwila kole Paulu. Katumine kulamba Paulu ha yisuho yinji ni kumusa mu zuwo lia ususu. Chizechene ngwe Ndawichi, Paulu neye kamuhungumionene chinji kuli atu waze te anamunyingika. Chipwe amwe a mu chikungulwila kapwile ni kulimika nenyi. (2 Kori. 12:11; Fwili. 3:18) Alioze, Paulu yahasa kukumba atu eswe waze apwile ni kulimika  nenyi. Kuchi achilingile? Iye yanunga ni kwambujola, chipwe ngwe te kanamuhungumiona. Yanunga ni kushishika kuli mandumbu, chipwe ngwe kamulingile yuma yipi. Kuhiana yeswe ayi, iye yanunga ni kushishika kuli Zambi ndo ha kufwa chenyi. (2 Timo. 4:8) Paulu kahashile kukumba yipikalo yenyi, hi ku tachi jenyi ko, alioze, mumu lia kufuliela ha ndundo ja Yehova.

15. Mulimo uka tuli nawo, kuchi mutuhasa kuulinga?

¹⁵ Shina ni yena kakukuhungumiona kuli akwenu ku shikola, ku mulimo hanji asoko je waze hi Yela ja Yehova ko? Shina hanakuhungumiona kuli umwe ndumbu wa mu chikungulwila? Nyi hiunapalika mu kapinda wa mutapu au, ewuluka chilweza cha Ndawichi ni Paulu. Muhasa kukumba “yipi ha kulinga yipema.” (Roma 12:21) Mulimo wetu, hi kukonga ko liwe kuli atu, ngwe chize Ndawichi alingile kuli Ngoliate. Alioze, kukwasa atu hanga anyingike Liji lia Zambi. Muhasa kuchilinga ha kukaula yiyulo yino: Kujikijila ha Liji lia Zambi muze unakumbulula yihula; kusolola vumbi ni zango kuli atu waze akukuhungumiona ni kulinga yuma yipema kuli atu eswe, chipwe akwa-kole je.—Mateu 5:44; 1 Petu. 3:15-17.

16-17. Yika Paulu kakavulamine?

¹⁶ Muze Paulu te kanda achipwa kambaji wa Kristu, te keshi vumbi, nawa kapwile ni kuhungumiona tumbaji a Yesu. (Yili. 7:58; 1 Timo. 1:13) Ha mashimbu jacho, Paulu, yoze apwile ni kuvuluka ngwo Saulu, kapwile ni kupinjisa chinji akwa-Kristu. Yesu mwene, mwe wakinjile Paulu kuhungumiona akwa-Kristu. Kukatuka mu malilu, Yesu yahanjika nenyi ni kumupwisa kapuputa. Paulu yeta ukwaso kuli atu waze apwile ni kuhungumiona hanga ahase kumona cheka. Paulu yalikehesa, yatayiza ukwaso wa kambaji avuluka ngwo Ananiya. Mwe wamukwashile kumona cheka.—Yili. 9:3-9, 17, 18.

¹⁷ Ha kupalika cha mashimbu, Paulu yapwa mukwa-Kristu yoze anyingika chinji. Alioze, kakavulamine yize alilongesele kuli Yesu mu tapalo ya kuya ku Ndamaseku. Paulu yanunga ni kulikehesa, ni kutayiza ukwaso wa mandumbu  jenyi akwa-Kristu. Yanyingika ngwenyi, ayo kali ‘akwa-kumutakamisa.’—Kolo. 4:10, 11.

18. Mumu liaka muchihasa kupwa chikalu kutayiza ukwaso wa akwetu?

¹⁸ Yika mutuhasa kulilongesa ha chilweza cha Paulu? Muze twaputukile kulilongesa umwenemwene, kota chapwile chashi kutayiza ukwaso wa akwetu. Twapwile ngwe twanuke ku ufulielo. Te twatamba kunyingika yuma yinji. (1 Kori. 3:1, 2) Mba musono? Chipwe ngwe twakulingila Yehova ha miaka yinji, nawa tunanyingika yuma yinji, shina twakutayiza ukwaso wa akwetu? Chino muchihasa kupwa chikalu chinji, chipi-chipi nyi mutu yoze unatwehe ukwaso wacho kali mwaha mu umwenemwene. Alioze, kanji-kanji Yehova kakututakamisa kupalikila muli mandumbu jetu. (Roma 1:11, 12) Nyi tunazange hanga Yehova atwehe tachi, twatamba kwiwuluka yuma yino twalilongesa.

19. Mumu liaka Paulu ahashile kulinga yuma yilemu?

¹⁹ Muze Paulu te hapwa mukwa-Kristu, mba yahasa kulinga yimwe yuma yilemu chinji. Mumu liaka? Mumu iye kalilongesele ngwenyi, mutu kechi kuhasa kukumba mumu lia tachi, kalasa wenyi, mbongo hanji lufuma. Mutu kakukumba muze malikehesa ni kujikijila muli Yehova. Kashika, sako tachi hanga wimbulule chilweza cha Paulu (1) ha kujikijila muli Yehova, (2) ha kulilongesa ha yilweza ya mu Mbimbiliya, ni (3) ha kutayiza ukwaso wa akwenu. Nyi walinga chino, chipwe mulivwa ngwe unalele, nihindu Yehova makwaha tachi, ni kukutakamisa!