1. ¿Chuqui tsaʼ cʼoti i yʌl Pablo tiʼ tojlel?

JIÑI apóstol Pablo tsiʼ yʌlʌ chaʼan añʌch qʼuiñil cʼun tsiʼ yubi i bʌ. Tsiʼ yʌlʌ chaʼan ‹woli ti chʌmel i bʌcʼtal› o i ñoxʼan, chaʼan woli (choncol) i chaʼlen wersa i mel chuqui wen yicʼot chaʼan an i tajol Jehová maʼañic miʼ jacʼben i yoración cheʼ bajcheʼ yom (2 Co. 4:16; 12:7-9; Ro. 7:21-23). Tsiʼ yʌlʌ chaʼan jiñi i contrajob miʼ qʼuelob chaʼan cʼuñatax * bʌ wiñic. Pero maʼañic tsiʼ yʌcʼʌ chaʼan jiñi mach bʌ weñic miʼ yʌjlel tiʼ tojlel yicʼot i bajñel cʼunlel miʼ yʌqʼuen i yubin chaʼan maʼañic i cʼʌjñibal (2 Co. 10:10-12, 17, 18).

2. Cheʼ bajcheʼ miʼ yʌl 2 Corintios 12:9, 10, ¿chuqui ñuc bʌ tsiʼ cʌñʌ Pablo?

² Pablo an chuqui ñuc bʌ tsiʼ cʌñʌ: Chaʼan juntiquil quixtañu pʼʌtʌl miʼ mejlel ti ajñel anquese cʼuñatax miʼ yubin i bʌ (pejcan 2 Corintios 12:9, 10). Cheʼ bʌ Jehová tiʼ sube Pablo chaʼan ‹miʼ tsʼʌctiyel i pʼʌtʌlel tiʼ cʼunlel wiñic›, woli (yʌquel) i suben chaʼan mi caj i yʌqʼuen jiñi pʼʌtʌlel anto bʌ yom i chaʼan. Laʼ lac ñaxan qʼuel chucoch mach yom mi laj cʌlʌx cʼojoʼtan cheʼ bʌ jiñi laj contrajob miʼ subeñonla mach tac bʌ weñic.

3. ¿Chucoch miʼ mejlel lac taj lac tijicñʌyel cheʼ bʌ mi lac subentel mach bʌ weñic?

³ Maʼañic mi lac mulan cheʼ bʌ mi lac subentel mach bʌ weñic. Pero miʼ mejlel lac taj lac chʼijiyemlel cheʼ bʌ mi laj cʌlʌx  cʼojoʼtan cheʼ jiñi laj contrajob miʼ subeñoñobla mach bʌ weñic (Pr. 24:10). Cheʼ jiñi, ¿chuqui yom mi lac mel cheʼ bʌ mi contrajiñoñobla? Cheʼ bajcheʼ tsiʼ mele Pablo, laʼ la cubin lac tijicñʌyel cheʼ bʌ mi lac «tsʼaʼlentel» o mi lac subentel mach bʌ weñic (2 Co. 12:10). ¿Chucoch? Come miʼ pʌs chaʼan i sujm bʌ xcʌntʼañonla i chaʼan Cristo cheʼ bʌ mi lac subentel mach bʌ weñic o mi laj contrajintel (1 P. 4:14). Jesús tsiʼ yʌlʌ chaʼan jiñi i wiñicob mi caj i ticʼlʌntelob (Jn. 15:18-20). I jiñʌch tsaʼ bʌ ujti ti ñaxam bʌ siglo. Jumpʼejl ejemplo, jiñi tsaʼ bʌ i toybeyob i pensar jiñi griegojob, tsiʼ qʼueleyob jiñi xñoptʼañob bajcheʼ maʼañobic bʌ i ñaʼtʌbal o maʼañobic bʌ i cʼʌjñibal. I jiñi judíojob tsiʼ qʼueleyob chaʼan lajalob bajcheʼ wiñicob ‹mach bʌ cʌntesʌbilobic ti jun, maʼañobic bʌ i yeʼtel›, cheʼ bajcheʼ tsiʼ ñaʼtayob tiʼ tojlel Pedro yicʼot Juan (Hch. 4:13). Cabʌl tsiʼ ñaʼtayob chaʼan jiñi xñoptʼañob cʼuñob come maʼañic miʼ yotsañob i bʌ ti política yicʼot maʼañic miʼ yochelob bajcheʼ soldado, i jiñi wiñicob xʼixicob (quixtañujob) miʼ tsʼaʼleñob.

4. ¿Chuqui tsiʼ meleyob jiñi ñaxam bʌ xñoptʼañob cheʼ bʌ jiñi i contrajob tsiʼ yʌlʌyob mach tac bʌ weñic tiʼ tojlelob?

⁴ Jiñi ñaxam bʌ xñoptʼañob maʼañic tsiʼ yʌcʼʌyob chaʼan miʼ mʌctañob jiñi mach tac bʌ weñic miʼ yʌlob jiñi i contrajob. Jumpʼejl ejemplo, jiñi apóstol Pedro yicʼot Juan utsʼat tsiʼ qʼueleyob cheʼ bʌ tsaʼ ticʼlʌntiyob come xcʌntʼañob i chaʼan Jesús i tsiʼ yʌqʼueyob i cʌn yambʌlob jiñi i cʌntesa tac (Hch. 4:18-21; 5:27-29, 40-42). Jiñi xñoptʼañob maʼañic chucoch yom miʼ yubiñob quisin. Anquese maʼañic tsaʼ chʼʌjmiyob ti ñuc jiñi xñoptʼañob tsaʼʌch i wen coltayob jiñi quixtañujob. Jumpʼejl ejemplo, jiñi libro tac tsaʼ bʌ i tsʼijbuyob tiʼ coltaya Dios woliʼ chʌn coltan yicʼot i yʌqʼuen i pijtaya yonlel quixtañujob. I jiñi Yumʌntel Dios tsaʼ bʌ i yʌcʼʌyob ti cʌjñel, wolix i mel i yeʼtel (troñel) ili ora yaʼ ti panchan i mach jalix yom chaʼan miʼ mel i yeʼtel tiʼ pejtelel pañimil (Mt. 24:14). Pero jiñi pʼʌtʌl bʌ yumʌntel i chaʼan Roma tsaʼ bʌ i ticʼla jiñi xñoptʼañob añix cabʌl jab tsaʼ jisʌnti. Cheʼ jaʼel, jiñi xucʼul bʌ xñoptʼañob añobix bajcheʼ rey ili ora yaʼ ti panchan. Pero jiñi i contrajob chʌmeñobix i miʼ tsaʼqui chaʼ chʼojyiyob, jiñʌch i yumʌntel Dios tsaʼ bʌ i subuyob ñumel jiñi xcʌntʼañob tsaʼ bʌ i tsʼaʼleyob muʼ bʌ caj i mel i yeʼtel tiʼ tojlelob (Ap. 5:10).

5. Cheʼ bajcheʼ miʼ yʌl Juan 15:19, ¿chucoch maʼañic miʼ qʼueloñobla ti ñuc jiñi quixtañujob?

⁵ Ili ora, an quixtañujob jaʼel maʼañic bʌ miʼ qʼueloñobla ti ñuc, miʼ wajleñoñobla yicʼot miʼ qʼueloñobla chaʼan maʼañic lac ñaʼtʌbal o maʼañic laj cʼʌjñibal. ¿Chucoch? Come maʼañic mi lac mel muʼ bʌ i mel jiñi quixtañujob. Ili pañimil (mulawil) wen miʼ qʼuel jiñi muʼ bʌ i chañʼesañob i bʌ yicʼot maʼañic bʌ miʼ jacʼob tʼan. Pero joñonla mi lac chaʼlen wersa chaʼan mi lac pʌs lac pecʼlel, la cutslel yicʼot chaʼan mi lac jaqʼueʼ tʼan. Cheʼ jaʼel, maʼañic mi la cotsan lac bʌ ti política yicʼot maʼañic mi la cochel bajcheʼ soldado. Come mach la com lac mel muʼ bʌ i mel ili pañimil, jin chaʼan maʼañic laj cʼʌjñibal mi laj qʼuejlel (pejcan Juan 15:19; Ro. 12:2).

6. ¿Chuqui wen utsʼatax bʌ woliʼ mel Jehová cheʼ miʼ cʼʌñonla?

⁶ Jehová woliʼ cʼʌñonla chaʼan miʼ mel wen utsʼatax bʌ, anquese jiñi quixtañujob miʼ yʌlob chaʼan maʼañic laj cʼʌjñibal. Jumpʼejl ejemplo, woliʼ sujbel jiñi wen tʼan tiʼ pejtelel pañimil. Jiñi i wiñiconbʌla mi lac puc jiñi revista tac ti cabʌl tʼan yicʼot am bʌ cʼotem tiʼ pejtelel pañimil, i mi laj cʼʌn jiñi Biblia chaʼan mi laj coltan yonlel quixtañujob chaʼan wen miʼ chumtʌlob. I woliʼ yujtel pejtelel jiñi, wocolix i yʌlʌ Jehová come woliʼ cʼʌn junmojt quixtañujob cʼuñatax bʌ miʼ poj qʼuejlelob. Ixcu ti lac tojlel, ¿mejl ba i coltañonla Jehová chaʼan pʼʌtʌl mi lac sujtel? I ¿chuqui yom mi lac mel chaʼan  miʼ mejlel i coltañonla? Laʼ laj qʼuel uxchajp chuqui miʼ mejlel laj cʌn tiʼ tojlel jiñi apóstol Pablo.

7. ¿Chuqui ñaxam bʌ mi laj cʌn tiʼ tojlel Pablo?

⁷ Jiñi ñaxam bʌ muʼ bʌ laj cʌn tiʼ tojlel Pablo jiñʌch chaʼan, cheʼ bʌ mi lac melben i yeʼtel Jehová, mach yomic mi lac ñop lac bajñel cʼʌn lac pʼʌtʌlel o chuqui la cujil melol. Cabʌl quixtañujob tsiʼ qʼueleyob ti ñuc jiñi Pablo tiʼ caj chuqui tac yujil melol yicʼot chuqui tsiʼ mele, cheʼ yomiqui tsaʼ mejli i chañʼesan i bʌ yicʼot i bajñel chʼʌm i bʌ ti ñuc. Tsaʼ coli ti Tarso, i capital jumpʼejl tejclum i chaʼan Roma, jumpʼejl wem bʌ lum yicʼot an i chaʼan jumpʼejl universidad wen cʌmbil bʌ. Pablo tsaʼʌch i wen chaʼle qʼueljun come jiñi tsaʼ bʌ i pʌsbe jiñʌch Gamaliel, juntiquil judío wen ñuc bʌ i yeʼtel yicʼot muʼ bʌ i wen qʼuejlel ti ñuc (Hch. 5:34; 22:3). I Pablo tsaʼ cʼoti i taj wen ñuc bʌ i yeʼtel tiʼ tojlel jiñi judíojob. Tsiʼ yʌlʌ: «Tiʼ pejtelel i costumbre israelob ñumen bʌxon bajcheʼ c piʼʌlob» (Gá. 1:13, 14; Hch. 26:4). Pero pejtelel jiñi maʼañic tsiʼ yʌcʼʌ chaʼan miʼ bajñel chʼʌm i bʌ ti ñuc.

8. a) Cheʼ bajcheʼ miʼ yʌl Filipenses 3:8, ¿bajcheʼ tsaʼ cʼoti i qʼuel Pablo pejtelel jiñi tsaʼ bʌ i cʌyʌ? b) ¿Chucoch tsiʼ yʌlʌ Pablo chaʼan tijicña cheʼ an i cʼunlel?

⁸ Pablo tsiʼ cʌyʌ tiʼ pejtelel muʼ bʌ i yʌcʼ ti qʼuejlel ti ñuc tiʼ tojlel yambʌlob. Tsiʼ yʌlʌ chaʼan pejtelel jiñi lajalʌch «bajcheʼ misujelʌl» (pejcan Filipenses 3:8). Pero tsaʼʌch i taja wocol cheʼ tsaʼ sujti ti xcʌntʼan i chaʼan Cristo. Jiñi i tejclum tsaʼ cʼoti i tsʼaʼlen (Hch. 23:12-14). I jiñi romanojob, i piʼʌloʼ bʌ ti chumtʌl, tsiʼ jatsʼʌyob yicʼot tsiʼ yotsayob ti cárcel (Hch. 16:19-24, 37). Cheʼ jaʼel, tsaʼ cʼoti i qʼuel chaʼan wocolʌch chaʼan miʼ mel chuqui wem bʌ come xmulilʌch (Ro. 7:21-25). Pero maʼañic tsiʼ yʌcʼʌ chaʼan jiñi i contrajob yicʼot jiñi i cʼunlel miʼ mʌctan. Tsiʼ yʌlʌ: «Tijicñayon cheʼ an j cʼunlel». ¿Chucoch? Come cheʼ baʼ ora cʼun miʼ yubin i bʌ miʼ cʼotel i qʼuel bajcheʼ miʼ coltʌntel tiʼ pʼʌtʌlel Dios (2 Co. 4:7; 12:10).

9. ¿Bajcheʼ yom mi la cubin lac bʌ mi maʼañic lac chaʼan cabʌl lac pʼʌtʌlel, maʼañic tsaʼ lac wen chaʼle qʼueljun o yan tac bʌ?

⁹ Mi la com chaʼan Jehová miʼ yʌqʼueñonla  i pʼʌtʌlel, mach yomic mi lac ñaʼtan chaʼan jiñi laj cʼʌjñibal yaʼ jach cʌyʌl ti lac bajñel pʼʌtʌlel, bajcheʼ cʼamel tsaʼ lac chaʼle qʼueljun, jiñi laj cultura o lac chubʌʼan tac. Ili mach jiñic muʼ bʌ i yʌqʼueñonla laj cʼʌjñibal tiʼ wut Jehová. Tiʼ tejclum Dios «maʼanic cabʌl ñucoʼ bʌ am bʌ cabʌl i ñaʼtʌbal [...]. Maʼanic cabʌl pʼʌtʌloʼ bʌ, mi cabʌl yumʌlob». Jehová woliʼ cʼʌn «jini mach bʌ pʼʌtʌlic ti pañimil» (1 Co. 1:26, 27). Jin chaʼan, anquese maʼañic lac chaʼan jiñi tsaʼ bʌ ajli tac tiʼ tejchibal ili párrafo, mejlʌch lac melben i yeʼtel Jehová yicʼot miʼ mejlel laj qʼuel bajcheʼ miʼ coltañonla jiñi i pʼʌtʌlel. Jumpʼejl ejemplo, mi an majqui miʼ subeñonla chaʼan mach i sujmic jiñi ñopol bʌ lac chaʼan yicʼot miʼ yotsan lac bʌqʼuen, laʼ laj cʼajtiben Jehová jiñi lac chʼejlel chaʼan miʼ mejlel lac tsictesan jiñi ñopol bʌ lac chaʼan (Ef. 6:19, 20). Mi woli lac ñusan tsʌts bʌ cʼamʌjel, laʼ laj cʼajtiben Jehová chaʼan miʼ yʌqʼueñonla lac chʼejlel chaʼan mi lac bej melben i yeʼtel. Miʼ pʼʌtʼan lac ñopoñel yicʼot ñumen pʼʌtʌl mi lac sujtel cheʼ bʌ mi laj qʼuel bajcheʼ miʼ coltañonla.

10. ¿Chucoch yom mi lac pejcan tiʼ tojlel jiñi xucʼul bʌ wiñicob bajcheʼ jiñi muʼ bʌ i tajtʌlob ti tʼan ti Hebreos 11:32-34?

¹⁰ Pablo ñʌmʌl i pejcan jiñi Tsʼijbujel tac. Jin chaʼan, tsiʼ taja cabʌl i ñaʼtʌbal, i cheʼ jaʼel cabʌl chuqui tsiʼ cʌñʌ tiʼ tojlel jiñi xucʼul bʌ i wiñicob Jehová. Ti jiñi carta tsaʼ bʌ i tsʼijbube jiñi xñoptʼañob hebreojoʼ bʌ, Pablo tiʼ sube jiñi xñoptʼañob chaʼan yom miʼ qʼuelob chuqui tsaʼ bʌ i meleyob jiñi xucʼul bʌ wiñicob (pejcan Hebreos 11:32-34). Laʼ lac taj ti tʼan juntiquil: Jiñi rey David. Tsiʼ ñusa wocol tiʼ caj i contrajob yicʼot tsaʼ bʌ cʌn ajñiyob bajcheʼ i yamigojob. Laʼ lac ñumen cʌn tiʼ tojlel. Cheʼ bajcheʼ jiñi, mi caj laj qʼuel bajcheʼ cʼamel tsiʼ colta Pablo cheʼ tsiʼ wen ñaʼta tsaʼ bʌ i ñusa David yicʼot bajcheʼ miʼ mejlel lac tsajcʌben i melbal (chaʼlibal) Pablo.

11. ¿Chucoch cʼuñatax tsaʼ qʼuejli David? (Qʼuele jiñi dibujo am bʌ tiʼ tejchibal).

¹¹ Cheʼ bʌ jiñi pʼʌtʌl bʌ soldado Goliat tsiʼ qʼuele David, «maʼanic tsiʼ pʼisi ti wenta» come tsiʼ qʼuele chaʼan mach pʼʌtʌlic. Cheʼ jaʼel, Goliat jiñʌch juntiquil wiñic wen chan bʌ yicʼot ñumen chajpʌbil bʌ chaʼan jiñi guerra. David cʼuñatax yilal come xcolelto i mach chajpʌbilic chaʼan jiñi guerra, pero tiʼ sujm pʼʌtʌlʌch. Yujilʌch chaʼan Jehová mi caj i coltan, i Jehová tsiʼ yʌqʼue i pʼʌtʌlel chaʼan miʼ tsʌnsan Goliat (1 S. 17:41-45, 50).

12. ¿Chuqui yambʌ wocol tsiʼ ñusa David?

¹² David tsiʼ ñusa yambʌ wocol tsaʼ bʌ mejli i yʌqʼuen i yubin i cʼunlel. Jiñʌch juntiquil xucʼul bʌ wiñic i chaʼan Saúl, juntiquil rey tsaʼ bʌ i waʼchoco Jehová yaʼ ti Israel. Ti ñaxan, Saúl tsaʼʌch i qʼuele ti ñuc David. Pero ti wiʼil tsaʼ caji i tsʼaʼlen come chan miʼ qʼuel i bʌ. Mach weñix chuqui tsaʼ caji i mel tiʼ tojlel yicʼot tsiʼ ñopo i tsʌnsan (1 S. 18:6-9, 29; 19:9-11).

13. ¿Chuqui tsiʼ mele David cheʼ bʌ jiñi rey Saúl tsiʼ melbe mach bʌ weñic?

¹³ Saúl tsiʼ melbe mach bʌ weñic David. Pero David tsiʼ chʌn qʼuele ti ñuc come yujil chaʼan jiñʌch Jehová tsaʼ bʌ i waʼchoco bajcheʼ rey (1 S. 24:6). Cheʼ jaʼel, maʼañic tsiʼ yʌlʌ chaʼan i mul Dios cheʼ Saúl tsiʼ mele mach tac bʌ weñic. Yujil chaʼan Jehová mi caj i yʌqʼuen i pʼʌtʌlel chaʼan miʼ cuch jiñi tsʌts bʌ wocol (Sal. 18:1, qʼuele jiñi tʼan tac am bʌ tiʼ tejchibal jiñi Salmo 18).

14. ¿Chuqui ti wocol tsiʼ ñusa jiñi apóstol Pablo lʌcʼʌ lajal bʌ tsiʼ ñusa David?

¹⁴ Jiñi apóstol Pablo tsiʼ ñusa jumpʼejl wocol lʌcʼʌ lajal bʌ bajcheʼ tsiʼ ñusa David. Tsiʼ taja i contrajob wen pʼʌtʌloʼ bʌ. Cabʌl wiñicob añoʼ bʌ ñuc bʌ i yeʼtel tiʼ tsʼaʼleyob, i mach  junyajlic jach tsiʼ yʌcʼʌyob ti jajtsʼel yicʼot tsiʼ yotsayob ti cárcel. Cheʼ bajcheʼ David, Pablo tsiʼ yubi wocol tiʼ tojlel jiñi tsaʼ bʌ cʌn ajñiyob bajcheʼ i yamigojob. Cheʼto jaʼel, an hermanojob tsaʼ bʌ ajñiyob tiʼ contra (2 Co. 12:11; Fil. 3:18). Pero maʼañic tsiʼ yʌcʼʌ chaʼan jiñi i contrajob miʼ mʌlbeñob (jotbeñob). Tsiʼ bej chaʼle subtʼan anquese an i contrajintel. Xucʼul tsaʼ ajñi tiʼ tojlel jiñi hermanojob anquese tsiʼ meleyob tsaʼ bʌ i yʌqʼue i yubin i cʼuxel i pusicʼal. Yicʼot chʌn xucʼul tsaʼ ajñi ti Dios cʼʌlʌl tsaʼ chʌmi (2 Ti. 4:8). Anquese cʌlʌxix tsiʼ ñusa wocol, tsaʼʌch i mʌlʌ come tsiʼ ñopo ti Jehová i mach jiñic tiʼ bajñel pʼʌtʌlel.

15. ¿Chuqui la com lac mel tiʼ tojlel lac piʼʌlob?

¹⁵ ¿Woli ba laj cuch jiñi ticʼlʌntel o mach bʌ weñic miʼ subeñoñobla lac piʼʌlob ti clase, ti eʼtel o jiñi lac familia mach bʌ testigojobic? ¿Am ba juntiquil yaʼ ti congregación tsaʼ bʌ i melbeyonla mach bʌ weñic? Mi cheʼʌchi, laʼ laj cʼajtesan jiñi tsaʼ bʌ i ñusayob David yicʼot Pablo. Laʼ lac chʌn ‹mel chuqui wen chaʼan miʼ mʌjlel lac chaʼan› (Ro. 12:21). Anquese jiñi quixtañujob miʼ contrajiñonla, maʼañic mi lac mel cheʼ bajcheʼ tsiʼ mele David tiʼ tojlel Goliat. Pero mi lac mʌlben jiñi mach bʌ weñic cheʼ mi lac chaʼlen wersa laj coltan jiñi quixtañujob chaʼan miʼ cʌñob Jehová yicʼot chuqui miʼ yʌl jiñi Biblia. Jin chaʼan, mi laj cʼʌn jiñi Biblia chaʼan mi lac jacʼben i cʼajtiya tac jiñi quixtañujob, mi lac pʌsbeñob la cutslel yicʼot mi laj qʼuelob ti ñuc jiñi muʼ bʌ i melbeñonla mach bʌ weñic yicʼot mi lac melbeñob chuqui wem bʌ pejtelel lac piʼʌlob, jinto jaʼel tiʼ tojlel laj contrajob (Mt. 5:44; 1 P. 3:15-17).

16, 17. ¿Chuqui maʼañic tsaʼ wis ñajʌyi i chaʼan Pablo?

¹⁶ Cheʼ bʌ jiñi apóstol Pablo, cʌmbil bʌ ti wajali bajcheʼ Saulo, maxto xcʌntʼañic i chaʼan Cristo tsiʼ wen tsʼaʼle jiñi muʼ bʌ i tsajcañob Jesús (Hch. 7:58; 1 Ti. 1:13). Pero cheʼ yaʼix an Jesús yaʼ ti panchan tsiʼ pejca jiñi Pablo, tsiʼ cʌyʌ ti xpotsʼ i maʼañix tsiʼ yʌcʼʌ chaʼan miʼ chʌn ticʼlan jiñi congregación. Chaʼan miʼ chaʼ cʼotel i wut, Pablo tsiʼ cʼajtibe i coltaya jiñi tsaʼ bʌ i ticʼlayob. Tsiʼ pʌsʌ i pecʼlel i tsiʼ yʌcʼʌ chaʼan juntiquil xcʌntʼan i cʼabaʼ Ananías miʼ coltan chaʼan miʼ chaʼ cʼotel i wut (Hch. 9:3-9, 17, 18).

 ¹⁷ Ti wiʼil, Pablo tsaʼ sujti ti juntiquil wen cʌmbil bʌ yaʼ ti congregación, pero maʼañic tsaʼ wis ñajʌyi i chaʼan jiñi tsaʼ bʌ i sube Jesús cheʼ bʌ tsiʼ pejca cʼʌlʌl ti panchan cheʼ bʌ woliʼ majlel ti Damasco. Tsaʼʌch i chʌn pʌsʌ i pecʼlel i tsiʼ yʌcʼʌ chaʼan jiñi hermanojob yicʼot hermanajob miʼ coltañob. Tsiʼ yʌlʌ chaʼan tsaʼʌch i coltayob yicʼot chaʼan tsiʼ wen ñuqʼuesʌbeyob i pusicʼal (Col. 4:10, 11).

18. ¿Chucoch an qʼuiñil mach la com chaʼan jiñi yambʌlob miʼ coltañonla?

¹⁸ ¿Chuqui miʼ cʌntesañonla jiñi tsaʼ bʌ i ñusa Pablo? Cheʼ bʌ tsaʼ caji lac chʼʌm estudio, tsaʼ lac mulaj cheʼ bʌ jiñi yambʌlob miʼ coltañonla come tsaʼ lac chʼʌmbe i sujm chaʼan cabʌlto chuqui yom bʌ mi laj cʌn tiʼ chaʼan bʌ Dios (1 Co. 3:1, 2). Tajol wʌle, cheʼ añix ora i cajel lac melben i yeʼtel Jehová yicʼot cheʼ cabʌlix chuqui la cujil mach la comix chaʼan an majqui miʼ coltañonla, ñumento mi jiñi yom bʌ i coltañonla jiñʌch juntiquil maxto bʌ jalic tsaʼ ochi tiʼ sujmlel. Pero Jehová miʼ cʼʌn jiñi hermanojob yicʼot hermanajob chaʼan miʼ ñuqʼuesan lac pusicʼal (Ro. 1:11, 12). Ili jiñʌch yom bʌ mi lac ñaʼtan mi la com chaʼan miʼ coltañonla jiñi i pʼʌtʌlel muʼ bʌ i yʌqʼueñonla Jehová.

19. ¿Chucoch Pablo tsaʼ cʼoti i taj chuqui tac wen utsʼatax bʌ?

¹⁹ Wen utsʼatax chuqui tsiʼ taja Pablo cheʼ bʌ tsaʼix sujti ti xñoptʼan. ¿Chucoch? Come tsiʼ cʌñʌ chaʼan mach jiñic ñumen ñuc bʌ i cʼʌjñibal baqui chʼoyol juntiquil quixtañu, mi wen an i pʼʌtʌlel, mi tsiʼ wen chaʼle qʼueljun yicʼot mi wen an i taqʼuin. Mi añʌch i pecʼlel yicʼot miʼ ñop ti Jehová, cabʌl chuqui wem bʌ miʼ mejlel i mel. Jin chaʼan, laʼ lac mel tsaʼ bʌ i mele Pablo: Laʼ lac ñop ti Jehová, laʼ laj cʌn tiʼ tojlel jiñi quixtañujob muʼ bʌ tajtʌlob ti tʼan yaʼ ti Biblia yicʼot laʼ lac jacʼ cheʼ bʌ miʼ coltañonla jiñi hermanojob. Cheʼ jiñi, anquese cʼun mi la cubin lac bʌ, Jehová mi caj i pʼʌtʼesañonla.