1. Nemene la hna qaja hnei Paulo aposetolo?

 ÖNI Paulo aposetolo ka hape, hnei angeice fe hna hane kucakuca. Öhne hi Paulo laka, kola “hnyiqetre la ngönetrei” angeic, matre loi e tro angeic a isine troa kuca la loi. Atre hi angeic laka, tha Iehova kö a sa la itre thithi angeic, thenge la sipu aja i angeic. (2 Kor. 4:16; 12:7-9; Rom. 7:21-23) Ketre, atre hi Paulo laka, itre ka icilekeu a wangacon me aceitunë angeic me ketre atr ka kucakuca. * Ame pe, tha hnei Paulo kö hna drei angatr me mekun ka hape, ka pë eloin angeic.—2 Kor. 10:10-12, 17, 18.

2. Thenge la 2 Korinito 12:9, 10, nemene la ini ka tru hna hamën hnei Paulo?

² Hnei Paulo hna hamën la ketre ini ka tru: ijije hi tro sa catr ngacama easa kucakuca. (E jë la 2 Korinito 12:9, 10.) Öni Iehova koi angeic: “Kola pexeje la meneng ngöne la kucakuca.” Eje hi, tro Iehova a nyixane la trengecatre i Paulo. Tro sa ce wang la kepin matre tha tro kö sa xou ngöne la kola iqaqa hnene la itre ka icilekeu.

3. Kola hapeu la troa ‘madrine ngöne la kola iqaqa’?

³ Tha madrine kö së ngöne la kola qaqa së. Ngo maine tro sa wangatrune la itre hnei angatre hna qaja, tro hë sa kucakuca. (Ite Edomë 24:10) Nemene la aqane tro sa cile kowe la jole cili? Ijije hi tro sa “madrine” tui Paulo, ngacama  kola ‘qaqa’ së. (2 Kor. 12:10) Pine nemen? Ame la kola icilekeu me qaqa së ke, kolo lai a amamane laka, easa xötrethenge Iesu. (1 Pet. 4:14) Öni Iesu kowe la itretre drei nyidrë ka hape, tro fe a hane qanangazo angatr. (Ioane 15:18-20) Celë hi ka traqa kowe la itre pane Keresiano. Ame kowe lo itre hna ajojezin hnene la ini angetre Geres, pëkö inamacane la itre Keresiano nge itre ka kucakuca angatr. Ame pena koi angetre Iudra, itre “ka thatre tusi” la itre Keresiano, tui Peteru me Ioane aposetolo. (Itre hu. 4:13) Ame kowe la itre atr, ka kucakuca me pë trengecatre la itre Keresiano ke, tha sine kö angatr la kuci politik me isi. Ketre, hna wangaconyi angatr hnei mus.

4. Hnene kö la itre pane Keresiano hna kucakuca ngöne la icilekeu? Qejepengöne jë.

⁴ Hapeu, hnene kö la itre pane Keresiano hna kucakuca ngöne la kola icilekeu? Waea. Atre hi Peteru me Ioane aposetolo laka, troa qanangazo angatr ke, angatr a xötrethenge Iesu me tro fë la itre ini nyidrë. Angatr a madrin ngöne la kola icilekeu. (Itre hu. 4:18-21; 5:27-29, 40-42) Tha hnei angatre kö hna hmahma. Nge hetre thangane la huliwa i angatr. Eje hi, ame lo itre tusi hnei angatr hna cinyihan ekö jëne la uati hmitrötr, tre, kolo palahi a xatua së me hamë mejiune së enehila. Ketre, cile hë la Baselaia hnei angatr hna cainöjën, nge easenyi hë matre tro ej a musi e cailo fen. (Mat. 24:14) Ame pena lo musi angetre Roma ka akötrëne la itre Keresiano ke, paatre hë enehila. Ketre, itre Keresiano ka mele nyipici a musi e hnengödrai, nge meci hë lo itre ka icilekeu. Maine troa amelene hmaca lo itre ka icilekeu, tro angatr a mel e celë fen, fene la Baselaia hna cainöjën ekö hnene la itre Keresiano, lo hnei angatr hna akötrën.—Hna ama. 5:10.

5. Thenge la Ioane 15:19, pine nemene matre kola wangacone la itre hlue i Iehova?

⁵ Ame enehila, itre atr a wangacon me hnyimasai së. Ame koi angatr, itre ka kucakuca nge ka tha inamacane kö së. Pine nemen? Pine laka, tha ceitu së kö memine la itre atr ne fen. Easa ajane troa ipië me thiina ka menyik me idrengethenge. Ame ngöne la fene celë, kola wangatrune la itre atr ka pi tru me pi mama me ka icilekeu. Ketre, tha ka kuci politik kö së me hane isi. Pine laka tha ceitu së memine la itre xaa atr ne fen, matre kola wangaconyi së.—E jë la Ioane 15:19; Rom. 12:2.

6. Nemene la hna kuca hnei Iehova jëne la itre hlue i Nyidrë?

⁶ Ngacama kola wangaconyi së hnene la itre atr, ngo Iehova a aijijë së troa eatrëne la huliwa i Nyidrë. Nyidrëti a upi së troa cainöj me ujëne la itre itus nyine tro fë e cailo fen asë. Nge jëne la Tusi Hmitrötr, easa xatuane la itre milio lao atr troa mele madrin me mele ka loi. Eje hi, Iehova hi la nyine tro sa atrun ke, Nyidrëti a upe la itre ka kucakuca troa kuca la itre ewekë ka tru. Ngo tune kaa easë isa ala caas? Ijiji Iehova kö troa thue trengecatre së? Maine eje hi, nemene la nyine tro sa kuca? Tro sa ce wang la köni ini hna hamën hnene la tulu i Paulo aposetolo.

7. Nemene la pane ini hne së hna xom qa ngöne la tulu i Paulo?

⁷ Ame la pane ini ke, ame la easa huliwa koi Iehova, tha tro kö sa mejiune kowe la sipu trengecatre së me kowe la hne së hna atrein. Alanyimu la ka haine la itre hna atreine kuca hnei Paulo. Maine  ju, ijije hi tro angeic a kuca la mekuna i angeic me mejiune kowe la sipu trengecatre i angeic. Hnei Paulo hna tru e Taraso, ketre nöj hna musinën hnei angetre Roma. Ketre traon ka hetre mo, nge hetre uma ne ini ka tru e cili. Ka inamacane Paulo ke, hna ini angeic hnei Gamaliela, ketre tane i angetre Iudra hna metrötrën. (Itre hu. 5:34; 22:3) Ketre, ka hlemu Paulo thene la angetre Iudra. Öni angeic: “Ka mama kö ni hune la itre sine xötrenge qa Iudra ngöne la hmi angetre Iudra.” (Gal. 1:13, 14; Itre hu. 26:4) Ngo tha hnei Paulo kö hna mejiun kowe la sipu inamacane i angeic.

8. Thenge la Filipi 3:8 memine la ithuemacany, nemene la aqane goeëne Paulo la itre ewekë hnei angeic hna nuetrij, nge pine nemene matre angeic a “madrine e kola kucakuca”?

⁸ Hnei Paulo hna nuetrije la itre ewekë ne fen ka adraië angeic. Hnei angeic hna goeëne la itre ewekë cili ceitu me “itre hnasany.” (E jë la Filipi 3:8 me ithuemacany.) Nyimutre la itre jol ka traqa koi Paulo ngöne lo angeic a kapa la hmi Keresiano. Hna methinë angeic ngöne la sipu nöje i angeic. (Itre hu. 23:12-14) Ketre, hna lepi Paulo me akalabusi angeic hnei angetre Roma. (Itre hu. 16:19-24, 37) Eje hi, hnei Paulo hna akötr, matre wangatrehmekune hë angeic la itre ifego i angeic. (Rom. 7:21-25) Ame pe, tha hnei Paulo kö hna xouene la itre ka icilekeu me wangatrune la itre ifego i angeic. Hnei angeice pe hna “madrine e kola kucakuca.” Pine nemen? Pine laka, ame la angeic a kucakuca ke, kolo hi lai a mama la mene i Akötresie.—2 Kor. 4:7; 12:10.

9. Nemene la aqane tro sa goeëne la itre ewekë hna wangatrune ngöne la fene celë?

⁹ Maine easa ajane troa öhne la mene i Iehova, tha tro kö sa mejiun kowe la sipu trengecatre së, maine inamacane së, maine aqane mele së, maine mejiune pena kowe la nöjei ewekë hne së hna hetreny. Itre ewekë lai hna wangatrune ngöne la fene celë. Ngo tha ka nyipiewekë kö itre ej koi Iehova. Eje hi, ame kowe la itre atr ne fen ke, ‘tha itre ka inamacan asë kö’ la  itre hlue i Akötresie, tha “ka catr” kö angatr, nge ‘tha hna hnaho angatr asë kö ngöne la itre lapa ka trenamo.’ Ngo hnei Iehova pe hna ië angatr, ene la “itre ewekë ka kucakuca ne la fen.” (1 Kor. 1:26, 27) Celë hi matre, tha tro kö sa nue la ketre ewekë troa sewe së troa nyihlue i Iehova. Aqane tro hi së lai a öhne la mene i Akötresie. Maine easa xouene la itre atr ka qaja angazone la lapaune së, loi e tro sa sipo trengecatr koi Iehova, matre troa atreine isigöline la lapaune së. (Efe. 6:19, 20) Maine hna tithi së hnei mec, loi e tro sa sipo trengecatr koi Iehova, matre tro palahi sa catre huliwa koi Nyidrë. Ame la easa öhne la aqane xatua së hnei Iehova, kolo hi lai a acatrene la lapaune së me aegöcatrenyi së.

10. Pine nemene matre loi e tro sa xomi ini qa ngöne la tulu ne la itre hlue i Iehova ekö, tune la hna qaja ngöne Heberu 11:32-34?

¹⁰ Hnei Paulo hna catre inine la Tusi Hmitrötr, matre tru catre la itre ini hnei angeic hna xom qa ngön. Nge hnei angeice fe hna xomi ini qa ngöne la tulu ne la itre hlue i Iehova ekö. Hnei Paulo hna ithuecatre kowe la itre Keresiano ne Heberu troa lapa mekun la itre tulu cili. (E jë la Heberu 11:32-34.) Tro sa ce wang la tulu i Dravita joxu. Hnei nyidrëti hna cile catr kowe la itre ithupëjia, me kowe fe la itre xaa sinee i nyidrëti ekö. Tro sa ce wang la aqane aegöcatrenyi Paulo hnene la tulu i Dravita, me aqane tro sa nyitipu angeic.

11. Pine nemene matre ka pë pengöne Dravita koi Goliatha? (Wange ju la pane iatr.)

¹¹ Goliatha la ketre sooc ka tru trengecatr. Hnei Goliatha hna wangaconyi Dravita me hnyimasai angeic. Eje hi laka, ka hoea Goliatha, nge ka atreine isi. Ame pena Dravita, ketre thöth angeic ka thatreine palakö isi, matre pëkö jiane isi angeic. Ngacama ka pë pengöne Dravita koi Goliatha, ngo catre kö angeic. Hnei Dravita hna mejiune kowe la mene i Iehova me ngaan la ithupëjia me angeic.—1 Sam. 17:41-45, 50.

12. Nemene la ketre jol ka tru hna cile kowe hnei Dravita?

¹² Hnei Dravita hna cile kowe la ketre jol ka tru, nge maine ju, tro angeic a kucakuca me xou. Hnei angeic hna huliwa nyipici koi Saulo, lo joxu ne Isaraela hna acile hnei Iehova. Ame lo xötrei, hnei Saulo hna metrötrë Dravita. Ngo ame hë e thupen, hnei angeic hna pi tru me zalu koi Dravita. E cili, hnei angeic hna akötrë Dravita, me thele troa humuthi angeic.—1 Sam. 18:6-9, 29; 19:9-11.

13. Nemene la aqane ujë i Dravita kowe la itre hna kuca hnei Saulo?

¹³ Ngacama hna qanangazo Dravita, ngo hnei angeic palahi hna metrötrëne la joxu hna acile hnei Iehova. (1 Sam. 24:6) Tha hnei Dravita kö hna upezö Iehova göne la nöjei ewekë ka ngazo hna kuca hnei Saulo. Hnei angeice pe hna sipo trengecatre koi Iehova, matre troa atreine xomihnine lai jol.—Sal. 18:1, texte de présentation du Psaume.

14. Nemene la jol ka tru hna cile kowe hnei Paulo, tui Dravita?

¹⁴ Hnei Paulo aposetolo hna cile kowe la ketre jol ka tru, ceitu me Dravita. Ka catre kö la itre ithupëjia me angeic. Hnene la itre hene ne hmi hna metrötrën hnene la itre atr ekö, hna methinë Paulo. Hnei angatr hna iup troa lepi Paulo me akalabusi angeic. Ketre tui Dravita, hnene la itre sinee i Paulo hna  qanangazo angeic. Hnene mina fe la itre xaa atrene la ekalesia hna icilekeu me angeic. (2 Kor. 12:11; Fil. 3:18) Ngo hnei Paulo hna cile catr kowe la itre jole cili. Tune kaa? Hnei Paulo hna catre cainöj ngacama kola icilekeu. Hnei angeic hna mele nyipici kowe la itre trejin, ngacama hnei angatr hna akötrë angeic. Nge ame la ka sisitria catr ke, hnei angeic hna mele nyipici koi Iehova uti hë la pun. (2 Tim. 4:8) Hnei angeic hna cile catr kowe la itre jole cili, tha hnene kö la sipu trengecatre i angeic. Hnei angeice pe hna mejiune koi Iehova.

15. Nemene la hne së hna thel troa kuca, nge tro sa eatrëne tune kaa?

¹⁵ Hapeu, hna hane kö qanangazon me qaqa epun hnene la itre sine ini, maine sine huliwa, maine itre sinee pena ka tha hmi kö? Hapeu, hna hane kö akötrë epun hnene la ketre atrene la ekalesia? Maine eje hi, loi e tro sa mekune la tulu i Dravita me Paulo. Ijije hi tro sa “ngaane la ngazo hnene la loi.” (Rom. 12:21) Eje hi, tha easë kö a hna la wene etë kowe la he ne la ketre atr, tui Dravita. Ngo easë pe a thele troa ketr la hni me mekune la itre atr ka drei së. Celë hi matre loi e tro sa xome la Tusi Hmitrötr matre troa sa la itre hnying. Tro fe sa metrötrën me hni ka menyik kowe la itre ka qanangazo së, me kuca la loi kowe la nöjei atr, tune la ithupëjia me easë.—Mat. 5:44; 1 Pet. 3:15-17.

16-17. Nemene la ini hna lapa mekun hnei Paulo?

¹⁶ Qëmekene troa xötrethenge Iesu, tha hnei Paulo kö hna metrötrëne la itre Keresiano. Hnei angeic hna pane qanangazo angatr. (Itre hu. 7:58; 1 Tim. 1:13) Hnei Iesu hna sewe Paulo, lo hna hën ekö ka hape, Saulo, troa akötrëne la ekalesia. Hnei nyidrëti hna ithanata qa hnengödrai me atimekë Paulo. Paulo a ajane troa goe hmaca, matre hnei angeic hna sipo ixatua kowe la itre hnei angeic hna akötrën ekö. Hnei Paulo hna kapa la ixatua i Anania, matre goe hmaca pi hi angeic.—Itre hu. 9:3-9, 17, 18.

 ¹⁷ Paulo la ketre atr ka hlemu ngöne la ekalesia. Ngo hnei angeic hna lapa mekun la ini hna hamën hnei Iesu ngöne la gojenyi ne tro Damaseko. Hnei angeic hna hni ka ipië me kapa la ixatua ne la itre trejin. Atre hnyawa hi Paulo laka, angatr la ka ‘ithuecatre’ koi angeic.—Kol. 4:10, 11, ftn.

18. Pine nemene matre tha canga kapa kö së la ixatua ne la itre xan?

¹⁸ Nemene la ini hne së hna xom qa ngöne la tulu i Paulo? Ame lo easa xötrei atre la nyipici, hne së hna kapa la ixatua ne la itre xan. Atre hi së laka, “itre nekönatre” së ngöne la götrane u nge hetre nyine tro palakö sa inin. (1 Kor. 3:1, 2) Ngo tune kaa enehila? Maine jë, ekö hë së nyihlue i Iehova nge nyimutre la itre hne së hna atre. Ngo kösë tha canga kapa kö së la ixatua qaathene la ketre trejin ka xötrei atre la nyipici. Ame pe, Iehova ithuecatre koi së jëne la itre trejin. (Rom. 1:11, 12) Maine easa ajane troa kapa la ixatua qaathei Iehova, loi e tro sa kapa la ixatua angatr.

19. Pine nemene matre hnei Paulo hna kuca la itre ewekë ka tru?

¹⁹ Ketre Keresiano hë Paulo, matre tru catre la itre ewekë hnei angeic hna kuca. Pine nemen? Pine laka, trotrohnine hë angeic laka, ame la ka nyipiewekë ke, tha ene kö la troa egöcatr, me inamacan me trenamo, maine tro pena a lolo la aqane mel. Ngo loi e troa hetre hni ne ipië me catre mejiune koi Iehova. Haawe, loi e tro sa nyitipu Paulo, me (1) mejiune koi Iehova, me (2) lapa mekune la tulu ne la itre hlue i Iehova ekö, me (3) kapa la ixatua ne la itre trejin. Eje hi, ngacama easa kucakuca, ngo tro kö Iehova a aegöcatrenyi së.