1. Ka Pòl té ka admèt ?

LAPÒT Pòl pa té pè di kè i té ka santi-y fèb délè. Limenm té ka rann-li kont kè kò a-y té ka désann, kè fò i té goumé pou fè lèbyen é kè a pa toutlè Jéova té ka réponn a priyè a-y kon i té’é vlé (2 Kor. 4:16 ; 12:7-9 ; Wom. 7:21-23). I té sav osi kè lènmi a-y té ka pran-y pou on féba *. Sé vré, yo té ka di mové biten asi-y é i té ka fè érè men i pa lésé sé biten-lasa fè-y kwè kè i sé on manb initil (2 Kor. 10:10-12, 17, 18).

2. Sèlon 2 Korentyen 12:9, 10, Pòl aprann on vérité ki enpòwtan. Kilès ?

² Pòl aprann on vérité ki ni onlo valè toubònman : on moun pé ni bon fòs menmsi i ka santi-y fèb (li 2 Korentyen 12:9, 10). Mi sa Jéova ni lokazyon di-y : « Lè ou fèb, puisans an mwen ka vin pawfè. » Kivédi, Jéova té’é ba Pòl fòs-la i té bizwen la. Adan on prèmyé tan, an-nou réponn a kèsyon-lasa : poukwa lèwvwè lènmi an nou ka jiré-nou, fò pa nou lésé sa aji asi nou ?

3. Nou pé kontan menmsi yo ka jiré-nou. Kijansa ?

³ Pa ni ponmoun ki enmé lè yo ka jiré-y. Men si lènmi an nou ka jiré-nou é kè nou ka ba sa twòp enpòwtans sa pé rivé a dékourajé-nou (Pwov. 24:10). Alò, si janmé yo jiré-nou, ka pou nou fè ? Ni mwayen nou imité Pòl, kivédi, ni mwayen tchè an nou kontan magré yo ka jiré-nou (2 Kor. 12:10). Poukwa nou ka di sa ? An réyalité, lèwvwè yo ka  jiré-nou é kè yo ka pèwsékité-nou sa ka montré kè nou sé disip a Jézi (1 Pyè 4:14). Jézi té ja di kè yo té’é pèwsékité disip a-y (Jan 15:18-20). O 1^é syèk sé sa ki fèt. An tan-lasa, ni sèwten moun ki lésé sé grèk-la détenn asi yo, kifè, yo té ka pran sé krétyen-la pou dé tèbè é pou dé manb initil. É pou sé juif-la, sé krétyen-la, kon labann a lapòt Pyè é lapòt Jan, ‘a pa moun ki té fè onlo lékòl é a pa té dé gwotchak’ (Akt 4:13). Lè ou té ka gadé sé krétyen-la ou té ni lenprésyon kè yo té fèb é kè yo pa té pé défann-yo tousèl a yo ; yo pa té an politik, yo pa té ka fè lawmé é anplisdisa, pa té ni granzafè a moun ki té ka rèspèkté-yo.

4. Yo té ka di onlo bétiz asi sé prèmyé krétyen-la. Kijan yo té ka réyaji ?

⁴ Sé moun-la té vé anpéché sé prèmyé krétyen-la vin disip a Jézi é yo té vé anpéché-yo préché osi. Men ès yo té ka lésé sa dékourajé-yo ? Awa. Pa ègzanp, lapòt Pyè é lapòt Jan té sav byen kè si yo té ka pèwsékité-yo konsa sé pas yo té ka suiv Jézi é pas yo té ka fè lézòt konnèt sa i té ka anségné. Sé pousa, lèwvwè yo té pèwsékité-yo, pou yo, sé té on lonnè (Akt 4:18-21 ; 5:27-29, 40-42). Dayè pou yonn, nou pa’a vwè pou ki rézon sé disip-la té’é wont ! Lè nou byen gadé, sé disip-la té ni onlo imilité é yo fè lontan plis biten pou édé pwochen a yo ki sé moun-la ki té ka pèwsékité-yo la. Pa ègzanp, ni déotwa adan yo kè Bondyé itilizé pou ékri sèwten liv ki an Bib-la, é jousalè, sé liv-lasa ka édé plizyè milyon moun é ka ba-yo on bèl èspwa pou dèmen. Anplisdisa, jòdijou, wayòm-la yo té ka préché la ja anplas an syèl-la é talè, i ké gouvèné toutlatè (Mat. 24:14). Sé krétyen fidèl lasa, wa an syèl-la konnyéla. Pawkont, gouvènman-la ki té ka pèwsékité-yo la, kivédi sé women-la, ja disparèt dépi byen lontan. Tout lènmi a yo anba tè. É siwvwè sé lènmi-lasa résisité on jou, yo ké anba dominasyon a wayòm-la sé krétyen-la té ka préché la. É poutan, a pa ti hay yo té hay sé krétyen-lasa ! (Rév. 5:10).

5. Dapré Jan 15:19, poukwa yo ka méprizé sèwvitè a Jéova ?

⁵ Jòdijou, ni onlo moun ki ka méprizé-nou é ki ka fè jé èvè nou. Pou yo, nou sé dé tèbè é nou sé dé moun ki fèb. Poukwa nou ka di sa ? Pas nou pa’a fè kon toutmoun. Nou ka fè éfò pou nou ni imilité, pou nou ni dousè é pou nou kouté Bondyé. Men adan mond-lasa, sé moun ki ni òwgèy, moun ki ka akwè-yo é moun ki rèbèl kè yo ka pòté anlè. Anplisdisa, nou pa’a fè politik é nou pa’a fè lawmé kèlkèswa koté-la nou ka rété la. Piskè nou pa’a lésé lèspri a mond-lasa détenn asi nou, yo ka pran-nou pou dé ti kakazwa (li Jan 15:19 ; Wom. 12:2).

6. Ki bèl travay Jéova ka édé sèwvitè a-y fè ?

⁶ Menmsi mond-lasa ka konprann kè nou sé dé moun ki fèb, Jéova ka sèvi èvè nou pou i fè dé biten ki èstraòwdinè. Pa ègzanp, i ka sèvi èvè nou pou fè on travay a prédikasyon ki po’o té jen fèt asi Latè. Pa ni jounal ki pi tradui ki séla nou ka tradui la é sé yo yo ka distribiyé plis asi Latè. É grasa Labib, nou ka édé onpakèt moun ni on vi ki pi bèl. Sé Jéova ki dèyè do a tousa, sé li pou nou onoré ! I ka sèvi èvè dé moun ki ka sanm sa yo fèb pou fè dé biten ki èstraòwdinè. Men, é nou pèwsonèlman ? Ès Jéova pé fè-nou vin fò ? Si répons-la sé wi, ka pou nou fè pou i pé sa fè-nou vin fò ? Ègzanp a Pòl pé aprann-nou onlo biten. An-nou vwè 3 adan yo.

7. Ki 1^é lèson ègzanp a Pòl ka aprann-nou ?

⁷ Ègzanp a lapòt Pòl ka aprann-nou on prèmyé lèson : lè nou ka fè on travay pou Jéova, fò pa nou konté anlè pwòp fòs an nou oben anlè pwòp kapasité an nou. Ni onlo moun ki té ka pòté Pòl anlè pas i té ni onpakèt kapasité. É akòz dè sa, i té’é pé akwè-y é konté asi pwòp fòs a-y. I lévé a Taws, kapital a on téritwa women. Sé té on vil ki té rich é té ni on granjan dè linivèwsité koté-lasa. Dayè, Pòl menm sé té on boug ki fè gran lékòl. Poukwa nou ka di sa ? Pas sé Gamalyèl ki fè lékòl ba-y. A épòk-lasa, té ni déotwa chèf juif kè onlo moun té ka rèspèkté é Gamalyèl sé té yonn adan yo (Akt 5:34 ; 22:3). Anplisdisa, avan, pou sé Juif-la, Pòl sé té on grangrèk. Mi sa i di : « An té ka fè plis pwogré adan rèlijyon a sé Juif-la ki onlo moun ki té ni menm laj ki mwen é ki té an menm nasyon ki mwen » (Gal. 1:13, 14 ; Akt 26:4). Men Pòl pa té ka fè fon asi-y menm.

8. Sèlon Filipyen 3:8, Pòl mèt sèwten biten dèyè do a-y. Ki valè i té ka ba sé biten-lasa é poukwa i té ‘kontan ni féblès’ ?

⁸ Pòl té ni onlo biten ki té’é pé fè-y vin « puisan » a épòk a-y men i lésé tout sé biten-lasa dèyè do a-y é i fè sa èvè plézi. I rann-li kont kè tout sé biten-lasa sé té « on pil zòdi » (li Filipyen 3:8). Lè i désidé vin krétyen, a pa tibwen difikilté i jwenn ! Pwòp konpatriyòt a-y té hay-li (Akt 23:12-14). Anplisdisa, Pòl ni lokazyon pran bon kou é yo mété-y lajòl ; é sé Women kon-y menm ki fè-y sa (Akt 16:19-24, 37). Pòl rann-li kont osi kè i sé on moun enpawfè é kè sa vréman rèd dè fè sa ki jis (Wom. 7:21-25). Men menmsi té ni moun ki té kont li é kè limenm a-y té enpawfè, sa pa anpéché-y suiv Jézi. Okontrè, i té ‘kontan ni féblès’. Poukwa sa ? Pas sé lè i té ka santi-y fèb, i té ka vwè jan Bondyé té ka édé-y (2 Kor. 4:7 ; 12:10).

9. Ni dé biten ki pé fè moun pansé kè nou fèb, men, ès sé konsa pou nou vwè sa ?

⁹ Si nou vé Jéova ban-nou puisans a-y,  fò pa nou mèt an tèt an nou kè nou ni valè davwa nou ni onlo fòs, nou fè gran lékòl, nou lévé adan on granjan dè fanmi oben nou ni onlo byen. Pou sé moun-la ki an mond-la, sé biten-lasa ni onlo valè, men a pa paskè nou ni sé biten-lasa Jéova ké sèvi èvè nou. Lè nou ka gadé byen, pawmi sèwvitè a Bondyé, pa ni granzafè a moun ki ni sa mond-la ka kriyé sajès. Pa ni onlo sèwvitè a Bondyé ki ‘ni puisans’ oben ki sòti adan on granjan dè fanmi nonplis. Men li Jéova, sé èvè sé moun-lasa i ka sèvi, menmsi pou mond-lasa sé dé moun ki fèb (1 Kor. 1:26, 27). Alò, menmsi ou pa ni sé biten-la nou vwè an koumansman a paragraf-la, pa mèt an tèt a-w kè ou pé’é pé sèvi Jéova. Okontrè, sonjé kè sé ké on lokazyon pou ou vwè puisans a Jéova aji asi-w. Pa ègzanp, si ni moun ki ka éséyé fè-w konprann kè kwayans a-w pa bon é kè ou on ti jan pè yo, mandé Jéova kouraj pou défann kwayans a-w (Éféz. 6:19, 20). Si ou ka goumé èvè on maladi ki grav, mandé-y fòs pou ou pé sa fè tousa ou pé pou mèt sèwvis a-y prèmyé douvan an vi a-w. Chakfwa ou ké vwè men a Jéova an vi a-w, fwa a-w ké vin pi solid é voumenm a-w ké vin pi fò.

10. An Ébré 11:32-34, yo ka palé dè sèwten moun ki rété fidèl a Bondyé. Poukwa sa entérésan kè nou pran tan étidyé sé ègzanp-lasa ?

¹⁰ Pòl té ni labitid étidyé Labib. Sé konsa i aprann onpakèt biten asi sèwten sèwvitè a Bondyé ki té fidèl é sa édé-y onlo. Dayè, i di sé krétyen ébré la pran on tan pou réfléchi asi sé bèl ègzanp-lasa (li Ébré 11:32-34). An-nou ègzaminé ègzanp a Wa David. Non sèlman lènmi a-y té ka pèwsékité-y, men anplisdisa, bon bon zanmi a-y vin lènmi èvè-y osi. Lè lapòt Pòl pran tan réfléchi asi ègzanp a nonm fidèl lasa, sa dwèt édé-y onlo toubònman. Nou ké vwè ankijan sa édé-y é nou ké vwè osi, kijan ègzanp a David pé édé-nou a tou an nou.

11. Poukwa David té ka sanm sa i té fèb ? (gadé imaj-la ki anlè po a jounal-la).

¹¹ Golyat sé té on sòlda ki té plen fòs é pou-y, David sé té on kakazwa. Lè i vwè David, i fè jé èvè-y é i voyé mépri ba-y. Sé vré, Golyat té lontan pi ho ki David, i té ni plis zam ki-y é i té ka antrenné-y pou i fè lagè plis ki David osi. David, kanta-y, pa té ni pon èkspéryans adan zafè a lagè, é lè ou té ka gadé-y, ou pa té’é jen di sé goumé i té k’ay goumé. David té ka sanm sa i té fèb pas sé té on jennboug. Men an réyalité, i pa té pé pi fò ki sa pas i té ka konté asi Jéova. É dayè, Jéova ba-y puisans-la i té bizwen la pou i té fin bat èvè Golyat (1 Sam. 17:41-45, 50).

12. Ki dòt éprèv David jwenn ?

¹² David jwenn ondòt difikilté ki té’é pé ba moun lenprésyon kè i té fèb é kè yo pé fè-y nenpòt ki biten. David té ka travay ba Sayil lè Jéova té mété Sayil wa an Izrayèl. É i toujou rété fidèl a wa-lasa. Odépa, Sayil té ka rèspèkté David. Men aprésa, òwgèy koumansé rantré an tchè a Sayil é i vin jalou David. Alò, Sayil koumansé fè-y bon méchansté é i jous éséyé tchouyé-y (1 Sam. 18:6-9, 29 ; 19:9-11).

13. Kijan David réyaji magré tout méchansté Sayil fè-y ?

¹³ Magré tout méchansté Sayil fè-y, David kontinyé rèspèkté wa-la pas sé Bondyé ki té mété-y la (1 Sam. 24:6). É magré tout mové biten Sayil té ka fè, David pa jen fè kòlè èvè Jéova nonplis. Olyé dè sa, i mandé Jéova fòs pou i té pé sa andiré  éprèv difisil lasa (Sòm 18:1 é sa ki maké antèt a sòm-lasa).

14. Pòl touvé-y adan on sitiyasyon ki té ka sanm ta David. Ki sitiyasyon ésa ?

¹⁴ Lapòt Pòl touvé-y adan près menm sitiyasyon ki David. Lènmi a-y té lontan pi fò ki-y. Onlo chèf a rèlijyon é onlo chèf politik té hay-li toubònman. Kifè, souvantfwa, i pran bon kou é yo mété-y lajòl enpé fwa. Anplisdisa, menmjan ki David, Pòl jwenn bon difikilté èvè moun ki té dwètèt zanmi èvè-y nòwmalman. Jous ni moun an lasanblé-la ki vin lènmi èvè-y (2 Kor. 12:11 ; Filip. 3:18). Men Pòl rivé about a tout sé sitiyasyon-lasa. Kijan i fè ? I kontinyé préché menmsi yo té ka pèwsékité-y. I kontinyé enmé frè é sè a-y menmsi yo désèvwa-y. É sa ki pi bèl ankò, sé kè i rété fidèl a Bondyé joustan i mò (2 Tim. 4:8). Si i rivé fè tousa, a pa pas i té ni onlo fòs men sé pas i té ka fè fon asi Jéova.

15. Ki òbjèktif an nou é ka nou pé fè pou atenn-li ?

¹⁵ Ès sa ja rivé-w kè kanmarad-lékòl a-w, kolèg-travay a-w oben fanmi a-w ki pa Témwen jiré-w ou pèwsékité-w ? Ès on moun an lasanblé a-w ja fè-w on biten ki fè-w mal toubònman ? Si sa ja rivé-w, sonjé ègzanp a lapòt Pòl. Pou rivé about a sa ki mal, kontinyé fè sa ki byen (Wom. 12:21). Lè moun ka pèwsékité-w, ou pé’é ay goumé èvè yo kon David fè èvè Golyat ! Men sa ou vé, sé fè Pawòl a Bondyé rantré an lèspri é an tchè a moun ki ka kouté-w. Ou pé rivé fè sa si ou ka sèvi èvè Bib-la pou réponn a kèsyon yo ka pozé-w, si ou ni rèspé pou moun ki ka fè-w méchansté, si ou janti èvè yo, é si ou ka aji byen èvè moun ki lènmi èvè-w (Mat. 5:44 ; 1 Pyè 3:15-17).

16-17. Ka Pòl pa jen oubliyé ?

¹⁶ Avan Pòl té vin disip a Jézi, sé té on jennboug ki pa té ni pon rèspé pou sé krétyen-la é i té ka pèwsékité-yo (Akt 7:58 ; 1 Tim. 1:13). A moman-lasa, non a Pòl sé té Sòl é tèlman i té ka pèwsékité lasanblé krétyèn la, Jézi té oblijé vin limenm a-y pou fè-y arété biten a-y  lasa. Jézi palé ba Pòl étan an syèl-la é i fè-y vin avèg. É pou Pòl té woukoumansé vwè, fò i té ay vwè sé moun-la i té ka pèwsékité la. Èvè onlo imilité, i lésé Ananyas, on disip a Jézi édé-y, é sé grasa sa i woukoumansé vwè (Akt 9:3-9, 17, 18).

¹⁷ Plita, Pòl vin on moun yo té ka rèspèkté onlo adan lasanblé krétyèn la, men i pa jen oubliyé sa Jézi aprann-li lè i té an chimen pou i té ay Damas. I kontinyé aji èvè onlo imilité, é i aksèpté èd a frè é sè a-y dè bonkè. I té ka rèkonnèt kè frè é sè a-y sé té on ‘èd ki té ka ba-y plis fòs’ (Kol. 4:10, 11, nòt).

18. Poukwa nou té’é pé ni dimal a aksèpté èd a lézòt ?

¹⁸ Ka ègzanp a Pòl ka aprann-nou ? Lè nou té toufré konnèt lavérité, nou pa té ni pon pwoblèm pou aksèpté èd a lézòt pas nou té sav kè yo té ni onlo biten a aprann-nou (1 Kor. 3:1, 2). Men é jòdila aprézan ? Si ja ni plizyè lanné nou ka sèvi Jéova é kè nou ni onlo èkspéryans, pétèt kè nou ni dimal a aksèpté èd a lézòt, siwtou si moun-la ki vé édé-nou la batizé dépi mwen lontan ki nou. Men souvantfwa, Jéova ka itilizé frè é sè an nou pou ban-nou plis fòs (Wom. 1:11, 12). Donk, si nou vé Jéova ban-nou fòs, fò-nou aksèpté èd a frè é sè an nou.

19. Poukwa Pòl rivé fè dé biten èstraòwdinè ?

¹⁹ Apré Pòl vin krétyen, i rivé fè onpakèt biten ki té èstraòwdinè toubònman. Poukwa ? Pas i byen konprann kè lè on moun plen fòs, lè i fè onlo lékòl, lè i rich oben lè i sòti adan on granjan dè fanmi sé biten an kouyonnad. I té sav kè sa ki pi enpòwtan sé konté asi Jéova é montré kè ou ni imilité. Alò, an-nou imité Pòl : 1) fò-nou konté asi Jéova, 2) fò-nou pran tan réfléchi asi ègzanp a sé moun fidèl la ki an Bib-la é 3) fò-nou aksèpté èd a frè é sè an nou. Konsa, menmsi nou ka santi-nou fèb, Jéova ké ban-nou fòs-la nou bizwen la !