1. Tera ae e aki maamaa ni kaotia te abotoro Bauro?

E AKI maamaa ni kaotia te abotoro Bauro ae n tabetai e namakina te mamaara. E taekinna bwa “e a tabe ni mamaara” rabwatana, ao e riai ni kakorakoraa ibukini karaoan te bwai ae eti, ao Iehova e aki kaekai ana tataro n taai nako n aron are e kantaningaia. (2Kor. 4:16; 12:7-9; IRom 7:21-23) E boni kaotia naba Bauro ae a iangoia taani kakaitaraa bwa e mamaara. * Ma e aki kariaia aia kabuakaka tabeman ke oini mamaarana bwa e na iangoia iai bwa akea bongana.​—2Kor. 10:10-12, 17, 18.

2. Ni kaineti ma 2 I-Korinto 12:9, 10, tera te reirei ae kakawaki are e karekea Bauro?

² E reke reireiani Bauro ae kakawaki bwa e kona ni korakora te aomata e ngae ngke e mamaara. (Wareka 2 I-Korinto 12:9, 10.) E tuanga Bauro Iehova bwa e ‘kakororaoaki mwaakana irouna ni mamaarana,’ ae nanona bwa Iehova e na angani Bauro te korakora are e kainnanoia ngkai e a mamaara. Ma ti na noria moa bwa e aera ngkai ti aki riai n un n aia taetae ni kamatauninga taani kaaitaraira.

3. E aera bwa ti kona ni kukurei n taian taetae ni kamatauninga?

³ Akea i buakora ae e kukurei n te taetae ni kamatauninga. Ma ngkana a taetae ni kamatauningaira taani kairiribai nakoira ao a maraki nanora iai, e kona ni bwara nanora. (TaeRab.  24:10) Tera ngkanne arora ae riai n iangoi aia taetae ni kamatauninga taani kaaitaraira? N aroni Bauro, ti kona ni “kukurei . . . n taian taetae ni kamatauninga.” (2Kor. 12:10) Bukin tera? Ibukina bwa ngkana a taetae ni kamatauningaira ao ni kabuakakaira aomata, e oti iai bwa bon taan rimwin Iesu ni koaua ngaira. (1Bet. 4:14) E taekinna Iesu bwa a na bwainikirinaki taan rimwina. (Ioa. 15:​18-20) E bon riki anne nakoia Kristian ake n te moan tienture. N taai akanne ao naake iai rikiaia ni Kuriiti, a iangoiia Kristian bwa akea wanawanaia ao a mangori. Ao irouia I-Iutaia, a iangoiia Kristian bwa “e uarereke aia reirei ao a aki kakannato” n aron te abotoro Betero ao Ioane. (Mwa. 4:13) A taraa ni mamaara Kristian ibukina bwa a aki irekereke ma te tautaeka ke te taanga ni buaka, ao a riribaaki irouia aomata.

4. Tera aroia Kristian rimoa ngke a kabuakakaaki irouia taani kakaaitaraia?

⁴ Te koaua bwa a kariaia Kristian akanne bwa a na katoka aia beku ibukin aia kabuakaka taani kakaaitaraia? A bon aki. N te katoto, a iangoia te abotoro Betero ma Ioane bwa bon te kakabwaia bwainikirinaia ibukin irirakin Iesu, ao tataekinan ana reirei. (Mwa. 4:18-21; 5:27-29, 40-42) A bon aki riai n namakina te maamaa taan rimwin Iesu. A bati riki baike a karaoi Kristian n te moan tienture aika nanorinano aikai ibukia aomata, ni kabotauaki ma taani kakaaitaraia. N te katoto, tabeman Kristian a korei bokin te Baibara, ao booki akanne a teimatoa n reke iai buokaia ao aia kantaninga aomata aika mirion ma mirion. E a kairiri ngkai i karawa te Tautaeka n Uea are a tataekinna, ao n te tai ae waekoa e na manga kairiri i aoia aomata nako. (Mat. 24:14) Ni kaitaraan anne, e boni bwaka ao ni mannang te tautaeka ae korakora are bwainikirinia Kristian n te tai anne, ao a a tautaeka ngkai bwa ueea i karawa taan rimwini Kristo akana kakaonimaki ni koaua akanne. Ma a mate taani kakaaitaraia, ao ngkana arona bwa e reke kautakia, a na boni mena i aan te Tautaeka n Uea are a tataekinna Kristian ake a riribaiia ngkoa.​—TaeRab. 5:10.

5. Ni kaineti ma Ioane 15:19, e aera ngkai a kakeaaki bongaia ana aomata Iehova?

⁵ Ni boong aikai, a iangoira tabeman bwa akea bongara ao a kakanikoira n taku bwa ti aki wanawana ao ti mamaara, ngkai ana toro Iehova ngaira. Bukin tera? Ibukina bwa a kaokoro arora ma aomata aika i rarikira. Ti kataia ni bwaina te nanorinano, te nimamannei, ao te ongeaba. Ni kaitaraan anne, a karineaki n te waaki ae ngkai aomata aika kamoamoa, a kainikatonga, ao a karitei. Irarikin anne, ti aki kairekerekeira ma waaki n tautaeka, ke ni karin n te taanga ni buaka n te aba teuana ma teuana. A rangi ni kaokoro arora ma aroia kaain te aonnaba, ngaia are ti a iangoaki bwa ti mangori riki nakoia aomata.​—Wareka Ioane 15:19; IRom 12:2.

6. Tera ae e kakororaoia Iehova rinanoia ana aomata?

⁶ E ngae ngke a iangoia kaain te aonnaba bwa ti mamaara, ma e boni kamanenaira Iehova ibukini karaoani baika rianako. E a kakororaoa ngkai te mwakuri n uarongorongo n te aro ae tuai n nonoraki mai mwaina. Ni boong aikai, a katauraoaki irouia ana toro maekatin aika taabangaki riki rairakia ao tibwaakia n te aonnaba, ao a kamanena te Baibara ni buokiia iai aomata aika bati ni kanakoraoi maiuia. E boni kamoamoaaki Iehova ibukini baika karaoaki aika tamaroa aikai, bwa e kamanenaia aomata aika mamaara bwa a na karaoi baikai. Ma tera arora ngaira n tatabemanira nako? E kona ni kakorakoraira Iehova? Ngkana ngaia anne, tera ae ti riai ni karaoia bwa e aonga n  reke buokara mairouna? Ti na iangoi ngkai baika tenua aika ti kona ni karekei reireiara iai man ana katoto te abotoro Bauro.

7. Tera reireiara teuana man ana katoto Bauro?

⁷ Aei reireiara teuana ae ti karekea man ana katoto Bauro: Tai onimakina oini korakoram ke am konabwai ngkana ko beku ibukin Iehova. N aia taratara aomata, e bon riai Bauro ni kamoamoa ao n onimakinna i bon irouna. E ikawairake i Tareto ae kautun te aono teuana ae mena i aan Rom. Tareto bon te kaawa ae kaubwai ao iai te reirei ae rietata iai. E bubura ana reirei Bauro bwa e reireinaki irouni Kamariera ae aia tia kairiri I-Iutaia temanna, ae te mwaane ae rangi ni karineaki n ana bong. (Mwa. 5:34; 22:3) Ao e a tia naba n riki Bauro bwa te aomata ae kakannato i buakoia I-Iutaia. E taku: “E raka riki arou n te Aro n Iutaia nakoia tabonrorou aika bati n au reeti.” (IKar. 1:13, 14; Mwa. 26:4) Ma e aki onimakinna i bon irouna Bauro.

8. Ni kaineti ma I-Biribi 3:8, tera ana iango Bauro ni baike e kakeai, ao e aera ngkai e “kukurei n taiani mamaara”?

⁸ E kukurei Bauro ni kakeai bwaai nako ake a karika kakannatona i buakoia I-Iutaia. E bon iangoi ngkoa baikanne bwa “maange.” (Wareka I-Biribi 3:8.) E rinanoni kangaanga Bauro ngkai e riki bwa te tia rimwini Kristo. E a riribaaki irouia kaain ana reeti. (Mwa. 23:12-14) E oreaki ao ni karabuutinaki irouia kaain abana aika I-Rom. (Mwa. 16:19-24, 37) E ataia naba Bauro bwa e aki kororaoi ao e kangaanga irouna karaoan ae raoiroi. (IRom 7:21-25) Ma n oneani mwin ae e na kariaia bwa a na katoka ana beku taani kakaitaraa ke baike e kabwaka iai, e “kukurei n taiani mamaara.” Bukin tera? Ibukina bwa n taai ake e mamaara iai, e nora ana ibuobuoki te Atua i nanoni maiuna.​—2Kor. 4:7; 12:10.

9. Ngkana ti namakinna bwa akea arora, tera te iango ae ti riai ni bwainna?

⁹ Ngkana ti kani karekea te korakora mairoun Iehova, ti aki riai n iangoia bwa ti kakawaki ibukini marurungira, ara reirei, ara reeti,  ke kaubwaira. E aki iangoia Iehova bwa ti kakawaki ngkana iai iroura baikanne. Ni koauana, e karako mwaitiia ana aomata te Atua aika “wanawana n aia taratara aomata, ao a aki bati naba aika korakora, ao a aki bati naba bwaanuea.” Ma e rineia Iehova bwa e na kamanenai “bwain te aonnaba aika mamaara.” (1Kor. 1:26, 27) Ngaia are tai iangoia bwa ko aki kona ni beku iroun Iehova ngkana akea arom. Ma iangoa anne bwa te anga ae ko kona iai n nora mwaakan Iehova ni mwamwakuri iroum. N te katoto, ngkana ko a maakuia te koraki ake a kaaitarai am koaua, tataro nakon Iehova bwa e na anganiko te ninikoria bwa ko na tei ibukin am onimaki. (IEbe. 6:19, 20) Ngkana ko kabokorakora ma aorakim ae kakaiaki, butiia Iehova bwa e na anganiko te korakora ae ko kainnanoia bwa ko na katabetabeko ni beku ibukina n aron am konaa. Ni katoatai are ko nora iai ana ibuobuoki Iehova, e na rikirake am onimaki ao ko na korakora riki.

10. E aera bwa ti riai n neneri aia katoto naake a kakaonimaki ake a karakinaki n te Baibara, n aroia naake a taekinaki n Ebera 11:32-34?

¹⁰ E katoatai Bauro n reiakina te Koroboki ae Tabu. E reiakin iai koaua aika bati ao e karekea naba reireiana man rongorongoia naake a taekinaki n Ana Taeka te Atua. Ngke e koroboki nakoia Kristian ake taian Ebera, e tuangia bwa a na iaiangoi aia katoto ana toro Iehova aika bati aika kakaonimaki. (Wareka Ebera 11:32-34.) Iangoa temanna mai buakoia ae te Uea ae Tawita. E rinanon te kakaaitara tiaki tii mairouia taani kairiribai nakoina, ma mairouia naba raoraona tabeman. Ngkana ti nenera ana katoto Tawita, ti na noria iai bwa e kangaa ni karekea korakorana Bauro man iaiangoani maiun Tawita, ao arora ni kona ni kakairi irouni Bauro.

11. E aera ngkai e taraa ni mamaara Tawita? (Nora te taamnei ni moan te maekatin.)

¹¹ E iangoaki Tawita bwa e mamaara iroun te tia buaka ae korakora ae Koria. Ngke e nora Tawita teuaei ao e “ngare ni kakanikoa.” E boni bubura riki rabwatani Koria, a taubobonga ana bwai ni buaka, ao e mwaatai riki n te buaka. N te itera are teuana, e ataei ao n ronnano Tawita ao e taraa n aki taubobonga nakon te buaka. E ngae ngke e taraa ni mamaara Tawita ma e boni korakora. E onimakina Iehova bwa e na kakorakoraa, ao e kataenikaia aiana.​—1Tam. 17:41-45, 50.

12. Tera riki te kangaanga are e kaitaraa Tawita?

¹² E kaaitara Tawita ma te kangaanga riki teuana ae kona ni kamamaraaki iai. E kakaonimaki Tawita ni beku iroun Tauro are e kabiria Iehova bwa uean Iteraera. N te moantai ao te Uea ae Tauro e karinea Tawita. Imwina riki, e a kamoamoa Tauro ao e a bakantang iroun Tawita. E karaoa ae buakaka Tauro nakon Tawita, ao e kataia naba n tiringnga.​—1Tam. 18:6-9, 29; 19:9-11.

13. Tera aron Tawita ni kaineti ma te ribuaka are e karaoia nakoina te Uea ae Tauro?

¹³ E ngae ngke e karaoa ae ribuaka te Uea ae Tauro nakon Tawita, ma e teimatoa Tawita ni karinea te uea ane kabiraki iroun Iehova anne. (1Tam. 24:6) E aki bukina Iehova Tawita ni baike a bubuaka ake e karaoi Tauro. Ma e onimakina Iehova Tawita bwa e na anganna te korakora ae e kainnanoia ibukini kaitaraan te kataaki anne.​—TaiAre. 18:1, atuna.

14. Tera te kangaanga are e kaitaraa te abotoro Bauro ae kuri n titeboo ma are e rinanona Tawita?

¹⁴ E kuri n titeboo ana kangaanga te abotoro Bauro ma Tawita. A rangi ni korakora riki nakoni Bauro taani kairiribai nakoina. A bati taani kairiri aika kakannato n ana bong aika  riribaia. E bati aia tai n tua oreani Bauro ao kamatawarikana. N aron Tawita, e karaoaki naba ae ribuaka nakoni Bauro irouia naake a bon riai n riki bwa raoraona. Iai naba tabeman kaain te ekaretia ake a kaitaraa Bauro. (2Kor. 12:11; IBir. 3:18) Ma e kataenikaiia Bauro naake a kaitaraa. N te aro raa? E teimatoa n uarongorongo n aki ongea te kakaaitara. E teimatoa ni kakaonimaki ni koaua nakoia raona n te onimaki, e ngae ngke a kammaraka nanona. Ao ae kakawaki riki, e teimatoa ni kakaonimaki nakon te Atua ni karokoa tokini maiuna. (2Tim. 4:8) E kona ni karaoi baikai ni kabane, tiaki ibukina bwa e korakora, ma ibukina bwa e onimakina Iehova.

15. Tera tiara ae ti uaiakinna, ao e na kangaa n reke iroura?

¹⁵ Ko kaaitara ma taian taetae ni kamatauninga ke te bwainikirinaki irouia raom n reirei, raom ni mwakuri, ke am utu aika tiaki taani Kakoaua? E a tia ni karaoaki ae ribuaka nakoim iroun te tari temanna? Ngkana ngaia anne, ururinga aia katoto Tawita ao Bauro. Ko kona n teimatoa ni “kataenikaia te buakaka n te raoiroi.” (IRom 12:21) Tiam bwa ko na aki karibua te atibu i ramwan temanna n aron Tawita, ma ko riai ni karina Ana Taeka te Atua n aia iango ao i nanoia aomata. E kona n reke tiam anne ngkana ko onimakina te Baibara ibukini kaekaan aia titiraki aomata, ko bwaina te karinerine ao te akoi nakoia naake a ribuaka nakoim, ao ko kakaraoa ae raoiroi nakoia aomata nako n ikotaki naba ma taani kairiribai nakoim.​—Mat. 5:44; 1Bet. 3:15-17.

16-17. Tera ae e teimatoa n uringnga Bauro?

¹⁶ Imwain rikin te abotoro Bauro bwa te tia rimwini Kristo, bon te mwaane ngaia ae iowawa ae bwainikirinia taan rimwin Iesu. (Mwa. 7:58; 1Tim. 1:13) Bon Iesu ae katoka Bauro ae kinaaki n te tai anne bwa Tauro, bwa e na aki manga bwainikirina te ekaretia ni Kristian. E taetae Iesu nakoni Bauro mai karawa ao e oreia ni kamatakia. Ibukini kaokan ana taratara Bauro, e a riai n ukera buokana mairouia aomata ake e bwabwainikirinia ngkoa. E nanorinano ni butimwaea te ibuobuoki mairoun te tia rimwini Kristo ae Anania, are e a manga kanorabaa Bauro.​—Mwa. 9:3-9, 17, 18.

 ¹⁷ Imwina e a riki Bauro bwa kaain te ekaretia temanna ae rangi ni kinaaki, ma e teimatoa n ururinga reireiana are e anganna Iesu i aon te kawai nako Tamateko. E teimatoa n nanorinano Bauro, ao e kukurei ni butimwaea aia ibuobuoki taari. E taekinia naba taari bwa bon ‘taani buokia aika a kakorakoraa.’​—IKoro. 4:10, 11, kbn.

18. E aera bwa ti kona n tabwara ni butimwaea aia ibuobuoki tabemwaang?

¹⁸ Tera reireiara mairouni Bauro? Ngke ti moan ikoikotaki ma ana aomata Iehova, tao ti kukurei ni butimwaea aia ibuobuoki tabemwaang, ngkai ti ataia bwa ti merimeri n te onimaki ao a bati riki baika ti riai n atai. (1Kor. 3:1, 2) Ma tera arora ngkai? Ngkana ti a maan ni beku ibukin Iehova ao e a bati riki ara atatai, ti a kona n tabwara ni butimwaea te ibuobuoki, moarara riki mairoun te tari ae tuai ni maan n te koaua n ai arora. Ma e ngae n anne, e kamanenaia taari n angiin te tai Iehova bwa a na kakorakoraira. (IRom 1:11, 12) Ti riai ni butimwaea te koaua anne ngkana ti kani karekea te korakora mairoun Iehova.

19. E aera ngkai e nakoraoi ana waaki Bauro?

¹⁹ E karaoi tabeua baika rianako Bauro imwin rikina bwa te Kristian. Bukin tera? Ibukina bwa e ataia ae e aki boto nakoraoin ana waaki i aoni korakorana, ana reirei, kaubwaina, ke kakannatona, ma e boto i aon nanorinanona ao onimakinan Iehova irouna. Ti bia bane ni katotonga Bauro n arora (1) n onimakina Iehova, (2) n reiakini katoto man te Baibara, ao (3) ni butimwaea te ibuobuoki mairouia raora n te onimaki. Ao e na boni kakorakoraira Iehova, e ngae ngke ti namakinna bwa ti mamaara!