1. ¿Kasa nüküjaka achiki Pablo?

NÜKÜJAIN Pablo süshakajüin sütsüin niʼiruku. Kapüleesü nümüin aaʼinraa tü kasa anasükat otta eeshi masoutuinre Jeʼwaa shiʼipajee tü nuchuntakat nümüin (2 Cor. 4:16; 12:7-9; Roma 7:21-23). Nnojoipejeʼe ooʼulaain Pablo suulia aʼyatawaa nümüin Jeʼwaa sünainjee mojuin pütchi nüchiki jee sünainjee müin matchinkai naaʼin * (2 Cor. 10:10-12, 17, 18).

2. ¿Kasa niyaawataka aaʼu Pablo saashin 2 Corinto 12:9, 10?

² Niyaawata aaʼu Pablo eein süpüla sükatchinraain naaʼin wanee wayuu jaʼitashi müin matchinkai naaʼin paala (paashajeʼera 2 Corinto 12:9, 10). Nütüjaa aaʼu Jeʼwaa isain nüchiki Pablo nukuwaʼipa nümüiwaʼa, müshijeseʼe nümüin nümüin: «Tachechereerü paaʼin suʼutpünaa tü müliaa piʼrakat». Wekirajaa palajana sünain tü waaʼinrajatkat süpüla nnojoluinjatüin shapaain maʼin waaʼin mojule pütchi wamüin natuma na kaʼürülakana waya.

3. ¿Jamüsü anainjatka waaʼin mojule pütchi wamüin?

³ Nnojotsü jaralüin acheküin süchiki mojuinjatüin pütchi sümüin. Mojeetpejeʼe maʼin waaʼin shapaale waaʼin sünainjee tü namakat na waneinnua wachiki (Prov. 24:10). ¿Kasakaʼa waaʼinrajatüin mojule pütchi wachiki? Washatüinjatü nukuwaʼipa Pablo. Jamüshijaʼa nia, aneerü naaʼin naashin mayaasüjeʼe mojuin sünüiki wayuu nümüin (2 Cor. 12:10). ¿Jamüsü anainjatka waaʼin mojule pütchi wamüin? Shia süka watüjaain saaʼu waaʼinrüin  tü nüchekakat Jesuu jaʼitashii müliain waya atumawaa jee mojuin pütchi wamüin (1 Ped. 4:14). Nüküjatüjülia Jesuu kanainjeenain saaʼin wayuu na nikirajüinkana (Juan 15:18-20). Shiaʼaya alataka tia namüin na anoujashiikana nükalioʼu Jesuu. Soʼu tia, eepuʼushii waneinnua wayuu maʼaka naaʼin na griegokana, jülüjapuʼukana aaʼin nnojoluin natüjain karaloʼuta na anoujashiikana jee nnojoluin kasain anain apüla naya naashin. Jaʼitakajeʼe na judíokana, jülüjasü naaʼin nüchiki Pedro otta Juan wayuuin matüjainsalii naya karaloʼuta otta wayuuwaʼatain neʼe naya naashin (Aluw. 4:13). Wainma na wayuu jülüjakana aaʼin malain na anoujashiikana süka nnojoluin naya sünainpünaain poliitika, nnojoluin surulaalüin naya otta isain nachiki asoutaa naaʼu.

4. ¿Kasa naaʼinraka na anoujashiikana nükalioʼu Jesuu mayaainjeʼe mojuin pütchi namüin?

⁴ Na anoujashiikana nükalioʼu Jesuu, nnojoishii ooʼulaain suulia aʼyatawaa nümüin Jeʼwaa mayaainjeʼe mojuin pütchi namüin natuma na kaʼürülakana naya. Jamüshijaʼa chi aluwataaushikai Pedro otta Juan, talatüsü maʼin naaʼin mayaainjeʼe müliain naya atumawaa sünainjee noushikajaain süchiirua nukuwaʼipa Jesuu jee nekirajüin sünain tü nikirajakalü anain naya (Aluw. 4:18-21; 5:27-29, 40-42). Nnojotsü eein wanee kasa mojuinjatka anainjee naaʼin naya anoujashiikana, süka jamüin, naaʼinrüin kasa anasü süpüleerua wayuu. Nnojotsü naaʼinrüin tia na kaʼürülakana naya. Watta naalii na wayuu akaalinjünakana jee na aʼatapakana kasa anasü sutuma tü pütchi nashajakat naya anoujashiikana. Tü aluwatawaa naküjakalü achiki paala, aikaleʼennüitpa shia chaa iipünaa otta aneerü sukuwaʼipa wayuu sutuma yaa saaʼu tü Mmakat (Mat. 24:14). Ajaʼttapejeʼe sukuwaʼipa naluwataaya na müliapuʼukana atuma na anoujashii kepiapuʼukana chaa Roma. Aluwataashii nümaa Jesuu chaa iipünaa naya anoujashiikana. Akaajasaʼa na kaʼürülapuʼukana naya, ajaʼttüshii outuin. Süsoʼiraalejeʼe naaʼin soʼu wanee kaʼi, aluwataaneena aaʼu naya natuma na anoujashii naʼürülapuʼukana (Alat. Map. 5:10).

5. ¿Jamüshii meeʼerapalaka waya sutuma wayuu saashin Juan 15:19?

⁵ Maaʼulu yaa, watta maʼin naalii na wayuu mojukana anüiki wamüin jee kemeeʼerainpalaka waya sünainjee matüjain waya karaloʼuta jee sünainjee isain wachiki waneirua kasa. ¿Jamüsüche sülataka tia wamüin? Shia süka nnojoluin washatüin nakuwaʼipapala na wayuu manoujainsaliikana. Kamalainsü sümüin wayuu yaletayaale naaʼin wanee wayuu, nuʼwaataale suluʼu nukuwaʼipa otta eʼrüire nia wayumüin. Nnojoliipejeʼe müin waya, wachajaain sukuwaʼipa süpüla nnojoluin yaletüin waaʼin, süpüla anamiain waya otta süpüla jüüjüüin waya. Nnojoishii waya sünainpünaain poliitika otta wayoutuin süchiki surulaalüin waya. Sünainjee tia, maaliinsalii waya napüla na manoujainsaliikana (paashajeʼera Juan 15:19; Roma 12:2).

6. ¿Kasa nuuntaka Jeʼwaa nakajee na aʼyataashiikana nümüin?

⁶ Mayaainjeʼe nnojoluin anain tü jülüjakat saaʼin wayuu nachiki na aʼyataashiikana nümüin Jeʼwaa, wainma tü kasa nuuntakat nakajee. Naaʼinrüin tia süpüla nikeraajüin tü keeʼireekat naaʼin. Jamüsüjaʼa maaʼulu yaa, aküjünüsü pütchi sainküin mmakat süpüshuaʼa, nnojotsü eeirüin wanee kasa eekai müin aka saaʼin tia. Watta saalii tü karaloʼuta akumajünakat suluʼu wainma anüikii otta eitajünakat sainküin mmakat. Na aʼyataashiikana nümüin Jeʼwaa, nakaalinjain na wayuukana sükajee tü sümakat tü Wiwüliakat süpüla nanoutuin nakuwaʼipa. Niapejeʼe Jeʼwaa nountuin atuma tia, jama nükaalinjain naya süpüla nountuin naaʼinrüin tia aʼyatawaakat. ¿Eesüche süpüla nükatchinrüin waaʼin Jeʼwaa waneʼewai wakua? ¿Kasa waaʼinrajatka süpüla nükatchinrüin waaʼin? Wekirajaajeerü anain apünüinsü kasa watüjaka sünainjee tü naaʼinrakat chi aluwataaushikai Pablo.

7. ¿Kasa watüjaka sünainjee nukuwaʼipa Pablo?

⁷ Wanee kasa watüjaka sünainjee nukuwaʼipa Pablo, shia nnojoluinjatüin weʼitaain waaʼin wanainjiraa jee sünain tü watüjakalü apüleerua waʼyataapa nümüin Jeʼwaa. Wainma tü kasa eekat süpüla nuʼwaataain aluʼu Pablo. Jamüshijaʼa nia, miyoʼushi suluʼu tü mmakat Tarso, wanee mma eʼnnaajünaka maʼin süka natüjain maʼin ekirajaa na chejeʼewaliikana chaʼayaa. Atüjashi maʼin karaloʼuta Pablo otta ekirajünüshi nia nutuma wanee wayuu kojutukai maʼin namüin na judíokana, Gamaliel nünülia chia wayuukai (Aluw. 5:34; 22:3). Kojutupuʼushi maʼin Pablo namüin na judíokana, anuu nünüiki: «Alanaʼaleeshia maʼi sünain kachiiruain maʼi taaʼin sünain tashatüin nakuaippa na tatuushi judíokana noulia wainma na tapüshi wanaawakana amaa touyase» (Gal. 1:13, 14; Aluw. 26:4). Nnojotpejeʼe niʼitaain naaʼin Pablo nünainjiraa.

8. (1) ¿Jamüsü nünüiki Pablo süchiki tü kasa nuuʼulaakat saashin Filipos 3:8? (2) ¿Jamüsü anaka naaʼin Pablo mayaainjeʼe niʼrüin müliaa?

⁸ Nnojotsü mojuin naaʼin Pablo sünainjee nuuʼulaain waneirua kasa kojutukat maʼin sümüin wayuu, müsü tia nümüin maʼaka saaʼin shiʼyarüla mma (paashajeʼera Filipos 3:8). Wainma müliaa niʼrakat Pablo sünainjee nuushikajaain süchiirua nukuwaʼipa Jesuu. Aʼürülaanüshi nia natuma na judíokana wanaa nümaa (Aluw. 23:12-14). Aʼyaajünüshi nia otta püreesashi nia natuma na romaanokana (Aluw. 16:19-24, 37). Mojusü naaʼin Pablo süka niyaawatüin saaʼu nüleʼeruʼuin tü kaainjalaakat otta isawalin nüchiki naaʼinrüin kasa eekai lotuin akuwaʼipa (Roma 7:21-25). Nnojoipejeʼe nia ooʼulaain suulia oushikajawaa süchiirua nukuwaʼipa Jesuu sünainjee tü kasa mojusü alatakat nümüin jee sünainjee mojuin pütchi nüchiki. Anasü naaʼin Pablo süka nükaalinjünüin nutuma Jeʼwaa soʼu niʼrüin müliaa (2 Cor. 4:7; 12:10).

9. ¿Kasa waaʼinrajatka kapüleere wamüin waʼyataain nümüin Jeʼwaa?

⁹ Nükaalinjeere waya Jeʼwaa, nnojoluinjatü jülüjain waaʼin kojutuin waya nümüin sünainjee katchin waya, watüjain karaloʼuta, jalejeʼewaliin waya jee shiale sünainjee washirüin waya. Nnojotsü shiain tia jaloulin anainjee waya nümüin Jeʼwaa. «Nnojoliishii wainmain jaʼaka eekai atüjain saashin wayuu, eekai kojutüin sütüma wayuu, otta eekai nachooin washinnuu»,  müsü tü Wiwüliakat nachiki waneinnua aʼyataalii nümüin Jeʼwaa, süka jamüin, nüneeküin Jeʼwaa «na wayuu ‹¿Kasakai neʼraajaka aaʼu?› münakana amüin» (1 Cor. 1:26, 27). Kapüleere wamüin aʼyatawaa nümüin Jeʼwaa, wachunta kaalinwaa nümüin süpüla wekeraajüin tü waʼyataainkat nümüin. Jamüshiijaʼa meeʼeraparale waya sünainjee tü wanoujakalü anain, wachunta kaalinwaa nümüin süpüla wasoutuin saaʼu wanoula (Éf. 6:19, 20). Müliale waaʼin saalinjee ayuulin waya, wachunta nümüin Jeʼwaa nükatchinraiwa waaʼin süpüla ayatüinya waʼyataain nümüin. Weʼrüle nükaalinjain waya, akooʼomüinraajeerü wanoula.

10. ¿Jamüshii wekirajaainjanaka nachiki waneinnua wayuu aküjünakana achiki suluʼu Hebreokana 11:32-34?

¹⁰ Naashajeʼerawalin Pablo waneepia tü Ashajuushikat otta atüjashi nia sünainjee tü naashajeʼerakalü nachiki na aʼyataashiikana nümüin Jeʼwaa. Wanaa sümaa nüshajüin Pablo tü karaloʼuta namüinjatkat na hebreokana, nüküjain nachiki waneinnua anoujashii namaiwajana (paashajeʼera Hebreokana 11:32-34). Noʼutku naya anoujashiikana nia David, nnojoishi neʼe nia müliain natuma na kaʼürülakana nia, müliashi nia natuma waneinnua wayuu aleewapuʼukana nümaa. Wekirajaa nüchiki David süpüla wayaawatüin saaʼu jamüin sükatchinraaka naaʼin Pablo sünainjee nikirajaain nüchiki otta wekirajaa süchiki tü waaʼinrajatkat süpüla washatüin nukuwaʼipa Pablo.

11. ¿Jamüshi nnojoika nüntapünaain David nünain Goliat saashin wayuu? (Piirakaa sümüin tü ayaakuaa sünainkat süta tü rewiisütakat).

¹¹ Nnojoishi antapünaain David nünain Goliat, eesüjaʼa müle tü jülüjakat saaʼin wayuu nüchiki David. Jamüshijaʼa wanaa sümaa niʼnnüin nutuma Goliat, «nümülaja aaʼinchi nia», jama miyoʼusenuuin maʼin Goliat, yapain nia süpüla tü atkawaakat jee yalayalain naaʼin sünain atkawaa. Akaajasaʼa David jintüi neʼe otta isasü nüchiki atkawaa. Yalayalapejeʼe naaʼin süka niʼitaain naaʼin nünain Jeʼwaa. Akaalinjünüshi nia nutuma Jeʼwaa süpüla niyamülüinjachin Goliat (1 Sam. 17:41-45, 50).

12. ¿Jarat tü wanee kasa müliakalü atuma naaʼin David?

¹² Wainma tü kasa müliakalü atuma naaʼin David otta müshi matchinkai naaʼin sutuma tia. Waneepiashi nia aʼyataain nümüin Saúl, chi nüneekajalakai Jeʼwaa süpüla aluwatawaa saaʼu Israel. Kojutushi paala David nümüin Saúl, shiasaʼa mapa, yaletajaasü naaʼin Saúl otta achunjashi nia naaʼujee David. Müliasü naaʼin nutuma otta nuʼutee aaʼinchi David (1 Sam. 18:6-9, 29; 19:9-11).

13. ¿Kasa naaʼinraka David mayaainjeʼe müliain nia nutuma Saúl?

¹³ Mayaainjeʼe müliain David nutuma chi aluwataaikai Saúl, ayatüshi kojutuin Saúl nutuma David süka nüneekajalain nia Jeʼwaa süpüla aluwatawaa (1 Sam. 24:6). Nnojotsü mojuin nünüiki David nümüin Jeʼwaa sünainjee tü kasa mojusü naaʼinrakat Saúl nümüin. Niʼitaain naaʼin David sünain nükaalinjüneechin nutuma Jeʼwaa süpüla nüchecherüin naaʼin soʼunnaa tü müliaa niʼrakat (Sal. 18:1, suʼttianainjee).

14. ¿Jamüsü müliaka naaʼin Pablo maʼaka müliain naaʼin David?

¹⁴ Müliasü naaʼin Pablo maʼaka müliain naaʼin David. Jamüshijaʼa nia, aʼürülaanüshi natuma waneinnua wayuu kojutukana maʼin sümüin wayuu, eeshi niʼyaajünüle jee püreesale nia atumawaa. Müliasü naaʼin Pablo natuma waneinnua wayuu aleewapuʼukana nümaa maʼaka müliain naaʼin David natuma na naʼaleewainkana, jaʼitakajeʼe noʼutku na anoujashiikana, mojutusai Pablo namüin (2 Cor. 12:11; Filip. 3:18, TNM). Mayaainjeʼe müin tia, ayatüshia Pablo sünain aküjaa pütchi, nnojoishi kasakainjachin natuma na kaʼürülakana nia. Ayatüshiʼiya alin na nuwalayuukana nüpüla mayaainjeʼe naaʼinrüin kasa mojuka atuma naaʼin  Pablo. Aʼyataapejeʼe waneepia Pablo nümüin Jeʼwaa outaleepa nia (2 Tim. 4:8). Watta saalii tü kasa nuuntakat naaʼinrüin Pablo süka niʼitaain naaʼin nünain Jeʼwaa, nnojotsü sükajeejatüin nütchin nümüiwaʼa.

15. (1) ¿Kasa tü waaʼinrajatkat? (2) ¿Kasa waaʼinrajatka süpüla wountuin tia?

¹⁵ ¿Airuʼutsüche pütchi pümüin jee müliasüche paaʼin natuma na koleejiajiraakana pümaa, na aʼyataajiraakana pümaa jee na püpüshi nnojotkana anoujain nünain Jeʼwaa? ¿Aainjünüsüche wanee kasa mojusü pümüin nutuma wanee wawala? Sülatüle pümüin tia, soto paaʼin tü naaʼinrakat David otta müshia Pablo. Jamüshiijaʼa naya, nayamülüin tü kasa mojusükat sükajee naaʼinrüin kasa anasü waneepia (Roma 12:21). Nnojoliipejeʼe peʼipaain waya namaa na wayuukana maʼaka peʼipaain David nümaa Goliat. Tü waaʼinrajatkat shia watanaleein naaʼin na wayuukana sükajee tü sümakat tü Wiwüliakat nüchiki Jeʼwaa. Wounteerü waaʼinrüin tia waküjale pütchi namüin na wayuukana sükajee tü Wiwüliakat, kojutule naya wamüin otta kamaneere waya namüin mayaainjeʼe müliain waya natuma. Waaʼinrüinjatü tia sümüin wayuu maʼleekalia, jaʼitakajeʼe namüin na kaʼürülakana waya (Mat. 5:44; 1 Ped. 3:15-17).

16, 17. ¿Kasa tü nnojotkat motuin naaʼin Pablo?

¹⁶ Süpülapünaa nunoujain Pablo nünain Jesuu, Saulopuʼu nünülia, wayuu eʼrüipuʼu wayumüin nia otta müliashii maʼin na anoujashiikana nutuma (Aluw. 7:58; 1 Tim. 1:13). Achiaanüshi nia nutuma Jesuu sünainjee müliain maʼin na anoujashiikana nutuma. Aashajaashi Jesuu nümaa iipünaajee otta moʼusai Pablo nutuma. Süpüla koʼuinjachin nüchikuaʼa Pablo, achuntuinjachi nia kaalinwaa namüin na wayuu müliapuʼukana nutuma. Nuuʼulaapejeʼe Pablo nükaalinjünüin nutuma wanee anoujashi, Ananías nünülia, koʼushi Pablo nutuma (Aluw. 9:3-9, 17, 18).

¹⁷ Mapa, kojutushi Pablo namüin na anoujashiikana, nnojotpejeʼe motuin naaʼin tü alatakat wanaa sümaa naashajaain Jesuu nümüin suluʼu tü wopu chaʼwatkat Damasco. Nnojotsüjeseʼe yaletayaain naaʼin Pablo otta nuuʼulaain nükaalinjünüin natuma na nuwalayuukana. «Namüliajüin taya na tawalayuukana», müsü nünüiki (Col. 4:10, 11).

18. ¿Jamüsü kapüleʼewaika wamüin wooʼulaain nakaalinjain waya na waneinnua?

 ¹⁸ ¿Kasa watüjaka sünainjee nukuwaʼipa Pablo? Jamüshiijaʼa woʼttaiwaʼaya sünain anoujaa nünain Jeʼwaa, wacheka achikit wakaalinjünüin natuma na waneinnua süka wayaawatüin saaʼu wattain saalii tü kasa isakat wachiki (1 Cor. 3:1, 2). ¿Jama maaʼulu? ¿Wacheka achikitche wakaalinjünüin natuma na waneinnua? Kakaliainnale waya sünain aʼyatawaa nümüin Jeʼwaa jee wainmale tü kasa waʼyataakalü anain nümüin, eesü kapüleere wamüin wooʼulaain wakaalinjünüin natuma na waneinnua, shialeekajaʼa nükaalinjeere waya wanee wawala eekai jekechin sünain anoujaa. Nnojotpejeʼe wayoutajatüin süchiki tia, jama nüchecherüin waaʼin Jeʼwaa nakajee na wawalayuukana (Roma 1:11, 12). Süpüla nükatchinrüin waaʼin Jeʼwaa, choʼujaasü wooʼulaain nakaalinjain waya na wawalayuukana.

19. ¿Jamüsü wainmaka tü kasa nuuntakat Pablo?

¹⁹ Wainma tü kasa nuuntakat Pablo nunoujapa nünain Jesuu. Niyaawata aaʼu nnojoluin nuuntuin tia sükajee nukuwaʼipa neʼe nümüiwaʼa, nnojoluin sükajeejatüin nütüjain karaloʼuta, washirüin nia jee sünainjee jalejeʼewalin nia. Nuuntuin tia süka nnojoluin yaletüin naaʼin otta süka niʼitaain naaʼin nünain Jeʼwaa. Washata nukuwaʼipa Pablo, weʼitaa maʼin waaʼin nünain Jeʼwaa, wekirajaa nachiki na wayuu saashajaakana achiki tü Wiwüliakat otta wooʼulaa nakaalinjain waya na wawalayuukana. Waaʼinrüle tia, nükatchinreerü waaʼin Jeʼwaa jaʼitasü müin matchinkai waaʼin.