1. ¿Pablokwe dre niebare jabätä?

APÓSTOL PABLO ie ja nämäne ruin di nekä ruäre ngwane niebare kwe. Ngrabare kwe jatani kite niken ngwarbe niebare kwe. Nämäne ja di ngwen kukwe kwin nuainkäre aune nämäne kukwe ruäre orasionte Jehovai ye ñaka mika nämäne nemen bare kräke niara tö nämäne erere niebare kwe (2 Cor. 4:16; 12:7-9; Rom. 7:21-23). Pablo ni ja mikaka ngwarbe ye nitre ja mikaka niara rüere nämäne nierebätä. * Akwa kukwe ngwarbe nie nämänebätä aune kukwe nämäne nainte ie ye ñaka tuanimetre kwe nütüre niara ye ni ngwarbe (2 Cor. 10:10-12, 17, 18).

2. ¿2 Corintios 12:9, 10 tä mike gare erere kukwe meden ütiäte namani gare Pablo ie?

² Kukwe ütiäte namani gare Pablo ie: jata nemen ruin di ñakare nie ngwane, erametre ni raba ja ngwen dite (ñäkädre 2 Corintios 12:9, 10 yebätä). “Ni bobre di ñakare, yebtä abko ti di kri tuata” Jehovakwe niebare Pablo ie ngwane, ye abokän niarakwe ja di biain Pablo ie meden gäräbare kwe. Nitre ja mikaka ni rüere tä ñäke tare nie ye ñobätä nikwe ñaka töbikadre ye ani mike gare käne jai.

3. ¿Ñäkäta tare nie ye ñobätä nikwe käi ngwandre juto jabätä?

³ Ñäkädre tare nie ye ñaka tä nemen kwin ni kräke. Akwa nitre  ja mikaka ni rüere tä ñäke nie yebätä nikwe ja töi mikadre krubäte ngwane, ye raba ni ngwen di nekä (Prov. 24:10). ¿Nitre ja mikaka ni rüere tä ñäke tare nie ye nikwe mikadre tuin ño jai? Ni raba ja ngwen Pablo erere aune ñäkäta tare nie ye käi ngwen juto jabätä (2 Cor. 12:10). ¿Ñobätä? Ñobätä ñan aune ñäkädre tare nie aune ja mikata ni rüere ye tä mike gare ni abokän ja tötikaka metre Kristokwe (1 Ped. 4:14). Nitre ja tötikaka Jesukwe ye rüere ja mikai niebare kwe (Juan 15:18-20). Aune ye erere namani bare siklo kena ye ngwane. Ñodre, nitre käkwe ja töi mikani nüne nitre griegore ye kwrere, ye käkwe nitre kristiano mikani tuin jai ni töi ñakare o ngwarbe ye erere. Aune niebare apóstol Pedro aune Juanbätä erere, nitre kristiano ye ñan ja tötikabare aune bobre, ye erere namani tuin nitre judío ie (Hech. 4:13). Nitre kristiano ye ngwarbe namani tuin nitre kwati ie, ñobätä ñan aune ñaka nämäne ja mike política yete aune di ñaka nämäne rükäre aune ñaka nämäne ütiäte nitre kräke.

4. ¿Kukwe ngwarbe niebare nitre kristiano siklo kena rüere ngwane niaratre dre nuainbare?

⁴ Nitre kristiano kenabätä kukwe ngwarbe nie nämäne ye ñaka tuanimetre kwetre nemen kwekebe. Ñodre, apóstol Pablo aune Juan ye ja tötikaka Jesukwe aune nämänentre blite kukwe diribare Jesukwe yebätä, ye köböire ja mikai niaratre rüere ye nämäne ütiäte kräketre (Hech. 4:18-21; 5:27-29, 40-42). Nitre kristiano siklo kena ye ie kukwe ñaka nämäne rabakäre ja gaire. Nitre kristiano ñaka nämäne ütiäte nitre kräke, akwa niaratre kukwe kwin nuainbare bäri ni kä tibienbätä kräke nitre ja mikaka niaratre rüere ye ngwä. Bämikakäre, tärä Bibliabätä tikani kwetre Jehová diebiti ye täbe tödeka bien nitre kwati aune dimike. Aune nitre kristiano nämäne Gobran driere ye niena gobrane nengwane, akwa ye ñan aibe, ñakare aune köböra ni kä tibienbätä gobraine (Mat. 24:14, TNM). Akwa juta dite Roma nämäne gobrane käkwe ja mikani niaratre rüere ye ñan niena tuintari. Ne madakäre, nitre kristiano ye niena reire kä kwinbiti, akwa nitre käkwe ja mikani niaratre rüere ye krütanina; aune nane gaikröta ngwane, nitre kristiano nämäne Gobran driere ye käkwe nitre ye gobrandi (Apoc. 5:10).

5. ¿Juan 15:19 tä niere erere ñobätä ni ngwarbe kä nebätä tä ni mike tuin ngwarbe jai?

⁵ Kä nengwane, nitre ruäre ñan ni mike ütiäte jai, tätre ni kötaire aune tätre ni mike ngwarbe jai. ¿Ñobätä? Ñobätä ñan aune ni ñaka töbike nitre nünanka ni bäre ye erere. Nire bike kri, rubun aune dokwä ribi ye tuin kwin ni ngwarbe kä nebätä ie. Akwa nita ja di ngwen ja mikakäre töi bobre, töi jäme aune ja mikakäre täte. Ne madakäre, ni ñaka ja mike política yete aune ñaka ja mike juto rükäre juta keteiti kräke. Ni ñaka ja ngwen ni ngwarbe kä nebätä erere, yebätä ni tuin ñaka ütiäte ietre (ñäkädre Juan 15:19 yebätä; Rom. 12:2).

6. ¿Jehovata dre nuainne juta kwe yebiti?

⁶ Nitre ngwarbe kä nebätä tä kukwe niere nibätä yebiti ta, Jehová tä ni mike kukwe ütiäte krubäte nuainne. Ñodre, kukwe drieta krubäte ñaka nuainbare jire erere. Tärä aune täräkwata kwitata aune döräita bäri kä jökräbiti tibien ye nitre Ngöbö mikaka täte tä sribere aune Bibliabiti nita nitre kwati krubäte dimike nünankäre bäri kwin. Aune kukwe jökrä ye tä nemen bare Jehová köböire, niara tä nitre tuin ngwarbe yebiti kukwe ütiäte krubäte ye nuainne. ¿Akwa dre nie raba ni itire itirebätä? ¿Jehová raba ni dimike ja ngwankäre dite? Ye erere akräke, ¿nikwe dre nuaindre ne kwe ni dimikadre kwe? Kukwe ketamä raba nemen gare nie Pablobätä ye ani mike gare jai.

7. ¿Kukwe meden kena raba nemen gare nie Pablobätä?

⁷ Kukwe kena raba nemen gare Pablobätä  nie ye abokän nita Jehová mike täte ngwane ñaka tö ngwandre ja di nikwe ie o kukwe nuain gare nie yei. Nitre ngwarbe kä nebätä tä töbike erere, kukwe nämäne Pablo ie bikakäre kri aune tö ngwankäre akwle jai. Ririabare Tarso, ye juta keteiti kä Roma yekänti, juta yete jondron nämäne krubäte aune kwela krikri ütiäte nämäne yete. Pablo tötikabare kwin, ñobätä ñan aune Gamaliel ni judío ji ngwanka ütiäte kä ye näire käkwe niara tötikani (Hech. 5:34; 22:3). Aune kä ruäre ngwane, Pablo namani ütiäte siba nitre judío mada mada ye ngätäite. Niebare kwe: “Ti mräkätre israelita ti näire, ye kräke ti näma Ngöbö mike täte bäri metre, aisete ti mika näma bäri ütiäte nitre israelita krikrikwe” (Gál. 1:13, 14; Hech. 26:4). Akwa kukwe ye ñaka Pablo mikani tö ngwen akwle jai.

8. a) ¿Filipenses 3:8 tä niere erere Pablo jondron tuanimetre ye mikani tuin ño jai? b) ¿Pablo di ñakare ngwane kä nämäne jutobätä ye ñobätä niebare kwe?

⁸ Kukwe nämäne Pablo mike tuin ütiäte ni ngwarbe kä nebätä okwäbiti ye tuanimetre kwe. Kukwe ye “jondron kwata kitakata ye kwrere” nükani gare Pablo ie (ñäkädre Filipenses 3:8 yebätä). * Pablo ja mikani ja tötikaka Jesukwe yebätä ja tuani kwe kukwe tare ben. Juta kwe arabe brukwä namani kräke (Hech. 23:12-14). Nitre romano nünanka niara käite käkwe metani aune kitani ngite (Hech. 16:19-24, 37). Ne madakäre, niara ñaka raba kukwe jökrä nuainne namani gare ie ye namani tare kräke (Rom. 7:21-25). Akwa niara rüe o kukwe nämäne kisete ye ñaka tuanimetre kwe ja ketebätä. Ñakare aune, niebare kwe: ‘Ti di ñakare ye käi nuäre tibätä’. ¿Ñobätä? Ñobätä ñan aune ja nämäne nemen ruin di nekä ie ngwane Ngöbö die nämäne dimike nämäne tuin ie (2 Cor. 4:7; 12:10).

9. ¿Kukwe meden tä ni mike tuin di ñakare ye nikwe mikadre tuin ño jai?

⁹ Jehovakwe ni dimikadre ie ni tö ngwane, ni ñaka rabadre nütüre ni die, nikwe ja tötikabare, nita nüne ño o jondron nikwe ye köböire ni ütiäte krubäte. Ye ñaka tä ni mike ütiäte  Jehová ngwärekri. Juta Jehovakwe te ‘ni töbätä kä nebätä, ye kwrere ni ñaka töbätä ni kwati kräke. Ni kwati ñaka di krikri gobran kwrere. Aune ni kwati ñan därebare ni ütiäte krikri mräkäkri’. Ñakare aune, ‘ni di ñakare kä nebätä ni kwrere abokän Ngöbökwe dianinkä’ sribikäre (1 Cor. 1:26, 27). Akwa, jondron tä nitre ngwarbe kä nebätä mike tuin ütiäte ye ñaka nikwe ngwane, nikwe ñaka jondron ye tuanemetre ja ketebätä Jehová mikakäre täte, ñakare aune Jehová raba ni dimike ño ye mikadre ñärärä. Ñodre, nita kukwe mike täte yebätä ni iti ni mikadre töbike aune kä jürä rabadre nibätä ngwane, nikwe oradre Jehovai ne kwe ni mikadre dite kwe blitakäre kukwe mikata täte nikwe yebätä (Efes. 6:19, 20). Bren tare ben nita ja tuin ngwane, nikwe ja di kärädre Jehovai ne kwe ja di biandre kwe nie sribi meden erere nuainkäre niara kräke. Batire batire niarata ni dimike rabai gare nie ngwane, ni jatai tödeke bäri ie aune ni jatai bäri dite.

10. ¿Ñobätä nikwe ja tötikadre nitre Ngöbö mikaka täte käkwe kukwe kwin bämikani abokän kädekateta Hebreos 11:32-34 yebätä?

¹⁰ Pablo nämäne käre ja tötike kukwe Ngöbökwe yebätä, ye köböire kukwe namani gare krubäte ie. Akwa nitre Jehová mikaka täte yebätä ja tötikani kwe ye köböire kukwe ütiäte namani gare ie ja töi kräke arato. Pablo tärä tikani nitre hebreo ie ngwane nitre töi mikani kwe ja tötike kukwe kwin bämikani nitre Ngöbö mikaka täte metre yebätä (ñäkädre Hebreos 11:32-34 yebätä). Ani töbike rei David yebätä. Nitre ja mikaka niara rüere yebe ja tuani kwe, akwa ja ketamukotre kwe ja mikani niara rüere yebe ja tuani kwe arato. Ani blite bäri niarabätä, ye köböire rabai gare nie David kukwe kwin bämikani yebätä Pablo töbikataribare ye käkwe dimikani aune ni raba ja ngwen ño Pablo erere rabai gare nie.

11. ¿Ñobätä David namani tuin di ñakare? (Üai kena täräkwatabätä mikadre ñärärä).

¹¹ Goliat ni rükä dite ie David jutuabare ngwane, namani tuin di ñakare aune “yakrä ie”. Goliat ye ni kri krubäte aune jondron rükäre nämäne kwe aune nämäne kitani kwin rükäre. David ye monso bati, kukwe ñaka nämäne gare krubäte ie aune ñaka nämäne juto biare rükäre namani tuin, akwa nämäne tö ngwen Jehovai. Ye köböire namani tuin di ñakare, akwa mrä mada rüe ganainbare kwe (1 Sam. 17:41-45, 50).

12. ¿David ja tuani kukwe meden ben?

¹² David ja tuani kukwe mada ben ye käkwe ngwani di nekä raba ruin nie. Niara nämäne sribire metre Saúl rei kädekani Jehovakwe juta Israel ye kräke. Kenanbe Saúl nämäne mike ütiäte jai. Akwa ja känenkäre namani bike kri yebätä jatani mokrere David ben. Jatani kukwe ñaka kwin nuainnebätä aune tö namani kämikai (1 Sam. 18:6-9, 29; 19:9-11).

13. ¿Saúl kukwe ñaka kwin nuainbare Davidbätä ye ngwane David dre nuainbare?

¹³ Saúl kukwe ñaka kwin nuainbare Davidbätä, akwa yebiti ta Davidkwe mikani ütiäte jai, ñobätä ñan aune Jehovakwe kädekani reire ye nämäne gare ie (1 Sam. 24:6). Aune ñaka ngite kitani kwe Jehovabiti kukwe käme nuainbare Saulkwe yebätä. Ñakare aune, Jehovakwe ja di biain ie ja tuakäre kukwe tare yebe ye ie tö ngwani kwe (Sal. 18:1 y encabezamiento).

14. ¿Pablokwe ja tuani kukwe ben bäsi David erere?

¹⁴ Kukwe ben Davidkwe ja tuani ye bäsi kwrere ben apóstol Pablo ja tuani. Nitre ja mikaka Pablo rüere ye bäri dite niara kräke. Nitre ji ngwanka krikri mätä nämänebätä ye ngätäite niara nämäne, bä kabre nuain mananbare tare aune kitani ngite. Aune David erere, ja ketamukotre kwe käkwe nuainbare  tare raba ruin nie. Nitre ruäre konkrekasionte käkwe ja mikani niara rüere (2 Cor. 12:11; Filip. 3:18, TNM). Akwa ñaka ja tuanimetre ganane kwe nitre ja mikaka niara rüere ie. Kukwe driebare jankunu kwe ja mikani rüere yebiti ta. Ja mräkätre ruäre niara mikani ulire, akwa yebiti ta ja ngwani metre kwe ietre. Aune bäri ütiäte, ja ngwani metre kwe Ngöböi nememe krütani ye ngwane (2 Tim. 4:8). Kukwe ñaka nuäre ben ja tuani kwe, akwa gananbare kwe ñobätä ñan aune tö ngwani kwe Jehovai aune ñaka ja di kwe ie.

15. ¿Ni töita dre nuainbätä aune ni raba nuainne ño?

¹⁵ ¿Nitre nänkä kwelate nibe, sribi muko nikwe o ni mräkätre ñaka testiko kätä ñäke tare nie aune ja mike ni rüere? ¿Ja mräkä konkrekasionte käkwe kukwe ñaka kwin nuainbare nibätä? Ye erere ngwane, kukwe kwin bämikani Davidkwe aune Pablokwe ye nikwe ngwandre törö jai. Nikwe kukwe käme ganaindre jankunu kukwe kwin yebiti (Rom. 12:21). Davidkwe Goliat täkäbare kübente jäbiti, akwa ye erere ni ñaka tö nuain nitrebätä Ngöbö Kukwei yebiti, ñakare aune ni tö nitre töi kwin dimikai Biblia yebiti ne kwe matadre töite aune brukwäte. ¿Ni raba nuainne ño? Kukwe mikadre gare nitre ie Bibliabiti, nire tä kukwe ñaka kwin nuainne nibätä ye mikadre ütiäte jai, kukwe kwin nuaindre kräketre aune ni jökrä kräke, ni rüe ye kräke arato (Mat. 5:44; 1 Ped. 3:15-17).

16, 17. ¿Pablo dre ñaka käi kwitaninkä jabiti?

¹⁶ Apóstol Pablo ja mikadre ja tötikaka Kristokwe ye känenkri, kädeka nämäne Saulo, niara ye monso bati ñaka ni mada mike ütiäte jai nämäne näin kisere nitre ja tötikaka Jesukwe jiebiti (Hech. 7:58; 1 Tim. 1:13). Akwa Jesús ara käkwe ñäkäbare ie kä kwinbiti, kä dikaninte okwäte aune ñaka tuanimetre kwe näin jankunu konkrekasion ye jiebiti. Kä rabadreta tuin Pablo ie yekäre, ja dimikamana kwe nitre ngwan nämäne ja tare nike kwe yei. Ja töi mikani bobre kwe aune ni ja tötikaka Jesukwe kädeka nämäne Ananías käkwe dimikadre ye kani ngäbiti kwe, ye käkwe kä mikaninta tuin ie (Hech. 9:3-9, 17, 18).

 ¹⁷ Ja känenkäre, Pablo namani ütiäte konkrekasion kristiana yete, akwa Jesukwe dre niebare ie ja töi kräke nikani Damasco kokwäre ngwane ye ñaka käi kwitaninkä kwe jabiti. Pablo ja töi mikani jankunu bobre aune ja mräkätre käkwe niara dimikadre ye kani kwin kwe ietre. Nitre ye käkwe niara dimikani aune mikani dite krubäte niebare kwe (Col. 4:10, 11).

18. ¿Ni madakwe ni dimikadre ye ñobätä ni ñaka töta nemen kai ngäbiti?

¹⁸ ¿Kukwe bämikani Pablokwe ye tä dre driere nie? Ni jatani ja tötike Bibliabätä ngwane, nitre mada ni dimikadre ye ni nämäne kain ngäbiti, ñobätä ñan aune nämäne gare nie ni nämäne monso kia erere kukwe ja üairebiti aune nämäne ja kitadre krubäte nie (1 Cor. 3:1, 2). ¿Akwa nengwane? Mekerabe nita Jehová mike täte aune kukwe niena gare krubäte nie ngwane, ni madakwe ni dimikadre ye ni ñaka törbadre kai ngäbiti raba ruin nie. Metrere nitre kä jämi rairebiti Ngöbö mikabätä täte törbadre ni dimikai ye ngwane. Akwa Jehovata ja mräkätre yebiti ni dimike (Rom. 1:11, 12). Ye medenbätä Jehovakwe ni dimikadre ie ni tö ngwane, ja mräkätre ni dimikadre ye nikwe kadre ngäbiti.

19. ¿Ñobätä kukwe ütiäte krubäte namani bare Pablo ie?

¹⁹ Pablo ja mikani kristiano ye bitikäre, kukwe ütiäte krubäte namani bare ie. ¿Ñobätä? Ñobätä ñan aune niara die, ja tötikabare kwe aune jondron nämäne kwe ye ñan köböire kukwe kwin tä nemen nikwe nükani gare ie, ñakare aune ja töi mikadre bobre aune tö ngwandre Jehovai ye köböire kukwe kwin rabai nikwe ye nükani gare ie. Ye medenbätä, Pablo erere nikwe tö ngwandre Jehovai, nitre Ngöbö mikaka täte kirabe yebätä kukwe ütiäte mikadre gare jai ja töi kräke aune ja mräkätre ni dimikadre ye nikwe kadre ngäbiti. Ja rabai ruin di nekä nie ngwane Jehovakwe ni mikai dite.